ព្រះយេស៊ូវ​ទ្រង់​យាង​គ្រប់​សព្វ​ក្នុង​ស្រុក​កាលីឡេ ទ្រង់​បង្រៀន​ក្នុង​អស់​ទាំង​សាលា​ប្រជុំ ក៏​ប្រកាស​ដំ ណឹង​ល្អ​ពី​នគរ ព្រម​ទាំង​ប្រោស​ជំងឺ​គ្រប់​មុខ និង​អស់​ទាំង​ជរា​ពិការ ក្នុង​ពួក​បណ្តាជន​ឲ្យ​ជា​ផង។ ដំណឹង​ ពី​ទ្រង់​បាន​ឮ​សុសសាយ​ទួទៅ ពេញ​ក្នុង​ស្រុក​ស៊ីរី គេ​ក៏​នាំ​អស់​ទាំង​មនុស្ស​ដែល​មាន​ជំងឺ រោគា​គ្រាំ​គ្រា​ ផ្សេងៗ ទាំង​មនុស្ស​អារក្ស​ចូល មនុស្ស​ឆ្កួត​ជ្រូក និង​មនុស្ស​ស្លាប់​ដៃ​ស្លាប់​ជើង មក​ឯ​ទ្រង់ ហើយ​ទ្រង់​ក៏​ ប្រោស​ឲ្យ​បាន​ជា​ទាំង​អស់​គ្នា។

[ម៉ាថាយ 4:23-24] 

 

នៅក្នុងសៀវភៅដំណឹងល្អទាំង ៤ យើងបានអានអំពី ព្រះយេស៊ូវបានធ្វើការអស្ចារ្យជាច្រើន។ គ្រប់ទី កន្លែងដែលព្រះអង្គយាងទៅ តែងតែមានអ្នកនាំយកអ្នកជម្ងឺ អ្នកពិការ អ្នកអារក្សចូលមក មករកព្រះយេស៊ូវ ហើយព្រះអង្គ "​ប្រោស​ជំងឺ​គ្រប់​មុខ និង​អស់​ទាំង​ជរា​ពិការ ក្នុង​ពួក​បណ្តាជន​ ឲ្យ​ជា​ផង”។  គេបានកត់ត្រាអំពីការអស្ចារ្យទាំង ៣៥ ដែលព្រះយេស៊ូវបានធ្វើនៅក្នុង សៀវភៅដំណឹងល្អ ហើយយើងក៏ដឹងថា មានការអស្ចារ្យច្រើនជាងនេះទៅទៀត។ ជាការពិត ព្រះយេស៊ូវបានធ្វើការអស្ចារ្យជាច្រើន ដែលគេមិន បានកត់ត្រាទុកអស់។

​

[យ៉ូហាន 21:25] ឥឡូវនេះ ក៏មានការជាច្រើនផ្សេងទៀតដែលព្រះយេស៊ូវបានធ្វើ។ បើសិនជាគេកត់ត្រា ទុកអំពីការអស្ចារ្យទាំងនោះ ខ្ញុំគិតថាពិភពលោកនេះ មិនអាចដាក់សៀវភៅដែល បានកត់ត្រាហើយ នោះអស់ទេ។

 

នៅក្នុងមេរៀននេះ យើងនឹងមើលអំពី ប្រភេទផ្សេងៗនៃការអស្ចារ្យដែលព្រះយេស៊ូវបានធ្វើ។ ការអស្ចារ្យ ទាំងអស់នេះ អាចបែងចែកចេញជា ៤ ប្រភេទដូចខាងក្រោម៖

• ព្រះយេស៊ូវប្រោស​អ្នកជម្ងឺឲ្យជា

• ព្រះយេស៊ូវដេញវិញ្ញាណអាក្រក់

• ព្រះយេស៊ូវគ្រប់គ្រងធម្មជាតិ

• ព្រះយេស៊ូវប្រោសមនុស្សស្លាប់ឱ្យរស់ឡើងវិញ

 

ចូរមើលអំពី ការអស្ចារ្យនីមួយៗ ដើម្បីដឹងអំពី អ្វីដែលវាប្រាប់អំពី ព្រះយេស៊ូវ

 

(1) ព្រះយេស៊ូវប្រោស​អ្នកជម្ងឺឲ្យជា

ព្រះយេស៊ូវ ទ្រង់​យាង​ចេញ​ពី​ទី​នោះ មក​ខាង​សមុទ្រ​កាលីឡេ រួច​យាង​ឡើង​ទៅ​លើ​ភ្នំ គង់​ចុះ​នៅ​ទី​នោះ នោះ​មាន​ហ្វូង​មនុស្សមក​ឯ​ទ្រង់​កកកុញ នាំ​ទាំង​មនុស្ស​ខ្វិន ខ្វាក់ គ ពិការ និង​មនុស្ស​ឯ​ទៀត​ជា​ច្រើន មក ​ដាក់​នៅ​ទៀប​ព្រះបាទ​ទ្រង់ ហើយ​ទ្រង់​ក៏​ប្រោស ឲ្យ​គេ​បាន​ជាដល់ម៉្លេះ​បាន​ជា​បណ្តា​មនុស្ស​ ទាំង​ប៉ុន្មាន​ មាន​សេចក្តី​អស្ចារ្យ ដោយ​ឃើញ​មនុស្ស​គ​និយាយ​បាន មនុស្ស​ពិការ​បាន​មាំមួន មនុស្ស​ខ្វិន​ដើរ​រួច និង ​មនុស្ស​ខ្វាក់​មើល​ឃើញ ហើយ​គេ​ក៏​សរសើរដំកើង​ដល់​ព្រះ​នៃ​សាសន៍​អ៊ីស្រាអែល​គ្រប់ៗ​គ្នា។ [ម៉ាថាយ 15:29-31]

​

ព្រះយេស៊ូវបានធ្វើការអស្ចារ្យជាច្រើន ដែលបង្ហាញអំពី ព្រះចេស្ដារបស់ព្រះអង្គ ក្នុងការប្រោសឲ្យជា​មនុស្ស​មនមានជម្ងឺ និងពិការភាព។ ព្រះអង្គព្យាបាលអ្នកជម្ងឺឃ្លង់ អ្នកគ្រុនក្ដៅ មនុស្សពិការភ្នែក មនុស្សថ្លង់ មនុស្សគ មនុស្សពិការដៃជើង និងមនុស្សស្វិតដៃស្វិតជើង ជាដើម។ មនុស្សម្នានាំយក មនុស្សក្នុងស្ថាន ភាពលំបាកវេទនាមកកាន់ព្រះយេស៊ូវ ហើយព្រះអង្គប្រោសពួកគេទាំងអស់។ ព្រះអង្គមិនដែល បដិសេធមិនប្រោសនរណាម្នាក់ ដែលគេនាំយកមកកាន់ព្រះអង្គនោះទេ ហើយព្រះអង្គក៏មិនដែលមិន អាចប្រោសអ្នកណាបានដែរ។

​

នៅពេលខ្លះ ព្រះអង្គបានស្ដារមនុស្សឱ្យត្រឡប់មកស្ថានភាពដើមវិញ ជាឧទាហរណ៍ ការព្យាបាលដៃ ស្វិត និងភ្ជាប់ស្លឹកត្រចៀកដាច់ឱ្យជាប់ឡើងវិញ។ ប៉ុន្តែ នៅក្នុងករណីផ្សេងទៀត ព្រះអង្គបាន ប្រទានឱ្យ មនុស្សមានសមត្ថភាពថ្មីដែលគេមិនដែលមានពីមុនមក ដូចជាប្រោស​ឱ្យបុរសពិការភ្នែកពីកំណើត បានភ្លឺឡើងវិញ។

​

ព្រះយេស៊ូវបានជួយមនុស្ស ដែលគ្មាននរណាអាចជួយគេបាន។ មានស្រ្តីម្នាក់ធ្លាក់ឈាម ១២ ឆ្នាំ បាន ចាយលុយទាំងអស់ដែលគាត់មាន ទៅលើគ្រូពេទ្យ តែគ្មានពេទ្យណាអាចព្យាបាលគាត់បានទេ។ ប៉ុន្តែ នៅពេលដែលគាត់ប៉ះព្រះពស្ត្ររបស់ព្រះយេស៊ូវ គាត់បានជាទាំងស្រុង។ 

ហើយមានបុរសម្នាក់ពិការអស់រយៈពេល ៣៨ ឆ្នាំ តែព្រះយេស៊ូវបានប្រោស​គាត់ឲ្យជា ដោយ ពាក្យបញ្ជា តែមួយម៉ាត់ប៉ុណ្ណោះ។ ការប្រោសឲ្យជានីមួយៗកើតឡើងភ្លាមៗ មិនមែនកើតឡើងបន្តិចម្ដងៗ អស់ពេល ប៉ុន្មានថ្ងៃ ឬប៉ុន្មានសប្ដាហ៍នោះទេ។ ការអស្ចារ្យទាំងនេះ បង្ហាញថា ព្រះយេស៊ូវមានអំណាចទៅលើ ផ្នែក រូបរាងកាយដែរ។

​

[ម៉ាកុស 7:37] គេ​នឹក​ប្លែក​ក្នុង​ចិត្ត​ជា​ខ្លាំង​ពន់ពេក ដោយ​ពាក្យ​ថា លោក​បាន​ធ្វើ​ការ​ទាំង​អស់​សុទ្ធ​តែ​ល្អ គឺ​បាន​ប្រោស​ទាំង​មនុស្ស​ថ្លង់​ឲ្យ​ស្តាប់​ឮ ហើយ​មនុស្ស​គ​ឲ្យ​និយាយ​បាន។

 

ការអស្ចារ្យនៃការប្រោសឲ្យជាដែលព្រះយេស៊ូវបានធ្វើ
. បុរសកើតជម្ងឺឃ្លង់ (ម៉ាថាយ 8:2-4, ម៉ាកុស 1:40-42, លូកា 5:12-13)
. បុរសម្នាក់បម្រើនាយទាហ៊ានរ៉ូម៉ាំងស្លាប់ដៃជើង (ម៉ាថាយ 8:5-13, លូកា 7:1-10)
. ម្ដាយក្មេករបស់ពេត្រុសកំពុងដេកគ្រុន (ម៉ាថាយ 8:14-15, ម៉ាកុស 1:30-32, លូកា 4:38-39)
. បុរសស្លាប់ដៃជើង (ម៉ាថាយ 9:2-7, ម៉ាកុស 2:3-12, លូកា​ 5:18-25)
. ស្រ្តីធ្លាក់ឈាម (ម៉ាថាយ 9:20-22, ម៉ាកុស 5:25-29, លូកា 8:43-48)
. បុរសពិការភ្នែក ២ នាក់ (ម៉ាថាយ 9:27-31)
. បុរសស្វិតដៃម្នាក់ (ម៉ាថាយ 12:10-13, ម៉ាកុស 3:1-5, លូកា 6:6-10)
. បុរសពិការភ្នែក ២ នាក់ បូកទាំង បារទីមេ (ម៉ាថាយ 20:29-34, ម៉ាកុស 10:46-52, លូកា 18:35-43)
. បុរសម្នាក់កើតជម្ងឺទាចទឹក (លូកា 14:1-4)
. បុរសកើតឃ្លង់ ១០ នាក់ (លូកា 17:11-19)
. ត្រចៀកអ្នកបម្រើរបស់ពួកសម្ដេចសង្ឃ (លូកា 22:50-51)
. ជម្ងឺគ្រុនក្ដៅរបស់កូនលោកនាម៉ឺន (យ៉ូហាន 4:46-54)
. បុរសពិការនៅស្រះបែតថែសដា (យ៉ូហាន 5:1-9)
. បុរសម្នាក់ពិការភ្នែកពីកំណើត (យ៉ូហាន 9:1-7)

បើមានអ្នកណាមានទីបន្ទាល់អំពី ការប្រោសឲ្យជាដោយអំណាចព្រះចេស្ដារបស់ព្រះយេស៊ូវ សូមចែកចាយ។

(2) ព្រះយេស៊ូវដេញវិញ្ញាណអាក្រក់

ព្រះយេស៊ូវរំដោះមនុស្ស ដែលមានវិញ្ញាណអាក្រក់សណ្ឋិតឱ្យមានសេរីភាព។ ជាញឹកញាប់ វិញ្ញាណអា ក្រក់ធ្វើឱ្យមនុស្សដែលមានវិញ្ញាណអាក្រក់សណ្ឋិតនោះ មានជម្ងឺប្រចាំកាយ។ ឧទាហរណ៍ បុរសគ​ម្នាក់ និងបុរសគនិងខ្វាក់ម្នាក់ផ្សេងទៀត ព្រមទាំងស្ត្រីពិការម្នាក់ទៀត ដោយសារវិញ្ញាណអាក្រក់។

​

ពេលខ្លះ ពួកវិញ្ញាណអាក្រក់បណ្ដាលឱ្យមនុស្ស ដែលវាសណ្ឋិតធ្វើការអាក្រក់ដល់ខ្លួនគេ។ បុរសម្នាក់តែងយកថ្ម ឆូតសាច់ខ្លួនឯងហើយក្មេងប្រុសម្នាក់តែងតែផ្ដួលខ្លួនឯង ទៅក្នុងភ្លើង ឬទឹក។ មនុស្សដែលមានវិញ្ញាណ អាក្រក់សណ្ឋិត "វា​វេទនា​ណាស់" (ម៉ាថាយ 17:15) និង "ធ្វើ​ទុក្ខ​ជា​ខ្លាំង​ណាស់" (ម៉ាថាយ 15:22)។ គ្រប់យ៉ាងដែលមនុស្សបានធ្វើដើម្បីជួយពួកគេនោះ មិនបានជោគជ័យទេ។ ប៉ុន្តែ គ្រប់ពេលដែលព្រះយេស៊ូវជួបនរណាម្នាក់ ដែលមានវិញ្ញាណអាក្រក់សណ្ឋិត ព្រះអង្គសង្គ្រោះពួកគេ។ ព្រះអង្គធ្វើការនេះ ដោយការបញ្ជា ហើយទទួលលទ្ធផលភ្លាមៗដែរ។

​

[ម៉ាថាយ 17:18] នោះ​ព្រះយេស៊ូវ​ទ្រង់​បន្ទោស​ដល់​អារក្ស ហើយ​វា​ក៏​ចេញ​ពី​ក្មេង​នោះ​ទៅ រួច​ក្មេង​នោះ ​បាន​ជា ចាប់​តាំង​ពី​វេលា​នោះ​មក។

 

ពួកវិញ្ញាណអាក្រក់ត្រូវបណ្ដេញចេញទាំងបង្ខំ។ ព្រះយេស៊ូវបន្ទោសដល់វិញ្ញាណអាក្រក់ រួចក៏បង្គាប់ឱ្យវា ចេញពីមនុស្សដែលវាសណ្ឋិត។ មនុស្សម្នាមិនដែលឃើញអំណាចខាងព្រលឹងបែបនេះ ពីមុនមកនោះ ទេ។

​

[ម៉ាថាយ 9:33]  រួច​កាល​បាន​ដេញ​អារក្ស​ចេញ​ហើយ នោះ​មនុស្ស​គ​បាន​និយាយ​ឡើង​បាន ឯ​បណ្តា ​មនុស្ស​ទាំង​ប៉ុន្មាន គេ​មាន​សេចក្តី​អស្ចារ្យ​ថា មិន​ដែល​ឃើញ​មាន​យ៉ាង​ដូច្នេះ នៅ​ក្នុង​ស្រុក​អ៊ីស្រាអែល ​សោះ​ឡើយ។

​

វិញ្ញាណអាក្រក់ដឹងថា ព្រះយេស៊ូវជានរណា ហើយពួកវាដឹងថា ព្រះអង្គមានសិទ្ធិអំណាចលើវា។

 

[ម៉ាកុស 1:23-27] រីឯ​នៅ​ក្នុង​សាលា​ប្រជុំ​របស់​គេ មាន​មនុស្ស​ម្នាក់​មាន​អារក្សអសោច​ចូល វា​ស្រែក​ ឡើង​ថា ហ៊ឹះ តើ​យើង​នឹង​ទ្រង់​មាន​ហេតុ​អ្វី​នឹង​គ្នា នែ ព្រះយេស៊ូវ​ពី​ភូមិ​ណាសារ៉ែត​អើយ តើ​ទ្រង់​មក​ បំ ផ្លាញ​យើង​ឬ​អី ខ្ញុំ​ស្គាល់​ជាក់​ហើយ ថា​ទ្រង់​ជា​ព្រះអង្គ​បរិសុទ្ធ​នៃ​ព្រះព្រះយេស៊ូវ ទ្រង់​ក៏​បន្ទោស​ដល់​វា ​ថា ចូរ​ស្ងៀម​ទៅ ហើយ​ថយ​ពី​មនុស្ស​នេះ​ចេញ។ កាល​អារក្សអសោច​បាន​ជាន់​មនុស្ស​នោះ​ឲ្យ​ប្រកាច់ ប្រកិន​ជា​ខ្លាំង ហើយ​ស្រែក​ឡើង នោះ​វា​ក៏​ចេញ​ទៅ។ អ្នក​ទាំង​អស់​គ្នា​ក៏​នឹក​ស្ងើច​ក្នុង​ចិត្ត ដល់​ម៉្លេះ ​បាន​ជា​គេ​សួរ​គ្នា​ថា នេះ​ជា​អ្វី​អេះ តើ​សេចក្តី​បង្រៀន​បែប​ថ្មី​យ៉ាង​ណា​ហ្ន៎ បាន​ជា​លោក​បង្គាប់ ​ដល់អារក្ស អសោច​ដោយ​អំណាច ហើយ​វា​ក៏​ស្តាប់​បង្គាប់​លោក​ដូច្នេះ។

​

វិញ្ញាណអាក្រក់ខ្លាចព្រះយេស៊ូវ ព្រោះពួកវាដឹងថា ព្រះអង្គមានអំណាចណាស់ មិនត្រឹមតែអាច បណ្ដេញ វាចេញនោះទេ តែព្រះអង្គមានអំណាចអាចធ្វើទារុណកម្ម និងបំផ្លាញពួកវាទៀតផង (ម៉ាថាយ 8:29, ម៉ាកុស 1:24, 5:7)។ ពួកវាដឹងថា នឹងមានថ្ងៃមួយដែលព្រះយេស៊ូវនឹងជំនុំជំរះ និងបំផ្លាញពួកវា (លូកា 8:31)។

​

ព្រះយេស៊ូវបង្គាប់វិញ្ញាណអាក្រក់ឱ្យចាកចេញ និងមិនឱ្យត្រឡប់មកចូលសណ្ឋិតមនុស្សនោះវិញទេ (ម៉ាកុស 9:25)។ សូម្បីតែមនុស្សម្នាក់ដែលត្រូវវាសណ្ឋិតជាយូរ ក៏ព្រះអង្គអាចសង្គ្រោះពួកវាបានដែរ។ ស្ត្រីម្នាក់ត្រូវវិញ្ញាណអាក្រក់ចូលសណ្ឋិតអស់រយៈពេល 18 ឆ្នាំ។ ព្រះយេស៊ូវបានជួយសង្គ្រោះគាត់។ ក្មេង ប្រុសម្នាក់ត្រូវវិញ្ញាណអាក្រក់សណ្ឋិតតាំងពីកំណើត។ ព្រះយេស៊ូវសង្គ្រោះគាត់។ ហើយសូម្បីតែមនុស្ស ម្នាក់ដែលមានអារក្សជាច្រើនចូលសណ្ឋិតនោះ ក៏ព្រះអង្គនៅតែអាចសង្គ្រោះគាត់ដែរ។ បុរសម្នាក់មាន វិញ្ញាណអាក្រក់ជា "កងទ័ព" សណ្ឋិត។ កងទ័ព គឺជាទាហ៊ានមានគ្នាប្រមាណ 6000 នាក់។ ព្រះយេស៊ូវសង្គ្រោះគាត់។ ទាំងនេះ សុទ្ធតែជាការអស្ចារ្យ ដែលបង្ហាញថាព្រះយេស៊ូវមានអំណាចលើ ផ្នែកវិញ្ញាណ។

​

បើមានអ្នកណាមានទីបន្ទាល់អំពី ការដេញវិញ្ញាណអាក្រក់ ដោយអំណាចរបស់ព្រះយេស៊ូវ សូមចែកចាយ។

ការអស្ចារ្យរបស់ព្រះយេស៊ូវ៖ ការដេញអារក្ស
. បុរសម្នាក់នៅសាលាប្រជុំ (ម៉ាកុស 1:23-26, លូកា 4:31-37)
. បុរស ២ នាក់នៅស្រុកគីរ៉ែន (ម៉ាថាយ 8:28-34) រួមទាំងបុរសម្នាក់ដែលមានអារក្សកងទ័ពចូល (ម៉ាកុស 5:1-15, លូកា 8:26-35)
. បុរសគម្នាក់ (ម៉ាថាយ 9:32-33)
. បុរសពិការភ្នែក និងគម្នាក់ (ម៉ាថាយ 12:22)
. កូនស្រីរបស់ស្ត្រីសាសន៍កាណាន (ម៉ាថាយ 15:21-28, ម៉ាកុស 7:24-30)
. ក្មេងប្រុសម្នាក់ (ម៉ាថាយ 17:14-18, ម៉ាកុស 9:17-29, លូកា 9:38-43)
. ស្រ្តីពិការម្នាក់ (លូកា 13:10-17)

(3) ព្រះយេស៊ូវគ្រប់គ្រងលើធម្មជាតិ

ព្រះយេស៊ូវបង្ហាញអំពី អំណាចរបស់ព្រះអង្គលើធម្មជាតិ ក្នុងរបៀបផ្សេងៗគ្នា។ ពេលខ្លះ ព្រះអង្គធ្វើការ នេះ ដើម្បីការពារមនុស្សជុំវិញព្រះអង្គ។ ព្រះអង្គបានបង្គាប់ព្យុះឱ្យស្ងប់។ ព្យុះចាប់ផ្ដើមបក់បោក ពេល ព្រះអង្គ និងពួកសិស្សនៅក្នុងទូក ជិះឆ្លងសមុទ្រកាលីឡេ។ ពេលនោះ ក៏មានព្យុះកំណាចមួយកើតឡើង ដែលវាខ្លាំងក្លាធ្វើឱ្យពួកសិស្សភ័យខ្លាចណាស់ ហើយក្នុងចំណោមពួកគេមាន ៤ នាក់ជាអ្នកនេសាទ ត្រីដ៏ជំនាញ ធ្លាប់នេសាទតាមសមុទ្ររាប់ឆ្នាំមកហើយដែរ។ ប៉ុន្តែ ព្រះយេស៊ូវ បង្គាប់ព្យុះដោយប្រើពាក្យ តែ ២ ម៉ាត់តែប៉ុណ្ណោះ ហើយភ្លាមនោះ ខ្យល់ក៏ឈប់ ហើយសមុទ្រទាំងមូលក៏ទៅជាស្ងៀមស្ងាត់វិញ។ ការអស្ចារ្យនេះ បង្ហាញថាព្រះយេស៊ូវអាចបង្គាប់ធម្មជាតិ ឱ្យធ្វើអ្វីតាមបំណងព្រះហឬទ័យរបស់ទ្រង់បាន។

​

មានពេលមួយទៀត ដែលពួកសិស្សជួបព្យុះនៅកណ្ដាលសមុទ្រកាលីឡេ តែពេលនេះ ព្រះយេស៊ូវមិន បានគង់នៅជាមួយគាត់នោះទេ។ យ៉ាងណាមិញ ព្រះអង្គបានយាងមករកពួកគាត់នៅលើទឹក។ ការ អស្ចារ្យនេះ បង្ហាញថាព្រះអង្គមានអំណាចលើច្បាប់ធម្មជាតិ និងមិនកំណត់ដោយធម្មជាតិ ក្នុងរបៀប ណាមួយនោះទេ។

​

ព្រះយេស៊ូវបានប្រើប្រាស់អំណាចរបស់ព្រះអង្គលើធម្មជាតិ ដើម្បីបំពេញតម្រូវការរបស់មនុស្ស ដោយ របៀបដ៏អស្ចារ្យ។ មាន ២ ដងដែលព្រះយេស៊ូវដែលព្រះយេស៊ូវចាប់ត្រីបានជាច្រើនសម្រាប់ពួកសិស្ស ព្រះអង្គ។ ទាំង ២ លើក ពួកសិស្សបាននេសាទត្រីពេញ ១ យប់ តែរកមិនបានត្រីសោះ ពេលនោះ ព្រះយេស៊ូវក៏ប្រាប់ពួកគេពីកន្លែងដែលត្រូវបោះអួន ហើយលទ្ធផលគឺ ពួកគេចាប់បានត្រីយ៉ាងច្រើន សន្ធឹកសន្ធាប់ភ្លាមៗ។ ដូច្នេះ ទាំងនេះគឺជាការអស្ចារ្យនៃការផ្គត់ផ្គង់របស់ព្រះអង្គ។

​

មាន ២ ដងដែរ ដែលព្រះយេស៊ូវបានពហុគុណត្រី និងនំបុ័ងតិចតួច នៅកន្លែងដាច់ឆ្ងាយ ឱ្យបណ្ដាជនជា ច្រើនហូបគ្រប់គ្រាន់ទាំងអស់គ្នា។ បណ្ដាជនទាំងនោះ មានប្រហែល៥០០០ នាក់ និង ៤០០០ នាក់ ដោយមិនគិតមនុស្សស្រី និងក្មេងៗ។ កាលពីសម័យនោះ មនុស្សប្រុសបរិភោគផ្សេងពី មនុស្សស្រី និងក្មេងៗ ដូច្នេះហើយ បើសរុបទាំងអស់ ប្រហែលជាចំនួននេះ គុណនឹង ២ ផង។ បណ្ដាជនទាំង ២ ក្រុមនេះ បានបរិភោគរហូតឆ្អែតគ្រប់ៗគ្នា ដែលនេះបង្ហាញថា អាហារក៏មានរសជាតិឆ្ងាញ់ដែរ។ ទាំង ២ លើកនេះ តែងតែមានអាហារនៅសល់ ដែលបង្ហាញថា ការផ្គត់ផ្គង់គឺបរិបូរណ៌។

​

មានការអស្ចារ្យអំពី ការផ្លាស់ប្រែមួយ គឺពេលព្រះយេស៊ូវធ្វើឱ្យទឹកប្រែជាស្រាទំពាំងបាយជូរ សម្រាប់ពិធី អាពាហិ៍ពិពាហិ៍។ ស្រាដែលព្រះអង្គបានធ្វើនោះ អ្នក​មង្គល‌ការ​ក៏​ពិពណ៌នាថា "ស្រា​ទំពាំង‌បាយ‌ជូរ​យ៉ាង​ល្អ" ដែលអ្នករៀបចំ ពិធីអាពាហិ៍ពិពាហិ៍គួរដាក់ក្នុងពិធីតាំងពីដំបូង។ ម្ដងទៀត យើងឃើញថា គុណភាពនៃអ្វីដែលព្រះអង្គ ផ្គត់ផ្គង់គឺ ល្អប្រសើរមែនទែន។ ការអស្ចារ្យទាំងនេះ បង្ហាញថា ព្រះយេស៊ូវមានអំណាចលើ ផ្នែកធម្មជាតិ គឺព្រះអង្គអាចបង្កើត ពហុគុណ និងផ្លាស់ប្រែរបស់ពីធម្មជាតិទាំងឡាយ។

​

បើនរណាមានទីបន្ទាល់អំពី ការផ្គត់ផ្គង់ ឬការការពារពីព្រះយេស៊ូវ សូមចែកចាយវា។

ការអស្ចារ្យរបស់ព្រះយេស៊ូវ៖ អំណាចលើធម្មជាតិ
. ព្រះអង្គធ្វើទឹកឱ្យប្រែជាស្រាទំពាំងបាយជូរ (យ៉ូហាន 2:1-11)
. ព្រះអង្គផ្គត់ផ្គង់អាហារសម្រាប់មនុស្ស ៥០០០ នាក់ (ម៉ាថាយ 14:15-21, ម៉ាកុស 6:35-44, លូកា 9:12-17, យ៉ូហាន 6:6-13)
. ព្រះអង្គផ្គត់ផ្គង់អាហារសម្រាប់មនុស្ស ៤០០០ នាក់ (ម៉ាថាយ 15:32-38, ម៉ាកុស 8:1-9)
. ចាប់ត្រីបានសន្ធឹកសន្ធាប់ (លូកា 5:4-11)
. កាក់នៅក្នុងមាត់ត្រី (ម៉ាថាយ 17:24-27)
. ចាប់ត្រីបានសន្ធឹកសន្ធាប់ម្ដងទៀត (យ៉ូហាន 21:1-11)
. ព្រះអង្គបង្រ្កាបព្យុះឱ្យស្ងប់ (ម៉ាថាយ 8:23-27, ម៉ាកុស 4:37-41, លូកា 8:22-25)
. ព្រះអង្គយាងលើទឹក (ម៉ាថាយ 14:22-33, ម៉ាកុស 6:48-51, យ៉ូហាន 6:19-21)
. ព្រះអង្គដាក់ស្វិត​ក្រៀមដើមល្វា (ម៉ថាយ 21:18-22, ម៉ាកុស 11:12-14, 20-25)

​

(4) ព្រះយេស៊ូវប្រោសមនុស្សស្លាប់ឱ្យរស់ឡើងវិញ

ព្រះគម្ពីរដំណឹងល្អ បានកត់ត្រាថា ព្រះយេស៊ូវបានប្រោសមនុស្ស ៣ នាក់ឱ្យរស់ឡើងវិញ។

​

ម្នាក់ដំបូង គឺកូនប្រុសតែម្នាក់របស់ស្ត្រីម៉េម៉ាយ ដែលកំពុងធ្វើបុណ្យខ្មោច ពេលព្រះយេស៊ូវយាងដល់ភូមិរបស់ពួកគេ។ ព្រះយេស៊ូវបានប្រោសកូនប្រុសរបស់ស្ត្រីម៉េម៉ាយ ឱ្យរស់ឡើងវិញ នៅក្នុងចំណោមបណ្ដាជននៅក្នុងភូមិ។

​

អ្នកទី២ គឺក្មេងស្រីអាយុ ១២ ឆ្នាំ ដែលជាកូនស្រីតែម្នាក់របស់មេសាលាប្រជុំឈ្មោះ យ៉ៃរ៉ុស។ កូនស្រី របស់យ៉ៃរ៉ុស បានប្រោសឱ្យរស់ឡើងវិញនៅចំពោះមុខឪពុកម្ដាយរបស់នាង និងពួកសិស្ស ៣ នាក់។

​

អ្នកទី ៣ គឺបុរសម្នាក់ឈ្មោះ ឡាសារ ដែលបានស្លាប់អស់ ៤ ថ្ងៃ និងត្រូវដាក់នៅក្នុងផ្នូរទៅហើយ។ ឡាសារបានរស់ឡើងវិញ នៅខាងក្រៅក្រុងយេរ៉ូសាឡឹម ដោយមានបណ្ដាជនជាច្រើនបានឃើញ។

​

ការអស្ចារ្យនីមួយៗ បង្ហាញថាព្រះយេស៊ូវមានអំណាចលើសេចក្ដីស្លាប់។

 

បើនរណាម្នាក់មានទីបន្ទាល់អំពី អំណាចរបស់ព្រះយេស៊ូវលើសេចក្ដីស្លាប់ សូមចែកចាយ។

 

ការអស្ចារ្យរបស់ព្រះយេស៊ូវ៖ ការប្រោសឱ្យរស់ឡើងវិញ
. កូនប្រុសរបស់ស្ត្រីម៉េម៉ាយនៅ ក្រុងណាអ៊ីន (លូកា 7:11-15)
. កូនស្រីរបស់យ៉ៃរ៉ុស (ម៉ថាយ 9:18-19, 23-25, ម៉ាកុស 5:22-24, 38-42, លូកា 8:41-42, 49-56)
. ឡាសារ (យ៉ូហាន 11:1-44)

 

សរុបសេចក្ដី

ពេលព្រះយេស៊ូវបង្គាប់ខ្យល់ព្យុះហើយ ពួកសិស្សរបស់ព្រះអង្គមានសេចក្ដីអស្ចារ្យ
រួចនិយាយថា៖ "តើមនុស្សនេះ បែបយ៉ាងណាបានជាទាំងខ្យល់ និងសមុទ្រក៏ស្ដាប់បង្គាប់លោកដូច្នេះ។" (ម៉ាថាយ 8:27) ពេលយើង អានអំពី ការអស្ចារ្យ សំនួរនេះក៏គួរតែជាសំនួរដែលយើងគួរសួរដែរ។ តើព្រះអង្គបែបយ៉ាងណា ទើបអាចព្យាបាលជម្ងឺទាំងឡាយ និងធ្វើឱ្យវិញ្ញាណអាក្រខ្លាច បង្គាប់ខ្យល់ និងរលក ព្រមទាំង ប្រោសមនុស្សស្លាប់ឱ្យរស់ឡើងវិញដូច្នេះ?

​

ការពិភាក្សា

• តើការអស្ចារ្យមួយណាដែលគួរឱ្យចាប់អារម្មណ៍ជាងគេមកកាន់អ្នក? ហេតុអ្វីទើបអ្នកយល់ដូច្នេះ?

• តើការអស្ចារ្យរបស់ព្រះយេស៊ូវបង្រៀនយើងថា ព្រះអង្គជានរណា?

 

អធិស្ឋានបញ្ចប់