មេរៀនទី ២: កំណើតថ្មី
សម្រង់សម្តីព្រះយេស៊ូវ៖ ព្រះយេស៊ូវមានបន្ទូលឆ្លើយថា ប្រាកដមែន ខ្ញុំប្រាប់អ្នកជាប្រាកដថា បើមិនបានកើតជាថ្មី នោះគ្មានអ្នកណាអាចនឹងឃើញនគរព្រះបានទេ (យ៉ូហាន ៣:៣) * កំណត់សម្គាល់គ្រូ #១
នៅពេលមនុស្សម្នាក់ជឿលើព្រះយេស៊ូវជាលើកដំបូង សេចក្តីពិតដែលគាត់មិនធ្លាប់បានដឹងពីមុនមកស្រាប់តែ ក្លាយជាការពិតសម្រាប់គាត់។ គាត់ដឹងអំពីអំពើបាប ដំណឹងល្អ និងសេចក្តីត្រូវការព្រះយេស៊ូវមកធ្វើជា ព្រះសង្គ្រោះរបស់គាត់។ គាត់មានអារម្មណ៍ថាមានការទាញឲ្យកែប្រែចិត្ត ដែលនោះគឺជាពេលដែលគាត់ចង់ ងាកចេញពីអំពើបាប និងត្រឡប់មករកព្រះវិញ។ គាត់ជឿថាព្រះជាម្ចាស់គឺពិតប្រាកដ ហើយថា គាត់អាច ស្គាល់ព្រះ ហើយថាព្រះជាម្ចាស់ស្រឡាញ់គាត់។ គាត់ទទួលអារម្មណ៍ថាចិត្តរបស់គាត់បានផ្លាស់ប្តូរនៅក្នុង ខ្លួនគាត់។ ទាំងអស់នេះកើតឡើងដោយសារតែឥទ្ធិពលពីព្រះវិញ្ញាណបរិសុទ្ធ ហើយជាទីសម្គាល់នៃជីវិតថ្មី មកពីព្រះជាម្ចាស់។ អ្នកជឿថ្មីបាន “កើតជាថ្មី”។
សេចក្តីពិត #១៖ ជីវិតថ្មីរបស់យើងនៅក្នុងព្រះគ្រីស្ទចាប់ផ្តើមនៅពេលយើង “កើតជាថ្មី”។
អត្ថបទគន្លឹះនៅក្នុងព្រះគម្ពីរអំពីការកើតជាថ្មីនៅក្នុងគម្ពីរយ៉ូហាន ជំពូក ៣។ ចំណាយពេលបន្តិចអាន យ៉ូហាន ៣:១-១០ ឲ្យឮៗ។
សូមយើងពីនិត្យមើលអ្វីដែលព្រះយេស៊ូវបង្រៀនអំពីការកើតជាថ្មី។ ដំបូងបង្អស់ ប្រៀបធៀបអ្វីដែល ព្រះយេស៊ូវមានបន្ទូលនៅក្នុងខ ៣ និងខ ៥។
យ៉ូហាន ៣:៣
ព្រះយេស៊ូវមានបន្ទូលឆ្លើយថា ប្រាកដមែន ខ្ញុំប្រាប់អ្នកជាប្រាកដថា បើមិនបានកើតជាថ្មី នោះគ្មានអ្នកណាអាចនឹងឃើញនគរព្រះបានទេ
យ៉ូហាន ៣:៥
ព្រះយេស៊ូវមានបន្ទូលឆ្លើយថា ប្រាកដមែន ខ្ញុំប្រាប់អ្នកជាប្រាកដថា បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ
វាច្បាស់ណាស់ថាដើម្បី “កើតជាថ្មី” គឺត្រូវ “កើតចេញពីទឹក និងព្រះវិញ្ញាណ”។
សេចក្តីពិត #២ ដើម្បីកើតជាថ្មីគឺត្រូវកើតចេញពីទឹក និងព្រះវិញ្ញាណ។
ប៉ុន្តែតើវាមានន័យដូចម្តេចចំពោះការកើតចេញពីទឹក និងព្រះវិញ្ញាណ? ព្រះយេស៊ូវមានព្រះបន្ទូលទៅកាន់ លោកនីកូដេមដែលជាគ្រូរបស់ជនជាតិអ៊ីស្រាអែល ហើយព្រះយេស៊ូវបានរំពឹងថាគាត់នឹងយល់អំពីរឿងនេះ (ខ ១០)។ ហេតុអ្វី? ដោយសារព្រះជាម្ចាស់មានព្រះបន្ទូលអំពីរឿងនេះរួចហើយតាមរយៈហោរ៉ារបស់ព្រះអង្គ។ យើងមើលឃើញការយកចិត្តទុកដាក់ចំពោះជីវិតថ្មីតាមរយៈទឹក និងព្រះវិញ្ញាណនៅក្នុងសេចក្តីទំនាយ របស់លោកអេសេគាល៖
អេសេគាល ៣៦:២៥-២៧
នោះអញនឹងប្រោះទឹកស្អាតទៅលើឯងរាល់គ្នា ដូច្នេះ ឯងនឹងបានស្អាត អញនឹងជំរះឯងរាល់គ្នាឲ្យស្អាត ពីគ្រប់ទាំងសេចក្ដីស្មោកគ្រោក ហើយពីអស់ទាំងរូបព្រះរបស់ឯងផង អញនឹងឲ្យឯងមានចិត្តថ្មី ហើយនឹងដាក់វិញ្ញាណថ្មីនៅក្នុងឯងដែរ អញនឹងដកចិត្តដែលរឹងដូចថ្មពីរូបសាច់ឯងចេញ រួចនឹងឲ្យមានចិត្តជាសាច់វិញ អញនឹងដាក់វិញ្ញាណរបស់អញនៅក្នុងឯងរាល់គ្នា ហើយបណ្តាលឲ្យឯងរាល់គ្នាដើរតាមក្រឹត្យក្រម ហើយរក្សាបញ្ញត្តច្បាប់របស់អញ ព្រមទាំងប្រព្រឹត្តតាមផង
** នៅក្នុងអត្ថបទនេះ តើអ្នកអាចមើលឃើញការយកចិត្តទុកដាក់ទៅលើទឹក និងព្រះវិញ្ញាណដែលជារបៀបក្នុងការបង្កើតជាថ្មីដែរឬទេ?
ព្រះជាម្ចាស់បានសន្យាតាមរយៈហោរ៉ាអេសគាលថាពេលវេលាបានកំពុងតែមកដល់នៅពេលដែលទ្រង់នឹង ធ្វើឲ្យមនុស្សកែជាថ្មីឡើង។ ជីវិតថ្មីនេះត្រូវបាននិមិត្តរូបតាមរយៈទឹកដែលលាងសម្អាតរាល់ភាពស្មោគគ្រោក និងការថ្វាយបង្គំរូបព្រះរបស់យើង ហើយតាមរយៈអំណោយទាននៃព្រះវិញ្ញាណដ៏បរិសុទ្ធដែលបានផ្លាស់ប្រែ មនុស្សពីខាងក្នុងមក និងប្រទានឲ្យពួកគេនូវបំណងចិត្តនៃការស្តាប់បង្គាប់ព្រះជាម្ចាស់។ នេះគឺជាអ្វីដែល ពាក់ព័ន្ធនឹងកំណើតថ្មី៖ ការសម្អាតចេញពីអំពើបាបតាមរយៈព្រះជាម្ចាស់ និងការទទួលព្រះវិញ្ញាណបរិសុទ្ធ នៅក្នុងអ្នក។
សេចក្តីពិត #៣៖ ការកើតចេញពីទឹក និងព្រះវិញ្ញាណមានន័យថាដើម្បីទទួលបានការសម្អាតចេញពីអំពើបាបទាំងអស់ ហើយទទួលព្រះវិញ្ញាណបរិសុទ្ធរបស់ព្រះនៅក្នុងអ្នក។
សាវ័កយ៉ូហានប្រើឃ្លាសមមូលគ្នាសម្រាប់ “ការកើតចេញពីទឹក និងព្រះវិញ្ញាណ” នៅពេលដែលគាត់សរសេរថាយើង “កើតមកអំពីព្រះ”។
យ៉ូហាន ១:១២-១៣
ប៉ុន្តែអស់អ្នកណាដែលទទួលទ្រង់ (ព្រះយេស៊ូវ) គឺអស់អ្នកដែលជឿដល់ព្រះនាមទ្រង់ នោះទ្រង់បានប្រទានអំណាចឲ្យបានត្រឡប់ជាកូនព្រះ គឺជាកូន ដែលមិនមែនកើតមកពីឈាម ឬតាមប្រាថ្នាខាងរូបសាច់ ឬតាមចំណង់នៃមនុស្សឡើយ គឺកើតមកអំពីព្រះវិញ។
ពេលយើងទទួល និងជឿលើព្រះយេស៊ូវ យើងកើតមកអំពីព្រះ។ ពេលទារកកើតចេញមក វាមានជីវិតបែបដែលឪពុកម្តាយមាន នោះគឺជាជីវិតមនុស្សខាងសាច់ឈាម។ ពេលយើងកើតជាថ្មី យើង “កើតមកអំពីព្រះ” ជាមួយជីវិតបែបដែលព្រះជាម្ចាស់មាន នោះគឺជាជីវិតខាងវិញ្ញាណ ដែលនៅអស់កល្បជានិច្ច។
យ៉ូហាន ៣:៦
របស់អ្វីដែលកើតពីសាច់ នោះជាសាច់ទេ ហើយដែលកើតពីព្រះវិញ្ញាណ នោះជាវិញ្ញាណវិញ
ការកើតជាថ្មីគឺជាកំណើតខាងវិញ្ញាណ។ កំណើតដំបូងរបស់យើងបានផ្តល់ជីវិតខាងសាច់ឈាមឲ្យយើង កំណើតថ្មីផ្តល់ឲ្យយើងនូវជីវិតខាងវិញ្ញាណ។ ដែលកើតពីព្រះវិញ្ញាណ នោះជាវិញ្ញាណវិញ។ ហេតុដូច្នេះ ដើម្បីកើតជាថ្មីគឺត្រូវមានជីវិតខាងវិញ្ញាណមកពីព្រះជាម្ចាស់។
សេចក្តីពិត #៤ ការកើតជាថ្មីគឺមានជីវិតខាងវិញ្ញាណមកពីព្រះជាម្ចាស់។
តើហេតុអ្វីបានជាមនុស្សម្នាក់ត្រូវកើតជាថ្មីម្តងទៀត?
ព្រះយេស៊ូវមានព្រះបន្ទូលថាយើងត្រូវតែកើតជាថ្មី (យ៉ូហាន ៣:៧)។ ‘ត្រូវតែ’ គឺជាពាក្យសង្កត់ធ្ងន់ ដែលបង្ហាញថាវាចាំបាច់។ តើហេតុអ្វីបានជាចាំបាច់ត្រូវកើតជាថ្មី? ដើម្បីយល់អំពីចំណុចនេះ យើងត្រូវតែសួរថា តើលក្ខខណ្ឌធម្មជាតិនៃមនុស្សគឺអ្វី?
លក្ខខណ្ឌរបស់មនុស្ស
មនុស្សត្រូវបានបង្កើតឡើងដោយព្រះជាម្ចាស់ដើម្បីឲ្យមានទំនាក់ទំនងជាមួយព្រះជាម្ចាស់។ នេះគឺជាជីវិតខាងវិញ្ញាណ។ វាគឺជាជីវិតរួមប្រកបជាមួយព្រះជាម្ចាស់។ ប៉ុន្តែមនុស្សបានបាត់បង់ជីវិតខាងវិញ្ញាណដែលព្រះជាម្ចាស់បានផ្តល់ឲ្យនៅពេលទ្រង់បង្កើតគេមក។ យើងអានអំពីរឿងនេះនៅក្នុងគម្ពីរលោកុប្បត្តិ។
លោកុប្បត្តិ ២:១៥-១៧
ព្រះយេហូវ៉ាដ៏ជាព្រះទ្រង់យកអ័ដាមទៅដាក់នៅក្នុងសួនច្បារអេដែន ឲ្យគាត់ធ្វើការហើយថែរក្សា ព្រះយេហូវ៉ាដ៏ជាព្រះទ្រង់បង្គាប់ទៅអ័ដាមថា ឯងនឹងស៊ីផ្លែឈើទាំងអស់ក្នុងសួនច្បារនេះបានតាមចិត្ត តែឯត្រង់ដើមដឹងខុសត្រូវ នោះមិនត្រូវឲ្យឯងស៊ីផលឡើយ ដ្បិតនៅថ្ងៃណាដែលឯងស៊ី នោះនឹងត្រូវស្លាប់ ជាមិនខាន។
អ័ដាមបានបរិភោគផ្លែឈើពីដើមដឹងខុសត្រូវ ប៉ុន្តែតើគាត់បានស្លាប់នៅក្នុងថ្ងៃនោះដែរឬទេ? អត់ទេ។ គាត់រស់នៅអស់រយៈពេលជាច្រើនឆ្នាំក្រោយមក ហើយស្លាប់នៅអាយុ ៩៣០ឆ្នាំ។ ដូច្នេះតើគាត់ស្លាប់ក្នុងន័យអ្វី “នៅថ្ងៃ” ដែលគាត់បរិភោគនោះ? អ័ដាមមិនបានស្លាប់ខាងសាច់ឈាមទេ សេចក្តីស្លាប់របស់គាត់គឺខាងវិញ្ញាណ។ នៅថ្ងៃនោះគាត់ទទួលបានបទពិសោធន៍នៃការបែកចេញពីព្រះជាម្ចាស់។
ការបែកចេញពីជីវិតរបស់ព្រះជាម្ចាស់គឺជាការស្លាប់ខាងវិញ្ញាណ។ ស្ថានភាពនៃការស្លាប់ខាងវិញ្ញាណនេះគឺជាអ្វីដែលមនុស្សទាំងប្រុសទាំងស្រីបានទទួលមកពីអ័ដាម។ ដូច្នេះចម្លើយសម្រាប់សំណួរ “តើហេតុអ្វីបានជាមនុស្សម្នាក់ត្រូវការកើតជាថ្មី?” គឺថាកំណើតថ្មីគឺជាភាពចាំបាច់ដើម្បីទទួលបានជីវិតខាងវិញ្ញាណ។
សាវ័កប៉ូលពណ៌នាអំពីលក្ខណៈដែលមនុស្សទាំងអស់មានមុនពេលគេមានបទពិសោធន៍នៅក្នុងកំណើតថ្មី។
អេភេសូរ ៤:១៨
គំនិតគេត្រូវបង្អាប់ ហើយគេដាច់ចេញពីព្រះជន្មព្រះ ដោយសារសេចក្ដីខ្លៅល្ងង់ក្នុងខ្លួនគេ ព្រោះចិត្តគេរឹងទទឹង
នេះគឺជាលក្ខខណ្ឌរបស់មនុស្ស។ មនុស្សត្រូវបាន “ដាច់ចេញពីព្រះជន្មព្រះ ដោយសារសេចក្ដីខ្លៅល្ងង់ក្នុងខ្លួនគេ ព្រោះចិត្តគេរឹងទទឹង”។ លទ្ធផលចំពោះរឿងនេះគឺមនុស្សមិនបានយល់ដឹងអំពីសេចក្តីពិតខាងវិញ្ញាណ។
១ កូរិនថូស ២:១៤
ប៉ុន្តែ មនុស្សខាងសាច់ឈាម គេមិនទទួលសេចក្ដីខាងឯព្រះវិញ្ញាណនៃព្រះទេ ពីព្រោះជាសេចក្ដីល្ងង់ល្ងើដល់គេ ក៏រកស្គាល់មិនបានដែរ ដ្បិតត្រង់ឯសេចក្ដីទាំងនោះ ត្រូវពិចារណាយល់ខាងវិញ្ញាណវិញ
“មនុស្សខាងសាច់ឈាម” គឺជាអ្វីដែលយើងទាំងអស់គ្នាមានតាមធម្មជាតិ។ “មនុស្សខាងវិញ្ញាណ” គឺជាអ្វីដែលយើងទទួលបាននៅពេលមានកំណើតថ្មី។ មនុស្សតាមធម្មជាតិ “មិនទទួល” ហើយ “រកស្គាល់មិនបាន” អំពីរឿងរ៉ាវនៃព្រះវិញ្ញាណរបស់ព្រះបានឡើយ។
រ៉ូម ៨:៧-៩
ព្រោះគំនិតខាងសាច់ឈាម នោះរមែងទាស់ទទឹងនឹងព្រះ ដ្បិតមិនចុះចូលនឹងក្រិត្យវិន័យរបស់ព្រះទេ ក៏ពុំអាចនឹងចុះចូលបានផង ពួកអ្នកដែលនៅខាងសាច់ឈាម នោះពុំអាចនឹងគាប់ព្រះហឫទ័យដល់ព្រះបានឡើយ តែបើសិនជាព្រះវិញ្ញាណនៃព្រះសណ្ឋិតក្នុងខ្លួនអ្នករាល់គ្នា នោះអ្នករាល់គ្នាមិននៅខាងសាច់ឈាមទៀតទេ គឺនៅខាងវិញ្ញាណវិញ ប៉ុន្តែ បើអ្នកណាគ្មានព្រះវិញ្ញាណរបស់ព្រះគ្រីស្ទ អ្នកនោះមិនមែនជារបស់ផងទ្រង់ទេ
គំនិតខាងសាច់ឈាម នោះរមែងទាស់ទទឹងនឹងព្រះ។ នេះមានន័យថាមនុស្សគ្មានបំណងចិត្ត តាមធម្មជាតិក្នុងការចង់ដឹង បម្រើ ស្រឡាញ់ ឬស្តាប់បង្គាត់ព្រះទេ។ នេះបង្ហាញពួកយើងថាតើហេតុអ្វីបាន ជាមនុស្សដែលមិនបានកើតជាថ្មី មិនអាចូលទៅក្នុងនគរព្រះបានឡើយ។ ដើម្បីចូលទៅក្នុងនគរព្រះ យើងត្រូវតែមានជីវិតខាងវិញ្ញាណ ដែលដឹងថាព្រះជាម្ចាស់គឺជាស្តេចរបស់យើង។
យ៉ូហាន ៤:២៤
ឯព្រះ ទ្រង់ជាវិញ្ញាណ ហើយអ្នកណាដែលថ្វាយបង្គំទ្រង់ នោះត្រូវតែថ្វាយបង្គំ ដោយវិញ្ញាណ នឹងសេចក្ដីពិតដែរ
ដើម្បីស្គាល់ព្រះ និងថ្វាយបង្គំទ្រង់ដោយវិញ្ញាណ និងសេចក្តីពិតមិនអាចសម្រេចបានដោយ “មនុស្សខាង សាច់ឈាម” ទេ។ យើងត្រូវតែកើតជាថ្មី។ ពិភាក្សា៖ ប្រសិនបើនរណាម្នាក់សួរអ្នកថាតើហេតុអ្វីបានជាមនុស្សម្នាក់ត្រូវ “កើតជាថ្មី” តើអ្នកនឹងនិយាយថាដូចម្តេច?
មនុស្សស្លាប់ត្រូវបានធ្វើឲ្យរស់ឡើងវិញ
គ្រីស្តសាសនាមានច្រើនជាងការទៅនគរស្ថានសួគ៌នៅពេលយើងស្លាប់ទៅទៀត។ វាគឺជាអំពីការមានជីវិត ខាងវិញ្ញាណដ៏បរិបូរនាពេលឥឡូវនេះ។ តាមធម្មជាតិរបស់មនុស្សស្លាប់ខាងវិញ្ញាណដោយសារតែអំពើបាប ហេតុដូច្នេះហើយបានជាយើងត្រូវការជីវិតថ្មីមកពីព្រះជាម្ចាស់។
អេភេសូរ ២:១-៣
ពីដើម អ្នករាល់គ្នាក៏ស្លាប់ក្នុងការរំលង ហើយក្នុងអំពើបាបដែរ ជាការដែលអ្នករាល់គ្នាបានប្រព្រឹត្ត តាមរបៀបលោកីយនេះ គឺតាមមេគ្រប់គ្រងរាជ្យលើអាកាស ជាវិញ្ញាណ ដែលសព្វថ្ងៃនេះ បណ្តាលមកក្នុងពួកមនុស្សរឹងចចេស យើងរាល់គ្នាទាំងអស់ក៏បានប្រព្រឹត្តក្នុងពួកនោះពីដើមដែរ ដោយសេចក្ដីប៉ងប្រាថ្នារបស់សាច់ឈាមយើង ទាំងប្រព្រឹត្តសេចក្ដីដែលសាច់ឈាម នឹងគំនិតយើងចង់បានផង ហើយតាមកំណើតយើង នោះយើងជាមនុស្សជាប់ក្នុងសេចក្ដីខ្ញាល់ ដូចជាមនុស្សឯទៀតដែរ
ខណៈពេលដែលយើងស្ថិតនៅក្នុងលក្ខខណ្ឌស្លាប់ខាងវិញ្ញាណនេះ ព្រះជាម្ចាស់បានសង្គ្រោះយើង។
អេភេសូរ ២:៤-៥ក
ប៉ុន្តែ ព្រះដែលទ្រង់មានសេចក្ដីមេត្តាករុណាដ៏លើសលប់ ដោយព្រោះសេចក្ដីស្រឡាញ់ជាខ្លាំង ដែលទ្រង់មានដល់យើងរាល់គ្នា ក្នុងកាលដែលយើងនៅស្លាប់ក្នុងការរំលងនៅឡើយ នោះទ្រង់បានប្រោសឲ្យយើងរាល់គ្នាបានរស់ជាមួយនឹងព្រះគ្រីស្ទ
កូល៉ុស ២:១៣
ឯអ្នករាល់គ្នាដែលបានស្លាប់ក្នុងការរំលង ហើយក្នុងសណ្ឋានមិនកាត់ស្បែកខាងសាច់ឈាម នោះទ្រង់បានប្រោសឲ្យរស់ជាមួយនឹងទ្រង់ ដោយបានអត់ទោសចំពោះអស់ទាំងការរំលងរបស់អ្នករាល់គ្នា
ប្រសិនបើអ្នកគឺជាអ្នកជឿ ការរស់ឡើងវិញខាងវិញ្ញាណបានកើតមានឡើង! ដូចជាការដែលព្រះយេស៊ូវបានសុគតខាងសាច់ឈាម ហើយត្រូវបានប្រោសឲ្យរស់ពីស្លាប់ឡើងវិញដោយព្រះជាម្ចាស់ អ្នកបានស្លាប់ខាងវិញ្ញាណ ហើយត្រូវបានលើកឡើងឲ្យមានជីវិតខាងវិញ្ញាណដោយព្រះជាម្ចាស់។
រ៉ូម ៨:១១
មួយទៀត បើព្រះវិញ្ញាណនៃព្រះអង្គ ដែលបានប្រោសឲ្យព្រះយេស៊ូវរស់ពីស្លាប់ឡើងវិញ ទ្រង់សណ្ឋិតក្នុងខ្លួនអ្នករាល់គ្នា នោះព្រះអង្គនោះឯង ដែលបានប្រោសឲ្យព្រះគ្រីស្ទរស់ពីស្លាប់ឡើង ទ្រង់នឹងប្រោសរូបកាយនៃអ្នករាល់គ្នាដែលទៀងតែស្លាប់ ឲ្យមានជីវិតឡើងដែរ ដោយសារព្រះវិញ្ញាណទ្រង់ ដែលសណ្ឋិតនៅក្នុងខ្លួនអ្នករាល់គ្នា។
ជីវិតថ្មីនៃការរស់ឡើងវិញនេះ ដែលយើងមាន បានកើតឡើងចំពោះយើង ដោយសារយើងចូលរួមនៅក្នុងជីវិតរស់ឡើងវិញរបស់ព្រះយេស៊ូវ។
១ ពេត្រុស ១:៣
សូមសរសើរដល់ព្រះដ៏ជាព្រះវរបិតានៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា ដែលទ្រង់បានបង្កើតយើងឡើងជាថ្មី តាមសេចក្ដីមេត្តាករុណាដ៏ធំរបស់ទ្រង់ ដើម្បីឲ្យយើងរាល់គ្នាបានសេចក្ដីសង្ឃឹមដ៏រស់ ដោយសារព្រះយេស៊ូវគ្រីស្ទ ទ្រង់រស់ពីស្លាប់ឡើងវិញ
យ៉ូហាន ៥:២៤
ប្រាកដមែន ខ្ញុំប្រាប់អ្នករាល់គ្នាជាប្រាកដថា អ្នកណាដែលស្តាប់ពាក្យខ្ញុំ ហើយជឿដល់ព្រះអង្គ ដែលចាត់ឲ្យខ្ញុំមក អ្នកនោះមានជីវិតដ៏នៅអស់កល្បជានិច្ច ហើយមិនដែលត្រូវជំនុំជំរះឡើយ គឺបានកន្លងហួសពីសេចក្ដីស្លាប់ ទៅដល់ជីវិតវិញ
១ យ៉ូហាន ៥:១២
ឯអ្នកណាដែលមានព្រះរាជបុត្រា នោះក៏មានជីវិតដែរ តែអ្នកណាដែលគ្មានព្រះរាជបុត្រានៃព្រះទេ នោះគ្មានជីវិតឡើយ។
ប្រសិនបើអ្នកបានកើតជាថ្មីម្តងទៀត អ្នកបានឆ្លងផុតពីការស្លាប់ទៅកាន់ជីវិតហើយ! ការផ្តល់ឲ្យមានជីវិតឡើងវិញមកពីព្រះជាម្ចាស់ យើងពិតជានឹងមិនស្លាប់ឡើយ។ រូបកាយខាងសាច់ឈាមរបស់យើងនឹងស្លាប់ទៅនៅថ្ងៃមួយ ប៉ុន្តែយើងនឹងមិនស្លាប់ទេ។ ហេតុដូច្នេះ កំណើតថ្មីគឺជាចំណុចចាប់ផ្តើមនៃជីវិតដ៏អស់កល្បជានិច្ចជាមួយព្រះជាម្ចាស់។
យ៉ូហាន ១៧:៣
នេះជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែ១ នឹងព្រះយេស៊ូវគ្រីស្ទ ដែលទ្រង់បានចាត់ឲ្យមកផង
តាមរយៈការកើតជាថ្មី ជីវិតខាងវិញ្ញាណថ្មីត្រូវបានផ្តល់មកឲ្យយើង ហើយយើងចាប់ផ្តើមរស់នៅក្នុងជីវិតដែលព្រះជាម្ចាស់មានបំណងព្រះហឫទ័យសម្រាប់មនុស្ស នោះគឺជាជី វិតដ៏ពេញបរិបូរណ៍ដែលមានភាពជិតស្និទ្ធជាមួយព្រះជាម្ចាស់ និងព្រះអាទិកររបស់យើង!
ពិភាក្សា៖ ចូរគិតអំពីបទពិសោធន៍ផ្ទាល់ខ្លួនរបស់អ្នក៖ តើអ្វីជាភាពខុសគ្នារវាងការមានតែជីវិតខាងរូបកាយ ប្រៀបធៀបទៅនឹងការស្គាល់ព្រះជាម្ចាស់ និងការមានជីវិតខាងវិញ្ញាណ? *** ចាក់ចម្រៀងសម្រាប់ឆ្លុះបញ្ចាំង
តើយើងកើតជាថ្មីដោយរបៀបណា?
មនុស្សគ្រប់ៗរូបត្រូវការកើតជាថ្មីដើម្បីទទួលបានជីវិតអស់កល្បជានិច្ចជាមួយព្រះជាម្ចាស់។ មិនថាបុគ្គលខ្ពស់ខ្ពស់ប៉ុណ្ណា ល្អប៉ុណ្ណា ឬមានសីលធម៌ប៉ុណ្ណាគឺតាមស្តង់ដារមនុស្ស បើមិនកើតជាថ្មីទេ គាត់មានតែជីវិតខាងរូបកាយ ប៉ុន្តែមិនមានជីវិតអស់កល្បជានិច្ចនោះទេ។
ដូច្នេះតើយើងអាចមានជីវិតខាងវិញ្ញាណនៃព្រះនៅក្នុងយើងនេះដោយរបៀបណា? សាវ័កប៉ូលប្រាប់យើង៖
ទីតុស ៣:៣-៦
ដ្បិតពីដើម យើងរាល់គ្នាក៏ជាមនុស្សឥតប្រាជ្ញា រឹងចចេស ហើយវង្វេងដែរ ទាំងបំរើសេចក្ដីប៉ងប្រាថ្នា នឹងសេចក្ដីសំរើបផ្សេងៗ ទាំងរស់នៅដោយសេចក្ដីគំរក់ នឹងសេចក្ដីឈ្នានីស យើងក៏គួរខ្ពើម ហើយបានស្អប់គ្នាទៅវិញទៅមកដែរ តែកាលសេចក្ដីសប្បុរសរបស់ព្រះដ៏ជាព្រះអង្គសង្គ្រោះនៃយើង នឹងសេចក្ដីស្រឡាញ់របស់ទ្រង់ដល់មនុស្ស បានលេចមកឲ្យឃើញ នោះទ្រង់បានជួយសង្គ្រោះយើង មិនមែនដោយការដែលយើងបានប្រព្រឹត្តដោយសុចរិតនោះទេ គឺដោយសេចក្ដីមេត្តាករុណារបស់ទ្រង់វិញ ដោយសារការសំអាតនៃសេចក្ដីកើតជាថ្មី ហើយការប្រោសជាថ្មីឡើងវិញនៃព្រះវិញ្ញាណបរិសុទ្ធ ដែលទ្រង់បានចាក់មកលើយើងជាបរិបូរ ដោយសារព្រះយេស៊ូវគ្រីស្ទ ជាព្រះអង្គសង្គ្រោះនៃយើង
សូមកត់សម្គាល់ជាថ្មី ចំនុចផ្ដោតនោះគឺនៅលើជីវិតថ្មីដែលកើតចេញពីទឹក និងព្រះវិញ្ញាណ។ ព្រះជាម្ចាស់សង្គ្រោះយើង “ដោយសារការសំអាតនៃសេចក្ដីកើតជាថ្មី ហើយការប្រោសជាថ្មីឡើងវិញនៃព្រះវិញ្ញាណបរិសុទ្ធ ដែលទ្រង់បានចាក់មកលើយើងជាបរិបូរ ដោយសារព្រះយេស៊ូវគ្រីស្ទ ជាព្រះអង្គសង្គ្រោះនៃយើង”។
យ៉ូហាន ៦:៦៣
គឺជាវិញ្ញាណដែលឲ្យមានជីវិត រូបសាច់គ្មានប្រយោជន៍អ្វីទេ ឯពាក្យដែលខ្ញុំនិយាយនឹងអ្នករាល់គ្នា នោះត្រូវខាងវិញ្ញាណនឹងជីវិតវិញ
មានតែព្រះវិញ្ញាណរបស់ព្រះជាម្ចាស់តែប៉ុណ្ណោះអាចធ្វើឲ្យមនុស្សម្នាក់មានជីវិតខាងវិញ្ញាណបាន។ សាច់ឈាមមិនអាចជួយអ្វីបានឡើយ។ វាគឺជាព្រះវត្តមានរបស់ព្រះវិញ្ញាណបរិសុទ្ធរបស់ព្រះជាម្ចាស់នៅក្នុងយើងដែលធ្វើឲ្យយើងមានជីវិតខាងវិញ្ញាណ មានទំនាក់ទំនងជាមួយព្រះ និងអាចដឹង និងទទួលបានសេចក្តីពិតខាងវិញ្ញាណ។
សូមកត់សម្គាល់ផងដែរអំពីសារៈសំខាន់នៃព្រះបន្ទូលរបស់ព្រះជាម្ចាស់ដើម្បីបង្កើតកំណើតថ្មី។ ព្រះយេស៊ូវមានបន្ទូល “ឯពាក្យដែលខ្ញុំនិយាយនឹងអ្នករាល់គ្នា នោះត្រូវខាងវិញ្ញាណនឹងជីវិតវិញ”។ សាវ័កពេត្រុសប្រាប់យើង៖
១ ពេត្រុស ១:២២-២៥ (គកស១៦)
ដោយអ្នករាល់គ្នាបានជម្រះព្រលឹងឲ្យបានស្អាតបរិសុទ្ធ ដោយស្តាប់តាមសេចក្តីពិត ដើម្បីឲ្យអ្នករាល់គ្នាមានសេចក្តីស្រឡាញ់ជាបងប្អូន នោះចូរស្រឡាញ់គ្នាទៅវិញទៅមកឲ្យអស់ពីចិត្តចុះ។ ព្រះបានបង្កើតអ្នករាល់គ្នាជាថ្មី មិនមែនពីពូជដែលតែងតែពុករលួយនោះទេ គឺពីពូជដែលមិនចេះពុករលួយវិញ ជាព្រះបន្ទូលរបស់ព្រះដែលរស់នៅ ហើយស្ថិតស្ថេរ។ ដ្បិតមនុស្សគ្រប់រូបប្រៀបដូចជាស្មៅ ហើយសិរីល្អទាំងប៉ុន្មានរបស់មនុស្សក៏ដូចជាផ្កាស្មៅ។ ស្មៅតែងតែក្រៀមស្វិត ហើយផ្កាក៏រុះរោយដែរ តែព្រះបន្ទូលរបស់ព្រះអម្ចាស់ស្ថិតស្ថេរអស់កល្បជានិច្ចវិញ ព្រះបន្ទូលនោះគឺជាដំណឹងល្អដែលបាន ប្រកាស ប្រាប់អ្នករាល់គ្នា។
លោកពេត្រុសប្រាប់យើងពីរបៀបកំណើតថ្មីចាប់បដិសន្ធិឡើង៖ “ព្រះបានបង្កើតអ្នករាល់គ្នាជាថ្មី (តាមរយៈ) … ជាព្រះបន្ទូលរបស់ព្រះដែលរស់នៅ ហើយស្ថិតស្ថេរ… ព្រះបន្ទូលនោះគឺជាដំណឹងល្អដែលបានប្រកាស ប្រាប់អ្នករាល់គ្នា”។ រឿងនេះប្រាប់យើងថាគឺតាមរយៈដំណឹងល្អដែលយើងបានកើតជាថ្មី។ លោកយ៉ាកុបបញ្ជាក់ពីចំណុចនេះ។ គាត់សំដៅទៅលើកំណើតថ្មីបែបយ៉ាងដូច្នេះ៖
យ៉ាកុប ១:១៨
ទ្រង់បានបង្កើតយើងរាល់គ្នាមកតាមព្រះហឫទ័យទ្រង់ ដោយសារព្រះបន្ទូលដ៏ពិត ប្រយោជន៍ឲ្យយើងបានបែបដូចជាផលដំបូង ក្នុងរបស់ទាំងប៉ុន្មានដែលទ្រង់បង្កើតមក។
ពាក្យបកប្រែថា “បានបង្កើតយើងរាល់គ្នាមក” (ἀπεκύησεν) គឺជាពាក្យជាភាសាក្រិកសម្រាប់ ‘កំណើត’។ របៀបដែលព្រះជាម្ចាស់បង្កើតយើងគឺដោយសារ “ព្រះបន្ទូលដ៏ពិត” ឃ្លាដែលនៅក្នុងព្រះគម្ពីរតែងតែសំដៅទៅលើដំណឹងល្អ (អេភេសូ ១:១៣; កូឡុស ១:៥; ២ ធីម៉ូថេ ២:១៥)។ ដូច្នេះគឺតាមរយៈដំណឹងល្អដែលយើងបានកើតជាថ្មីម្តងទៀត។
ព្រះបន្ទូល និងព្រះវិញ្ញាណ
ព្រះវិញ្ញាណដ៏បរិសុទ្ធ និងព្រះបន្ទូលព្រះធ្វើការរួមគ្នានៅក្នុងកំណើតថ្មី។ ព្រះវិញ្ញាណបរិសុទ្ធធ្វើចលនាស្របជាមួយនឹងការផ្សាយដំណឹងល្អ។ យ៉ូហាន ១៦:១៤ ប្រាប់យើងថាបេសកកម្មនៃព្រះវិញ្ញាណដ៏បរិសុទ្ធគឺដើម្បីលើកតម្កើងព្រះយេស៊ូវ។ ហេតុដូច្នេះ ព្រះវិញ្ញាណបរិសុទ្ធនឹងមិនធ្វើឱ្យមនុស្សកើតជាថ្មី ដាច់ដោយឡែកក្រៅពីពួកគេឮដំណឹងល្អំពីព្រះយេស៊ូវទេ។
កិច្ចការ ១០:៤៤
កាលពេត្រុសកំពុងតែអធិប្បាយនៅឡើយ នោះព្រះវិញ្ញាណបរិសុទ្ធក៏យាងចុះមក សណ្ឋិតលើអស់អ្នកដែលកំពុងតែស្តាប់ព្រះបន្ទូល
នៅក្នុងសៀវភៅកិច្ចការ សាវ័កផ្សព្វផ្សាយដំណឹងល្អ ហើយបន្ទាប់មកព្រះវិញ្ញាណបរិសុទ្ធយាងចូលមក កាន់មនុស្ស ហើយពួកគេបានកើតជាថ្មី។ រឿងនេះអាចកើតឡើងទៅដល់មនុស្សចំនួនបីពាន់នាក់ ក្នុងពេលតែមួយដូច ជានៅថ្ងៃបុណ្យទីហាសិបនៅក្នុងទីក្រុងយេរូសាឡឹម (កិច្ចការ ២)។ វាក៏អាចកើតឡើងចំពោះបុគ្គលម្នាក់ ដូចជានៅពេលដែលព្រះជាម្ចាស់បើកដួងចិត្តរបស់លីឌា ដើម្បីឆ្លើយតបទៅកាន់សាររបស់លោកប៉ូល (កិច្ចការ ១៦)។
មេរៀនសម្រាប់យើងគឺថាយើងមិនអាចបង្កើតឲ្យមានកំណើតថ្មីបានទេ នៅក្នុងខ្លួនយើង ឬនៅក្នុងអ្នកដទៃ។ វាគឺជាកិច្ចការនៃការបង្កើតថ្មីមកពីព្រះជាម្ចាស់តាមរយៈព្រះវិញ្ញាណបរិសុទ្ធរបស់ទ្រង់តាមរយៈដំណឹងល្អ។ ហេតុដូច្នេះ ប្រសិនបើយើងចង់ឱ្យ មនុស្សទទួលបានកំណើតថ្មី តួរនាទីរបស់យើងគឺនិយាយពីដំណឹងល្អរបស់ព្រះជាម្ចាស់ ហើយទុកចិត្តលើព្រះវិញ្ញាណបរិសុទ្ធដើម្បីធ្វើកិច្ចការកំណើតថ្មី។
នៅក្នុងលោកុប្បត្តិ ជំពូក ១ យើងអានថាព្រះជាម្ចាស់បានបង្កើតផែនដី និងរបស់គ្រប់យ៉ាងនៅក្នុងនោះ។ តើទ្រង់ធ្វើវាបានដោយរបៀបណា? ចម្លើយគឺ៖ តាមរយៈព្រះបន្ទូលទ្រង់ និងព្រះវិញ្ញាណរបស់ទ្រង់។ ព្រះវិញ្ញាណបានរេរានៅលើផ្ទៃទឹក ហើយព្រះជាម្ចាស់មានបន្ទូល ហើយវាកើតឡើងយ៉ាងដូច្នោះ។ ការបង្កើតទាំងអស់កើតមានឡើងដោយសារតែព្រះបន្ទូល និងព្រះវិញ្ញាណរបស់ព្រះជាម្ចាស់។
ព្រះជាម្ចាស់បានបង្កើតមនុស្សតាមសណ្ឋានរបស់ទ្រង់។ បន្ទាប់មកនៅពេលដែលមនុស្សបះបោរប្រឆាំងនឹងព្រះជាម្ចាស់ដោយសារអំពើបាប យើងបានឃ្លាតដាច់ឆ្ងាយចេញពីព្រះជន្មរបស់ព្រះជាម្ចាស់។ ឥឡូវនេះ ព្រះជាម្ចាស់កំពុងតែធ្វើឲ្យយើងបង្កើតយើងជាថ្មី ហើយជាថ្មីម្តងទៀតទ្រង់ធ្វើតាមរយៈព្រះបន្ទូល និងព្រះវិញ្ញាណបរិសុទ្ធរបស់ទ្រង់។ ការផ្លាស់ប្តូរនេះគឺធំណាស់ដែលវាគឺជា ការបង្កើតថ្មី។
វិវរណៈ ២១:៥ក
ឯព្រះអង្គ ដែលគង់លើបល្ល័ង្ក ទ្រង់មានបន្ទូលថា មើល អញធ្វើទាំងអស់ឡើងជាថ្មី
២ កូរិនថូស ៥:១៧
បានជាបើអ្នកណានៅក្នុងព្រះគ្រីស្ទ នោះឈ្មោះថាបានកើតជាថ្មីហើយ អស់ទាំងសេចក្ដីចាស់បានកន្លងបាត់ទៅ មើល គ្រប់ទាំងអស់បានត្រឡប់ជាថ្មីវិញ
ព្រះជាម្ចាស់បានបង្កើតមនុស្សឲ្យមានសណ្ឋានដូចជាទ្រង់។ សណ្ឋានត្រូវបានបំផ្លាញដោយសារអំពើបាប។ ប៉ុន្តែព្រះជាម្ចាស់កំពុងតែស្តារសណ្ឋានរបស់ទ្រង់នៅក្នុងមនុស្សវិញ។ ជាលទ្ធផលនៃកំណើតថ្មី អ្នកមាន " មនុស្សថ្មីវិញ ដែលកើតមកក្នុងសេចក្ដីសុចរិត ហើយក្នុងសេចក្ដីបរិសុទ្ធរបស់ផងសេចក្ដីពិត តាមភាពព្រះ។” (អេភេសូរ ៤:២៤) និង "មនុស្សថ្មីវិញ ដែលកំពុងតែកែឡើងខាងឯសេចក្ដីចេះដឹង ឲ្យបានត្រូវនឹងរូបអង្គព្រះ ដែលបង្កើតមនុស្សថ្មីនោះមក (កូល៉ុស ៣:១០)!
សង្ខេប៖ កំណើតថ្មីគឺជាការអស្ចារ្យរបស់ព្រះជាម្ចាស់ដែលទ្រង់បានប្រទានជីវិតខាងវិញ្ញាណដ៏នៅអស់កល្បជានិច្ចដល់អ្នកដែលស្លាប់ក្នុងការរំលង និងអំពើបាបរបស់ពួកគេ នៅពេលដែលពួកគេទទួលដំណឹងល្អពីព្រះយេស៊ូវជាព្រះអង្គសង្គ្រោះ ហើយទទួលព្រះវិញ្ញាណរបស់ព្រះជាម្ចាស់នៅក្នុងពួកគេ។
ភ័ស្តុតាង និងលទ្ធផលនៃកំណើតថ្មី
ឯខ្យល់ ចង់បក់ទៅឯណា ក៏ចេះតែបាន ហើយអ្នកឮសូរសព្ទ តែមិនដឹងជាមកពីណា ឬទៅឯណាទេ អស់អ្នកណាដែលកើតមកពីព្រះវិញ្ញាណ នោះក៏ដូច្នោះដែរ” (យ៉ូហាន 3:8).
ព្រះយេស៊ូវមានបន្ទូលថាកំណើតថ្មីគឺដូចជាខ្យល់។ តើទ្រង់មានន័យយ៉ាងដូចម្តេច?
-
ទីមួយ វាកើតឡើងទៅតាមបំណងព្រះហឫទ័យរបស់ព្រះជាម្ចាស់។ យើងមិនអាចបង្កើតខ្យល់ ឬធ្វើឲ្យព្រះវិញ្ញាណមានចលនាបានទេ។ វាមិនមែនជាអំណាចដែលមនុស្សអាចគ្រប់គ្រងបាននោះទេ។
-
ទីពីរ កំណើតថ្មីគឺមើលមិនឃើញ។ ដូចជាអ្នកមិនអាចមើលឃើញខ្យល់ដូច្នោះដែរ ប៉ុន្តែអ្នកអាចមើលឃើញពីឥទ្ធិពលរបស់ខ្យល់ អ្នកមិនអាចមើលឃើញកំណើតថ្មីកើតឡើងទេ ប៉ុន្តែអ្នកអាចមើលឃើញពីឥទ្ធិពលរបស់វានៅក្នុងជីវិតរបស់មនុស្សម្នាក់។
-
ទីបី ដូចជាខ្យលល់ដែរ កំណើតថ្មីគឺមិនអាចទាយទុកជាមុនបានទេ។ វាមិនអាចដឹងបានថាពេលណា និងកន្លែងណាដែលវានឹងកើតឡើងនោះទេ។
-
ទីបួន កំណើតថ្មីគឺមានថាមពល។ ខ្យល់អាចបក់ដោយកម្លាំងដែលវាផ្លាស់ប្តូរតំបន់មួយទាំងស្រុង។ ដូចគ្នាដែរ កំណើតថ្មីធ្វើឲ្យមានការផ្លាស់ប្តូរបុគ្គល ក្រុមជំនុំ សហគមន៍ និងសូម្បីតែជាតិសាសន៍។
ដូច្នេះតើយើងដឹងបានយ៉ាងដូចម្តេចថាប្រសិនបើមនុស្សម្នាក់បានកើតជាថ្មី? ចូរយើងសរុបសេចក្តីនៃមេរៀននេះតាមរយៈការមើលទៅកាន់ភ័ស្តុតាង និងលទ្ធផលនៃការកើតជាថ្មី។
(១) ជំនឿលើព្រះយេស៊ូវ
១ យ៉ូហាន ៥:១
អស់អ្នកណាដែលជឿថា ព្រះយេស៊ូវជាព្រះគ្រីស្ទ អ្នកនោះបានកើតពីព្រះមក ហើយអស់ទាំងអ្នកណាដែលស្រឡាញ់ព្រះដ៏បង្កើតខ្លួនមក នោះក៏រមែងស្រឡាញ់ដល់អស់អ្នកឯទៀត ដែលកើតពីទ្រង់មកដែរ
ភ័ស្តុតាងទីមួយដែលយើងបានកើតជាថ្មីគឺថាយើងជឿថាព្រះយេស៊ូវគឺជាព្រះគ្រីស្ទ។ សេចក្តីជំនឿរបស់យើងមិនបណ្តាលឲ្យមានកំណើតថ្មីទេ។ កំណើតថ្មីបណ្តាលឲ្យមានជំនឿ។ វាគឺដោយសារមនុស្សម្នាក់បានកើតមកអំពីព្រះ គាត់ជឿថាព្រះយេស៊ូវគឺជាព្រះគ្រីស្ទ។ ដើម្បីជឿថាព្រះយេស៊ូវគឺជា “ព្រះគ្រីស្ទ” គឺត្រូវដឹងថាទ្រង់បានទទួលការចាក់ប្រេងតាំងពីព្រះជាម្ចាស់ ឲ្យក្លាយជាស្តេចនៅក្នុងជីវិតរបស់អ្នក។ នេះគឺជាអ្វីដែលព្រះយេស៊ូវគឺសម្រាប់អស់អ្នកដែលបានកើតជាថ្មីម្តងទៀត។
(២) សេចក្តីស្រឡាញមកពីព្រះសម្រាប់អ្នកដទៃ
១ យ៉ូហាន ៤:៧
ពួកស្ងួនភ្ងាអើយ យើងត្រូវស្រឡាញ់គ្នាទៅវិញទៅមក ដ្បិតសេចក្ដីស្រឡាញ់មកពីព្រះ ឯអស់អ្នកណាដែលមានសេចក្ដីស្រឡាញ់ នោះឈ្មោះថាមកពីព្រះ ហើយក៏ស្គាល់ទ្រង់ដែរ
ភ័ស្តុតាងមួយទៀតដែលមនុស្សម្នាក់បានកើតជាថ្មីគឺជាសេចក្តីស្រឡាញ់។ កំណើតថ្មីផ្លាស់ប្រែដួងចិត្តរបស់មនុស្សដែលពីមុនមកធ្លាប់បានបដិសេធ ច្រានចោល ឬមិនស្គាល់ព្រះជាម្ចាស់ទេ ដើម្បីឲ្យពួកគេបានក្លាយជាមនុស្សដែលស្រឡាញ់ទ្រង់ ហើយជាលទ្ធផលចេះស្រឡាញ់ដល់អ្នកដទៃទៀត។
១ យ៉ូហាន ៣:១៤
យើងរាល់គ្នាដឹងថា យើងបានកន្លងផុតពីសេចក្ដីស្លាប់ ទៅដល់ជីវិតហើយ ពីព្រោះយើងស្រឡាញ់ដល់ពួកបងប្អូន ឯអ្នកណាដែលមិនស្រឡាញ់បងប្អូន អ្នកនោះជាអ្នកនៅជាប់ក្នុងសេចក្ដីស្លាប់នៅឡើយ
កំណើតថ្មីមានន័យថាព្រះជាម្ចាស់បានប្រទានឲ្យអ្នកមានដួងចិត្តថ្មីមួយ។ នៅក្នុង អេសេគាល ៣៦ ព្រះជាម្ចាស់ពណ៌នាអំពីរឿងនេះថា ជាការជំនួសដួងចិត្តដែលរឹងដូចថ្ម របស់អ្នកដោយដួងចិត្តជាសាច់វិញ។ ឥឡូវនេះអ្នកអាចស្រឡាញ់ព្រះជាម្ចាស់ និងស្រឡាញ់មនុស្សតាមរបៀបមួយដែលអ្នកមិនធ្លាប់បានធ្វើពីមុនមក។
(៣) ប្រព្រឹត្តតាមសេចក្ដីសុចរិត
១ យ៉ូហាន ២:២៩
បើអ្នករាល់គ្នាដឹងថា ទ្រង់សុចរិត នោះត្រូវតែយល់ឃើញថា អស់អ្នកណាដែលប្រព្រឹត្តតាមសេចក្ដីសុចរិតនោះ គេបានកើតពីទ្រង់មកដែរ។
កំណើតថ្មីបង្កើតឲ្យមានប្រព្រឹត្តសុចរិតនៅក្នុងជីវិតរបស់មនុស្សម្នាក់ដោយសារតែវាផ្លាស់ប្តូរដួងចិត្តរបស់គាត់ ឆន្ទៈរបស់គាត់ និងបំណងចិត្តរបស់គាត់។ មនុស្សដែលចូលចិត្តធ្វើតាមឆន្ទៈរបស់ខ្លួនពីមុន ឥឡូវនេះចូលចិត្តធ្វើតាមព្រះហឫទ័យរបស់ព្រះជាម្ចាស់វិញ។ គាត់ស្រេកឃ្លាននូវភាពសុចរិត ហើយព្រះវិញ្ញាណរបស់ព្រះជាម្ចាស់នៅក្នុងគាត់អនុញ្ញាតិឲ្យគាត់លូតលាស់នៅក្នុងសេចក្តីសុចរិត។
(៤) ការយកឈ្នះបាប
១ យ៉ូហាន ៣:៩
អស់អ្នកណាដែលកើតពីព្រះ នោះមិនដែលប្រព្រឹត្តអំពើបាបទេ ពីព្រោះពូជព្រះនៅក្នុងអ្នកនោះឯង បានជាពុំអាចនឹងធ្វើបាបបានឡើយ ដ្បិតបានកើតពីព្រះមក
១ យ៉ូហាន ៥:១៨
យើងដឹងថា អ្នកណាដែលកើតពីព្រះមក នោះមិនចេះធ្វើបាបទេ អ្នកនោះឯងជាអ្នករក្សាខ្លួនវិញ ហើយមេកំណាចនឹងពាល់អ្នកនោះមិនបានឡើយ
លទ្ធផលដទៃទៀតនៃការកើតម្តងទៀតគឺថាឥឡូវនេះអ្នកស្រេកឃ្លាននូវភាពបរិសុទ្ធ។ អ្នកស្រឡាញ់ព្រះជាម្ចាស់ និងមនុស្ស និងហេតុដូច្នេះហើយបានជាអ្នកមិនចង់ធ្វើបាបប្រឆាំងទាស់នឹងព្រះជាម្ចាស់ និងមនុស្សទៀតទេ។ ឥឡូវនេះអ្នកមានបំណងចិត្តចង់បានភាពបរិសុទ្ធ ច្រើនជាងដែលអ្នកមានបំណងចិត្តចង់ធ្វើបាប។ ** កំណត់សម្គាល់គ្រូ #២
(៥) ការយកឈ្នះទៅលើពិភពលោក
១ យ៉ូហាន ៥:៤
ពីព្រោះគ្រប់ទាំងអស់ដែលកើតពីព្រះមក នោះបានឈ្នះលោកីយហើយ ឯជ័យជំនះដែលឈ្នះលោកីយ នោះគឺជាសេចក្ដីជំនឿរបស់យើង
សញ្ញាមួយទៀតដែលមនុស្សម្នាក់បានទទួលកំណើតថ្មីគឺថាគាត់មិនត្រូវបានគ្រប់គ្រងដោយពិភពលោកនេះ ទៀតទេ។ របស់ដែលគាត់ឲ្យតម្លៃ (អំណាច ទ្រព្យសម្បត្តិ ការសរសើររបស់មនុស្ស កិត្តិយស។ល។) លែងជាអន្ទាក់សម្រាប់គាត់ទៀតហើយ។ គាត់បានយកឈ្នះពិភពលោកនេះហើយ!
ពិភាក្សាជាមួយដៃគូ៖ តើអ្នកបានកើតជាថ្មីឬ? ប្រសិនបើមាន តើមានការផ្លាស់ប្តូរអ្វីខ្លះជាលទ្ធផលនៅក្នុងជីវិតរបស់អ្នក?
អធិស្ឋានបញ្ចប់។
កំណត់សម្គាល់គ្រូ
កំណត់សម្គាល់គ្រូ #១
* ទារកមិនដឹងថាខ្លួនវាកើតមកដោយរបៀបណានោះទេ។ អស់រយៈពេលជាច្រើនឆ្នាំក្រោយមក គាត់ប្រហែលជាចង់ដឹង ហើយសួរទៅកាន់ឪពុកម្តាយរបស់គាត់ “តើទារកកើតមកពីណា?”។ ប៉ុន្តែពួកគេមិនប្រាប់គាត់នោះទេ។ តាមពិត ប្រហែលជាអស់រយៈពេលជាច្រើនឆ្នាំក្រោយមករហូតទាល់តែគាត់រកឃើញចម្លើយ (ហើយសូម្បីតែពេលនោះគាត់មិនជឿវាឡើយ!)។ ដូចគ្នា អ្នកជឿថ្មីជាធម្មតាច្រើនតែមិនដឹងថាមានអ្វីកើតឡើងចំពោះគាត់ខាងវិញ្ញាណនៅពេលគាត់ក្លាយជាគ្រីស្ទាននោះទេ។ ព្រះគម្ពីរប្រាប់គាត់ថាគាត់បាន “កើតជាថ្មី” ប៉ុន្តែគាត់មិនយល់ថាតើវាមានន័យយ៉ាងដូចម្តេចនោះទេ។ ប្រហែលជាអស់រយៈពេលជាច្រើនឆ្នាំក្រោយមកទើបគាត់យល់។
កំណត់សម្គាល់គ្រូ #២
** តើលោកយ៉ូហានមានន័យថានៅពេលដែលមនុស្សម្នាក់កើតជាថ្មីគាត់នឹងរស់នៅក្នុងជីវិតដែលមិនធ្វើបាបទៀត? ទេ នៅក្នុងសំបុត្រដូចគ្នានោះលោកយ៉ូហានបានសរសេរថា “បើសិនជាយើងថា យើងគ្មានបាបសោះ នោះឈ្មោះថាយើងបញ្ឆោតដល់ខ្លួន ហើយសេចក្ដីពិតមិនស្ថិតនៅក្នុងយើងទេ បើយើងលន់តួបាបវិញ នោះទ្រង់មានព្រះហឫទ័យស្មោះត្រង់ ហើយសុចរិត ប្រយោជន៍នឹងអត់ទោសបាបឲ្យយើង ហើយនឹងសំអាតយើង ពីគ្រប់អំពើទុច្ចរិតទាំងអស់ផង” (១ យ៉ូហាន ១:៨-៩)។ អ្វីដែលលោកយ៉ូហាននិយាយគឺថាមនុស្សកើតជាថ្មីមិនបន្តធ្វើបាបទៀតទេ។ គាត់មានន័យថាមនុស្សដែលកើតជាថ្មីម្តងទៀតមិនមានរបៀបរស់នៅដែលបះបោរ និងមិនស្តាប់បង្គាប់ព្រះជាម្ចាស់ឡើយ។
