មេរៀនទី ៨: ការញែកជាបរិសុទ្ធ
សម្រង់សម្តីព្រះយេស៊ូវ៖ សូមញែកគេចេញជាបរិសុទ្ធ ដោយសារសេចក្ដីពិតរបស់ទ្រង់ ឯសេចក្ដីពិត គឺជាព្រះបន្ទូលរបស់ទ្រង់ ទូលបង្គំបានចាត់គេឲ្យទៅក្នុងលោកីយ ដូចជាទ្រង់ចាត់ទូលបង្គំ ឲ្យមកក្នុងលោកីយដែរ ឯទូលបង្គំក៏ញែកខ្លួនចេញជាបរិសុទ្ធដោយយល់ដល់គេ ដើម្បីឲ្យគេបានញែកចេញជាបរិសុទ្ធ ដោយសារសេចក្ដីពិតដែរ។ (យ៉ូហាន ១៧:១៧-១៩)
កាលពីមេរៀនមុន យើងឃើញថាដើម្បីរាប់ជាសុចរិតមានន័យថាព្រះជាម្ចាស់ប្រកាសថាអ្នកបានសុចរិត ដោយសារសេចក្តីជំនឿលើព្រះគ្រីស្ទ។ នេះមានន័យថាអ្នកមានឋានៈនៃ “ភាពសុចរិត” ស្របច្បាប់នៅក្នុងព្រះនេត្យរបស់ព្រះជាម្ចាស់។ យ៉ាងណាមិញ នេះមិនមានន័យថា កិរិយារបស់អ្នក ប្រែទៅជាសុចរិតឥតខ្ចោះភ្លាមៗនោះទេ។ វាក៏មិនន័យថាអ្នកបន្តធ្វើដូចពីមុន ទុកដូចជាគ្មានអ្វីកើតឡើង ចំពោះអ្នកនោះដែរ។ អ្វីដែលចង់មានន័យនោះគឺថាព្រះជាម្ចាស់ចាប់ផ្តើមដំណើរការនៃការបង្កើតភាពសុចរិត និងបរិសុទ្ធនៅក្នុងជីវិតរបស់អ្នក។ ដំណើរការនេះគឺដោយអំណាចនៃព្រះវិញ្ញាណបរិសុទ្ធនៅក្នុងអ្នក ហើយត្រូវបានហៅថាការញែកជាបរិសុទ្ធ។
ការញែកជាបរិសុទ្ធគឺជាដំណើរការនៃការធ្វើឱ្យមនុស្សបរិសុទ្ធដោយសារព្រះជាម្ចាស់។
តើ “បរិសុទ្ធ” មានន័យដូចម្តេច?
នៅក្នុងព្រះគម្ពីរ ពាក្យជាភាសាហេព្រើរសម្រាប់បរិសុទ្ធ ពាក្យថា קָדוֹשׁ មានន័យថា ‘ញែកចេញ’ ឬ ‘ដាច់ដោយឡែក’។ ពាក្យជាភាសាក្រិក ἅγιος មានន័យថា ‘ខុសពី’។ ដូច្នេះ ដើម្បីក្លាយជាបរិសុទ្ធគឺត្រូវបែក ខុសពី ពិសេស ហើយស្ថិតនៅក្នុងចំណាត់ថ្នាក់ដោយឡែកផ្ទាល់ខ្លួន។ មានតែព្រះជាម្ចាស់តែប៉ុណ្ណោះដែលបរិសុទ្ធ តាមលក្ខណៈរបស់ទ្រង់ ពីព្រោះគ្មាននរណាដូចជា ព្រះជាម្ចាស់នោះទេ។
និក្ខមនំ ១៥:១១
ឱព្រះយេហូវ៉ាអើយ តើមានព្រះឯណាឲ្យដូចទ្រង់ តើមានអ្នកឯណាដែលមានសេចក្ដីបរិសុទ្ធដ៏វិសេសដូចទ្រង់ ដែលគួរសរសើរដំកើង ហើយក៏ធ្វើការអស្ចារ្យផង
១ សាំយូអែល ២:២
គ្មានព្រះណាបរិសុទ្ធ ដូចព្រះយេហូវ៉ាឡើយ ដ្បិតក្រៅពីទ្រង់គ្មានព្រះឯណាទៀតសោះ ក៏គ្មានព្រះឯណាដែលទុកជាថ្មដា ឲ្យដូចព្រះនៃយើងខ្ញុំដែរ
អេសាយ ៤០:២៥
ដូច្នេះ ព្រះដ៏បរិសុទ្ធទ្រង់មានបន្ទូលថា ឯងរាល់គ្នានឹងប្រៀបផ្ទឹមអញដូចជាអ្នកណា ឲ្យអញបានស្មើនឹងគេនោះ
សូមសម្គាល់ថា ភាពបរិសុទ្ធគឺនិយាយអំពី វិសេសដាច់ដោយឡែក គ្មានអ្វីប្រៀបធៀបបាន និងគ្មានអ្វីប្រៀបស្មើបាន។ ‘‘បរិសុទ្ធ’ ពណ៌នាពីភាពឧត្តុងឧត្តម្ភ និងល្អឥតខ្ចោះរបស់ព្រះជាម្ចាស់ ដែលធ្វើឱ្យទ្រង់ខ្ពស់លើសពី អ្វីៗគ្រប់យ៉ាង ដែលទ្រង់បានបង្កើតឡើយ។
សេចក្តីពិតដ៏គួរឱ្យកត់សម្គាល់នៃការញែកជាបរិសុទ្ធគឺថាព្រះជាម្ចាស់កំពុងតែធ្វើឱ្យយើងបរិសុទ្ធ! ព្រះជាម្ចាស់ហៅអ្នកមានបាប (ដូចជាអ្នក និងខ្ញុំ) ប្រកាសថាពួកគេបានសុចរិត ហើយបន្ទាប់មកចាប់ផ្តើមផ្លាស់ប្រែពួកគេដើម្បីឱ្យពួកគេបានក្លាយទៅជាសុចរិតពិតប្រាកដ!
វាអាចជាមានប្រយោជន៍ក្នុងការគិតពីការញែកជាបរិសុទ្ធថាជាដំណើរការដេលព្រះជាម្ចាស់បំផ្លាស់បំប្រែមនុស្សមានបាបដែលទទួលការរាប់ជាសុចរិតដោយសារជំនឿ ក្លាយជាពួកបរិសុទ្ធដ៏មានសិរីល្អ។ គ្រប់គ្នាដែលព្រះជាម្ចាស់រាប់ជាសុចរិត ដោយសេចក្តីជំនឿលើព្រះគ្រីស្ទ នោះទ្រង់ញែកជាបរិសុទ្ធដោយព្រះវិញ្ញាណដ៏បរិសុទ្ធ។
ការរាប់ជាសុចរិត ⇒ ការញែកជាបរិសុទ្ធ ⇒ ការទទួលសិរីរុងរឿង
ការរាប់ជាសុចរិតកើតឡើងនៅពេលចាប់ផ្តើមជីវិតជាគ្រីស្ទានរបស់យើង។ ការទទួលសិរីល្អគឺជា គោលដៅចុងក្រោយបង្អស់។ ការញែកជាបរិសុទ្ធគឺជាដំណើរការនៅក្នុងចន្លោះនោះ។ ការញែកជាបរិសុទ្ធ ចាប់ផ្តើមនៅពេលរាប់ជាសុចរិតរបស់យើង ហើយនឹងបញ្ចប់ទៅនៅពេលទទួលសិរីល្អរបស់យើង។ ដូច្នេះហើយ ជីវិតជាគ្រីស្ទានគឺជាការញែកជាបរិសុទ្ធពេញមួយជីវិត។
គ្រិស្តសាសនាមិនមែនជាសាសនាដែលអ្នកត្រូវចំណាយពេលពេញមួយជីវិតដើម្បីព្យាយាមស្វែងរកបុណ្យ កុសលនោះទេ។ ព្រះជាម្ចាស់បានប្រទានឲ្យយើងនូវការពេញចិត្តរបស់ទ្រង់ និងការទទួលយកយើង រួចហើយ នៅពេលចាប់ផ្តើមការដើរជាគ្រីស្ទានរបស់យើង។ ការនេះមិនមែនដោយសារតែអ្វីដែលអ្នកបានធ្វើនោះទេ ប៉ុន្តែគឺជាអ្វីដែលព្រះគ្រីស្ទបានធ្វើសម្រាប់យើងវិញ។ ឥឡូវនេះដោយបានទទួលយកយើងរួចហើយ ព្រះជាម្ចាស់ចាប់ផ្តើមធ្វើការនៅក្នុងជីវិតរបស់យើង ដើម្បីបង្កើតភាពសុចរិតដែលទ្រង់បានប្រកាសថា យើងមានរួចហើយ។ ** សូមមើលកំណត់សម្គាល់របស់គ្រូទី១
ការញែកជាបរិសុទ្ធគឺជាដំណើរការនៃការធ្វើឱ្យមនុស្សបរិសុទ្ធដោយសារព្រះជាម្ចាស់។ ការនេះពាក់ព័ន្ធជាមួយនឹង អ្នកជឿម្នាក់ដាច់ចេញពីអំពើបាបកាន់តែច្រើនឡើង ហើយស្មោះចំពោះព្រះជាម្ចាស់កាន់តែច្រើនឡើង។ ព្រះជាម្ចាស់ទ្រង់បរិសុទ្ធ ហើយព្រះអង្គក៏ញែកប្រជារាស្ត្ររបស់ទ្រង់ឱ្យបរិសុទ្ធដូច្នោះដែរ។ នៅក្នុងគម្ពីរសញ្ញាចាស់ ជនជាតិអ៊ីស្រាអែលត្រូវបានញែកចេញដោយឡែកពីជាតិសាសន៍នានាឱ្យក្លាយជា ប្រជារាស្ត្រដ៏បរិសុទ្ធរបស់ព្រះជាម្ចាស់។
លេវីវិន័យ ២០:២៦
ត្រូវឲ្យឯងរាល់គ្នាបានបរិសុទ្ធដល់អញ ដ្បិតអញនេះ គឺព្រះយេហូវ៉ា អញបរិសុទ្ធ ហើយអញបានញែកឯងរាល់គ្នាចេញពីអស់ទាំងសាសន៍ដទៃ ដើម្បីឲ្យបានជារបស់ផងអញវិញ។
ទុតិយកថា ៧:៦
ដ្បិតឯងជាសាសន៍បរិសុទ្ធដល់ព្រះយេហូវ៉ាជាព្រះនៃឯង ហើយព្រះយេហូវ៉ាជាព្រះនៃឯង ទ្រង់បានរើសយកឯង ឲ្យបានជារបស់ផងទ្រង់ លើសជាងអស់ទាំងសាសន៍ ដែលនៅផែនដីផង។
សូមកត់សម្គាល់ថារបៀបដែលព្រះជាម្ចាស់ធ្វើឱ្យមនុស្ស ‘បរិសុទ្ធ’ គឺតាមរយៈការជ្រើសរើសយកពួកគេ ហើយបំបែកពួកគេដើម្បីឱ្យពួកគេក្លាយជាកម្មសិទ្ធិរបស់ព្រះអង្គ។ ដើម្បីឱ្យជនជាតិអ៊ីស្រាអែលបានក្លាយជា បរិសុទ្ធមានន័យថាពួកគេត្រូវមើលខ្លួនឯងថាជាកម្មសិទ្ធិរបស់ព្រះជាម្ចាស់។ ហេតុដូច្នេះ ពួកគេមិនត្រូវត្រាប់តាមអកប្បកិរិយារបស់ជាតិសាសន៍នានាទេ ប៉ុន្តែផ្ទុយមកវិញត្រូវអនុវត្តតាមបទបញ្ញតិរបស់ព្រះជាម្ចាស់វិញ។
ទុតិយកថា ១៨:៩
កាលណាឯងបានចូលទៅក្នុងស្រុក ដែលព្រះយេហូវ៉ាជាព្រះនៃឯង ទ្រង់ប្រទានឲ្យ នោះមិនត្រូវរៀនធ្វើតាមការគួរស្អប់ខ្ពើមរបស់សាសន៍ទាំងនោះឡើយ
ប្រសិនបើជនជាតិអ៊ីស្រាអែលធ្វើតាមបទបញ្ញតិរបស់ព្រះជាម្ចាស់ ពួកគេនឹងបានជាបរុសុទ្ធ ហើយខុសប្លែក ពីជាតិសាសន៍ដទៃៗទៀត។ ប៉ុន្តែជំនួសមកវិញ ពួកគេត្រាប់តាមជាតិសាសន៍នានា នៅជុំវិញពួកគេ។ ពួកគេមិនចង់ឱ្យព្រះជាម្ចាស់ធ្វើឱ្យពួកគេបរិសុទ្ធទេ។ ជំនួសមកវិញ ពួកគេចង់ដូចជាអ្នកដទៃទៀតដែរ។
នៅក្នុងគម្ពីរសញ្ញាថ្មី មានបញ្ញតិស្រដៀងគ្នាសម្រាប់អ្នកជឿ។
១ យ៉ូហាន ២:១៥-១៦
កុំឲ្យស្រឡាញ់លោកីយ ឬរបស់អ្វីដែលនៅក្នុងលោកីយនេះឲ្យសោះ បើអ្នកណាស្រឡាញ់លោកីយ អ្នកនោះគ្មានសេចក្ដីស្រឡាញ់របស់ព្រះវរបិតានៅក្នុងខ្លួនឡើយ ដ្បិតអស់ទាំងសេចក្ដី ដែលនៅក្នុងលោកីយនេះ គឺជាសេចក្ដីប៉ងប្រាថ្នារបស់សាច់ឈាម នឹងសេចក្ដីប៉ងប្រាថ្នារបស់ភ្នែក ហើយសេចក្ដីអំនួតរបស់ជីវិត នោះមិនកើតមកពីព្រះវរបិតាទេ គឺមកតែពីលោកីយនេះវិញ
តើយើងនឹងស្តាប់តាមការព្រមានទាំងនេះ? ឬតើយើងនឹងធ្វើដូចជាជនជាតិអ៊ីស្រាអែល? យើងត្រូវតែយកចិត្តទុកដាក់ចំពោះមនុស្សនៅទូទាំងពិភពលោក ប៉ុន្តែយើងមិនត្រូវដាក់ចិត្តរបស់យើងទៅលើ របស់នៅលើលោកីយ៍នេះទេ។ ប្រជារាស្ត្ររបស់ព្រះជាម្ចាស់គឺអស់អ្នកដែលដាក់ចិត្តទៅលើទ្រង់ និងព្រះរាជ្យ និងភាពសុចរិតរបស់ទ្រង់។
ពិភាក្សា៖ តើវាមានន័យយ៉ាងដូចម្តេចសម្រាប់អ្នក ដែលថាព្រះជាម្ចាស់បំបែកអ្នកចេញពីអ្វីៗ ទាំងអស់ ដែលមិនសុចរិត?
ព្រះជាម្ចាស់ទ្រង់បរិសុទ្ធ។ ព្រះជាម្ចាស់ត្រាស់ហៅ ជ្រើសរើស និងបំបែកមនុស្សដើម្បីឱ្យ ពួកគេក្លាយជាកម្មសិទ្ធិរបស់ព្រះអង្គ ហើយលទ្ធផលពីការនេះគឺថាពួកគេបានបរិសុទ្ធ។ ភាពបរិសុទ្ធ របស់ពួកគេភ្ជាប់ទៅកាន់ភាពបរិសុទ្ធរបស់ព្រះអង្គ។ ភាពបរិសុទ្ធមិនមែនជាអ្វីដែលអ្នកសាកល្ប ដើម្បី សម្រេចឱ្យបានដោយខ្លួនឯងតាមរយៈការអនុវត្តតាមច្បាប់នោះឡើយ។ ភាពបរិសុទ្ធគឺជា ការទទួលស្គាល់ថាអ្នកជាកម្មសិទ្ធិរបស់ព្រះជាម្ចាស់។ ទ្រង់បានត្រាស់ហៅអ្នក ជ្រើសរើសអ្នក និងបំបែកអ្នកឱ្យក្លាយជាទ្រព្យសម្បត្តិដ៏មានតម្លៃរបស់ព្រះអង្គ។ នេះគឺជាការជម្រុញទឹកចិត្តដល់ អ្នកឱ្យរស់នៅ ក្នុងជីវិតដែលបរិសុទ្ធ។
មូលហេតុដែលព្រះជាម្ចាស់ត្រាស់ហៅមនុស្សគឺដើម្បីឱ្យយើងត្រូវបានញែកជាបរិសុទ្ធតាមបំណង ព្រះហឫទ័យរបស់ទ្រង់។ នៅក្នុងព្រះគម្ពីរ អ្វីៗដែលព្រះជាម្ចាស់ញែកសម្រាប់គោលបំណង របស់ទ្រង់ត្រូវហៅថា ‘បរិសុទ្ធ’។ សូម្បីតែផើងនៅក្នុងព្រះវិហារក៏ហៅថា ‘បរិសុទ្ធ’ ដែរ។ តើអ្វីដែលធ្វើឱ្យផើងធម្មតាក្លាយជា ‘បរិសុទ្ធ’ គឺថាវាត្រូវបានញែកសម្រាប់ការប្រើប្រាស់របស់ព្រះជាម្ចាស់។ ហេតុដូច្នោះ ដើម្បីញែកអ្វីមួយឱ្យបរិសុទ្ធគឺត្រូវយករបស់ធម្មតា ហើយញែកវាដោយឡែកសម្រាប់ ការប្រើប្រាស់របស់ ព្រះជាម្ចាស់។
២ ធីម៉ូថេ ២:២១
ដូច្នេះ បើអ្នកណាបានសំអាតខ្លួន ពីសេចក្ដីទាំងនោះ អ្នកនោះនឹងបានជាប្រដាប់សំរាប់ការប្រសើរ ដោយបានញែកជាបរិសុទ្ធហើយ ក៏មានប្រយោជន៍ដល់ម្ចាស់ផង ទុកជាប្រដាប់ដែលបានរៀបចំ សំរាប់ការល្អគ្រប់ជំពូក។
ប្រជារាស្ត្ររបស់ព្រះជាម្ចាស់គឺជាមនុស្សបរិសុទ្ធ ប៉ុន្តែតាមសណ្ឋានពីធម្មជាតិយើងមិនខុសគ្នាពីមនុស្ស ដទៃទៀតឡើយ។ តើមានអ្វីដែលធ្វើឱ្យយើងបរិសុទ្ធគឺថាព្រះជាម្ចាស់បានញែកយើងដាច់ ដោយឡែកសម្រាប់ការប្រើប្រាស់របស់ទ្រង់។ ឥឡូវនេះ ប្រយោជន៍របស់យើងចំពោះម្ចាស់គឺអាស្រ័យ ទៅលើការញែកជាបរិសុទ្ធរបស់យើង នោះគឺថា តើយើងអនុញ្ញាតិឱ្យទ្រង់ញែកយើងដាច់ដោយ ឡែកសម្រាប់ការប្រើប្រាស់របស់ទ្រង់។ យើងគឺជា “ប្រដាប់” របស់ព្រះជាម្ចាស់។ តើយើងនឹងត្រូវបានទ្រង់ប្រើប៉ុន្មាននោះអាស្រ័យទៅលើថាតើយើងអនុញ្ញាតិឱ្យទ្រង់បំពេញយើងដោយព្រះវិញ្ញាណបរិសុទ្ធរបស់ទ្រង់ច្រើនប៉ុណ្ណា។
គោលបំណងរបស់ប្រទេសអ៊ីស្រាអែលក្នុងនាមជាប្រជាជាតិបរិសុទ្ធគឺដើម្បីបង្ហាញដល់ពិភពលោកពីរបៀបដែលប្រជារាស្ត្ររបស់ព្រះជាម្ចាស់រស់នៅ។ នេះគឺជាផ្នែកមួយនៃផែនការដ៏អស្ចារ្យរបស់ព្រះជាម្ចាស់ដើម្បី នាំការសង្គ្រោះមកដល់ពិភពលោកទាំងមូល។
អេសាយ ៤៩:៦ខ
អញនឹងបន្ថែមការនេះឲ្យឯងបានធ្វើជាពន្លឺដល់សាសន៍ដទៃទាំងប៉ុន្មានទៀត ដើម្បីឲ្យឯងបានធ្វើជាអ្នកជួយសង្គ្រោះរបស់អញ រហូតដល់ចុងផែនដីបំផុត
នៅក្នុងគម្ពីរសញ្ញាថ្មី គ្រីស្ទានមានការត្រាស់ហៅដូចៗគ្នា។
ម៉ាថាយ ៥:១៥-១៦
ក៏គ្មានអ្នកណាអុជចង្កៀង យកទៅដាក់ក្រោមថាំងដែរ គេតែងដាក់លើជើងចង្កៀងវិញ នោះទើបភ្លឺដល់អ្នកដែលនៅក្នុងផ្ទះទាំងអស់គ្នា ដូច្នេះ ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នា ដែលគង់នៅស្ថានសួគ៌។
យើងត្រូវបានព្រះជាម្ចាស់ញែកយើងដោយឡែកសម្រាប់បំណងព្រះហឫទ័យរបស់ទ្រង់។ ឥឡូវនេះ ព្រះជាម្ចាស់ចង់ធ្វើការតាមរយៈជីវិតរបស់យើងដើម្បីប្រទានពរដល់អ្នកដទៃទៀត ហើយជួយពួកគេឱ្យស្គាល់ ទ្រង់ដែរ។
ពិភាក្សា៖ តើវាមានន័យដូចម្តេចសម្រាប់អ្នកដែលថាព្រះជាម្ចាស់ញែកអ្នកដាច់ដោយឡែកសម្រាប់បំណង ព្រះហឫទ័យរបស់ទ្រង់? តើសេចក្តីពិតនេះមានឥទ្ធិពលនៅក្នុងជីវិតអ្នកយ៉ាងដូចម្តេច?
ផ្នែកទី២៖ ការញែកជាបរិសុទ្ធ៖ កិច្ចការរបស់ព្រះ និងរបស់យើង
ការញែកជាបរិសុទ្ធ៖ កិច្ចការរបស់ព្រះជាម្ចាស់នៅក្នុងយើង
ភាពបរិសុទ្ធមិនមែនជាអ្វីដែលយើងអាចបង្កើតឡើងបាន ឬសម្រេចបានតាមរយៈការខិតខំប្រឹងប្រែងដោយខ្លួនយើងនោះទេ។ ព្រះជាម្ចាស់តាមរយៈអំណាចនៃព្រះវិញ្ញាណដ៏បរិសុទ្ធបង្កើតបានជាភាពបរិសុទ្ធនៅក្នុងយើង។
១ ថេស្សាឡូនិក ៥:២៣
សូមឲ្យព្រះនៃសេចក្ដីសុខសាន្ត ញែកអ្នករាល់គ្នាចេញជាបរិសុទ្ធសព្វគ្រប់ ហើយឲ្យទាំងព្រលឹងនឹងវិញ្ញាណ ហើយរូបកាយទាំងមូលបានបំរុងទុកឥតសៅហ្មង ដរាបដល់ព្រះយេស៊ូវគ្រីស្ទ ជាព្រះអម្ចាស់នៃយើង ទ្រង់យាងមក
២ ថេស្សាឡូនិក ២:១៣
ឱបងប្អូនដ៏ជាស្ងួនភ្ងានៃព្រះអម្ចាស់អើយ យើងខ្ញុំត្រូវតែអរព្រះគុណដល់ព្រះអង្គជានិច្ច ពីដំណើរអ្នករាល់គ្នា ពីព្រោះព្រះទ្រង់បានរើសអ្នករាល់គ្នា តាំងពីដើមដំបូងមក ដើម្បីឲ្យបានសង្គ្រោះ ដោយព្រះវិញ្ញាណទ្រង់ញែកចេញជាបរិសុទ្ធ ហើយដោយមានចិត្តជឿ តាមសេចក្ដីពិតផង
ព្រះជាម្ចាស់ញែកយើងជាបរិសុទ្ធតាមរយៈព្រះវិញ្ញាណបរិសុទ្ធ។ ព្រះវិញ្ញាណបរិសុទ្ធត្រូវបានផ្តល់ឱ្យទៅ អ្នកជឿនៅពេលយើងប្រែចិត្តដើម្បីអនុញ្ញាតិឱ្យយើងរស់នៅក្នុងជីវិតដែលបរិសុទ្ធ។ យើងមិនអាចរស់នៅ ក្នុងជីវិតដែលបរិសុទ្ធតាមរយៈការខិតខំ ប្រឹងប្រែងដោយខ្លួនយើងបាននោះទេ (អ្វីដែលព្រះគម្ពីរហៅថា “សាច់ឈាម”)។ យើងត្រូវការព្រះចេស្តារ និងការដឹកនាំពីព្រះវិញ្ញាណបរិសុទ្ធនៅក្នុងយើង។
ដូចជាគ្មាននរណាម្នាក់ត្រូវបានរាប់ជាសុចរិតដោយសារការប្រព្រឹត្តិឡើយ ប៉ុន្តែគឺតាមរយៈសេចក្តីជំនឿលើ ព្រះគ្រីស្ទតែប៉ុណ្ណោះ គ្មាននរណាម្នាក់ត្រូវញែកជាបរិសុទ្ធដោយកិច្ចការរបស់ពួកគេនោះឡើយ ប៉ុន្តែតាមរយៈការទទួលយកកិច្ចការរបស់ព្រះវិញ្ញាណដ៏បរិសុទ្ធវិញ។ យើងទទួលកិច្ចការរបស់ព្រះយេស៊ូវ ដែលបានធ្វើសម្រាប់យើង ប៉ុន្តែយើងក៏ត្រូវទទួលកិច្ចការរបស់ព្រះវិញ្ញាណបរិសុទ្ធ ដែលបានធ្វើនៅក្នុងយើង ផងដែរ។ ព្រះយេស៊ូវបានឈ្នះលើអំពើបាបជំនួសយើង។ ឥឡូវនេះ ព្រះវិញ្ញាណដ៏បរិសុទ្ធ កំពុងតែផ្តល់ជ័យជំនះនោះមកដល់យើងនៅពេលដែលទ្រង់ជួយយើងឱ្យយកឈ្នះលើអំពើបាប។
ការប្រយុទ្ធ៖ វិញ្ញាណ ទល់នឹងសាច់ឈាម
ព្រះគម្ពីរប្រើពាក្យ “សាច់ឈាម” មានន័យថា ‘ការខិតខំប្រឹងប្រែងរបស់មនុស្សដោយគ្មានព្រះ’។ យើងនឹងមិនអាចទទួលបានភាពបរិសុទ្ធតាមរយៈ “សាច់ឈាម” (នោះគឺជា ដោយការខិតខំប្រើប្រែង របស់យើងនោះទេ)។
កាឡាទី ៣:៣
តើអ្នករាល់គ្នាជាមនុស្សឥតបើគិតជាខ្លាំងដល់ម៉្លេះឬអី ដែលបានចាប់ផ្តើម ដោយព្រះវិញ្ញាណហើយ តើឥឡូវនេះបានគ្រប់លក្ខណ៍ឡើង ដោយសាច់ឈាមវិញឬ
ចំណុចរបស់លោកប៉ូលគឺថាជីវិតថ្មីរបស់អ្នកនៅក្នុងព្រះគ្រីស្ទចាប់ផ្តើមនៅពេលអ្នកទទួលព្រះវិញ្ញាណបរិសុទ្ធ។ ឥឡូវនេះ តើអ្នកនឹងរស់នៅក្នុងជីវិតថ្មីនេះដោយរបៀបណា? តាមរយៈអំណាចខាងសាច់ឈាមរបស់អ្នក ឬព្រះចេស្តារនៃព្រះវិញ្ញាណរបស់ព្រះជាម្ចាស់នៅក្នុងអ្នក?
រ៉ូម ៨:៧-៩
ព្រោះគំនិតខាងសាច់ឈាម នោះរមែងទាស់ទទឹងនឹងព្រះ ដ្បិតមិនចុះចូលនឹងក្រិត្យវិន័យរបស់ព្រះទេ ក៏ពុំអាចនឹងចុះចូលបានផង ពួកអ្នកដែលនៅខាងសាច់ឈាម នោះពុំអាចនឹងគាប់ព្រះហឫទ័យដល់ព្រះបានឡើយ តែបើសិនជាព្រះវិញ្ញាណនៃព្រះសណ្ឋិតក្នុងខ្លួនអ្នករាល់គ្នា នោះអ្នករាល់គ្នាមិននៅខាងសាច់ឈាមទៀតទេ គឺនៅខាងវិញ្ញាណវិញ ប៉ុន្តែ បើអ្នកណាគ្មានព្រះវិញ្ញាណរបស់ព្រះគ្រីស្ទ អ្នកនោះមិនមែនជារបស់ផងទ្រង់ទេ
សាច់ឈាមមិនជួយដល់ជីវិតខាងវិញ្ញាណរបស់យើងនោះទេ។ “គំនិតខាងសាច់ឈាម នោះរមែងទាស់ ទទឹងនឹងព្រះ”។ សាច់ឈាម “មិនចុះចូលនឹងក្រិត្យវិន័យរបស់ព្រះទេ ក៏ពុំអាចនឹងចុះចូលបានផង”។ វាមិនអាចស្តាប់បង្គាប់តាមព្រះជាម្ចាស់នោះទេ។ មុនពេលអ្នកស្គាល់ព្រះជាម្ចាស់ អ្នកត្រូវបានគ្រប់គ្រង ដោយសាច់ឈាម។ ឥឡូវនេះអ្នកមានព្រះវិញ្ញាណបរិសុទ្ធនៅក្នុងអ្នក។ ប៉ុន្តែ សាច់ឈាមនៅតែមានដដែល។ ដូច្នេះមានការប្រយុទ្ធកំពុងតែកើតឡើងនៅក្នុងអ្នក។ ការប្រយុទ្ធគ្នារវាងសាច់ឈាម និងព្រះវិញ្ញាណបរិសុទ្ធ។ ទាំងសាច់ឈាម និងព្រះវិញ្ញាណបរិសុទ្ធមានសេចក្តីប៉ងប្រាថ្នា ប៉ុន្តែវាប្រឆាំងគ្នា ទៅវិញទៅមក។
កាឡាទី ៥:១៦-១៧
តែខ្ញុំប្រាប់ថា ចូរដើរក្នុងព្រះវិញ្ញាណ នោះអ្នករាល់គ្នានឹងមិនបំពេញសេចក្ដីប៉ងប្រាថ្នាខាងសាច់ឈាមទេ ដ្បិតសាច់ឈាមតែងតែប៉ងប្រាថ្នាទាស់នឹងព្រះវិញ្ញាណ ឯព្រះវិញ្ញាណ ទ្រង់ក៏ទាស់នឹងសាច់ឈាមដែរ សេចក្ដីទាំង២នេះប្រឆាំងនឹងគ្នា ដល់ម៉្លេះបានជាអ្នករាល់គ្នារកធ្វើការ ដែលចង់ធ្វើទៅមិនកើត
-
សូមអាននូវអ្វីដែលសាវ័កប៉ូលបានសរសេរអំពីកិច្ចការខាងសាច់ឈាមនៅក្នុង កាឡាទី ៥:១៩-២១។
-
សូមអាននូវអ្វីដែលសាវ័កប៉ូលបានសរសេរអំពីផលផ្លែនៃព្រះវិញ្ញាណនៅក្នុង កាឡាទី ៥:២២-២៣។
សូមកត់សម្គាល់ថាការអាក្រក់ដែលមនុស្សធ្វើគឺជា “កិច្ចការខាងសាច់ឈាម”។ វាគឺជាសកម្មភាព ដែលលក្ខណៈដែលពេញដោយអំពើបាបរបស់យើងអាចធ្វើបានគ្រប់ពេលវេលា។ ប៉ុន្តែការល្អដែលមនុស្ស ធ្វើគឺជាគឺជា “ផលផ្លែនៃព្រះវិញ្ញាណ” នោះគឺជា គុណភាពដែលព្រះវិញ្ញាណបរិសុទ្ធបង្កើតឡើងនៅក្នុងយើង ដែលលូតលាស់ជាលំដាប់នៅក្នុងរយៈពេលមួយ។
មនុស្សមួយចំនួនគិតថាពួកគេអាចរស់នៅប្រកបដោយភាពសុចរិតតាមរយៈការខិតខំប្រឹងប្រែងផ្ទាល់ខ្លួនរបស់គេ។ ប៉ុន្តែអ្នកមិនអាចយកឈ្នះលើសាច់ឈាមបានតាមរយៈការខិតខំប្រឹងប្រែងដោយខ្លួនឯងនោះទេ (នោះគឺតាមរយៈខាងសាច់ឈាមរបស់អ្នក!)។ សាច់ឈាមរបស់អ្នកនឹងមិនបំបាក់ខ្លួនឯងនោះទេ! មានវិធីតែមួយគត់ដើម្បីយកឈ្នះខាងសាច់ឈាមបានគឺត្រូវចុះចូលចំពោះអំណាចដ៏អស្ចារ្យជាង នោះគឺជា ព្រះវិញ្ញាណដ៏បរិសុទ្ធ។ ទ្រង់នឹងជួយអ្នកឱ្យយកឈ្នះលើអំពើបាប ហើយបង្កើតផលផ្លែល្អ នៅក្នុង ជីវិតរបស់អ្នក។
កិច្ចការរបស់យើងនៅក្នុងការញែកជាបរិសុទ្ធ
មានបញ្ញតិជាច្រើននៅក្នុងគម្ពីរសញ្ញាថ្មីដែលបង្ហាញប្រាប់ថាយើងមានទំនួលខុសត្រូវសម្រាប់ការញែកជា បរិសុទ្ធរបស់យើង។ ឧទាហរណ៍ យើត្រូវបានបង្គាប់ឱ្យ “ចូរឲ្យអ្នករាល់គ្នាបានបរិសុទ្ធក្នុងគ្រប់កិរិយា ទាំងអស់” (១ ពេត្រុស ១:១៥-១៦) ហើយដេញតាម "ឲ្យបានញែកជាបរិសុទ្ធ បើអ្នកណាគ្មានសេចក្ដី បរិសុទ្ធ នោះមិនដែលឃើញព្រះអម្ចាស់ឡើយ" (ហេព្រើរ ១២:១៤)។ ដូច្នេះតើអ្វីជាតួរនាទីរបស់យើង ក្នុងការញែកជាបរិសុទ្ធរបស់យើង?
១) យើងថ្វាយរូបកាយរបស់យើងទៅព្រះជាម្ចាស់
រ៉ូម ១២:១-២
ដូច្នេះ បងប្អូនអើយ ខ្ញុំទូន្មានអ្នករាល់គ្នាដោយសេចក្ដីមេត្តាករុណានៃព្រះ ឲ្យបានថ្វាយរូបកាយទុកជាយញ្ញបូជារស់ ហើយបរិសុទ្ធ ដែលគាប់ព្រះហឫទ័យដល់ព្រះ ជាការគោរពនៃអ្នករាល់គ្នា ដែលមានទំនង កុំឲ្យត្រាប់តាមសម័យនេះឡើយ ចូរឲ្យអ្នករាល់គ្នាបានផ្លាស់ប្រែវិញ ដោយគំនិតបានកែជាថ្មីឡើង ដើម្បីនឹងអាចលមើលឲ្យបានស្គាល់បំណងព្រះហឫទ័យនៃព្រះ ដែលល្អ ស្រួលទទួល ហើយគ្រប់លក្ខណ៍ផង
រ៉ូម ៦:១៩ខ
ដ្បិតដូចជាកាលពីដើម អ្នករាល់គ្នាបានប្រគល់អវយវៈទាំងប៉ុន្មាន ទៅបំរើសេចក្ដីស្មោកគ្រោក នឹងសេចក្ដីទទឹងច្បាប់ កាន់តែច្រើនឡើងយ៉ាងណា ឥឡូវនេះ ចូរអ្នករាល់គ្នាប្រគល់អវយវៈទាំងអស់នោះ ទៅបំរើសេចក្ដីសុចរិតវិញ ប្រយោជន៍ឲ្យបានបរិសុទ្ធយ៉ាងនោះដែរ
យើងចាប់ផ្តើមដោយការថ្វាយរូបកាយរបស់យើងទៅព្រះជាម្ចាស់។ នេះគឺជារបៀបដែលយើងថ្វាយបង្គំ ព្រះជាម្ចាស់៖ តាមរយៈការប្រគល់ខ្លួនយើងទៅទ្រង់។ យើងអនុញ្ញាតិឱ្យព្រះជាម្ចាស់បំផ្លាស់ប្រែយើង "ដោយគំនិតបានកែជាថ្មីឡើង"ដោយការទទួលសេចក្តីពិតចេញមកពីព្រះបន្ទូលរបស់ទ្រង់ ជារៀងរាល់ថ្ងៃ។ បន្ទាប់មក យើងអាចស្គាល់ និងធ្វើតាមព្រះហឫទ័យទ្រង់បាន។
២) យើងត្រូវតែស្គាល់ព្រះបន្ទូលរបស់ព្រះជាម្ចាស់
នៅយប់មុនថ្ងៃគេយកព្រះអង្គទៅឆ្កាង ព្រះយេស៊ូវបានអធិស្ឋានឱ្យអ្នកជឿ៖ សូមញែកគេចេញជាបរិសុទ្ធ ដោយសារសេចក្ដីពិតរបស់ទ្រង់ ឯសេចក្ដីពិត គឺជាព្រះបន្ទូលរបស់ទ្រង់ ទូលបង្គំបានចាត់គេឲ្យទៅក្នុងលោកីយ ដូចជាទ្រង់ចាត់ទូលបង្គំ ឲ្យមកក្នុងលោកីយដែរ ឯទូលបង្គំក៏ញែកខ្លួនចេញជាបរិសុទ្ធដោយយល់ដល់គេ ដើម្បីឲ្យគេបានញែកចេញជាបរិសុទ្ធ ដោយសារសេចក្ដីពិតដែរ។ (យ៉ូហាន ១៧:១៧-១៩)
ការញែកជាបរិសុទ្ធរបស់យើងគឺដោយសេចក្តីពិតដែលជាព្រះបន្ទូលរបស់ព្រះជាម្ចាស់។ ហេតុដូច្នោះ ដើម្បីលូតលាស់នៅក្នុងការញែកជាបរិសុទ្ធយើងត្រូវតែលូតលាស់តាមរយៈការស្គាល់ព្រះបន្ទូលរបស់ព្រះជាម្ចាស់។ គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្តាលឲ្យតែងទេ។ ព្រះវិញ្ញាណបរិសុទ្ធនៅក្នុងយើង។ ពេលដែលយើងអានព្រះបន្ទូលព្រះ ព្រះវិញ្ញាណដាក់ព្រះបន្ទូល មកកាន់ ចិត្តយើង ដើម្បីបង្ហាត់បង្រៀនដាស់តឿន ចាក់ចុចចិត្តយើង ហើយដឹកនាំយើងឲ្យឆ្ពោះទៅកាន់ គ្រប់អស់ទាំងសេចក្តីពិត (យ៉ូហាន ១៤:១៦; ១៦:៨-១៥)។ ទ្រង់បង្ហាញ យើងពីរបៀបដែលត្រូវរស់នៅ ដើម្បីថ្វាយកិត្តិយសទៅកាន់ព្រះ ហើយទ្រង់ក៏ប្រទាន ព្រះចេស្តាជួយឲ្យយើងអាចស្តាប់បង្គាប់ព្រះអង្គផងដែរ។
ការញែកជាបរិសុទ្ធកើតឡើងនៅពេលយើងចំណាយពេលអានព្រះគម្ពីរដោយមានជំនួយពីព្រះវិញ្ញាណបរិសុទ្ធ។ នៅពេលយើងធ្វើដូច្នេះ ព្រះវិញ្ញាណញែកយើងជាបរិសុទ្ធតាមរយៈការការបង្ហាញប្រាប់ ពីអំពើបាបរបស់យើង បង្ហាញយើងពីគំរូរបស់ព្រះគ្រីស្ទ និងគ្រប់អ្វីៗទាំងអស់ដែលទ្រង់បានធ្វើសម្រាប់យើង ហើយជួយយើងឱ្យស្គាល់ព្រះជាម្ចាស់ និងបំណងព្រះហឫទ័យទ្រង់សម្រាប់យើង។
៣) យើងដើរដោយព្រះវិញ្ញាណបរិសុទ្ធ
ការដើរនៅក្នុងព្រះវិញ្ញាណគឺជាការ ដែលរស់នៅជីវិតរបស់យើង ដោយពឹងផ្អែកលើព្រះវិញ្ញាណបរិសុទ្ធ គ្រប់ពេលវេលា ដោយមានការញាណដឹងពីការ ដឹកនាំរបស់ទ្រង់ ហើយស្តាប់បង្គាប់ធ្វើតាមទ្រង់។ នៅពេលដែលយើងធ្វើការនេះ ព្រះអង្គទ្រង់នឹងប្រទានអំណាច ដឹកនាំ តម្រែតម្រង់ផ្លូវមកកាន់ជីវិត របស់យើង។
កាឡាទី ៥:១៦
តែខ្ញុំប្រាប់ថា ចូរដើរក្នុងព្រះវិញ្ញាណ នោះអ្នករាល់គ្នានឹងមិនបំពេញសេចក្ដីប៉ងប្រាថ្នាខាងសាច់ឈាមទេ
នៅពេលដែលយើងជាគ្រីស្ទបរិស័ទ ដើរនៅក្នុងព្រះវិញ្ញាណបរិសុទ្ធ នោះយើងមាន សេចក្តីសន្យាមក កាន់យើងថា យើងនឹងមិនបំពេញសេចក្តីប៉ងប្រាថ្នាខាងសាច់ឈាមទេ។ នៅពេលដែលយើងដើរដោយព្រះវិញ្ញាណបរិសុទ្ធ នោះយើងនឹងទទួលបានជ័យជំនះ លើអំពើបាប។ ការដើរដោយព្រះវិញ្ញាណមិនមែនជាអ្វីដែលអាថ៍កំបាំងហើយពិបាកយល់នោះទេ។ ការដើរដោយព្រះវិញ្ញាណ គឺជាការដែល ព្រះវិញ្ញាណធ្វើការហ្វឹកហ្វឺនមកកាន់យើង តាមរយៈព្រះបន្ទូលព្រះ ដើម្បីឲ្យលោកអ្នកធ្វើបាបកាន់ តែតិច ហើយស្តាប់បង្គាប់ធ្វើតាមព្រះកាន់តែច្រើន ហើយនេះហើយគឺជាការលូតលាស់រីកចម្រើនខាងវិញ្ញាណ។ ព្រះវិញ្ញាណបរិសុទ្ធ បើកបង្ហាញព្រះបន្ទូលទៅកាន់លោកអ្នក ដឹកនាំការអធិស្ឋានរបស់លោកអ្នកគ្រប់គ្រងមកកាន់ ជីវិតរបស់លោកអ្នក ហើយធ្វើឲ្យលោកអ្នកមានចរិតលក្ខណៈរបស់ព្រះគ្រីស្ទ នៅក្នុងជីវិតរបស់លោកអ្នក។
ការដើរដោយព្រះវិញ្ញាណបរិសុទ្ធគឺជារបៀបដែលព្រះយេស៊ូវបានរស់នៅ។ ព្រះយេស៊ូវទទួលបានការចាក់ ប្រេងតាំងដោយព្រះវិញ្ញាណបរិសុទ្ធពីព្រះវរបិតាដ៏ជាព្រះនៅក្នុងការជ្រមុជទឹករបស់ទ្រង់ ហើយបន្ទាប់មក ព្រះវិញ្ញាណបរិសុទ្ធបាននាំព្រះយេស៊ូវឱ្យតែងតែធ្វើតាមបំណងព្រះហឫទ័យរបស់ព្រះវរបិតាជានិច្ច។ នៅពេលយើងធ្វើដូចគ្នានេះ យើងក្លាយដូចជាទ្រង់។
៤) យើងបដិសេធអំពើបាបដោយអំណាចនៃព្រះវិញ្ញាណដ៏បរិសុទ្ធ
នៅពេលយើងដឹងថាអំពើបាបធ្វើឱ្យព្រះជាម្ចាស់អន់ព្រះទ័យ ហើយធ្វើឱ្យព្រះវិញ្ញាណបរិសុទ្ធសោកសង្រេង យើងចាប់ផ្តើមធ្វើសង្គ្រាមប្រឆាំងនឹងអំពើបាបនៅក្នុងជីវិតផ្ទាល់ខ្លួនរបស់យើង។
១ ថេស្សាឡូនិក ៤:៣-៧
ដ្បិតព្រះទ្រង់សព្វព្រះហឫទ័យ ឲ្យអ្នករាល់គ្នាបានញែកជាបរិសុទ្ធ ដើម្បីឲ្យបានចៀសពីសេចក្ដីកំផិតចេញ ត្រូវឲ្យអ្នករាល់គ្នានិមួយៗចេះរក្សាអត្តភាពខ្លួន ដោយសេចក្ដីបរិសុទ្ធ នឹងសេចក្ដីប្រសើរ មិនមែនដោយសេចក្ដីរំជួលក្នុងតណ្ហា ដូចជាសាសន៍ដទៃដែលមិនស្គាល់ព្រះនោះឡើយ កុំឲ្យអ្នកណាបំពាន ឬធ្វើខុសនឹងបងប្អូនណាមួយក្នុងការនោះឲ្យសោះ ពីព្រោះព្រះអម្ចាស់ទ្រង់នឹងសងសឹកក្នុងការទាំងនោះ ដូចជាយើងខ្ញុំបានប្រាប់ដល់អ្នករាល់គ្នាហើយ ព្រមទាំងធ្វើបន្ទាល់សព្វគ្រប់ផង ដ្បិតព្រះមិនបានហៅយើងរាល់គ្នា មកក្នុងសេចក្ដីស្មោកគ្រោកទេ គឺមកក្នុងសេចក្ដីបរិសុទ្ធវិញ
១ យ៉ូហាន ៣:៣
អស់អ្នកណាដែលមានសេចក្ដីសង្ឃឹមយ៉ាងនេះដល់ទ្រង់ នោះក៏តែងជំរះសំអាតចិត្តខ្លួនឲ្យដូចទ្រង់ដែលស្អាតដែរ
ឥទ្ធិពលនៃការទទួលព្រះវិញ្ញាណបរិសុទ្ធ គឺថាអ្នកមានភាពស្រេកឃ្លានកាន់តែខ្លាំងឡើងចំពោះភាពបរិសុទ្ធ ។ ភាពបរិសុទ្ធបដិសេធអ្វីៗដែលមិនធ្វើឱ្យព្រះគាប់ព្រះហឫទ័យដើម្បីមានការប្រកបគ្នាជាមួយព្រះជាម្ចាស់។ ភាពបរិសុទ្ធកើតឡើងនៅពេលអ្នកយល់ដឹងថា ព្រះជាម្ចាស់អស្ចារ្យប៉ុណ្ណា បន្ទាប់មកអ្នកឱ្យតម្លៃទៅ លើទំនាក់ទំនងដែលអ្នកមានជាមួយទ្រង់ ហើយជ្រើសរើសដើម្បីបែក ចេញពីអ្វីដែលទ្រង់មិនគាប់ ព្រះហឫទ័យ ដើម្បីថ្វាយដួងចិត្តរបស់អ្នកពេញលេញដល់ព្រះអង្គ។
ពិភាក្សា៖ តើការញែកជាបរិសុទ្ធជាកិច្ចការរបស់ព្រះជាម្ចាស់ ឬរបស់មនុស្ស?
នេះគឺជាគន្លឹះ៖ ព្រះជាម្ចាស់ធ្វើកិច្ចការនៅក្នុងយើង។ យើងមិនអាចធ្វើវាដោយមិនមានទ្រង់បានទេ។ ទ្រង់មិនបានធ្វើដាច់ដោយឡែកដោយគ្មានយើងដែរ។ ភីលីព ២:១៣ ប្រាប់យើងថា “ដ្បិតគឺជាព្រះហើយ ដែលបណ្តាលចិត្តអ្នករាល់គ្នា ឲ្យមានទាំងចំណង់ចង់ធ្វើ និងឲ្យបានប្រព្រឹត្តតាមបំណងព្រះហឫទ័យ ទ្រង់ដែរ”។ ព្រះវិញ្ញាណបរិសុទ្ធធ្វើកិច្ចការនៅក្នុងយើង ដើម្បីយើងជ្រើសរើសយកភាពបរិសុទ្ធជាង អំពើបាប។
ពិចារណា
អ្នកជឿទាំងអស់កំពុងទទួលការញែកជាបរិសុទ្ធ។ សូមចំណាយពេលខ្លះៗដើម្បីធ្វើការពិចារណាពីផ្នែក នៃជីវិតរបស់អ្នក ដែលព្រះជាម្ចាស់បានធ្វើឱ្យអ្នកបរិសុទ្ធចាប់តាំងពីការផ្លាស់ប្រែចិត្តរបស់អ្នក។ ចូរអរព្រះគុណទ្រង់ចំពោះការនេះ។
បន្ទាប់មក សួរថាតើមានផ្នែកផ្សេងទៀតដែលអ្នកនៅតែត្រូវការការបីញែកជាបរិសុទ្ធដែរឬទេ។ សុំឱ្យទ្រង់ធ្វើកិច្ចការនេះ ហើយជួយអ្នកឱ្យចេះសហការជាមួយទ្រង់។
ផ្នែកទី៣៖ គោលបំណងនៃការញែកជាបរិសុទ្ធ
តោះយើងបញ្ចប់ជាមួយគ្នាដោយក្រឡេកមើលទៅកាន់គោលបំណងនៃការញែកជាបរិសុទ្ធ។
-
ការញែកជាបរិសុទ្ធិគឺដើម្បីធ្វើឱ្យយើងអាចលូតលាស់បានសេចក្ដីពោរពេញផងព្រះគ្រីស្ទ
ព្រះជាម្ចាស់ធ្វើឱ្យយើងបរិសុទ្ធដើម្បីឱ្យយើងបានដូចជាព្រះយេស៊ូវ។ បំណងព្រះហឫទ័យរបស់ទ្រង់គឺថា គ្រីស្ទាននឹង “មានគំនិតជារបស់ផងព្រះគ្រីស្ទ” (១ កូរិនថូស ២:១៦; ភីលីព ២:៥) និង “ព្រះវិញ្ញាណរបស់ព្រះគ្រីស្ទ” (រ៉ូម ៨:៩) ពីព្រោះ “ព្រះគ្រីស្ទសណ្ឋិតក្នុងអ្នករាល់គ្នា” (រ៉ូម ៨:១០)។ ផែនការរបស់ព្រះជាម្ចាស់គឺដើម្បីឱ្យយើងលូតលាស់នៅក្នុងព្រះអង្គ (អេភេសូ ៤:១៥) “ព្រះគ្រីស្ទមានរូបរាងឡើងក្នុងអ្នករាល់គ្នា” (កាឡាទី ៤:១៩) ហើយយើងត្រូវក្រឡេកមើលទៅកាន់ទ្រង់ ហើយផ្លាស់ប្តូរទៅជារូបរាងរបស់ព្រះអង្គ (២ កូរិនថូស ៣:១៧)។
តែយើងដឹងថា គ្រប់ការទាំងអស់ផ្សំគ្នា សំរាប់សេចក្ដីល្អដល់ពួកអ្នកដែលស្រឡាញ់ព្រះ គឺដល់ពួកអ្នកដែលទ្រង់ហៅមក តាមព្រះដំរិះទ្រង់ ដ្បិតអ្នកណាដែលទ្រង់បានស្គាល់ជាមុន នោះទ្រង់ក៏ដំរូវទុកជាមុន ឲ្យបានត្រឡប់ដូចជារូបអង្គនៃព្រះរាជបុត្រាទ្រង់ ដើម្បីឲ្យព្រះរាជបុត្រាបានធ្វើជាបងច្បងគេក្នុងពួកបងប្អូនជាច្រើន
គោលបំណងល្អដែលគ្រប់ការទាំងអស់នៅក្នុងជីវិតរបស់អ្នកកំពុងតែធ្វើរួមគ្នាគឺថា៖ អ្នកត្រូវបានត្រឡប់ ដូចជារូបអង្គនៃព្រះយេស៊ូវ។ នេះគឺជារបៀបដែលគ្រីស្ទបិរស័ទត្រូវតែមើលនៅក្នុងជីវិតរបស់គាត់៖ អ្វីៗគ្រប់យ៉ាងដែលកើតឡើងនៅក្នុងជីវិតរបស់អ្នកគឺរួមគ្នាដើម្បីឱ្យអ្នកក្លាយដូចជាព្រះយេស៊ូវ! អ្នកជឿកំពុងតែត្រូវបាន “ត្រឡប់ដូចជារូបអង្គនៃព្រះរាជបុត្រាទ្រង់” ដើម្បីឱ្យយើងសម្រេចបាន “ដល់ខ្នាតកំពស់នៃសេចក្ដីពោរពេញផងព្រះគ្រីស្ទ” (អេភេសូ ៤:១៣)។ តាមរយៈការញែកជាបរិសុទ្ធ យើងក្លាយជាបុត្រាបុត្រីដ៏ល្អឥតខ្ចោះរបស់ព្រះជាម្ចាស់ ដូចជាព្រះយេស៊ូវដែរ។
-
ការញែកជាបរិសុទ្ធគឺដើម្បីឲ្យយើងបានធ្វើជាប្រជារាស្ត្របរិសុទ្ធដល់ព្រះជាម្ចាស់
ព្រះជាម្ចាស់ធ្វើឱ្យយើងបរិសុទ្ធពីព្រោះព្រះអង្គចង់បានមនុស្សដែលបរិសុទ្ធឥតសៅហ្មងសម្រាប់ទ្រង់។ ព្រះជាម្ចាស់ “បានរើសយើងរាល់គ្នាក្នុងព្រះគ្រីស្ទ តាំងពីមុនកំណើតលោកីយមក ប្រយោជន៍ឲ្យយើងរាល់គ្នាបានបរិសុទ្ធ ហើយឥតកន្លែងបន្ទោសបាននៅចំពោះទ្រង់” (អេភេសូ ១:៤)។ បំណងព្រះហឫទ័យរបស់ព្រះជាម្ចាស់គឺដើម្បី “សំអាតមនុស្ស១ពួក ទុកដាច់ជារាស្ត្ររបស់ផងទ្រង់ ដែលឧស្សាហ៍ធ្វើការល្អ” (ទីតុស ២:១៤)។
អេភេសូរ ៥:២៥ក-២៧
..ដូចជាព្រះគ្រីស្ទបានស្រឡាញ់ដល់ពួកជំនុំ ហើយបានប្រគល់ព្រះអង្គទ្រង់ជំនួសផង ដើម្បីឲ្យទ្រង់បានញែកពួកជំនុំចេញជាបរិសុទ្ធ ដោយបានលាងសំអាតនឹងទឹក គឺជាព្រះបន្ទូល ប្រយោជន៍នឹងថ្វាយពួកជំនុំនេះដល់ព្រះអង្គទ្រង់ ទុកជាពួកជំនុំដ៏ឧត្តម ឥតប្រឡាក់ ឥតជ្រួញ ឬមានអ្វីឲ្យដូចឡើយ គឺឲ្យបានបរិសុទ្ធ ហើយឥតកន្លែងបន្ទោសបានវិញ
តាមរយៈការញែកជាបរិសុទ្ធ ព្រះជាម្ចាស់កំពុងតែធ្វើឱ្យ រូបអង្គរបស់ទ្រង់កាន់តែថ្មីឡើងនៅក្នុងយើង។ នៅក្នុងលោកុប្បត្តិ ជំពូក ១ យើងរៀនថាមនុស្សត្រូវបានបង្កើតគេឲ្យចំនឹងរូបអង្គទ្រង់។ រូបអង្គនោះត្រូវបានខូចដោយសារតែអំពើបាប។ ឥឡូវនេះនៅក្នុងព្រះគ្រីស្ទ មានការបង្កើតថ្មី ហើយស្តាររូបអង្គរបស់ព្រះជាម្ចាស់នៅក្នុងប្រជារាស្ត្ររបស់ទ្រង់ដើម្បីឱ្យយើងនឹងឆ្លុះបញ្ចាំងពីភាពបរិសុទ្ធ និងភាពសុចរិតរបស់ទ្រង់។
អេភេសូរ ៤:២០-២៤
តែអ្នករាល់គ្នាមិនបានរៀនឲ្យស្គាល់ព្រះគ្រីស្ទយ៉ាងនោះទេ នោះគឺបើតិចណាស់អ្នករាល់គ្នាបានឮ ហើយរៀននឹងទ្រង់ តាមសេចក្ដីពិតដែលនៅក្នុងព្រះយេស៊ូវដែរ ថាខាងឯកិរិយាប្រព្រឹត្តកាលពីដើម នោះត្រូវឲ្យអ្នករាល់គ្នាបានដោះមនុស្សចាស់ ដែលតែងតែខូចទៅ តាមសេចក្ដីប៉ងប្រាថ្នារបស់សេចក្ដីឆបោកចោលចេញ ហើយឲ្យគំនិតក្នុងចិត្តបានកែប្រែជាថ្មីឡើង ព្រមទាំងប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្ដីសុចរិត ហើយក្នុងសេចក្ដីបរិសុទ្ធរបស់ផងសេចក្ដីពិត តាមភាពព្រះ។
-
ការញែកជាបរិសុទ្ធរៀបចំយើងសម្រាប់ជីវិតដ៏អស់កល្បជានិច្ច
ចុងបញ្ចប់ព្រះជាម្ចាស់ធ្វើឱ្យយើងបរិសុទ្ធដើម្បីរៀបចំយើងសម្រាប់ជីវិតនៅក្នុងនគររបស់ទ្រង់ដែលអ្វីៗគ្រប់យ៉ាងសុទ្ធតែល្អឥតខ្ចោះ។ វាគឺជា "អស់អ្នកដែលមានចិត្តបរិសុទ្ធ" ដែលនឹងបានឃើញព្រះ (ម៉ាថាយ ៥:៨)។
រ៉ូម ៦:២២
តែឥឡូវនេះ ដែលព្រះបានប្រោសឲ្យរួចពីបាប ហើយអ្នករាល់គ្នាបានត្រឡប់ជាបាវបំរើដល់ទ្រង់ នោះអ្នករាល់គ្នាបានផលខាងឯសេចក្ដីបរិសុទ្ធវិញ ហើយទីបំផុតនៃអំពើទាំងនោះ គឺជាជីវិតអស់កល្បជានិច្ចផង
បងប្អូនប្រុសស្រីអើយ ចូរអរសប្បាយចុះ! ថ្ងៃមួយ យើងនឹងបានល្អឥតខ្ចោះ! យើងនឹងមានសេរីភាពរួចពីអំពើបាបជារៀងរហូត។ យើងនឹងបរិសុទ្ធដូចជាព្រះគ្រីស្ទ! យើងនឹងមានដួងចិត្តបរិសុទ្ធ ហើយនឹងមើលឃើញព្រះជាម្ចាស់!
ការសន្និដ្ឋាន
មនុស្សមួយចំនួនខ្វល់ខ្វាយថា ពួកគេនឹងបរាជ័យខាងវិញ្ញាណ។ ចូរមានជំនឿ! ការជឿជាក់របស់យើងគឺមិនមែនជាសមត្ថភាពរបស់យើងដើម្បីសម្រេចឱ្យបាននូវការញែកជាបរិសុទ្ធទេ ដ្បិតយើងនឹងបរាជ័យបើវាជាផែនការរបស់យើងមែននោះ។ ការជឿជាក់របស់យើងទៅលើសមត្ថភាពរបស់ព្រះជាម្ចាស់គឺដើម្បីញែកយើងជាបរិសុទ្ធ។
ហេប្រឺ ១០:១៤
ដ្បិតទ្រង់ធ្វើឲ្យពួកអ្នក ដែលបានញែកជាបរិសុទ្ធហើយ បានគ្រប់លក្ខណ៍អស់កល្បជានិច្ច ដោយសារដង្វាយតែ១នោះ
នៅក្នុងភាសាក្រិក ខគម្ពីរនេះបញ្ជាក់ច្បាស់ថា ព្រះយេស៊ូវបានធ្វើឲ្យគេល្អឥតខ្ចោះរួចហើយ («កិច្ចការចប់សព្វគ្រប់ហើយ») អស់អ្នកដែលកំពុងត្រូវបានទទួលញែកជាបរិសុទ្ធឥឡូវនេះ (សកម្មភាពកំពុងតែដំណើរការ)។ តាមរយៈទស្សនៈដ៏អស់កល្បជានិច្ចរបស់ព្រះជាម្ចាស់ ព្រះយេស៊ូវបានធ្វើឱ្យគ្រប់គ្នាបានល្អឥតខ្ចោះ ដែលស្ថិតនៅក្នុងដំណើរការនៃការញែកជាបរិសុទ្ធ!
ភីលីព ១:៦
ខ្ញុំជឿសេចក្ដីនេះជាយ៉ាងជាក់ថា ព្រះអង្គ ដែលទ្រង់បានចាប់តាំងធ្វើការល្អក្នុងអ្នករាល់គ្នា ទ្រង់នឹងធ្វើឲ្យកាន់តែពេញខ្នាតឡើង ទាល់តែដល់ថ្ងៃនៃព្រះយេស៊ូវគ្រីស្ទ
ហេប្រឺ ១០:១០
គឺដោយសារចំណង់ព្រះហឫទ័យនោះ ដែលយើងរាល់គ្នាបានញែកជាបរិសុទ្ធ ដោយសារដង្វាយថ្វាយរូបអង្គព្រះយេស៊ូវគ្រីស្ទ១ដងជាសំរេច។
យើងត្រូវបានព្រះយេស៊ូវញែកជាបរិសុទ្ធរួចហើយ។ ឥឡូវនេះ ព្រះវិញ្ញាណបរិសុទ្ធត្រូវបានប្រទានដល់យើង ដើម្បីធ្វើការការញែកជាបរិសុទ្ធនៅក្នុងយើង។ ព្រះវិញ្ញាណបរិសុទ្ធនឹងជួយយើងឱ្យទទួលបទពិសោធន៍នូវ អ្វីដែលព្រះយេស៊ូវបានសម្រេចសម្រាប់យើង។ ជាថ្មីម្តងទៀត យើងមើលឃើញសេចក្តីពិតថា អ្វីដែលព្រះវរបិតាបង្គាប់ ព្រះរាជ្យបុត្រាសម្រេចបាន (បានតម្រូវទុកមក) ហើយព្រះវិញ្ញាណបរិសុទ្ធ ធ្វើឱ្យយើងអាចធ្វើបានទទួល។
យូដាស ២៤-២៥
រីឯព្រះ ដែលអាចនឹងថែរក្សា មិនឲ្យអ្នករាល់គ្នាជំពប់ដួល ហើយនឹងដាក់អ្នករាល់គ្នា នៅចំពោះសិរីល្អទ្រង់ ដោយឥតមានកន្លែងបន្ទោសបាន ព្រមទាំងមានចិត្តត្រេកអរផង គឺជាព្រះអង្គដ៏ជាព្រះតែមួយ ជាព្រះអង្គសង្គ្រោះនៃយើងរាល់គ្នា ដោយសារព្រះយេស៊ូវគ្រីស្ទ ជាព្រះអម្ចាស់នៃយើង នោះសូមឲ្យទ្រង់បានសិរីល្អ ឫទ្ធានុភាព ព្រះចេស្តា នឹងអំណាច តាំងពីមុនអស់កល្ប នៅជាន់ឥឡូវនេះ ហើយទៅដល់អស់កល្បជានិច្ចតទៅ។ អាម៉ែន។:៚.
សង្ខេប៖ ការញែកជាបរិសុទ្ធមានន័យថាព្រះជាម្ចាស់ញែកអស់អ្នកដែលទ្រង់រាប់ជាសុចរិតដោយសារសេចក្តីជំនឿលើព្រះគ្រីស្ទ ហើយបញ្ជូនព្រះវិញ្ញាណបរិសុទ្ធឱ្យគង់នៅក្នុងពួកគេដើម្បីធ្វើឱ្យពួកគេអាចធ្វើបាន លូតលាស់នៅក្នុងភាពបរិសុទ្ធ និងទទួលបានជ័យជំនះលើអំពើបាប និងសាច់ឈាមរបស់ពួកគេ។ នៅពេលគេធ្វើបាបកាន់តែតិចទៅៗ ហើយស្តាប់បង្គាប់តាមព្រះជាម្ចាស់កាន់តែច្រើនឡើងៗ ពួកគេកំពុងតែត្រូវបានត្រឡប់ដូចជារូបអង្គនៃព្រះយេស៊ូវ ក្លាយជាប្រជារាស្ត្រដ៏វិសុទ្ធរបស់ព្រះជាម្ចាស់ ហើយត្រូវបានរៀបចំសម្រាប់ជីវិតដ៏អស់កល្បជានិច្ចនៅក្នុងនគររបស់ព្រះអង្គ។
សូមចំណាយពេលខ្លះៗដើម្បីអរព្រះគុណព្រះជាម្ចាស់សម្រាប់ពះពរនៃការញែកជាបរិសុទ្ធ!
* កំណត់សម្គាល់របស់គ្រូទី១
សូមស្រមៃថាអ្នកចាត់ចែងក្លិបបាល់ទាត់រៀលម៉ាឌ្រីតមកលេងប្រទេសកម្ពុជា។ គាត់ឃើញក្មេងៗលេងបាល់ទាត់ ហើយចុះកុងត្រាឱ្យពួកគេលេងក្នុងក្លិបរបស់គាត់។ ពិតណាស់ ពួកគេមិនទាន់មានសមត្ថភាពដូចជាកីឡាករបាល់ទាត់អាជីពនៅឡើយទេ។ ពួកគេនៅខ្វះមិនទាន់ដល់ស្តង់ដារនៅឡើយ។ ប៉ុន្តែអ្នកចាត់ចែងក្លិបបានសម្រេចចិត្តជ្រើសរើសពួកគេដើម្បីចាប់ផ្តើមដំណើរការហ្វឹកហាត់រយៈពេលយូររហូតទាល់តែថ្ងៃមួយពួកគេក្លាយជាកីឡាករបាល់ទាត់អាជីព។
ស្រដៀងគ្នាដែរ ព្រះជាម្ចាស់ប្រកាសថាអ្នកក្លាយជាមនុស្សសុចរិត បើទោះបីជាអ្នកនៅខ្វះមិនទាន់ដល់ស្តង់ដារនៅឡើយ។ ឥឡូវនេះ ព្រះអង្គកំពុងតែហ្វឹកហ្វឺនអ្នកតាមរយៈព្រះបន្ទូលរបស់ទ្រង់ និងព្រះវិញ្ញាណបរិសុទ្ធដើម្បីឱ្យថ្ងៃមួយអ្នកនឹងរស់នៅក្លាយជាកូនដែលសុចរិតរបស់ព្រះជាម្ចាស់នៅក្នុងនគររបស់ព្រះអង្គជារៀងរហូត!
ពិភាក្សា៖ តើអ្នកគិតថាក្មេងតូចម្នាក់មកពីភូមិមួយនឹងមានអារម្មណ៍បែបណាដែលត្រូវបានជ្រើសរើសឱ្យក្លាយជាកីឡាករអាជីព? តើអ្នកមានអារម្មណ៍បែបណាដោយដឹងថាព្រះជាម្ចាស់បានជ្រើសរើសអ្នកឱ្យក្លាយជាមនុស្សសុចរិតជារៀងរហូត?
