មេរៀនទី ១១: ការប្រទានសិរីរុងរឿង
ការប្រទានសិរីរុងរឿងគឺជាដំណាក់កាលចុងក្រោយបង្អស់នៃផែនការរបស់ព្រះជាម្ចាស់សម្រាប់ប្រជារាស្ត្របស់ទ្រង់។ ហេតុដូច្នេះ វាគឺជាអ្វីដែលព្រះពរខាងវិញ្ញាណដទៃទៀតនាំឆ្ពោះទៅកាន់ ហើយជាគោលបំណង ចុងក្រោយបង្អស់នៃជីវិតរបស់គ្រីស្ទបរិស័ទ។
តើអ្វីជាការប្រទានសិរីរុងរឿង?
ពាក្យ “សិរីរុងរឿង” (δόξα) មានន័យថា ភាពរុងរឿង កិត្តិយស ឧត្តមភាព ភាពល្អឥតខ្ចោះ។ ហេតុដូច្នេះ ដើម្បីផ្តល់សិរីរុងរឿងទៅនរណាម្នាក់គឺត្រូវផ្តល់ទាំងកិត្តិយស និងលើកតម្កើងឡើងពួកគេ។ យើងថ្វាយសីរីរុងរឿងទៅកាន់ព្រះជាម្ចាស់តាមរយៈការទទួលស្គាល់ភាពអស្ចារ្យរបស់ទ្រង់ ហើយបន្ទាប់មក ផ្តល់កិត្តិយសព្រមទាំងលើកទ្រង់ឡើង តាមរយៈការសរសើរ និងបម្រើ។ ព្រះជាម្ចាស់ផ្តល់សិរីល្អដល់យើងដោយធ្វើឱ្យយើងបានគ្រប់លក្ខណ៍ដើម្បីឱ្យយើងសមនឹងស្ថានសួគ៌។
តាំងពីមុនពេលវេលាចាប់ផ្តើមឡើង ព្រះជាម្ចាស់ទ្រង់មានផែនការផ្តល់សិរីល្អដល់យើង។ ទ្រង់បានរៀបចំទុកសេចក្ដីដ៏អស្ចារ្យសម្រាប់យើងលើសពីអ្វីដែលចិត្តនឹកមិនដែលដល់!
១ កូរិនថូស ២:៧-៩
គឺនិយាយតាមតែប្រាជ្ញានៃព្រះវិញ ជាសេចក្ដីអាថ៌កំបាំងដ៏លាក់ទុក ដែលព្រះបានគិតគូ តាំងពីមុនអស់ទាំងកល្ប សំរាប់ជាសិរីល្អដល់យើងរាល់គ្នា គ្មានចៅហ្វាយណាក្នុងលោកីយនេះ បានស្គាល់សេចក្ដីអាថ៌កំបាំងនោះឡើយ បើបានស្គាល់ នោះគេមិនបានឆ្កាងព្រះអម្ចាស់ដ៏មានសិរីទេ ដូចមានសេចក្ដីចែងទុកមកថា «សេចក្ដីដែលភ្នែកមិនដែលឃើញ ត្រចៀកមិនដែលឮ ហើយចិត្តនឹកមិនដែលដល់ គឺសេចក្ដីនោះឯងដែលព្រះបានរៀបចំទុក សំរាប់ពួកអ្នកដែលស្រឡាញ់ទ្រង់»
ឥឡូវនេះ ព្រះអង្គហៅយើងមកក្នុងនគរ ហើយក្នុងសិរីល្អរបស់ទ្រង់។
១ ថេស្សាឡូនិក ២:១២
ហើយទាំងធ្វើបន្ទាល់ឲ្យអ្នករាល់គ្នាបានដើរយ៉ាងគួរនឹងព្រះ ដែលទ្រង់ហៅអ្នករាល់គ្នាមកក្នុងនគរ ហើយក្នុងសិរីល្អរបស់ទ្រង់។
តើអ្វីជាសិរីល្អនេះ ដែលព្រះជាម្ចាស់បានគិតគូ តាំងពីមុនអស់ទាំងកល្ប ដែលទ្រង់ត្រាស់ហៅយើង មកឥឡូវនេះ?
១ យ៉ូហាន ៣:២
ពួកស្ងួនភ្ងាអើយ ឥឡូវនេះ យើងរាល់គ្នាជាកូនព្រះហើយ តែដែលយើងរាល់គ្នានឹងបានទៅ ជាយ៉ាងណាទៀត នោះមិនទាន់សំដែងមកនៅឡើយ ប៉ុន្តែ យើងដឹងថា កាលណាទ្រង់លេចមក នោះយើងនឹងបានដូចជាទ្រង់ ដ្បិតដែលទ្រង់យ៉ាងណា នោះយើងនឹងឃើញទ្រង់យ៉ាងនោះឯង
សីរីរុងរឿងដែលព្រះបានគិតគូ សម្រាប់យើងគឺថា យើងនឹងបានដូចជាព្រះយេស៊ូវ។ ការប្រទានសិរីរុងរឿងគឺជាភាពដ៏ល្អឥតខ្ចោះជាទីបំផុតរបស់អ្នកជឿដែលនឹងកើតឡើងនៅពេលព្រះយេស៊ូវលេចមក។ យើងនឹងឃើញព្រះអង្គមានលក្ខណៈជាអង្គទ្រង់ ហើយយើងនឹងបានដូចជាទ្រង់ដែរ។
២ កូរិនថូស ៣:១៨
ហើយយើងរាល់គ្នាទាំងអស់ ដែលកំពុងតែរំពឹងមើលសិរីល្អព្រះអម្ចាស់ ទាំងមុខទទេ ដូចជាឆ្លុះមើលទ្រង់ក្នុងកញ្ចក់ យើងកំពុងតែផ្លាស់ប្រែទៅ ឲ្យដូចជារូបឆ្លុះនោះឯង ពីសិរីល្អទៅដល់សិរីល្អ គឺដោយសារព្រះអម្ចាស់ដ៏ជាព្រះវិញ្ញាណ។
ពួកយើងកំពុងត្រូវបានផ្លាស់ប្រែឲ្យមានសិរីរុងរឿង ដូចជាព្រះយេស៊ូវ។ នៅពេលដែលយើងកំពុងតែ រំពឹងមើលសិរីល្អរបស់ទ្រង់ យើងកំពុងតែផ្លាស់ប្រែទៅឲ្យដូចជារូបអង្គរបស់ទ្រង់។ បន្ទាប់មក នៅពេលទ្រង់យាងមកវិញជាលើកទីពីរ ជាពេលដែលយើងមើលឃើញទ្រង់យ៉ាងល្អឥតខ្ចោះ យើងនឹងបានដូចជាទ្រង់។ ការនេះតែងតែជាផែនការរបស់ព្រះជាម្ចាស់ជានិច្ច។ ព្រះជាម្ចាស់បានបង្កើត មនុស្សឲ្យដូចជារូបអង្គទ្រង់ ដើម្បីឆ្លុះបញ្ចាំងពីលក្ខណៈរបស់ទ្រង់នៅលើផែនដី (លោកុប្បត្តិ ១:២៦-២៧)។ រូបអង្គនោះត្រូវបានខូចខាតដោយសារអំពើបាបរបស់យើង ប៉ុន្តែឥឡូវនេះយើងត្រូវបានបំផ្លាស់បំប្រែឱ្យក្លាយ ទៅជារូបអង្គរបស់ព្រះជាម្ចាស់ម្តងទៀត។
រ៉ូម ៨:២៩-៣០
ដ្បិតអ្នកណាដែលទ្រង់បានស្គាល់ជាមុន នោះទ្រង់ក៏ដំរូវទុកជាមុន ឲ្យបានត្រឡប់ដូចជារូបអង្គនៃព្រះរាជបុត្រាទ្រង់ ដើម្បីឲ្យព្រះរាជបុត្រាបានធ្វើជាបងច្បងគេក្នុងពួកបងប្អូនជាច្រើន ឯពួកអ្នកដែលទ្រង់បានដំរូវទុកជាមុន នោះទ្រង់ក៏ហៅ ហើយពួកអ្នកដែលទ្រង់បានហៅ នោះទ្រង់ក៏រាប់ទុកជាសុចរិត ហើយពួកអ្នកដែលទ្រង់បានរាប់ជាសុចរិត នោះទ្រង់ក៏បានដំកើងឡើងដែរ។
នេះគឺជាសេចក្តីពិតដ៏គួរឱ្យកត់សម្គាល់មួយ។ សូមគិតពីព្រះយេស៊ូវ។ ចូរគិតពីរលក្ខណៈគ្រប់លក្ខណ៍ និងមានប្រាជ្ញា ហើយតើទ្រង់មានព្រះចេស្តាខ្លាំងប៉ុណ្ណា។ សូមគិតពីរបៀបដែលទ្រង់ប្រោសអស់ទាំង ជំងឺរោគាគ្រប់ប្រភេទឲ្យបានជា និងរបៀបដែលទ្រង់បង្គាប់ខ្យល់ និងរលកហើយវាស្តាប់តាមទ្រង់។ សូមគិតពីព្រះហឫទ័យក្តួលអាណិតរបស់ទ្រង់ចំពោះមនុស្ស។ សូមគិតពីប្រាជ្ញា ដែលទ្រង់បានបង្ហាញ ជាចម្លើយទៅកាន់សំណួរដែលមនុស្សសួរទ្រង់។ សូមគិតពីការស្តាប់បង្គាប់ និងសេចក្តីស្រឡាញ់ របស់ទ្រង់ចំពោះព្រះបិតាទ្រង់។
ឥឡូវនេះ សូមគិតពីអ្នកជឿដែលអ្នកស្គាល់។ បន្ទាប់មកចូរស្រមៃថានៅថ្ងៃមួយពួកគេនឹងមានលក្ខណៈ ដូចជាព្រះយេស៊ូវដែរ! ពួកគេនឹងបានល្អឥតខ្ចោះ មានប្រាជ្ញា ហើយមានចេស្តា ព្រមទាំង…សិរីរុងរឿង! គ្មានអ្នកគ្រីស្ទានធម្មតានោះទេ។ យើងទាំងអស់គ្នាកំពុងត្រូវបានបំប្លែងដោយអំណាចនៃព្រះទៅជា ការបង្កើតដ៏រុងរឿងនៅដែលនឹងឆ្លុះបញ្ចាំងពីសិរីល្អរបស់ព្រះជារៀងរហូត!
ឥឡូវនេះ ចូរគិតពីខ្លួនរបស់អ្នក។ នេះគឺជាអ្វីដែលព្រះជាម្ចាស់មានផែនការសម្រាប់អ្នកចាប់តាំងពីមុន ការបង្កើតលោកីយមកម្លេះ។ ផែនការរបស់ទ្រង់តែងតែថាអ្នកនឹងទទួលបានសិរីរុងរឿង ដូចព្រះយេស៊ូវ ជារៀងរហូត!
មានលក្ខណៈដូចជាព្រះយេស៊ូវ
សាវ័កពេត្រុសពណ៌នាអំពីការប្រទានសិរីរុងរឿងរបស់យើងដោយព្រះជាម្ចាស់ តាមរបៀបដ៏គួរឱ្យកត់សម្គាល់៖ គាត់និយាយថាយើង "បានចំណែកជានិស្ស័យនៃព្រះ”។
២ ពេត្រុស ១:២-៤
សូមឲ្យព្រះគុណ នឹងសេចក្ដីសុខសាន្ត បានចំរើនដល់អ្នករាល់គ្នាឲ្យបានស្គាល់ព្រះ នឹងព្រះយេស៊ូវ ជាព្រះអម្ចាស់នៃយើង ដ្បិតព្រះចេស្តានៃព្រះ បានផ្តល់ឲ្យយើងរាល់គ្នាមានគ្រប់របស់ទាំងអស់ ខាងឯជីវិត នឹងសេចក្ដីគោរពប្រតិបត្តិដល់ព្រះ ដោយយើងបានស្គាល់ព្រះអង្គ ដែលទ្រង់ហៅយើងរាល់គ្នាមក ដោយសារសិរីល្អ នឹងសគុណរបស់ទ្រង់ ដែលដោយសារសេចក្ដីទាំងនោះ ទ្រង់បានប្រទានសេចក្ដីសន្យាដ៏ធំបំផុត ហើយវិសេសផង មកយើងរាល់គ្នា ដើម្បីឲ្យអ្នករាល់គ្នាបានចំណែកជានិស្ស័យនៃព្រះ ដោយសារសេចក្ដីសន្យានោះឯង ដោយបានរួចពីសេចក្ដីពុករលួយនៅក្នុងលោកីយនេះដែលកើតអំពីសេចក្ដីប៉ងប្រាថ្នា
តើការដែលយើង "បានចំណែកជានិស្ស័យនៃព្រះ” មានន័យដូចម្តេច? វាមិនមែនមានន័យថា យើងក្លាយទៅជាព្រះនោះទេ ប៉ុន្តែវាមានន័យថាយើងទទួលមរតកនូវនិស្ស័យថ្មីមួយ មកពីព្រះយេស៊ូវ។ ដោយសារភាពជាមនុស្ស យើងទទួលបានមរតកនៃនិស្ស័យជាមនុស្សមកពីអ័ដាំ ហើយនិស្ស័យជាមនុស្ស ត្រូវបានធ្លាក់ចុះ និងពោរពេញដោយអំពើបាប។ ដោយសារការប្រទានសិរីរុងរឿង យើងនឹងទទួលនិស្ស័ យសិរីរុងរឿងថ្មីមកពីព្រះយេស៊ូវ ហើយនឹងមិនធ្វើបាបទៀតឡើយ។ យើងនឹងមានលក្ខណៈល្អឥតខ្ចោះ ដូចជាទ្រង់ដែរ។ ការនេះចាំបាច់ណាស់ដើម្បីឱ្យយើងអាចរស់នៅលើផែនដីថ្មី ដែលនឹងមានលក្ខណៈ ល្អឥតខ្ចោះ។
ដូចដែលយើងបានឃើញ ការញែកជាបរិសុទ្ធគឺជាដំណើរការនៃការលូតលាស់នៅក្នុងភាពបរិសុទ្ធ តាមរយៈព្រះចេស្តានៃព្រះវិញ្ញាណបរិសុទ្ធនៅក្នុងយើង។ ការប្រទានសិរីរុងរឿងគឺជាលទ្ធផលចុងក្រោយ។ ការតម្កើងឡើងគឺជាដកចេញពីអំពើបាបទាំងអស់ចេញពីជីវិតប្រជារាស្ត្ររបស់ព្រះជាម្ចាស់។ នៅពេល ព្រះយេស៊ូវយាងត្រឡប់មកវិញជាលើកទីពីរ សិរីរុងរឿងនៃព្រះជាម្ចាស់នឹងត្រូវបានសម្រេចបាននៅក្នុង យើង។ យើងនឹងទទួល “បានរួចពីសេចក្ដីពុករលួយនៅក្នុងលោកីយនេះដែលកើតអំពីសេចក្ដីប៉ងប្រាថ្នា” ជំនួសឱ្យការជាប់មានបន្ទុកជាមួយនឹងនិស្ស័យអំពើបាប (ពីអ័ដាំ) តទៅទៀត យើងនឹងត្រូវបានផ្លាស់ប្រែចូលទៅក្នុងសិរីរុងរឿងជាមួយនឹងនិស្ស័យជាទេវភាព (ពីព្រះយេស៊ូវ)។ បន្ទាប់មកយើងនឹងរីករាយជាមួយការរួមសម្ព័ន្ធវង្សដ៏បរិសុទ្ធជាមួយព្រះជាម្ចាស់ជារៀងរហូត!
ព្រះជាម្ចាស់បានចាប់ផ្តើមធ្វើការនៅក្នុងអ្នកដែលនឹងធ្វើឱ្យអ្នកមានលក្ខណៈដូចជាព្រះយេស៊ូវអស់កល្បជារៀងរហូតតទៅ! ពិភាក្សា៖ តើអ្វីជាការឆ្លើយតបរបស់អ្នកចំពោះការពិតដែលថា ព្រះជាម្ចាស់នឹងធ្វើឱ្យអ្នកទៅជាល្អឥតខ្ចោះដូចជាព្រះយេស៊ូវជារៀងរហូត?
ផ្នែកទី២៖ ប្រវត្តិនៃការប្រទានសិរីរុងរឿង
យើងអាចដឹងបន្ថែមពីផែនការរបស់ព្រះជាម្ចាស់សម្រាប់ការប្រទានសិរីរុងរឿងរបស់យើងតាមរយៈការសិក្សាពីរបៀបដែលព្រះពរនេះបន្តិចម្តងៗបង្ហាញចេញមកតាមរយៈព្រះគម្ពីរទាំងស្រុង។
អ័ដាំដំបូងបង្អស់
ព្រះជាម្ចាស់មានព្រះហឫទ័យផ្តល់សិរីរុងរឿងដល់សាសន៍របស់មនុស្សជាតិតាំងពីដើមរៀងមក។ ព្រះបានបង្កើតមនុស្សឲ្យដូចជារូបអង្គទ្រង់។
លោកុប្បត្តិ ១:២៦-២៧
ទ្រង់ក៏មានបន្ទូលថា ចូរយើងធ្វើមនុស្សឲ្យដូចជារូបយើង ឲ្យមានភាពដូចយើង ហើយឲ្យមានអំណាចលើត្រីសមុទ្រ សត្វហើរលើអាកាស នឹងសត្វជើង៤ដែលនៅលើផែនដីទាំងមូល ព្រមទាំងសត្វលូនវារដែលវារនៅលើផែនដីផង ទ្រង់ក៏បង្កើតមនុស្សឲ្យដូចរូបអង្គទ្រង់ គឺបានបង្កើតគេឲ្យចំនឹងរូបអង្គទ្រង់នោះឯង ក៏បង្កើតគេឡើងជាប្រុសជាស្រី
ដើម្បីឲ្យដូចជារូបអង្គរបស់ព្រះជាម្ចាស់គឺត្រូវឆ្លុះបញ្ចាំងពីសិរីរុងរឿងរបស់ទ្រង់។ យ៉ាងណាមិញ មនុស្សដំបូងត្រូវបានល្បួងឱ្យទៅជាមិនស្តាប់បង្គាប់ព្រះជាម្ចាស់។
លោកុប្បត្តិ ៣:១-៥
ឯពស់ជាសត្វចេះឧបាយកលលើសជាងអស់ទាំងសត្វព្រៃ ដែលព្រះយេហូវ៉ាដ៏ជាព្រះទ្រង់បានបង្កើត វានិយាយទៅកាន់ស្ត្រីថា តើព្រះមានបន្ទូលហាមមិនឲ្យអ្នកបរិភោគផ្លែឈើណានៅក្នុងសួនច្បារមែនឬ ស្ត្រីឆ្លើយតបថា យើងបរិភោគអស់ទាំងផ្លែឈើនៅក្នុងសួនច្បារបាន តែត្រង់ដើមឈើ១ ដែលនៅ កណ្តាលសួនច្បារនោះ ព្រះទ្រង់មានបន្ទូលថា កុំឲ្យបរិភោគផ្លែនោះឡើយ ថែមទាំងកុំឲ្យពាល់ប៉ះផង ក្រែងលោស្លាប់ រួចពស់ក៏និយាយទៅស្ត្រីថា អ្នកមិនស្លាប់ជាពិតមែនទេ ដ្បិតព្រះទ្រង់ជ្រាបថា នៅថ្ងៃណាដែលអ្នកបរិភោគ នោះភ្នែកអ្នកនឹងបានភ្លឺឡើង ហើយអ្នកនឹងបានដូចជាព្រះដែរ ព្រមទាំងដឹងការខុសត្រូវផង
អំពើបាបរបស់អ័ដាំ និងអេវ៉ាគឺស្វែងរកសិរីរុងរឿងសម្រាប់ខ្លួនឯង ដាច់ចេញពីព្រះជាម្ចាស់។ ពួកគេចង់ក្លាយទៅជា “ដូចជាព្រះ” ប៉ុន្តែពួកគេត្រូវបានបោកបញ្ឆោតពីរបៀបសម្រេចបានអំពីរឿងនេះ។ យើងមិនអាចក្លាយទៅជាដូចព្រះជាម្ចាស់តាមរយៈការសង្ស័យលើព្រះបន្ទូលរបស់ទ្រង់ ហើយមិនស្តាប់ បង្គាប់តាមបញ្ញតិទ្រង់នោះទេ។ យើងក្លាយទៅជាដូចព្រះជាម្ចាស់តាមរយៈការចុះចូលចំពោះទ្រង់ ហើយអនុញ្ញាតិឱ្យព្រះអង្គបង្កើតនូវភាពបរិសុទ្ធនៅក្នុងយើងតាមរយៈព្រះចេស្តានៃព្រះវិញ្ញាណដ៏បរិសុទ្ធ។
រ៉ូម ២:៧
ជាជីវិតអស់កល្បជានិច្ច ដល់ពួកអ្នកដែលរកសិរីល្អ កេរ្តិ៍ឈ្មោះ នឹងសេចក្ដីមិនពុករលួយ ដោយគេកាន់ខ្ជាប់ក្នុងការល្អ
វាជាការល្អក្នុងការស្វែងរកសិរីរុងរឿង ប៉ុន្តែយើងមិនត្រូវស្វែងរកសិរីរុងរឿងសម្រាប់ខ្លួនឯង ដាច់ចេញពីព្រះជាម្ចាស់ ដូចជាការដែលអ័ដាំ និងអេវ៉ាធ្វើនោះទេ។ តាមរយៈការមិនស្តាប់បង្គាប់ អ័ដាំ និងអេវ៉ាមិនបានក្លាយទៅជាដូចព្រះជាម្ចាស់នោះទេ។ ផ្ទុយទៅវិញ ពួកកេបានចម្លងតាមសាតាំង ដែលជាអ្នកបះបោរដំបូងដែលប្រឆាំងនឹងព្រះជាម្ចាស់។ តាមរយៈការព្យាយាមដើម្បីសម្រេចឱ្យបាននូវ សិរីរុងរឿងរបៀបនេះ អ័ដាំបាននាំយកអំពើបាបចូលមកកាន់ពិភពលោកនេះ។
រ៉ូម ៥:១២
ដូច្នេះ ដែលបាបបានចូលមកក្នុងលោកីយ ដោយសារមនុស្សតែម្នាក់ ហើយក៏មានសេចក្ដីស្លាប់ចូលមកដែរ ដោយសារអំពើបាបនោះជាយ៉ាងណា នោះសេចក្ដីស្លាប់បានឆ្លងរាលដាល ដល់មនុស្សគ្រប់គ្នាយ៉ាងនោះដែរ ដ្បិតគ្រប់គ្នាបានធ្វើបាបហើយ
រ៉ូម ៣:២៣
ពីព្រោះគ្រប់គ្នាបានធ្វើបាប ហើយខ្វះមិនដល់សិរីល្អនៃព្រះ
ជាធម្មតាយើងគិតពីអំពើបាបថា ជាការខ្វះមិនដល់ស្តង់ដារនៃភាពសុចរិត (ដូចជាតាមក្រិត្យវិន័យជាដើម)។ ប៉ុន្តែនៅក្នុងខគម្ពីរនេះគឺថា យើងមើលឃើញថាវាមានច្រើនលើសពីនោះទៅទៀត។ ការធ្វើបាបគឺជាការ "ខ្វះមិនដល់សិរីល្អនៃព្រះ"។ ដូចយើងបានឃើញ ពាក្យជាភាសាក្រិកសម្រាប់អំពើបាបមានន័យថា ខ្វះមិនដល់គោលដៅ។ គោលដៅគឺសិរីល្អ។ សិរីល្អនៃព្រះគឺជាអ្វីដែលមនុស្សគ្រប់គ្នាខ្វះមិនដល់ ហើយសិរីល្អនៃព្រះគឺជាអ្វីដែលព្រះយេស៊ូវបានយាងមកដើម្បីផ្តល់មកឱ្យយើង។
ព្រះយេស៊ូវ - អ័ដាំចុងក្រោយ
គ្រប់មនុស្សទាំងអស់ត្រូវបានជាប់ជាឈ្លើយចំពោះអំពើបាបដោយសារតែអ័ដាំដំបូងបង្អស់។ យ៉ាងណាមិញ ព្រះយេស៊ូវ (ដែលជា “អ័រដាំចុងក្រោយ”) បានយាងមកកាន់ផែនដីនេះ បានរស់នៅក្នុងជីវិតដ៏ល្អឥតខ្ចោះ សុគត ហើយត្រូវបានរស់ឡើងវិញ និងបានលើកឡើងទៅស្ថានសួគ៌វិញដែលជាកន្លែងទ្រង់ ត្រូវបានតម្កើងឡើង។ នៅពេលដែលទ្រង់គង់នៅលើផែនដីនេះនៅឡើយមនុស្សបានឃើញសិរីរុងរឿងរ បស់ព្រះអង្គ។
យ៉ូហាន ១:១៤
ព្រះបន្ទូលក៏ត្រឡប់ជាសាច់ឈាម ហើយបានស្នាក់នៅជាមួយនឹងយើងរាល់គ្នា យើងរាល់គ្នាបានឃើញសិរីល្អទ្រង់ គឺជាសិរីល្អនៃព្រះរាជបុត្រាតែ១ ដែលមកពីព្រះវរបិតា មានពេញជាព្រះគុណ នឹងសេចក្ដីពិត
មានរបៀបចំនួនបីយ៉ាងដែលសិរីរុងរឿងរបស់ទ្រង់ត្រូវបានបង្ហាញចេញមក។ ទីមួយមានការអស្ចារ្យ ដែលទ្រង់បានធ្វើដូច្នោះដើម្បីបង្ហាញពីសិទ្ធិអំណាចរបស់ព្រះអង្គលើស្នាព្រះហស្តទាំងអស់។ នៅពេលទ្រង់ ធ្វើការអស្ចារ្យ ទ្រង់បាន ‘សំដែងសិរីល្អរបស់ទ្រង់’ (យ៉ូហាន ២:១១)។ ទីពីរ មានសិរីរុងរឿងខាងសីលធម៌របស់ទ្រង់ ដែលជាជីវិត និងចរិកលក្ខណៈដ៏ល្អឥតខ្ចោះរបស់ទ្រង់។ គ្មានកំហុស ឬការបន្ទោសអ្វីសោះនៅក្នុងទ្រង់។ ទ្រង់គ្រប់លក្ខណ៍ក្នុងគ្រប់ទាំងផ្លូវរបស់ទ្រង់ ហើយរាល់គុណធម៌ត្រូវបានបង្ហាញចេញមកនៅក្នុងជីវិតរបស់ទ្រង់។ ទីបី មានពន្លឺចែងចាំងនៃសីរីរុងរឿង របស់ព្រះអង្គដែលបានកើតឡើងនៅត្រង់ចំណុចនៃការផ្លាស់ប្រែរបស់ទ្រង់។ សូមអានអំពីរឿងនេះនៅក្នុង ម៉ាថាយ ១៧:១-៨
ព្រះយេស៊ូវបាន “ផ្លាស់ប្រែ” (μετεμορφώθη) នៅនឹងមុខគេ។ ពាក្យនៅក្នុងភាសាក្រិចប្រាប់យើងថា មានការផ្លាស់ប្តូរពីរូបរាងរបស់ព្រះយេស៊ូវ ដែលបណ្តាលមកពីពន្លឺចែងចាំងពីខាងក្នុងរបស់ព្រះអង្គ។ ការដែលព្រះអង្គយាងមកផែនដីនេះ ក្នុងភាពជាមនុស្ស ព្រះយេស៊ូវបានលះបង់សិរីល្អរបស់ទ្រង់រួចទៅហើយ។ (ភីលីព ២:៥-៧)។ ពេលនេះ សិរីល្អព្រះអង្គ ត្រូវបានបើកសំដែងដែលបានជះពន្លឺនៅក្នុងរូបកាយសាច់ឈាម របស់ព្រះអង្គ។ “ព្រះភក្ត្រទ្រង់បានភ្លឺដូចព្រះអាទិត្យ” (ម៉ាថាយ ១៧:២)។ ពន្លឺដ៏ភ្លឺគឺជាលក្ខណៈរបស់ព្រះ ហើយព្រះយេស៊ូវ “គឺទ្រង់ជារស្មីភ្លឺមកពីសិរីល្អនៃព្រះ ហើយជារូបភាពនៃអង្គទ្រង់ ទាំងទ្រទ្រង់គ្រប់របស់ទាំងអស់” (ហេព្រើរ ១:៣)។ ជាលើកំបូងបំផុតដែលពួកសិស្ស ទាំងនេះបានឃើញព្រះយេស៊ូវនៅក្នុងលក្ខណៈពិតរបស់ព្រះអង្គ (សិរីល្អដ៏ពិតរបស់ព្រះអង្គ ព្រះចេស្តា និងអំណាចជាស្តេចរបស់ព្រះអង្គ) ដែលជាលក្ខណៈរបស់ព្រះអង្គ តាំងពីមុនដែល ពិភពលោកត្រូវបានបង្កើតមក។
សូមស្តាប់ពីអ្វីដែលព្រះយេស៊ូវបានអធិស្ឋាននៅយប់មុនពេលគេឆ្កាងទ្រង់។
យ៉ូហាន ១៧:៥
ឥឡូវនេះ ឱព្រះវរបិតាអើយ សូមដំកើងទូលបង្គំឡើងជាមួយនឹងទ្រង់ផង ដោយសិរីល្អដែលទូលបង្គំមានជាមួយនឹងទ្រង់ ក្នុងកាលដែលលោកីយមិនទាន់បានកើតនៅឡើយ។
យ៉ូហាន ១៧:២២
ឯសិរីល្អដែលទ្រង់ប្រទានមកទូលបង្គំ នោះទូលបង្គំបានឲ្យដល់គេហើយ ដើម្បីឲ្យគេបានរួមគ្នាតែមួយ ដូចជាយើងក៏រួមតែមួយដែរ
ព្រះយេស៊ូវមានសិរីរុងរឿងតាំងពីមុនកំណើតលោកីយមកម្លេះ។ ទ្រង់បានបង្ហាញសិរីរុងរឿងរបស់ទ្រង់ ទៅកាន់សាក្សីនៅលើផែនដីនេះ។ ហើយទ្រង់ប្រទានឱ្សិរីរុងរឿងដល់សិស្សរបស់ទ្រង់។ មុនពេលដែលទ្រង់អាចធ្វើនេះបាន វាចាំបាច់ដែលព្រះយេស៊ូវត្រូវរងទុក្ខនៅលើឈើឆ្កាង ដើម្បីនាំយើងមកក្នុងសិរីល្អបាន។
ហេប្រឺ ២:១០
ដ្បិតឯព្រះ ដែលគ្រប់របស់ទាំងអស់សំរាប់ទ្រង់ ហើយដោយសារទ្រង់ កាលទ្រង់ចង់នាំកូនជាច្រើនមកក្នុងសិរីល្អ នោះគួរគប្បីឲ្យទ្រង់បានធ្វើឲ្យមេនៃសេចក្ដីសង្គ្រោះគេ បានគ្រប់លក្ខណ៍ ដោយរងទុក្ខលំបាក
ព្រះយេស៊ូវរងទុក្ខជំនួសយើងដើម្បីសង្គ្រោះយើង និងនាំយើងមកក្នុងសិរីល្អ។ ទ្រង់បានយាងមកមិនមែនគ្រាន់តែសង្គ្រោះមនុស្សជាតិប៉ុណ្ណោះទេ ប៉ុន្តែដើម្បីបំផ្លាស់បំប្រែវិញ។ ទ្រង់បានចែករំលែកមនុស្សជាតិរបស់យើងពេញលេញ ហើយបានសុគតសម្រាប់យើងដើម្បីឱ្យយើងអាចចែករំលែកសិរីរុងរឿងរបស់ទ្រង់ពេញលេញបាន។ បន្ទាប់មកទ្រង់បានធ្វើការនេះរួចរាល់ ព្រះអង្គបានយាងទៅកាន់សិរីរុងរឿងរបស់ទ្រង់នៅស្ថានសួគ៌វិញ។
ម៉ាកុស ១៦:១៩
ដូច្នេះ ក្រោយដែលព្រះអម្ចាស់បានមានបន្ទូលនឹងគេរួចហើយ នោះព្រះវរបិតាបានទទួលទ្រង់ឡើងទៅស្ថានសួគ៌វិញ ឲ្យគង់នៅខាងស្តាំ
១ ធីម៉ូថេ ៣:១៦
ពិតប្រាកដជាសេចក្ដីអាថ៌កំបាំងរបស់សាសនានៃយើង នោះជ្រាលជ្រៅណាស់ គឺដែលព្រះបានលេចមកក្នុងសាច់ឈាម បានរាប់ជាសុចរិតដោយព្រះវិញ្ញាណ ពួកទេវតាបានឃើញទ្រង់ មនុស្សបានប្រកាសប្រាប់ពីទ្រង់ដល់ពួកសាសន៍ដទៃ មានគេជឿដល់ទ្រង់ក្នុងលោកីយនេះ រួចព្រះបានលើកទ្រង់ឡើងទៅក្នុងសិរីល្អវិញ។
ក្រោយពេលទ្រង់សុគត ព្រះយេស៊ូវត្រូវបានរស់ឡើងវិញ ហើយបន្ទាប់មកត្រូវបានលើកឡើង ទៅក្នុងសិរីល្អទៅនៅជាមួយនឹងព្រះជាម្ចាស់នៅស្ថានសួគ៌វិញ។ អស់អ្នកដែលនៅក្នុងព្រះគ្រីស្ទនឹងមាន បទពិសោធដូចគ្នៃ នៃការស្លាប់ បន្ទាប់មករស់ឡើងវិញ ហើយបន្ទាប់ទៀតគឺការប្រទានសិរីរុងរឿង នៅស្ថានសួគ៌។
ផ្នែកទី៣៖ ការប្រទានសិរីរុងរឿងរបស់យើង
នៅក្នុងផ្នែកចុងក្រោយនៃការសិក្សានេះយើងនឹងឆ្លើយសំណួរចំនួនបី៖
-
តើយើងនឹងទទួលបានការប្រទានសិរីរុងរឿងនៅពេលណា?
-
តើយើងនឹងទទួលបានការប្រទានសិរីរុងរឿងដោយរបៀបណា?
-
តើការប្រទានសិរីរុងរឿងរបស់យើងពាក់ព័ន្ធនឹងអ្វីខ្លះ?
តើយើងនឹងទទួលសិរីរុងរឿងនៅពេលណា?
ការប្រទានសិរីរុងរឿងគឺនៅថ្ងៃអនាគត។ វាគឺជាសេចក្តីដែលត្រូវសង្ឃឹមទុក ដោយសារវានឹងត្រូវបាន បើកសម្តែងឱ្យឃើញ។
វាគឺជាអ្វីដែលត្រូវសង្ឃឹមទុក…
រ៉ូម ៥:២
ក៏ដោយសារទ្រង់ យើងមានផ្លូវចូលក្នុងព្រះគុណនេះ ជាទីដែលយើងកំពុងឈរនៅដោយសេចក្ដីជំនឿ ហើយយើងអួតពីសេចក្ដីសង្ឃឹមដល់សិរីល្អនៃព្រះផង
កូឡូស ១:២៧
ព្រះទ្រង់បានសព្វព្រះហឫទ័យ នឹងសំដែងឲ្យពួកបរិសុទ្ធនោះដឹងថា សិរីល្អដ៏បរិបូររបស់សេចក្ដីអាថ៌កំបាំងនេះជាយ៉ាងណា ក្នុងពួកសាសន៍ដទៃ គឺថា ព្រះគ្រីស្ទទ្រង់សណ្ឋិតនៅក្នុងអ្នករាល់គ្នា ដែលជាទីសង្ឃឹមយ៉ាងឧត្តម
វានឹងត្រូវបានបើកសម្តែងឱ្យឃើញ…
រ៉ូម ៨:១៨
ខ្ញុំរាប់អស់ទាំងសេចក្ដីទុក្ខលំបាកនៅជាន់នេះ ថាជាសេចក្ដីមិនគួរប្រៀបផ្ទឹមនឹងសិរីល្អ ដែលនឹងបើកសំដែងមកឲ្យយើងរាល់គ្នាឃើញនោះទេ
១ ពេត្រុស ៥:១
ឯពួកចាស់ទុំក្នុងពួកអ្នករាល់គ្នា នោះខ្ញុំ ដែលជាអ្នកចាស់ទុំដែរ ហើយជាស្មរបន្ទាល់ពីការរងទុក្ខរបស់ព្រះគ្រីស្ទ ជាអ្នកមានចំណែកក្នុងសិរីល្អដែលត្រូវលេចមក
តើពេលណាការប្រទានសិរីរុងរឿងនេះនឹងត្រូវបង្ហាញចេញមក? ចម្លើយគឺនៅពេលព្រះយេស៊ូវយាងត្រឡប់មកវិញជាលើកទីពីរ។ កាលណាព្រះគ្រីស្ទបានលេចមក នោះយើងនឹងលេចមកក្នុងសិរីល្អ ជាមួយនឹងទ្រង់ដែរ។
កូឡូស ៣:៤
កាលណាព្រះគ្រីស្ទដ៏ជាជីវិតនៃយើង បានលេចមក នោះអ្នករាល់គ្នានឹងលេចមកក្នុងសិរីល្អ ជាមួយនឹងទ្រង់ដែរ។
តើយើងនឹងត្រូវបានសិរីរុងរឿងដោយរបៀបណា?
ការប្រទានសិរីរុងរឿងគឺជាកិច្ចការរបស់ព្រះជាម្ចាស់។ អ្នកជឿត្រូវបានត្រាស់ហៅ និងនាំចូលមកក្នុងសិរីរុងរឿងដោយព្រះជាម្ចាស់។
ព្រះជាម្ចាស់ប្រកាសពីសិរីរុងរឿងរបស់យើង តាំងពីមុនអស់ទាំងកល្ប។ តាំងពីមុនកំណើតលោកីយមក ព្រះជាម្ចាស់បានប្រកាសរួចហើយថាអ្នកនឹងត្រូវបានសិរីរុងរឿង។
១ កូរិនថូស ២:៧
គឺនិយាយតាមតែប្រាជ្ញានៃព្រះវិញ ជាសេចក្ដីអាថ៌កំបាំងដ៏លាក់ទុក ដែលព្រះបានគិតគូ តាំងពីមុនអស់ទាំងកល្ប សំរាប់ជាសិរីល្អដល់យើងរាល់គ្នា
ព្រះជាម្ចាស់ត្រាសហៅអ្នកជឿមកក្នុងសិរីរុងរឿងរបស់ទ្រង់
អ្នកត្រូវបានកំណត់ទុកជាមុនសម្រាប់សិរីរុងរឿងតាំងពីមុនកំណើតលោកីយមកម្លេះ។ នៅពេលដល់ពេលហើយ ព្រះជាម្ចាស់បានត្រាស់ហៅអ្នកចូលមកក្នុងសិរីរុងរឿង។
១ ថេស្សាឡូនិក ២:១២
ហើយទាំងធ្វើបន្ទាល់ឲ្យអ្នករាល់គ្នាបានដើរយ៉ាងគួរនឹងព្រះ ដែលទ្រង់ហៅអ្នករាល់គ្នាមកក្នុងនគរ ហើយក្នុងសិរីល្អរបស់ទ្រង់។
គោលបំណងនៃការត្រាស់ហៅអ្នករបស់ព្រះជាម្ចាស់តាមរយៈដំណឹងល្អគឺថាអ្នកនឹង ទទួលបានសិរីរុងរឿងរបស់ព្រះយេស៊ូវគ្រីស្ទដ៏ជាព្រះអម្ចាស់។
២ ថេស្សាឡូនិក ២:១៣-១៤
ឱបងប្អូនដ៏ជាស្ងួនភ្ងានៃព្រះអម្ចាស់អើយ យើងខ្ញុំត្រូវតែអរព្រះគុណដល់ព្រះអង្គជានិច្ច ពីដំណើរអ្នករាល់គ្នា ពីព្រោះព្រះទ្រង់បានរើសអ្នករាល់គ្នា តាំងពីដើមដំបូងមក ដើម្បីឲ្យបានសង្គ្រោះ ដោយព្រះវិញ្ញាណទ្រង់ញែកចេញជាបរិសុទ្ធ ហើយដោយមានចិត្តជឿ តាមសេចក្ដីពិតផង ទ្រង់បានហៅអ្នករាល់គ្នាមកក្នុងសេចក្ដីទាំងនោះ ដោយសារដំណឹងល្អនៃយើងខ្ញុំ ប្រយោជន៍ឲ្យបានសិរីល្អរបស់ព្រះយេស៊ូវគ្រីស្ទ ជាព្រះអម្ចាស់នៃយើង
ព្រះជាម្ចាស់នាំអ្នកជឿមកក្នុងសិរីល្អ
នៅចុងបញ្ចប់ព្រះជាម្ចាស់នឹងនាំអ្នកចូលមកក្នុងសិរីរុងរឿង។ ការប្រទានសិរីរុងរឿង (គឺដូចជា ព្រះពរខាងវិញ្ញាណទាំងអស់) ដោយសារព្រះគុណ ហើយគឺជាកិច្ចការរបស់ព្រះជាម្ចាស់។ ដូចជាអ្វីដែលយើងបានឃើញ ព្រះជាម្ចាស់ “នាំកូនជាច្រើនមកក្នុងសិរីល្អ” (ហេប្រឺ ២:១០)។ ទ្រង់បានរៀបចំសិរីរុងរឿងសម្រាប់យើង ហើយនឹងយាងមកដើម្បីនាំយើងទៅនៅជាមួយទ្រង់វិញ។
យ៉ូហាន ១៤:២-៣
នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន ពុំនោះ ខ្ញុំបានប្រាប់អ្នករាល់គ្នាហើយ ខ្ញុំទៅរៀបកន្លែងឲ្យអ្នករាល់គ្នា បើខ្ញុំទៅរៀបកន្លែងឲ្យអ្នករាល់គ្នា នោះខ្ញុំនឹងត្រឡប់មកវិញ នឹងទទួលអ្នករាល់គ្នាទៅឯខ្ញុំ ប្រយោជន៍ឲ្យអ្នករាល់គ្នាបាននៅកន្លែងដែលខ្ញុំនៅនោះដែរ
ព្រះជាម្ចាស់រៀបចំយើងសម្រាប់សិរីរុងរឿង និងរៀបចំសិរីរុងរឿងសម្រាប់យើង។ * សូមមើលកំណត់ស្គាល់សម្រាប់គ្រូដូចខាងក្រោម
វាគឺជាសេចក្តីពិតដ៏អស្ចារ្យដែលព្រះជាម្ចាស់បានរៀបចំព្រះពរទុកសម្រាប់យើង។ ប៉ុន្តែសេចក្តីពិតដ៏អស្ចារ្យ មួយទៀតគឺថាព្រះជាម្ចាស់ក៏បានរៀបចំយើងសម្រាប់ព្រះពរដែរ។ ទ្រង់កំពុងតែធ្វើឱ្យយើងរួចរាល់ ដើម្បីទទួលបានអ្វីដែលទ្រង់បានរៀបចំសម្រាប់យើង។ ទ្រង់កំពុងតែបំផ្លាស់បំប្រែយើងទៅជាប្រភេទមនុស្ស ដែលអាចរីករាយបានពេញលេញជាមួយនឹងព្រះពរទាំងឡាយដែលទ្រង់មានសម្រាប់យើង។
ដូច្នេះហើយបានជា ព្រះជាម្ចាស់បានរៀបចំសិរីរុងរឿងសម្រាប់យើង…
១ កូរិនថូស ២:៩
ដូចមានសេចក្ដីចែងទុកមកថា «សេចក្ដីដែលភ្នែកមិនដែលឃើញ ត្រចៀកមិនដែលឮ ហើយចិត្តនឹកមិនដែលដល់ គឺសេចក្ដីនោះឯងដែលព្រះបានរៀបចំទុក សំរាប់ពួកអ្នកដែលស្រឡាញ់ទ្រង់»
…ហើយព្រះជាម្ចាស់កំពុងតែរៀបចំយើងសម្រាប់សិរីរុងរឿងដែរ។
រ៉ូម ៩:២៣
ហើយបើទ្រង់ចង់បើកឲ្យពួកគ្រឿងប្រដាប់ ដែលគួរនឹងសេចក្ដីមេត្តាករុណា ដែលទ្រង់បានរៀបចំជាមុន បានស្គាល់សេចក្ដីវិសេសនៃសិរីល្អដ៏បរិបូររបស់ទ្រង់វិញ
ទំនុកតម្កើង ៧៣:២៤
ទ្រង់នឹងនាំទូលបង្គំ ដោយដំបូន្មានរបស់ទ្រង់
រួចនឹងទទួលទូលបង្គំចូលក្នុងសិរីល្អ
ការប្រទានសិរីរុងរឿងរបស់យើងនឹងមានលក្ខណៈអចិន្ត្រៃយ៍ និងអស់កល្បជានិច្ច។ ហេតុដូច្នេះ វាមានតម្លៃក្នុងការស៊ូទ្រាំនឹងទុក្ខលំបាក និងទុក្ខវេទនាបណ្តោះអាសន្ននេះ។ ព្រះយេស៊ូវបានរងទុក្ខដើម្បីនាំយើងមកកាន់សិរីរុងរឿង។ យើងបានរួបរួមគ្នាជាមួយទ្រង់វិញ។ ហេតុដូច្នេះ យើងនឹងចែករំលែកការរងទុក្ខរបស់ទ្រង់មុនពេលយើងចែករំលែកនៅក្នុងសិរីរុងរឿងរបស់ទ្រង់។
រ៉ូម ៨:១៦-១៧
ព្រះវិញ្ញាណទ្រង់ក៏ធ្វើបន្ទាល់នឹងវិញ្ញាណយើងថា យើងជាកូនរបស់ព្រះ បើសិនណាជាកូនព្រះហើយ នោះយើងក៏បានគ្រងមរដកដែរ គឺជាអ្នកគ្រងមរដកនៃព្រះជាមួយនឹងព្រះគ្រីស្ទផង ឲ្យតែយើងទទួលរងទុក្ខជាមួយនឹងទ្រង់ចុះ ដើម្បីឲ្យបានដំកើងឡើងជាមួយនឹងទ្រង់ដែរ។
២ កូរិនថូស ៤:១៦-១៨
ហេតុនោះយើងខ្ញុំមិនណាយចិត្តឡើយ ប៉ុន្តែ ទោះបើមនុស្សខាងក្រៅរបស់យើងខ្ញុំ កំពុងតែពុករលួយទៅក៏ពិតមែន តែនៅខាងក្នុងកំពុងតែកែប្រែជាថ្មីឡើងរាល់ថ្ងៃជានិច្ចវិញ ដ្បិតសេចក្ដីទុក្ខលំបាកយ៉ាងស្រាលរបស់យើងខ្ញុំ ដែលនៅតែមួយភ្លែតនេះ នោះបង្កើតឲ្យយើងខ្ញុំមានសិរីល្អយ៉ាងធ្ងន់លើសលប់ ដ៏នៅអស់កល្បជានិច្ចវិញ ដោយយើងខ្ញុំមិនរាប់អានរបស់ដែលមើលឃើញឡើយ គឺរាប់អានតែរបស់ដែលមើលមិនឃើញវិញ ដ្បិតរបស់ដែលមើលឃើញ នោះស្ថិតស្ថេរមិនយូរប៉ុន្មានទេ តែឯរបស់ដែលមើលមិនឃើញ នោះនៅស្ថិតស្ថេរអស់កល្បជានិច្ចវិញ។
១ ពេត្រុស ៥:១០
រីឯព្រះដ៏មានព្រះគុណសព្វគ្រប់ ដែលទ្រង់បានហៅយើងរាល់គ្នា មកក្នុងសិរីល្អនៃទ្រង់ ដ៏នៅអស់កល្បជានិច្ច ដោយព្រះគ្រីស្ទយេស៊ូវ នោះសូមទ្រង់មេត្តាប្រោសឲ្យអ្នករាល់គ្នាបានគ្រប់លក្ខណ៍ ទាំងចំរើនកំឡាំង ហើយតាំងអ្នករាល់គ្នាឲ្យមាំមួនឡើង ក្នុងខណក្រោយដែលបានរងទុក្ខបន្តិច
ពិភាក្សា៖ តើការដឹងថាការរងទុក្ខលំបាកដែលយើងជួបប្រទះពេលនេះគឺជា “បង្កើតឲ្យយើងខ្ញុំមានសិរីល្អ យ៉ាងធ្ងន់លើសលប់ ដ៏នៅអស់កល្បជានិច្ចវិញ” លើកទឹកចិត្តយើងឱ្យចេះស៊ូទ្រាំ និងមានចិត្តស្មោះត្រង់ យ៉ាងដូចម្តេច?
តើការប្រទានសិរីរុងរឿងរបស់យើងពាក់ព័ន្ធនឹងអ្វីខ្លះ?
ការប្រទានសិរីរុងរឿងទាក់ទងនឹងលក្ខណៈគ្រប់លក្ខណ៍នៃលក្ខណៈរបស់យើង និងរាងកាយរបស់យើង ដើម្បីឱ្យយើងអាចចូលរួមនៅក្នុងការបង្កើតថ្មី ដែលព្រះជាម្ចាស់នឹង “សំដែង ឲ្យអស់ទាំងកល្បខាងមុខ បានឃើញព្រះគុណដ៏ធ្ងន់លើសលប់របស់ទ្រង់ ដោយសេចក្ដីសប្បុរស ដែលទ្រង់ផ្តល់មកយើង ក្នុងព្រះគ្រីស្ទយេស៊ូវ” (អេភេសូរ ២:៧)។
ដំបូងបង្អស់ ការប្រទានសិរីរុងរឿងទាក់ទងនឹងភាពល្អឥតខ្ចោះខាងសីលធម៌របស់យើង។
យូដាស ១:២៤-២៥
រីឯព្រះ ដែលអាចនឹងថែរក្សា មិនឲ្យអ្នករាល់គ្នាជំពប់ដួល ហើយនឹងដាក់អ្នករាល់គ្នា នៅចំពោះសិរីល្អទ្រង់ ដោយឥតមានកន្លែងបន្ទោសបាន ព្រមទាំងមានចិត្តត្រេកអរផង គឺជាព្រះអង្គដ៏ជាព្រះតែមួយ ជាព្រះអង្គសង្គ្រោះនៃយើងរាល់គ្នា ដោយសារព្រះយេស៊ូវគ្រីស្ទ ជាព្រះអម្ចាស់នៃយើង នោះសូមឲ្យទ្រង់បានសិរីល្អ ឫទ្ធានុភាព ព្រះចេស្តា នឹងអំណាច តាំងពីមុនអស់កល្ប នៅជាន់ឥឡូវនេះ ហើយទៅដល់អស់កល្បជានិច្ចតទៅ។ អាម៉ែន។:៚
អេភេសូរ ៥:២៥-២៧
…ព្រះគ្រីស្ទបានស្រឡាញ់ដល់ពួកជំនុំ ហើយបានប្រគល់ព្រះអង្គទ្រង់ជំនួសផង ដើម្បីឲ្យទ្រង់បានញែកពួកជំនុំចេញជាបរិសុទ្ធ ដោយបានលាងសំអាតនឹងទឹក គឺជាព្រះបន្ទូល ប្រយោជន៍នឹងថ្វាយពួកជំនុំនេះដល់ព្រះអង្គទ្រង់ ទុកជាពួកជំនុំដ៏ឧត្តម ឥតប្រឡាក់ ឥតជ្រួញ ឬមានអ្វីឲ្យដូចឡើយ គឺឲ្យបានបរិសុទ្ធ ហើយឥតកន្លែងបន្ទោសបានវិញ
ការប្រទានសិរីរុងរឿងមានន័យថានៅពេលយើងឈរនៅចំពោះព្រះភក្ររបស់ព្រះជាម្ចាស់ ព្រះយេស៊ូវនឹង "ថ្វាយពួកជំនុំនេះដល់ព្រះអង្គ ទុកជាពួកជំនុំដ៏ឧត្តម ឥតប្រឡាក់ ឥតជ្រួញ ឬមានអ្វីឲ្យដូចឡើយ គឺឲ្យបានបរិសុទ្ធ ហើយឥតកន្លែងបន្ទោសបានវិញ"។ នៅក្នុងស្ថានភាពនៃភាពគ្រប់លក្ខណ៍ ខាងសីលធម៌នេះ យើងនឹងមិនប្រព្រឹត្តិអំពើបាបទៀតឡើយ។ សម្រាប់អស់អ្នក ដែលស្រេកឃ្លានសេចក្តីសុចរិត នេះគឺជាដំណឹងដ៏ល្អបំផុត! យើងនឹងលែងដួលចុះនៅក្នុងអំពើបាប និងភាពទន់ខ្សោយទៀតហើយ។ យើងនឹងលែងប្រព្រឹត្តិខុស ធ្វើឱ្យមនុស្សឈឺចាប់ ប្រព្រឹត្តិកំហុស ឬមានអារម្មណ៍ខ្មាសអៀនទៀតហើយ។ យើងនឹងមានសេរីភាពចេញពីអំពើបាបជារៀងរហូត!
នៅក្នុងមេរៀនទីមួយរបស់យើងក្នុងស៊េរីនេះ យើងបានរៀនថា ការសង្គ្រោះគឺចេញពីការដាក់ទោស អំណាច និងវត្តមាននៃអំពើបាប។ ព្រះជាម្ចាស់បានសង្គ្រោះយើងចេញពីការដាក់ពិន័យរបស់អំពើបាបតាមរយៈការរាប់ជាសុចរិត ទ្រង់កំពុងតែសង្គ្រោះយើងចេញពីអំណាចនៃអំពើបាបតាមរយៈការញែកជាបរិសុទ្ធ ហើយទ្រង់នឹងសង្រ្គោះយើងចេញពីវត្តមាននៃអំពើបាបតាមរយៈការប្រទានសិរីរុងរឿង!
ទីពីរ ការប្រទានសិរីរុងរឿងមានន័យថាយើងនឹងទទួលបាននូវរូបកាយដែលមានសិរីរុងរឿង។
ភីលីព ៣:២០-២១
ឯយើងរាល់គ្នា យើងជាសាសន៍ស្ថានសួគ៌វិញ ក៏នៅចាំព្រះអម្ចាស់យេស៊ូវគ្រីស្ទ ជាព្រះអង្គសង្គ្រោះ ទ្រង់យាងមកពីស្ថាននោះឯង ដែលទ្រង់នឹងបំផ្លាស់បំប្រែរូបកាយទាបថោករបស់យើង ឲ្យត្រឡប់ដូចជារូបអង្គឧត្តមរបស់ទ្រង់ តាមដែលព្រះចេស្តាទ្រង់ពូកែនឹងបញ្ចុះបញ្ចូលគ្រប់ទាំងអស់ នៅក្រោមអំណាចទ្រង់ផង។
១ កូរិនថូស ១៥:៤២-៤៣
សេចក្ដីដែលមនុស្សស្លាប់បានរស់ឡើងវិញ នោះក៏បែបដូច្នោះដែរ គេបានកប់ទៅ ជារូបកាយ ដែលពុករលួយ តែរស់ឡើងវិញ ជារូបកាយមិនចេះពុករលួយឡើយ បានកប់ទៅ ទាំងមានសេចក្ដីអាប់ឱន តែរស់ឡើងវិញ ទាំងមានសិរីល្អ
នៅក្នុងមេរៀនរបស់យើងអំពីព្រះពរខាងវិញ្ញាណនៃការរស់ឡើងវិញ យើងបានរៀនថា រូបកាយដែលរស់ឡើងវិញរបស់យើងគឺជារូបកាយខាងវិញ្ញាណ មិនចេះវិនាស ហើយមានសិរីរុងរឿង និងមានអំណាច។ យើងនឹងលែងឈឺ ឬអស់កម្លាំង ឬមានអារម្មណ៍ថាលែងឈឺចាប់ទៀតឡើយ។
ទីបី ការប្រទានសិរីរុងរឿង មានន័យថាយើងនឹងរស់នៅក្នុងការបង្កើតថ្មី (ស្ថានសួគ៌ និងផែនដីថ្មី) ដែលគ្មានពុករលួយ ការខូច និងស្លាប់ទៀតហើយទេ។
វិវរណៈ ២១:៥
ឯព្រះអង្គ ដែលគង់លើបល្ល័ង្ក ទ្រង់មានបន្ទូលថា មើល អញធ្វើទាំងអស់ឡើងជាថ្មី
រ៉ូម ៨:២១
ជីវិតទាំងនោះឯង នឹងបានរួចពីចំណងនៃសេចក្ដីពុករលួយ ឲ្យបានសេរីភាពនៃសិរីល្អរបស់ពួកកូនព្រះវិញ
គោលបំណងរបស់ព្រះជាម្ចាស់ក្នុងការធ្វើទាំងអស់ឡើងជាថ្មី គឺដើម្បីឱ្យការបង្កើតនោះ “នឹងបានរួចពីចំណងនៃសេចក្ដីពុករលួយ ឲ្យបានសេរីភាពនៃសិរីល្អរបស់ពួកកូនព្រះវិញ”។ នៅក្នុងការបង្កើតថ្មី យើងនឹងទទួលបានបទពិសោធន៍នៃសិរីរុងរឿងដ៏អស់កល្បជានិច្ច (២ ធីម៉ូថេ ២:១០)។ សិរីរុងរឿងដ៏អស់កល្បជានិច្ចរបស់យើងត្រូវបានពណ៌នាតាមរបៀបនេះ៖ យើងនឹង “ភ្លឺដូចជាថ្ងៃ នៅក្នុងនគររបស់ព្រះវរបិតានៃយើង”!
ដានីយ៉ែល ១២:៣
ឯពួកអ្នកដែលមានប្រាជ្ញា គេនឹងភ្លឺដូចជារស្មីនៃផ្ទៃមេឃ ហើយពួកអ្នកដែលទាញនាំមនុស្សជាច្រើនឲ្យវិលមកឯសេចក្ដីសុចរិត នោះនឹងភ្លឺដូចជាអស់ទាំងផ្កាយនៅជាដរាបតទៅ
ម៉ាថាយ ១៣:៤៣
គ្រានោះ ពួកសុចរិតនឹងភ្លឺដូចជាថ្ងៃ នៅក្នុងនគររបស់ព្រះវរបិតានៃគេ អ្នកណាដែលមានត្រចៀកសំរាប់ស្តាប់ ឲ្យស្តាប់ចុះ។
នេះគឺជាអ្វីដែលព្រះជាម្ចាស់មានផែនការ ហើយនឹងធ្វើសម្រាប់ប្រជារាស្ត្ររបស់ព្រះអង្គ។ ទ្រង់នឹងធ្វើឱ្យយើងគ្រប់លក្ខណ៍ខាងវិញ្ញាណ និងរូបកាយ ហើយបន្ទាប់មកយើងនឹងត្រៀមខ្លួនរួចជាស្រេច ដើម្បីរីករាយជាមួយជីវិតនៅក្នុងសិរីរុងរឿងក្នុងនគររបស់ទ្រង់ជារៀងរហូត!
ពិភាក្សា៖ ប្រសិនបើនរណាម្នាក់សួរអ្នកថាតើអ្វីជាគោលដៅចុងក្រោយបង្អស់នៃជីវិតរបស់គ្រីស្ទបរិស័ទ តើអ្នកនឹងនិយាយថាយ៉ាងដូចម្តេច?
សង្ខេប៖ ការប្រទានសិរីរុងរឿងគឺជាភាពគ្រប់លក្ខណ៍បំផុតរនៃអ្នកជឿ ដែលនឹងកើតឡើង នៅពេលព្រះយេស៊ូវយាងត្រឡប់មកវិញជាលើកទីពីរ។ យើងនឹងឃើញព្រះអង្គមានលក្ខណៈជាអង្គទ្រង់ ហើយយើងនឹងបានដូចជាទ្រង់ដែរ។ យើងនឹងមានសិរីរុងរឿងដោយសារយើងឆ្លុះបញ្ចាំងពីសិរីរុងរឿង របស់ព្រះជាម្ចាស់ជារៀងរហូត។
អធិស្ឋានបញ្ចប់
*កំណត់សម្គាល់សម្រាប់គ្រូ
ចូរស្រមៃថាឪពុកចង់ផ្តល់ឱកាសថ្ងៃឈប់សម្រាកដល់កូនប្រុសរបស់គាត់នៅប្រទេសបារាំង។ ដើម្បីធ្វើឱ្យប្រាកដថាកូនប្រុសរបស់គាត់មានពេលវេលាល្អ ឪពុកត្រូវតែធ្វើកិច្ចការពីរយ៉ាង។
ទីមួយគាត់ត្រូវតែរៀបចំដំណើរកំសាន្តសម្រាប់កូនប្រុសរបស់គាត់ (ដោយធ្វើការទិញសំបុត្រយន្តហោះ កក់កន្លែងស្នាក់នៅ រៀបចំកម្មវិធីដំណើរកំសាន្ត។ល។)។
ប៉ុន្តែទីពីរ គាត់ក៏ត្រូវរៀបចំកូនប្រុសរបស់គាត់សម្រាប់ការធ្វើដំណើរកំសាន្តដែរ (តាមរយៈការធ្វើឱ្យប្រាកដថាគាត់មានលិខិតឆ្លងដែន និងលុយប្រទេសបារាំង ហើយចេះភាសា និងទំនៀមទម្លាប់ខ្លះៗនៅក្នុងប្រទេសបារាំង។ល។)។
ស្រដៀងគ្នាដែរ ព្រះជាម្ចាស់បានរៀបចំស្ថានសួគ៌រួចជាស្រេចសម្រាប់យើង ឥឡូវនេះទ្រង់កំពុងតែរៀបចំយើងសម្រាប់ស្ថានសួគ៌វិញ!
