មេរៀនទី ១០: ការរស់ឡើងវិញ
សម្រង់សម្តីព្រះយេស៊ូវ៖ ព្រះយេស៊ូវមានបន្ទូលទៅនាងថា ខ្ញុំជាសេចក្ដីរស់ឡើងវិញ ហើយជាជីវិត អ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញដែរ ឯអ្នកណាដែលរស់នៅ ហើយជឿដល់ខ្ញុំ នោះមិនត្រូវស្លាប់ឡើយ នាងជឿសេចក្ដីនេះឬទេ (យ៉ូហាន ១១:២៥-២៦)
ព្រះពរខាងវិញ្ញាណបន្ទាប់ទៀតដែលយើងនឹងសិក្សាគឺការរស់ឡើងវិញ។ ការរស់ឡើងវិញមានអត្ថន័យលើសពីការមានជីវិតឡើងវិញក្រោយពីការសុគត។ នៅក្នុងព្រះគម្ពីរ មនុស្សមួយចំនួនត្រូវបានប្រោសឱ្យរស់ឡើងវិញពីសេចក្តីស្លាប់៖
-
កូនប្រុសរបស់ស្រ្តីមេម៉ាយក្រុងសារិបតា (១ ពង្សាវតារក្សត្រ ១៧:៨-២៤),
-
កូនប្រុសរបស់ស្រ្តីនៅស៊ូណែម (២ ពង្សាវតារក្សត្រ ៤:៨-៣៧),
-
បុរសដែលត្រូវបោះចូលទៅក្នុងផ្នូររបស់អេលីសេ (២ ពង្សាវតារក្សត្រ ១៣:២០-២១),
-
កូនប្រុសរបស់ស្ត្រីមេម៉ាយក្រុងណាអ៊ីន (លូកា ៧:១១-១៧),
-
កូនស្រីរបស់លោកយ៉ៃរ៉ូស (ម៉ាកុស៥:២១-៤៣),
-
ឡាសា (យ៉ូហាន ១១:១-៤៤),
-
មនុស្សដែលរស់វិញនៅពេលព្រះយេស៊ូវសុគត (ម៉ាថាយ ២៧:៥០-៥៣),
-
តេប៊ីថា (កិច្ចការ ៩:៣៦-៤២)
-
អើទីកុស (កិច្ចការ ២០:៧-១២)។
មនុស្សទាំងនេះបានស្លាប់ ហើយមានជីវិតរស់វិញនៅក្នុងរូបកាយដដែលដើម្បីបន្តជីវិតរបស់ពួកគេ ដូចជាពីមុន ហើយបន្ទាប់មកពួកគេបានស្លាប់ម្តងទៀតនាពេលក្រោយមក។ ទាំងអស់នេះមិនដូចគ្នានឹងការរស់ឡើងវិញនោះទេ។ ដើម្បីរស់ឡើងវិញគឺត្រូវមានជីវិតជាមួយនឹងរូបកាយដែលទទួលនូវសិរីល្អមិនចេះស្លាប់ទៀតឡើយ។
ដើម្បីរស់ឡើងវិញគឺត្រូវបានប្រោសឱ្យមានជីវិតរស់ពីស្លាប់ជាមួយរូបកាយដែលមានសិរីរុងរឿងថ្មី
មិនស្លាប់ទៀតឡើយ។
មានតែមួយអង្គគត់នៅក្នុងប្រវត្តិសាស្ត្ររបស់ពិភពលោកនេះដែលត្រូវបានប្រោសឱ្យមានព្រះជន្មរស់ឡើងវិញគឺ ព្រះយេស៊ូវ។ ព្រះអង្គគឺជាភ័ស្តុតាងបញ្ជាក់ថាការរស់ឡើងវិញពិតជាអាចកើតឡើងបាន។
១ កូរិនថូស ១៥:១២
បើសិនជាបានផ្សាយដំណឹងល្អពីព្រះគ្រីស្ទថា ទ្រង់មានព្រះជន្មរស់ពីស្លាប់ឡើងវិញហើយ នោះធ្វើដូចម្តេចឲ្យពួកអ្នករាល់គ្នាខ្លះ និយាយបាន ថាពួកស្លាប់មិនរស់ឡើងវិញទេ
តោះសូមមើលឱ្យបានច្បាស់ពីការរស់ឡើងវិញរបស់ព្រះយេស៊ូវដើម្បីយល់ដឹងបន្ថែមទៀតអំពីព្រះពរខាងវិញ្ញាណនៃការរស់ឡើងវិញនេះដែលនៅថ្ងៃមួយក៏ជារបស់យើងផដែរ។
ផ្នែកទី ១៖ ការរស់ឡើងវិញរបស់ព្រះយេស៊ូវ
ការរស់ឡើងវិញរបស់ព្រះយេស៊ូវគឺត្រូវបានកត់ត្រាទុកនៅក្នុងសៀវភៅដំណឹងល្អទាំងបួនក្បាល។ យើងនឹងអានចេញពីសៀវភៅនីមួយៗដើម្បីទទួលបានរូបភាពពេញលេញអំពីអ្វីដែលបានកើតឡើង។
ម៉ាកុស ១៦:១-៧
កាលផុតថ្ងៃឈប់សំរាកហើយ នោះម៉ារា ជាអ្នកស្រុកម៉ាក់ដាឡា ម៉ារា ជាម្តាយយ៉ាកុប នឹងសាឡូមេបាននាំគ្នាទិញគ្រឿងក្រអូប ដើម្បីនឹងទៅអប់ព្រះសពទ្រង់ ដល់ព្រលឹមឡើង នៅថ្ងៃទី១ក្នុងអាទិត្យនោះ កាលថ្ងៃទើបនឹងរះឡើង គេក៏ទៅឯផ្នូរ ព្រមទាំងនិយាយគ្នាបណ្តើរថា តើមានអ្នកណា នឹងប្រមៀលថ្មចេញពីមាត់ផ្នូរឲ្យយើង តែកាលបានងើបមើលទៅ នោះឃើញថ្មបានប្រមៀលចេញហើយ (ថ្មនោះធំណាស់) លុះកាលបានចូលទៅក្នុងផ្នូរ ក៏ឃើញកំឡោះម្នាក់ ពាក់អាវសអង្គុយនៅខាងស្តាំ ហើយស្ត្រីទាំងនោះមានសេចក្ដីភាំងស្លុត តែអ្នកនោះនិយាយថា កុំឲ្យភ័យឡើយ អ្នករាល់គ្នាមករកព្រះយេស៊ូវ ពីណាសារ៉ែត ដែលត្រូវឆ្កាង ទ្រង់មានព្រះជន្មរស់ឡើងវិញហើយ ទ្រង់មិនគង់នៅទីនេះទេ មើល នេះជាកន្លែងដែលគេបានផ្តេកព្រះសពទ្រង់ ចូរអ្នករាល់គ្នាទៅប្រាប់ពួកសិស្សទ្រង់ ព្រមទាំងពេត្រុសផងថា ទ្រង់យាងទៅឯស្រុកកាលីឡេមុនអ្នករាល់គ្នាហើយ អ្នករាល់គ្នានឹងឃើញទ្រង់នៅស្រុកនោះ ដូចជាទ្រង់បានប្រាប់ទុក
ម៉ាថាយ ២៨:៨-១០
ស្ត្រី២នាក់នោះក៏ដើរចេញពីផ្នូរជាប្រញាប់ទាំងភ័យ ហើយមានសេចក្ដីអំណរជាខ្លាំងផង ក៏រត់ទៅប្រាប់ដល់ពួកសិស្សទ្រង់ តែកាលនាងកំពុងតែទៅ នោះព្រះយេស៊ូវទ្រង់យាងមកជួបនឹងនាង មានបន្ទូលថា ជំរាបសួរ រួចអ្នកទាំង២ក៏ចូលទៅឱបព្រះបាទថ្វាយបង្គំទ្រង់ នោះព្រះយេស៊ូវទ្រង់មានបន្ទូលទៅនាងថា កុំខ្លាចអី ចូរទៅប្រាប់ដល់បងប្អូនខ្ញុំផង ឲ្យគេទៅឯស្រុកកាលីឡេទៅ គេនឹងឃើញខ្ញុំនៅស្រុកនោះហើយ។
លូកា ២៤:៣៦-៤៣
កាលកំពុងតែប្រាប់រឿងទាំងនោះ ស្រាប់តែព្រះយេស៊ូវទ្រង់ឈរនៅកណ្តាលគេ មានបន្ទូលថា សូមឲ្យអ្នករាល់គ្នាបានប្រកបដោយសេចក្ដីសុខសាន្តចុះ តែគេភ័យញ័រ ទាំងមានសេចក្ដីស្ញែងខ្លាចជាខ្លាំង ដោយស្មានថាជាខ្មោចលងវិញ ទ្រង់មានបន្ទូលទៅគេថា ហេតុអ្វីបានជាវិលវល់ ហើយសង្ស័យក្នុងចិត្តដូច្នេះ ចូរមើលមកដៃនឹងជើងខ្ញុំ ឲ្យបានដឹងថា នេះគឺខ្ញុំពិតមែន ចូរពាល់ខ្ញុំមើល ដ្បិតខ្មោចគ្មានសាច់ឬឆ្អឹង ដូចជាឃើញខ្ញុំនេះទេ លុះទ្រង់មានបន្ទូលដូច្នោះរួចហើយ នោះក៏បង្ហាញព្រះហស្ត នឹងព្រះបាទទ្រង់ដល់គេ កាលគេមិនទាន់ជឿនៅឡើយ ដោយព្រោះមានសេចក្ដីអំណរ នឹងសេចក្ដីអស្ចារ្យ នោះទ្រង់មានបន្ទូលថា នៅទីនេះ អ្នករាល់គ្នាមានអ្វីបរិភោគឬទេ គេក៏យកត្រីអាំង១ដុំ នឹងសំណុំឃ្មុំមកថ្វាយទ្រង់ រួចទ្រង់យកទៅសោយនៅមុខគេ
យ៉ូហាន ២០:២៤-២៩
រីឯថូម៉ាស ជាម្នាក់ក្នុងពួក១២ ដែលគេហៅថា ឌីឌីម គាត់មិននៅជាមួយ ក្នុងកាលដែលព្រះយេស៊ូវយាងមកនោះទេ ដូច្នេះ ពួកសិស្សឯទៀតប្រាប់គាត់ថា យើងបានឃើញព្រះអម្ចាស់ តែគាត់ឆ្លើយថា បើខ្ញុំមិនឃើញស្នាមដែកគោលនៅព្រះហស្តទ្រង់ ទាំងលូកម្រាមទៅក្នុងស្នាមដែកគោលនោះ ហើយលូកដៃខ្ញុំទៅក្នុងចំហៀងទ្រង់ នោះខ្ញុំមិនព្រមជឿទេ ដល់៨ថ្ងៃក្រោយមក ពួកសិស្សទ្រង់នៅក្នុងផ្ទះម្តងទៀត ហើយថូម៉ាសក៏នៅជាមួយដែរ នោះព្រះយេស៊ូវទ្រង់យាងមក ឈរកណ្តាលពួកគេ ទាំងទ្វារនៅបិទ ហើយមានបន្ទូលថា សូមឲ្យអ្នករាល់គ្នាបានប្រកបដោយសេចក្ដីសុខសាន្ត រួចទ្រង់មានបន្ទូលទៅថូម៉ាសថា ចូរលូកម្រាមដៃអ្នកមក ស្ទាបមើលដៃខ្ញុំឯណេះ ហើយលូកដៃមកក្នុងចំហៀងខ្ញុំផង កុំឲ្យមានចិត្តមិនជឿឡើយ ត្រូវឲ្យជឿចុះ នោះថូម៉ាសទូលឆ្លើយថា ឱព្រះអម្ចាស់ទូលបង្គំ ឱព្រះនៃទូលបង្គំអើយ ព្រះយេស៊ូវមានបន្ទូលទៅគាត់ថា ថូម៉ាសអើយ អ្នកជឿដោយព្រោះបានឃើញខ្ញុំទេតើ មានពរហើយ អ្នកណាដែលជឿឥតឃើញសោះ។
រូបកាយរស់ឡើងវិញរបស់ព្រះយេស៊ូវបង្ហាញប្រាប់នូវសេចក្តីពិតពីអ្វីដែលរូបកាយដែលរស់ឡើងវិញរបស់យើងនឹងមានលក្ខណៈបែបយ៉ាងណា។
តើរូបកាយដែលរស់ឡើងវិញរបស់ព្រះយេស៊ូវមានលក្ខណៈដូចម្តេច?
-
ម៉ាថាយ ២៨:៩ ព្រះបាទារបស់ទ្រង់អាចត្រូវបានឱប។
-
លូកា ២៤:៣៦–៣៩ ព្រះអង្គមានរូបកាយមានសាច់ឈាម និងឆ្អឹង។
-
លូកា ២៤:៤១ ទ្រង់ទទួលទានត្រីជាអាហារ។
-
យ៉ូហាន ២០:២៦ ព្រះអង្គអាចចូលទៅកាន់បន្ទប់ចាក់សោបាន។
-
យ៉ូហាន ២០:២៧ រូបកាយរស់ឡើងវិញរបស់ព្រះអង្គនៅតែមានស្នាមដែកគោល។
ពិភាក្សា៖ តើការពិតទាំងនេះប្រាប់យើងអំពីរូបកាយដែលរស់ឡើងវិញរបស់ព្រះយេស៊ូវយ៉ាងណាខ្លះ?
កំណត់ចំណាំរបស់គ្រូ៖ ចំណុចគន្លឹះគឺ៖
-
រាងកាយររបស់ព្រះអង្គគឺជារូបកាយ - អាចចាប់កាន់បាន ហើយមានសាច់ និងឆ្អឹង ប៉ុន្តវាក៏មានសមត្ថភាពពិសេសផងដែរ - គឺអាចចូលទៅកាន់បន្ទប់ចាក់សោជិតបាន (ហើយក្រោយមកត្រូវបានលើកឡើងទៅកាន់ស្ថានសួគ៌)។
-
ពេលពួកសិស្សឃើញព្រះអង្គលើកដំបូងពួកគេគិតថាទ្រង់គឺជាវិញ្ញាណ ប៉ុន្តែបន្ទាប់មកពួកគេស្គាល់ថាជាទ្រង់ ហើយដឹងថាគឺជាព្រះយេស៊ូវ។
-
រាងកាយរបស់ទ្រង់មានលក្ខណៈខុសពីនៅពេលដែលទ្រង់សុគតកាលពីប៉ុន្មានថ្ងៃមុន។ ព្រះអង្គមិនមានហូរឈាម ឬការឈឺចាប់នោះទេ។ ព្រះអង្គមានសុខភាពល្អ ហើយមានកម្លាំងមាំមួន ប៉ុន្តែទ្រង់នៅតែមានស្នាមដែកគោល និងស្នាមលំពែងនៅលើខ្លួនទ្រង់។
ផ្នែកទី ២៖ សារៈសំខាន់នៃការរស់ឡើងវិញរបស់ព្រះយេស៊ូវ
សម្រង់សម្តីរបស់ពេត្រុស៖ ឯព្រះយេស៊ូវនេះ ព្រះបានប្រោសឲ្យទ្រង់មានព្រះជន្មរស់ឡើងវិញ ហើយពួកយើងនេះជាទីបន្ទាល់ពីទ្រង់ទាំងអស់គ្នា (កិច្ចការ ២:៣២)
ការរស់ឡើងវិញរបស់ព្រះយេស៊ូវគឺជាសារគន្លឹះរបស់ពួកសាវ័ក។ តាមការពិត តួរនាទីរបស់ពួកសាវ័កគឺត្រូវធ្វើជាសាក្សីនៃការរស់ឡើងវិញរបស់ព្រះអង្គ (កិច្ចការ ១:២២, ៣:១៥)។
កិច្ចការ ៤:៣៣
ពួកសាវកក៏ធ្វើបន្ទាល់ ដោយព្រះចេស្តាដ៏ធំ ពីដំណើរដែលព្រះអម្ចាស់យេស៊ូវមានព្រះជន្មរស់ឡើងវិញ ហើយមានព្រះគុណជាធំ សណ្ឋិតលើគេទាំងអស់គ្នាដែរ
លោកពេត្រុសបានអធិប្បាយអំពីការរស់ឡើងវិញនៅថ្ងៃទីហាសិប។ សូមអាន៖ កិច្ចការ ២:២២-៣២ (សុំឱ្យម្នាក់នៅក្នុងថ្នាក់ធ្វើជាលោកពេត្រុស ហើយអធិប្បាយខទាំងនេះ)។
លោកពេត្រុសបានប្រកាសថាព្រះជាម្ចាស់បានប្រោសព្រះយេស៊ូវឱ្យរស់ឡើងវិញ ពីព្រោះសេចក្តីស្លាប់មិនអាចឃាត់ទ្រង់បាននោះទេ។ ព្រះអង្គមិនត្រូវបានជាប់នៅក្នុងស្ថានឃុំព្រលឹងមនុស្សស្លាប់ទេ ហើយរូបសាច់របស់ទ្រង់ក៏មិនខូចដែរ ប៉ុន្តែព្រះជាម្ចាស់បានប្រោសឱ្យទ្រង់រស់ពីស្លាប់ឡើងវិញ។
លោកប៉ូលក៏បានអធិប្បាយអំពីការរស់ឡើងវីញរបស់ព្រះយេស៊ូវ និងសេចក្តីសង្ឃឹមពីការរស់ឡើងវិញរបស់អ្នកដើរតាមទ្រង់ដែរ។ សូមអាន កិច្ចការ ១៣:២៦-៣៧
(សុំឱ្យនរណាម្នាក់នៅក្នុងថ្នាក់ធ្វើជាលោកប៉ូល ហើយអធិប្បាយ ខទាំងនេះ)។
ពិភាក្សាយ៖ តើមានសារៈសំខាន់អ្វីពីការរស់ឡើងវិញរបស់ព្រះយេស៊ូវ ដែលវាជាចំណុចសំខាន់នៃការអធិប្បាយរបស់ពួកសាវ័ក?
ការរស់ឡើងវិញរបស់ព្រះយេស៊ូវបង្ហាញថា៖
(១) ព្រះយេស៊ូវគឺជាព្រះរាជបុត្រារបស់ព្រះជាម្ចាស់
រ៉ូម ១:៣-៤
គឺពីព្រះរាជបុត្រានៃព្រះ ដែលខាងឯសាច់ឈាម ទ្រង់បានចាប់កំណើតក្នុងព្រះវង្សាហ្លួងដាវីឌ តែខាងឯព្រះវិញ្ញាណនៃសេចក្ដីបរិសុទ្ធ នោះបានសំដែងមកច្បាស់ថា ទ្រង់ជាព្រះរាជបុត្រារបស់ព្រះពិត ទាំងមានព្រះចេស្តាផង ដោយទ្រង់បានរស់ពីស្លាប់ឡើងវិញ គឺជាព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា
(២) ព្រះយេស៊ូវមានព្រះជន្មរស់ជារៀងរហូត ហើយមានអំណាចលើសេចក្តីស្លាប់
វិវរណៈ ១:១៧-១៨
កាលខ្ញុំឃើញទ្រង់ នោះខ្ញុំដួលនៅទៀបព្រះបាទាទ្រង់ដូចជាស្លាប់ តែទ្រង់ដាក់ព្រះហស្តស្តាំលើខ្ញុំ ដោយបន្ទូលថា កុំខ្លាចអ្វីឡើយ អញជាដើម ហើយជាចុង ជាព្រះដ៏រស់នៅ អញបានស្លាប់ តែមើល អញរស់នៅអស់កល្បជានិច្ចរៀងរាបតទៅវិញ អញក៏មានកូនសោនៃសេចក្ដីស្លាប់ នឹងស្ថានឃុំព្រលឹងមនុស្សស្លាប់ដែរ
អេភេសូរ ១:១៩-២១
…តាមដែលកំឡាំងទ្រង់ដ៏មានឫទ្ធិបានពូកែនឹងធ្វើ ជាព្រះចេស្តាដែលទ្រង់បានសំដែងចេញ ដោយប្រោសព្រះគ្រីស្ទ ឲ្យមានព្រះជន្មរស់ពីស្លាប់ឡើងវិញ ព្រមទាំងតាំងឲ្យគង់ខាងស្តាំទ្រង់ នៅស្ថានដ៏ខ្ពស់ ឲ្យខ្ពស់ជាងអស់ទាំងពួកគ្រប់គ្រង ពួកមានអំណាច មានឫទ្ធិបារមី នឹងពួកមេទាំងប៉ុន្មាន ហើយគ្រប់ទាំងឈ្មោះដែលបានតាំងឡើងដែរ មិនមែនតែក្នុងបច្ចុប្បន្ននេះតែប៉ុណ្ណោះ គឺទៅក្នុងអនាគតខាងមុខទៀតផង
(៣) នៅក្នុងព្រះយេស៊ូវ យើងនឹងមានជីវិតជារៀងរហូត
១ កូរិនថូស ១៥:២០-២២
តែឥឡូវនេះ ព្រះគ្រីស្ទទ្រង់មានព្រះជន្មរស់ពីស្លាប់ឡើងវិញជាពិត ជាផលដំបូងពីពួកអ្នកដែលបានដេកលក់ទៅហើយ ដ្បិតដែលសេចក្ដីស្លាប់បានមកដោយសារមនុស្ស នោះសេចក្ដីដែលមនុស្សស្លាប់បានរស់ឡើងវិញ ក៏មកដោយសារមនុស្សដែរ ព្រោះ ដូចជាគ្រប់មនុស្សទាំងអស់បានត្រូវស្លាប់ក្នុងលោកអ័ដាមជាយ៉ាងណា នោះគ្រប់គ្នាក៏នឹងបានប្រោសឲ្យរស់ ក្នុងព្រះគ្រីស្ទយ៉ាងនោះដែរ
ចូរកត់សម្គាល់ពីការទំនាក់ទំនងគ្នារវាងសេចក្តីពិតដ៏អស្ចារ្យទាំងនេះ។ ដោយសារតែព្រះយេស៊ូវគឺជាព្រះរាជបុត្រារបស់ព្រះជាម្ចាស់ដែលមានព្រះជន្មរស់ជារៀងរហូត និងមានអំណាចលើសេចក្តីស្លាប់ (“នសោនៃសេចក្ដីស្លាប់ នឹងស្ថានឃុំព្រលឹងមនុស្សស្លាប់”) ថានៅក្នុងទ្រង់ពួកយើងនឹងបានប្រោសឱ្យរស់ឡើងវិញ!
កំណត់ចំណាំសម្រាប់គ្រូ៖ ការរស់ឡើងវិញរបស់ព្រះយេស៊ូវបំផ្លាស់បំប្រែពួកសិស្សរបស់ទ្រង់ចេញពីមនុស្សដែលតែងតែលាក់ខ្លួន និងមានការភ័យខ្លាចឱ្យក្លាយទៅជាមនុស្សមានភាពក្លាហានក្នុងការប្រកាសពីការរស់ឡើងវិញរបស់ព្រះគ្រីស្ទ! ដោយសារសេចក្តីពិតនេះ ពួកគេមិនខ្លាចស្លាប់ទៀតឡើយ។ ហេតុអ្វី? ពីព្រោះពួកគេដឹងថាអ្នកជឿនឹងត្រូវបានប្រោសឱ្យរស់ឡើងវិញបន្ទាប់ពីយើងស្លាប់ទៅ។
ផ្នែកទី ៣៖ ការរស់ឡើងវិញរបស់យើង
មកដល់ស៊េរីនេះរហូតដល់ពេលនេះ រាល់ព្រះពរខាងវិញ្ញាណទាំងអស់ដែលយើងបានសិក្សាអាចក្លាយទៅជាបទពិសោធន៍ទាំងស្រុង ឬជាផ្នែកមួយនៅក្នុងជីវិតរបស់យើងនាពេលឥឡូវនេះ។ ប៉ុន្តែការរស់ឡើងវិញគឺជាសេចក្តីសង្ឃឹមដែលយើងមានសម្រាប់ពេលអនាគត។ សេចក្តីសង្ឃឹមរបស់គ្រីស្ទបរិស័ទគឺការរស់ឡើងវិញរបស់រូបកាយនៅថ្ងៃចុងក្រោយ (នោះគឺនៅពេលព្រះយេស៊ូវយាងត្រឡប់មកវិញជាលើកទីពីរ)។ យើងមានសេចក្តីសង្ឃឹមនេះតាមរយៈការសន្យសារបស់ព្រះយេស៊ូវ។ ព្រះយេស៊ូវមានព្រះបន្ទូលថា៖
យ៉ូហាន ៦:៣៩-៤០
ឯបំណងព្រះហឫទ័យនៃព្រះវរបិតា ដែលចាត់ឲ្យខ្ញុំមក នោះគឺមិនចង់ឲ្យខ្ញុំបាត់អ្នកណា ក្នុងគ្រប់អស់ទាំងមនុស្ស ដែលទ្រង់ប្រទានមកខ្ញុំនោះឡើយ គឺទ្រង់ចង់ឲ្យខ្ញុំប្រោសទាំងអស់ឲ្យរស់ឡើង នៅថ្ងៃចុងបំផុតវិញ នេះហើយជាបំណងព្រះហឫទ័យនៃព្រះវរបិតាខ្ញុំ គឺឲ្យអស់អ្នកណាដែលឃើញព្រះរាជបុត្រា ហើយក៏ជឿដល់ទ្រង់ បានជីវិតដ៏នៅអស់កល្បជានិច្ច ហើយខ្ញុំនឹងឲ្យអ្នកនោះរស់ឡើងវិញ នៅថ្ងៃចុងបំផុត។
យ៉ូហាន ៦:៤៤
គ្មានអ្នកណាអាចនឹងមកឯខ្ញុំបានទេ លើកតែព្រះវរបិតា ដែលចាត់ខ្ញុំឲ្យមក ទ្រង់ទាញនាំគេប៉ុណ្ណោះ ហើយខ្ញុំនឹងឲ្យអ្នកនោះរស់ឡើងវិញ នៅថ្ងៃចុងបំផុតដែរ
យ៉ូហាន ៦:៥៤
អ្នកណាដែលបរិភោគសាច់ នឹងឈាមរបស់ខ្ញុំ នោះមានជីវិតដ៏នៅអស់កល្បជានិច្ច ហើយខ្ញុំនឹងឲ្យអ្នកនោះរស់ឡើងវិញ នៅថ្ងៃចុងបំផុត
យ៉ូហាន ១១:២៥-២៦
ព្រះយេស៊ូវមានបន្ទូលទៅនាងថា ខ្ញុំជាសេចក្ដីរស់ឡើងវិញ ហើយជាជីវិត អ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញដែរ ឯអ្នកណាដែលរស់នៅ ហើយជឿដល់ខ្ញុំ នោះមិនត្រូវស្លាប់ឡើយ នាងជឿសេចក្ដីនេះឬទេ
ព្រះយេស៊ូវបានសន្យាថាទ្រង់នឹងឲ្យមនុស្សទាំងអស់ដែលជឿលើទ្រង់នោះរស់ឡើងវិញ។ ពិភាក្សាជាមួយដៃគូ៖ តើអ្នកមានទំនុកចិត្តប៉ុណ្ណាចំពោះការសន្យារបស់ព្រះយេស៊ូវថាទ្រង់នឹងឲ្យអ្នករស់ឡើងវិញ?
មុនពេលទ្រង់សុគត ព្រះយេស៊ូវបានដឹងថាព្រះអង្គនឹងត្រូវមានព្រះជន្មរស់ឡើងវិញ។ ទ្រង់បានប្រកាសប្រាប់មនុស្ស ដែលថាទ្រង់នឹងរស់ឡើងវិញ។ ព្រះអង្គមានជំនឿចិត្តពេញលេញថាព្រះជាម្ចាស់ដ៏ជាព្រះវរបិតានឹងធ្វើកិច្ចការនេះ។ សូមអានពីអ្វីដែលទ្រង់មានបន្ទូលនៅក្នុងខគម្ពីរទាំងអស់នេះ។ សូមចំណាំថាតួរនាទីរបស់ព្រះយេស៊ូវសម្រាប់ អង្គទ្រង់គឺជា “កូនមនុស្ស”។
ម៉ាកុស ៨:៣១
រួចទ្រង់ចាប់តាំងបង្រៀនគេថា កូនមនុស្សត្រូវរងទុក្ខជាច្រើន ហើយត្រូវពួកចាស់ទុំ ពួកសង្គ្រាជ នឹងពួកអាចារ្យ បោះបង់ចោល ហើយសំឡាប់លោក រួច៣ថ្ងៃក្រោយដែលលោកស្លាប់ទៅ នោះលោកនឹងរស់ឡើងវិញ
ម៉ាកុស១០:៣២-៣៤
ទ្រង់ក៏យកពួក១២មកម្តងទៀត ចាប់តាំងមានបន្ទូលប្រាប់អំពីការដែលត្រូវកើតមកដល់ទ្រង់ថា មើល យើងឡើងទៅឯក្រុងយេរូសាឡិម នោះកូនមនុស្សនឹងត្រូវបញ្ជូនទៅឯពួកសង្គ្រាជ នឹងពួកអាចារ្យ គេនឹងកាត់ទោសលោកដល់ជីវិត ហើយបញ្ជូនទៅដល់ពួកសាសន៍ដទៃ ពួកនោះនឹងចំអកមើលងាយ វាយនឹងរំពាត់ ស្តោះដាក់ ហើយសំឡាប់លោក រួច៣ថ្ងៃក្រោយដែលស្លាប់ទៅ នោះលោកនឹងរស់ឡើងវិញ។
ព្រះយេស៊ូវមានបន្ទូលថាទ្រង់នឹងត្រូវបានប្រោសឱ្យរស់ឡើងវិញ ហើយទ្រង់ត្រូវបានប្រោសឱ្យរស់ឡើងវិញ។ ព្រះអង្គសន្យាថាទ្រង់នឹងប្រោសឱ្យយើងរស់ឡើងវិញ ហើយទ្រង់ច្បាស់ជានឹងធ្វើកិច្ចការនេះយ៉ាងពិតប្រាកដ ជាក់ជាមិនខាន។
ដូចជាការដែលព្រះយេស៊ូវទ្រង់មានព្រជន្មរស់ឡើងវិញដែរ អស់អ្នកដែលនៅក្នុងព្រះគ្រីស្ទនឹងត្រូវបានរស់ឡើងវិញ ដូច្នោះដែរ។ ការរស់ឡើងវិញរបស់យើងទាក់ទងគ្នាជាមួយការរស់ឡើងវិញរបស់ទ្រង់។ ការរស់ឡើងវិញ របស់ព្រះយេស៊ូវ គឺជាការធានាពីការរស់ឡើងវិញនាពេលអនាគតសម្រាប់អស់អ្នកដែលជាប់ជាមួយនឹងទ្រង់។
រ៉ូម ៦:៤-៥
ដូច្នេះ យើងបានត្រូវកប់ជាមួយនឹងទ្រង់ហើយ ដោយទទួលជ្រមុជក្នុងសេចក្ដីស្លាប់ ដើម្បីឲ្យយើងបានដើរក្នុងជីវិតបែបថ្មី ដូចជាព្រះគ្រីស្ទបានរស់ពីស្លាប់ឡើងវិញ ដោយសារសិរីល្អនៃព្រះវរបិតាដែរ ដ្បិតបើយើងបានជាប់ជាមួយនឹងទ្រង់ ក្នុងការដែលជាគំរូពីសេចក្ដីសុគតរបស់ទ្រង់ នោះក៏នឹងបានជាប់ក្នុងសេចក្ដីរស់ឡើងវិញរបស់ទ្រង់ដែរ
១ កូរិនថូស ៦:១៤
ព្រះទ្រង់បានទាំងប្រោសឲ្យព្រះអម្ចាស់រស់ឡើងវិញ ហើយនឹងប្រោសឲ្យយើងរាល់គ្នារស់ឡើងដែរ ដោយសារព្រះចេស្តានៃទ្រង់
កូឡូស ១:១៨
ទ្រង់ជាសិរសារបស់រូបកាយ គឺជាពួកជំនុំ ទ្រង់ជាដើម ក៏បានរស់ពីស្លាប់ឡើងវិញមុនគេបង្អស់ ដើម្បីឲ្យទ្រង់បានជាប្រធានក្នុងគ្រប់ទាំងអស់
ព្រះយេស៊ូវជា “ដើម ក៏បានរស់ពីស្លាប់ឡើងវិញមុនគេបង្អស់”។ ព្រះអង្គគឺជាមនុស្សដំបូងគេ ដែលឈ្នះលើសេចក្តីស្លាប់ ហើយទទួលបានជីវិតថ្មីជាមួយនឹងរូបកាយដែលរស់ឡើងវិញ។ ព្រះអង្គគឺជាសិរសាររបស់ក្រុមជំនុំ ហើយយើងគឺជារូបកាយ។ តាមធម្មតាពេលកើតមកគឺក្បាលចេញមកមុន ហើយបន្ទាប់មករាងកាយចេញមកតាមក្រោយ។ ដូចគ្នានេះដែរ ព្រះយេស៊ូវគឺជាមនុស្សដំបូងគេ ដែលត្រូវបានប្រោសឱ្យរស់ឡើងវិញ ហើយនៅថ្ងៃមួយអ្នកជឿលើទ្រង់ទាំងអស់ក៏នឹងត្រូវប្រោសឱ្យរស់ឡើងវិញដែរ។ ការបង្ហាញតាមរបៀបម្យ៉ាងទៀតពីសេចក្តីពិតនេះគឺត្រូវពណ៌នាពីព្រះយេស៊ូវថាជាផលផ្លែដំបូងនៃចម្រូតដ៏អស្ចារ្យ។
១ កូរិនថូស ១៥:២០-២៣
តែឥឡូវនេះ ព្រះគ្រីស្ទទ្រង់មានព្រះជន្មរស់ពីស្លាប់ឡើងវិញជាពិត ជាផលដំបូងពីពួកអ្នកដែលបានដេកលក់ទៅហើយ ដ្បិតដែលសេចក្ដីស្លាប់បានមកដោយសារមនុស្ស នោះសេចក្ដីដែលមនុស្សស្លាប់បានរស់ឡើងវិញ ក៏មកដោយសារមនុស្សដែរ ព្រោះ ដូចជាគ្រប់មនុស្សទាំងអស់បានត្រូវស្លាប់ក្នុងលោកអ័ដាមជាយ៉ាងណា នោះគ្រប់គ្នាក៏នឹងបានប្រោសឲ្យរស់ ក្នុងព្រះគ្រីស្ទយ៉ាងនោះដែរ តែគ្រប់គ្នាតាមលំដាប់រៀងខ្លួន គឺព្រះគ្រីស្ទជាផលដំបូង រួចពួកអ្នកដែលជារបស់ផងព្រះគ្រីស្ទ ក្នុងកាលដែលទ្រង់យាងមក
អំពើបាបរបស់អ័ដាំបាននាំយកសេចក្តីស្លាប់មកដល់មនុស្សជាតិ។ ភាពល្អឥតខ្ចោះរបស់ព្រះគ្រីស្ទនាំយក នូវជីវិតរស់ឡើងវិញមកដល់មនុស្សជាតិ។ ព្រះគ្រីស្ទគឺជា “ផលដំបូងពីពួកអ្នកដែលបានដេកលក់ទៅហើយ”។
ព្រះយេស៊ូវត្រូវបានប្រោសឱ្យរស់ឡើងវិញនៅថ្ងៃអាទិត្យដំបូងបន្ទាប់ពីថ្ងៃបុណ្យរំលងដែលជាថ្ងៃនៃផលដំបូង។ នៅថ្ងៃដ៏វិសុទ្ធនេះ មនុស្សអបអរផលដំបូងនៃរដូវកាលថ្មី។ មនុស្សអបអរដោយរីករាយដោយសារតែការលេចចេញ នូវផលដំបូងនៃរដូវកាលដែលជាសញ្ញាប្រាប់ថាព្រះជាម្ចាស់បានប្រទានឱ្យនូវជីវិតថ្មី។ នៅថ្ងៃនេះ ផលដំបូងត្រូវបានថ្វាយទៅកាន់ព្រះជាម្ចាស់ដើម្បីបង្ហាញប្រាប់ថានោះជារបស់ទ្រង់ ហើយថាទ្រង់តែងតែជាទីមួយជានិច្ច ហើយក៏ជាសញ្ញានៃសេចក្តីជំនឿរបស់មនុស្សថាជាចម្រូតដ៏អស្ចារ្យដែលនឹងត្រូវមកតាមក្រោយ។ តាមរបៀបដូចគ្នានេះ ការរស់ឡើងវិញដំបូងមកពីសេចក្តីស្លាប់គឺជារបស់ព្រះជាម្ចាស់ (ព្រះយេស៊ូវ) ហើយឥឡូវនេះយើងត្រូវតែមានសេចក្តីជំនឿយ៉ាងជាក់ថាចម្រូត (ដែលជាអ្នកជឿទាំងអស់) នឹងត្រូវមកតាមក្រោយ។
សាវ័កប៉ូលបាននិយាយអំពីព្រះយេស៊ូវថា “ដោយសារទ្រង់មានព្រះជន្មរស់ពីស្លាប់ឡើងវិញមុនគេទាំងអស់ នោះទ្រង់បានប្រកាសប្រាប់ពីពន្លឺ ដល់សាសន៍នេះ ហើយដល់សាសន៍ដទៃផង។” (កិច្ចការ ២៦:២៣)។ សេចក្តីសង្ឃឹមនៃជីវិតដែលរស់ឡើងវិញសម្រាប់មនុស្សទាំងអស់នៅលើពិភពលោកគឺជាព្រះយេស៊ូវ! ដូចព្រះយេស៊ូវមានបន្ទូលថា “ដោយព្រោះខ្ញុំរស់ នោះអ្នករាល់គ្នានឹងរស់ដែរ” (យ៉ូហាន ១៤:១៩)។
***ចាក់បទចម្រៀង៖ រហូតដល់ពេលព្រះគ្រីស្ទទ្រង់យាងមក
ការរស់ឡើងវិញរបស់យើង៖ តើនឹងមានអ្វីកើតឡើង?
ការរស់ឡើងវិញរបស់អ្នកជឿនឹងកើតឡើងនៅពេលព្រះយេស៊ូវយាងត្រឡប់មកវិញជាលើកទីពីរ។ ព្រះយេស៊ូវពណ៌នាពីព្រឹត្តិការណ៍នេះថា៖
យ៉ូហាន ៥:២៨-២៩
កុំឲ្យឆ្ងល់ពីសេចក្ដីនេះឡើយ ដ្បិតមានពេលវេលាមក ដែលអស់ទាំងខ្មោចនៅក្នុងផ្នូរនឹងឮសំឡេងទ្រង់ ហើយនឹងចេញមក គឺពួកអ្នកដែលបានប្រព្រឹត្តល្អ គេនឹងរស់ឡើងវិញឲ្យបានជីវិត ឯពួកអ្នកដែលបានប្រព្រឹត្តអាក្រក់វិញ គេនឹងរស់ឡើង ឲ្យជាប់មានទោស
វានឹងក្លាយទៅជាព្រឹត្តិការណ៍ដ៏អស្ចារ្យបំផុតនៅក្នុងប្រវត្តិសាស្ត្ររបស់មនុស្សជាតិ! ដូចជាព្រះយេស៊ូវបានសុគត ហើយបានរស់ឡើងវិញ នោះអ្នកជឿទាំងអស់ក្នុងប្រវត្តិសាស្ត្រនឹងរស់ឡើងវិញនៅពេលទ្រង់ យាងត្រឡប់មកវិញ លើកទីពីរ។ សាវ័កប៉ូលបានផ្តល់សេចក្តីលម្អិតបន្ថែមទៀតដល់យើងអំពីថ្ងៃប្រោសឱ្យ រស់ឡើងវិញ។
១ ថេស្សាឡូនិក ៤:១៣-១៨
បងប្អូនអើយ ខ្ញុំមិនចង់ឲ្យអ្នករាល់គ្នាឥតដឹង ពីពួកអ្នកដែលដេកលក់ទៅហើយទេ ក្រែងអ្នករាល់គ្នាកើតទុក្ខព្រួយ ដូចជាអ្នកឯទៀត ដែលគ្មានសង្ឃឹម ដ្បិតបើយើងជឿថា ព្រះយេស៊ូវបានសុគត ព្រមទាំងរស់ឡើងវិញហើយ នោះត្រូវជឿថា ព្រះទ្រង់នឹងនាំអស់អ្នក ដែលដេកលក់ទៅក្នុងព្រះយេស៊ូវ ឲ្យបានមកជាមួយនឹងទ្រង់ដែរ ដ្បិតយើងខ្ញុំប្រាប់មកអ្នករាល់គ្នា តាមព្រះបន្ទូលនៃព្រះអម្ចាស់ដូច្នេះថា យើងដែលរស់នៅជាប់ ដរាបដល់ព្រះអម្ចាស់យាងមក នោះយើងមិនទៅមុនពួកអ្នក ដែលបានដេកលក់ទៅហើយនោះទេ
ព្រោះព្រះអម្ចាស់ទ្រង់នឹងយាងចុះពីស្ថានសួគ៌មក ដោយស្រែកបង្គាប់១ព្រះឱស្ឋ ទាំងមានឮសំឡេងមហាទេវតា នឹងត្រែរបស់ព្រះផង នោះពួកស្លាប់ក្នុងព្រះគ្រីស្ទនឹងរស់ឡើងវិញជាមុនបង្អស់ រួចយើងរាល់គ្នាដែលកំពុងតែរស់នៅ ក៏នឹងបានលើកឡើង ទៅក្នុងពពកជាមួយគ្នាទាំងអស់ ដើម្បីឲ្យបានជួបជុំនឹងព្រះអម្ចាស់នៅនាអាកាស យ៉ាងនោះ យើងនឹងនៅជាមួយនឹងព្រះអម្ចាស់ជាដរាបទៅ ដូច្នេះ ចូរកំសាន្តចិត្តគ្នាទៅវិញទៅមក ដោយដំណើរនេះចុះ។
តើនឹងមានអ្វីកើតឡើង?
(១) ព្រះយេស៊ូវ នឹងយាងចុះមកពីស្ថានសួគ៌។
(២) មហាទេវតានឹងចេញបញ្ជាឱ្យផ្លុំត្រែ។
(៣) មនុស្សស្លាប់នឹងរស់វិញទៅជួបជុំនឹងព្រះយេស៊ូវ។
(៤) បន្ទាប់មក អ្នកជឿដេលមានជីវិតនៅពេលព្រះយេស៊ូវយាងត្រឡប់មកវិញនឹងត្រូវលើកឡើងទៅក្នុងពពក។
(៥) អ្នកជឿទាំងអស់នឹងនៅជាមួយព្រះជាម្ចាស់ជាដរាបទៅ។
អេសាយ ២៦:១៩
ឯពួកស្លាប់របស់ឯងគេនឹងរស់ទៀត គេនឹងរស់ឡើងវិញជាមួយនឹងសពរបស់អញ ឯងរាល់គ្នាដែលអាស្រ័យនៅក្នុងធូលីដីអើយ ចូរភ្ញាក់ឡើង ហើយច្រៀងចុះ ដ្បិតទឹកសន្សើមរបស់ឯង ប្រៀបដូចជាទឹកសន្សើមពេលព្រលឹម ឯដីនឹងបញ្ចេញមនុស្សស្លាប់មក។
តើយើងនឹងមានរូបកាយដូចម្តេច?
ជំពូកដ៏អស្ចារ្យបំផុតនៅក្នុងព្រះគម្ពីរអំពីការរស់ឡើងវិញមាននៅក្នុង ១ កូរិនថូស ១៥។ តោះសូមមើលឥឡូវនេះ។
១ កូរិនថូស ១៥:៣៥-៤១
មុខជានឹងមានអ្នកណាមួយសួរថា ឯពួកមនុស្សស្លាប់ នឹងរស់ឡើងវិញយ៉ាងណា តើមកវិញមានរូបកាយដូចម្តេច ឱមនុស្សកំឡៅអើយ គ្រាប់ពូជដែលអ្នកព្រោះទៅ បើមិនងាប់ នោះមិនពន្លកដុះឡើងទេ ហើយគ្រាប់ដែលអ្នកព្រោះនោះ មិនមែនដូចជាដើមដែលពន្លកឡើងនោះដែរ គឺជាគ្រាប់សុទ្ធ ដូចជាគ្រាប់ស្រូវ ឬពូជណាទៀតក្តី តែព្រះទ្រង់ប្រទានឲ្យមានដើមទីទៃពីគ្នារៀងរាល់ពូជ តាមព្រះហឫទ័យទ្រង់ គ្រប់ទាំងសាច់ក៏មិនដូចគ្នាដែរ គឺមាន១របស់មនុស្ស ១របស់សត្វ ១របស់ត្រី ហើយ១របស់សត្វហើរ ក៏មានរូបកាយសំរាប់ស្ថានសួគ៌ ហើយមានរូបកាយសំរាប់ផែនដីដែរ តែសិរីរបស់រូបកាយនៅស្ថានសួគ៌ នឹងរបស់រូបកាយនៅផែនដីនោះទីទៃពីគ្នា ឯព្រះអាទិត្យ នោះមានរស្មីម្យ៉ាងទៅ ព្រះចន្ទក៏មានរស្មីម្យ៉ាងទៅ ហើយផ្កាយក៏មានរស្មីម្យ៉ាងទៅ សូម្បីតែផ្កាយទាំងប៉ុន្មានសោត ក៏មានរស្មីខុសពីគ្នាដែរ
ទីមួយនឹងមានការបន្តអត្តសញ្ញាណ។ អ្នកនៅតែជាខ្លួនអ្នកដដែល។ ខ្ញុំនៅតែជាខ្ញុំដដែល។ យើងនៅតែជាបុគ្គលម្នាក់ៗដដែល។ បើទោះបីជាយើងនឹងមានការ "ផ្លាស់ប្តូរ" យើងនៅតែមានលក្ខណៈ ជាយើងដដែល។ សាវ័កប៉ូលបង្ហាញពីសេចក្តីពិតដោយប្រាប់ពីឧទាហរណ៍នៃគ្រាប់ស្រូវសាឡី។ នៅពេលព្រួសគ្រាប់ពូជវាត្រូវបានផ្លាស់ប្តូររូបរាង ប៉ុន្តែនៅតែជាស្រូវសាឡីដដែល។ អ្នកមិនព្រួសស្រូវសាឡី ហើយទទួលបានដំឡូងនោះទេ។ នៅក្នុងដំណឹងល្អ រូបរាងរបស់ព្រះយេស៊ូវបន្ទាប់ពីការរស់ឡើងវិញរបស់ទ្រង់ បានបង្ហាញពីការបន្តអត្តសញ្ញាណរបស់ព្រះអង្គ។ ព្រះយេស៊ូវនៅតែជាព្រះយេស៊ូវដដែល។ សាវ័ករបស់ ទ្រង់បានស្គាល់ទ្រង់។ ស្នាមចាក់ទម្លុះនៅលើព្រះហស្តរបស់ទ្រង់ និងលើចំហៀងខ្លួនទ្រង់គឺជាសញ្ញាប្រាប់ ពីការបន្តនៃអត្តសញ្ញាណរបស់ទ្រង់។
ទីពីរ យើងនឹងត្រូវបានផ្លាស់ប្តូរដោយសារព្រះចេស្តាររបស់ព្រះជាម្ចាស់។ រូបកាយរស់ឡើងវិញរបស់យើង នឹងត្រូវប្រទានឱ្យយើងមកពីព្រះជាម្ចាស់ ហើយនឹងមានលក្ខណៈខុសគ្នាពីរូបកាយពីមុនរបស់យើង។ ដូចជារុក្ខជាតិដែរ អ្វីដែលបានព្រួសគ្រាប់ពូជទៅកំណត់ពីអ្វីដែលនឹងត្រូវដុះឡើង ប៉ុន្តែអ្វីដែលដុះឡើងមាន លក្ខណៈខុសគ្នាពីអ្វីដែលបានព្រួសចេញទៅ (ដើមឈើមិនមានរូបរាងដូចជាគ្រាប់ពូជនោះទេ)។ រូបរាងកាយរបស់ យើងត្រូវបានព្រួសចូលទៅក្នុងការកប់ដីដូចជាគ្រាប់ពូជដែរ បន្ទាប់មករាងកាយដូចគ្នានេះនឹងរស់ឡើងវិញនៅក្នុង ជីវិតថ្មីទៅជាអ្វីម្យ៉ាងដែលប្រសើរជាងពីមុន។ ដូច្នេះយើងនឹងបន្តនៅតែជាខ្លួនរបស់យើង ប៉ុន្តែតាមរបៀបដ៏រំភើបថ្មីមួយ។ លោកប៉ូលបន្ត៖
១ កូរិនថូស ១៥:៤២-៤៤ក
សេចក្ដីដែលមនុស្សស្លាប់បានរស់ឡើងវិញ នោះក៏បែបដូច្នោះដែរ គេបានកប់ទៅ ជារូបកាយ ដែលពុករលួយ តែរស់ឡើងវិញ ជារូបកាយមិនចេះពុករលួយឡើយ បានកប់ទៅ ទាំងមានសេចក្ដីអាប់ឱន តែរស់ឡើងវិញ ទាំងមានសិរីល្អ បានកប់ទៅ ទាំងមានសេចក្ដីកំសោយ តែរស់ឡើងវិញ ទាំងមានព្រះចេស្តា បានកប់ទៅ ជារូបកាយ ខាងសាច់ឈាម តែរស់ឡើង ជារូបកាយខាងវិញ្ញាណវិញ
សូមគូសបន្ទាប់ពីក្រោមពីការផ្លាស់ប្តូរចំនួនបួនដែលលោកប៉ូលប្រាប់យើងអំពីរូបកាយដែលរស់ឡើងវិញរបស់យើង។ បន្ទាប់មកចូរបំពេញតារាង។
រូបកាយយើងពេលនេះ ("បានកប់ទៅ")
-
ពុករលួយ
-
មានសេចក្ដីអាប់ឱន
-
មានសេចក្ដីកំសោយ
-
ខាងសាច់ឈាម
រូបកាយរស់ឡើងវិញរបស់យើង
-
មិនចេះពុករលួយឡើយ
-
មានសិរីល្អ
-
មានព្រះចេស្តា
-
ខាងវិញ្ញាណ
រូបកាយដែលរស់ឡើងវិញរបស់យើងគឺជារូបកាយខាងវិញ្ញាណ មិនចេះវិនាស ហើយត្រូវបានប្រោសឱ្យរស់ឡើងវិញមានសិរីរុងរឿង និងមានអំណាច។
រូបកាយដែលស្លាប់មិនអំណាច ឬមានសិរីល្អនោះទេ។ ហេតុនេះបានជាលោកប៉ូលសំដៅទៅវាថាជា “បានកប់ទៅ ទាំងមានសេចក្ដីអាប់ឱន” និង “បានកប់ទៅ ទាំងមានសេចក្ដីកំសោយ”។ ប៉ុន្តែយើងត្រូវបានបង្កើតឡើង ឱ្យរស់នៅជាមួយព្រះជាម្ចាស់ជារៀងរហូត - មិនត្រូវកប់ទៅក្នុងដីដោយអាម៉ាស់ឡើយ។ ហេតុដូច្នេះ រាងកាយរបស់យើងដែលត្រូវបានព្រួសពូជនៅក្នុងភាពទន់ខ្សោយនឹងត្រូវបានប្រោសឱ្យរស់ឡើងវិញ ប្រកបដោយ អំណាច! ពីរូបកាយដែលរស់ឡើងវិញរបស់យើងនឹងមិនទន់ខ្សោយ ឬឈឺ ឬស្លាប់ទៀតទេ។ ជាលើកដំបូង មនុស្សខ្វាក់នឹងមើលឃើញ មនុស្សថ្លង់នឹងស្តាប់ឮ មនុស្សគនិងចេះនិយាយ ហើយមនុស្សខ្វិននឹងដើរ។ វានឹងក្លាយទៅជាថ្ងៃដ៏រីករាយនៅពេលដែលរូបកាយរបស់យើងត្រូវបាន "រស់ឡើងវិញទាំងមានសិរីល្អ"!
ព្រះយេស៊ូវពណ៌នាយើង (បន្ទាប់ពីការរស់ឡើងវិញរបស់យើង) ថា “ដូចជាទេវតា”។
លូកា ២០:៣៤-៣៦
នោះទ្រង់មានបន្ទូលឆ្លើយថា ធម្មតាមនុស្សនៅលោកីយនេះ គេតែងយកប្ដីប្រពន្ធ តែអស់អ្នកដែលបានរាប់ជាគួរ ឲ្យបានទៅឯបរលោកនាយ ហើយឲ្យបានរស់ពីស្លាប់ឡើងវិញ នៅស្ថាននោះគេមិនដែលយកប្ដីប្រពន្ធទៀតទេ ពីព្រោះគេមិនចេះស្លាប់ទៀត គឺដូចជាទេវតា ហើយជាពួកកូនរបស់ព្រះផង ដោយបានរស់ពីស្លាប់ឡើងវិញ
នេះគឺជាសេចក្តីពិតដ៏គួរឱ្យកត់សម្គាល់។ ចូរស្រមៃគិតពីខ្លួនអ្នក មានរូបកាយដែលរស់ឡើងវិញ គឺជារូបកាយខាងវិញ្ញាណ មិនចេះវិនាស ហើយមានសិរីរុងរឿង និងមានអំណាច។ ប៉ុន្តែនៅតែជាអ្នកដដែល! មនុស្សនៅតែស្គាល់អ្នកដដែល ប៉ុន្តែពួកគេនឹងភ្ញាក់ផ្អើលយ៉ាងខ្លាំង ចំពោះការបំផ្លាស់បំប្រែដ៏អស្ចារ្យនេះដោយព្រះចេស្តាររបស់ព្រះជាម្ចាស់។
បន្ទាប់មក លោកប៉ូលបានធ្វើការប្រៀបធៀបពីរូបកាយធម្មជាតិរបស់យើងដែលយើងមាននៅពេលនេះ ជាមួយនឹងរូបកាយខាងវិញ្ញាណដែលយើងនឹងមាននៅពេលរស់ឡើងវិញ។
១ កូរិនថូស ១៥:៤៤គ-៥០
បើមានរូបកាយ ខាងសាច់ឈាម នោះក៏មានរូបកាយ ខាងវិញ្ញាណដែរ ដូចជាសេចក្ដីដែលចែងទុក ពីលោកអ័ដាម ដែលជាមនុស្សមុនដំបូងថា «បានត្រឡប់ជាមានព្រលឹងរស់» តែលោកអ័ដាមក្រោយបង្អស់ ជាវិញ្ញាណដ៏ប្រោសឲ្យរស់វិញ ឯវិញ្ញាណមិនមែនកើតមុនទេ គឺជារូបសាច់ទេតើ រួចទើបមានវិញ្ញាណជាខាងក្រោយ មនុស្សមុនដំបូងកើតមកពីដី គឺធ្វើមកពីធូលីដី តែមនុស្សទី២ ជាព្រះអម្ចាស់ដែលចេញមកពីស្ថានសួគ៌វិញ ឯមនុស្សដែលកើតពីធូលីដីមកជាយ៉ាងណា នោះអស់អ្នកដែលកើតពីធូលីដី ក៏យ៉ាងនោះដែរ ហើយព្រះអម្ចាស់ ដែលយាងមកពីស្ថានសួគ៌ ជាយ៉ាងណា ពួកស្ថានសួគ៌ក៏យ៉ាងនោះដែរ យើងក៏នឹងមានរូបរាងរបស់ព្រះអម្ចាស់ពីស្ថានសួគ៌ ដូចជាយើងមានរូបរាងរបស់មនុស្ស ដែលធ្វើពីធូលីមកដែរ បងប្អូនអើយ សេចក្ដីដែលខ្ញុំចង់និយាយនេះ គឺថា សាច់ឈាមពុំអាចនឹងគ្រងនគរព្រះជាមរដកបានឡើយ ហើយសេចក្ដីពុករលួយក៏ពុំអាចនឹងគ្រងសេចក្ដី ដែលមិនចេះពុករលួយបានដែរ។
លោកប៉ូលធ្វើការប្រៀបធៀបលោកអ័ដាំ និងព្រះយេស៊ូវ។ នៅក្នុងអ័ដាំ “យើងមានរូបរាងរបស់មនុស្ស ដែលធ្វើពីធូលីមកដែរ”។ នេះគឺជា រូបកាយរបស់យើង ដែលធ្វើពីធូលីដីដែលនឹងត្រូវស្លាប់ ហើយត្រឡប់ទៅជាដីវិញ (លោកុប្បត្តិ ២:៧, ៣:១៩)។ ប៉ុន្តែនៅក្នុងព្រះគ្រីស្ទ “យើងក៏នឹងមានរូបរាងរបស់ព្រះអម្ចាស់ពីស្ថានសួគ៌” (នោះគឺព្រះយេស៊ូវ)។ នេះគឺជារូបកាយខាងវិញ្ញាណពីស្ថានសួគ៌ ដែលរស់ឡើងវិញរបស់យើង។ វាគឺជារូបកាយនេះហើយដែលមិនវិនាស ហើយនឹងទទួលមរតកពីនគរព្រះ! រូបកាយដែលរស់ឡើងវិញនឹងត្រូវបានសម្របខ្លួនរស់នៅក្នុងបរិយាកាសថ្មីនៅក្នុងយុគសម័យដែលត្រូវមកដល់ (ដូចជារូបកាយបច្ចុប្បន្នរបស់យើងត្រូវបានសម្របខ្លួនរស់នៅក្នុងពិភពលោកនេះដូច្នោះដែរ)។
លោកប៉ូសសន្និដ្ឋាន៖
១ កូរិនថូស ១៥:៥១-៥៧
នែ ខ្ញុំប្រាប់អ្នករាល់គ្នាពីសេចក្ដីអាថ៌កំបាំង គឺថាយើងទាំងអស់គ្នានឹងមិនដេកលក់ទៅទេ តែទាំងអស់គ្នានឹងបានផ្លាស់ប្រែទៅក្នុង១រំពេចវិញ គឺក្នុង១ប៉ប្រិចភ្នែកប៉ុណ្ណោះ ក្នុងកាលដែលឮសូរត្រែក្រោយបង្អស់ ដ្បិតត្រែនឹងឮឡើងមែន នោះពួកស្លាប់នឹងរស់ឡើងវិញ មិនពុករលួយទៀតឡើយ រួចយើងរាល់គ្នានឹងបានផ្លាស់ប្រែទៅ ដ្បិតត្រូវតែរូបកាយដ៏ពុករលួយនេះ បានប្រដាប់ដោយសេចក្ដីមិនពុករលួយវិញ ហើយរូបកាយដែលរមែងស្លាប់នេះ ត្រូវតែបានប្រដាប់ដោយសេចក្ដីមិនចេះស្លាប់វិញដែរ កាលណារូបកាយពុករលួយនេះ បានប្រដាប់ដោយសេចក្ដីមិនពុករលួយ ហើយរូបកាយដែលតែងតែស្លាប់នេះ បានប្រដាប់ដោយសេចក្ដីមិនចេះស្លាប់វិញ នោះទើបនឹងបានសំរេចតាមពាក្យ ដែលចែងទុកមកថា «សេចក្ដីជ័យជំនះបានលេបសេចក្ដីស្លាប់បាត់ហើយ» «ឱសេចក្ដីស្លាប់អើយ ទ្រនិចឯងនៅឯណា សេចក្ដីស្លាប់អើយ ជ័យជំនះរបស់ឯងនៅឯណា» រីឯទ្រនិចនៃសេចក្ដីស្លាប់ គឺជាអំពើបាប ហើយអំណាចរបស់បាប គឺជាក្រិត្យវិន័យ តែអរព្រះគុណដល់ព្រះអង្គ ពីព្រោះទ្រង់ប្រទានឲ្យយើងរាល់គ្នាមានជ័យជំនះ ដោយសារព្រះយេស៊ូវគ្រីស្ទ ជាព្រះអម្ចាស់នៃយើង
យើងនឹងត្រូវរស់ឡើងវិញនៅពេលព្រះយេស៊ូវយាងមកវិញ។ ការផ្លាស់ប្តូរនឹងកើតមានឡើងភ្លាមៗ “ក្នុង១រំពេចវិញ គឺក្នុង១ប៉ប្រិចភ្នែកប៉ុណ្ណោះ”។ រូបកាយថ្មីរបស់យើងនឹងមិនវិនាសទៀតឡើយ។ អរព្រះគុណដល់ព្រះអង្គ ពីព្រោះទ្រង់ប្រទានឲ្យយើងរាល់គ្នាមានជ័យជំនះ លើសេចក្តីស្លាប់ ដោយសារព្រះយេស៊ូវគ្រីស្ទ ជាព្រះអម្ចាស់នៃយើង!
យ៉ូបជាសៀវភៅដែលមានអាយុចំណាស់ជាងគេនៅក្នុងលោក។ វាត្រូវបានសរសេរឡើង ជាង ៤០០០ ឆ្នាំមុន។ ប៉ុន្ដែទោះបីពេលនោះក៏ដោយ លោកយ៉ូបបានដឹងអំពីព្រះពរ នៃការរស់ឡើងវិញ។ ចូរស្ដាប់អ្វីដែលគាតបាននិយាយ។
យ៉ូប ១៩:២៥-២៧
ប៉ុន្តែឯខ្ញុំៗដឹងថា អ្នកដែលលោះខ្ញុំទ្រង់មានព្រះជន្មរស់នៅ ហើយដល់ជាន់ក្រោយ ទ្រង់នឹងមកឈរនៅលើផែនដី ហើយក្រោយដែលសំបកកាយខ្ញុំនេះត្រូវរលាយទៅ គឺក្រៅពីរាងកាយនោះខ្ញុំនឹងបានឃើញព្រះ ដែលខ្ញុំ គឺខ្លួនខ្ញុំនេះ នឹងឃើញដោយខ្លួនខ្ញុំ មិនមែនអ្នកណាទៀត គឺភ្នែកខ្លួនខ្ញុំនឹងបានឃើញទ្រង់ ចិត្តខ្ញុំក៏ហេវទៅនៅក្នុងខ្លួន ដោយរង់ចាំពេលនោះ
លោកយ៉ូបបានដឹងថាគាត់មានអ្នកដែលលោះគាត់ (ព្រះយេស៊ូវ) ហើយដល់ជាន់ក្រោយ ទ្រង់នឹងឈរលើផែនដី (ការយាងមកជាលើកទី២របស់ទ្រង់) ហើយក្រោយដែលសំបកកាយខ្ញុំនេះត្រូវរលាយទៅ (ការសុគត់របស់ទ្រង់) គឺក្រៅពីរាងកាយនោះខ្ញុំនឹងបានឃើញព្រះ (ការរស់ឡើងវិញរបស់ទ្រង់)។
ពិភាក្សា៖ ចូរជ្រើសរើសពាក្យមួយដើម្បីពណ៌នាពីអារម្មណ៍របស់អ្នកចំពោះការរស់ឡើងវិញ។ បន្ទាប់មកប្រាប់ទៅកាន់ក្រុមទាំងមូលថាតើហេតុអ្វីបានជាអ្នកជ្រើសរើសយកពាក្យនេះ។
សង្ខេប៖ អ្នកជឿទាំងអស់នឹងរស់ឡើងវិញនៅពេលព្រះយេស៊ូវយាងមកលើកទីពីរ។ រូបកាយដែលរស់ឡើងវិញរបស់យើងគឺជារូបកាយខាងវិញ្ញាណ មិនចេះវិនាស ហើយមានសិរីរុងរឿង និងមានអំណាច។
អធិស្ឋានបញ្ចប់
