សេចក្តីពិតដ៏សំខាន់មួយ :  ទំនាក់ទំនងរវវាងយើង និងព្រះ គឺជាទំនាក់ទំនងបែបឪពុក និងកូន

 

សកម្មភាព : គ្រួសាររីករាយ

 

របៀបលេង :

១)  អង្គុយជាក្រុម រួចចែកក្រដាសឱ្យសិស្សម្នាក់ ១ សន្លឹក និងឱ្យពួកគេសរសេរអ្វីដែលពួកគេចូលចិត្តធ្វើ 

ដោយមិនចាំបាច់សរសេរឈ្មោះទេ។

​

២) ប្រមូលក្រដាសមកវិញ។ អាន <អ្វីដែលចូលចិត្តធ្វើ> ឮៗ ដើម្បីឱ្យគ្រប់គ្នាដឹង។ 

​

៣) និយាយ ៖ "គោលបំណងរបស់ហ្គេមនេះ គឺដើម្បីមានគ្រួសារធំជាងគេ។ អ្នកបន្ថែមសមាជិកគ្រួសារ ខ្លួនឯង ដោយការទាយ <អ្វីដែលចូលចិត្តធ្វើ> ឱ្យត្រូវនឹងមនុស្សដែលបានសរសេរវា។ បើអ្នកទាយត្រូវ ថាអ្នកណា គេនឹងក្លាយជាកូនរបស់អ្នក។"

​

៤) ជ្រើសរើសអ្នកណាម្នាក់ឱ្យធ្វើជា <អ្នកទាយ> ដំបូង។ <អ្នកទាយ> នឹងចាប់ផ្ដើមទាយ ជាឧទាហរណ៍ ៖ "ខ្ញុំគិតថា អ្វីដែល(សុភាព)ចូលចិត្តគឺជិះកង់"។

​

៥) បើ <អ្នកទាយ> ទាយត្រូវ (សុភាព)នឹងចូលក្នុងគ្រួសាររបស់ <អ្នកទាយ> ធ្វើជាកូនរបស់គាត់។ <អ្នកទាយ> ពេលនេះ ក្លាយជា មេគ្រួសារ ហើយគាត់អាចទាយម្ដងទៀត ជាមួយកូនរបស់គាត់។

​

៦)បើពួកគាត់ទាយត្រូវ ពួកគាត់ទទួលបានសមាជិកគ្រួសារបន្ថែម។ តែបើពួកគាត់ទាយខុស អ្នកដែល គាត់បានទាយ នឹងក្លាយជា <អ្នកទាយ> ម្ដង។

​

៧) អ្នកដែលត្រូវគេទាយត្រូវហើយ មិនអាចឱ្យ <អ្នកទាយ>ផ្សេងទាយម្ដងទៀតទេ។ (ឧទាហរណ៍ ៖ យើងមិនអាចលួចកូនរបស់អ្នកដទៃបានទេ។) ប៉ុន្តែ បើមានអ្នកណាទាយ មេគ្រួសារ ត្រូវ គេនឹងយកបាន សមាជិកទាំងគ្រួសារ។

​

៨) ហ្គេមនេះចប់ នៅពេលគ្រប់គ្នាចូលក្នុងគ្រួសារណាមួយ។ គ្រួសារណាមានសមាជិកច្រើនជាងគេ ជា អ្នកឈ្នះ។
 

រៀនព្រះគម្ពីរ

បរិបទ : ថ្ងៃនេះយើងនឹងរៀនបន្តអំពីប្រធានបទ <ទំនាក់ទំនងជាមួយព្រះ>។ នៅក្នុងមេរៀនដំបូង យើងបានដឹងហើយថា ព្រះគឺជាអង្គបុគ្គល ហើយទ្រង់ហៅយើងឱ្យមានទំនាក់ទំនង ជាមួយ ទ្រង់។ ថ្ងៃនេះ យើងនឹងរៀនអំពី ប្រភេទទំនាក់ទំនង ដែលយើងអាចមានជាមួយព្រះអង្គ។ តើមនុស្ស អាចមានទំនាក់ទំនងបែបណាជាមួយព្រះ? ចម្លើយដែលមាននៅក្នុងព្រះបន្ទូលរបស់ព្រះអង្គ គឺពិតជា អស្ចារ្យណាស់! (។)

 

[យ៉ូហាន 1:12] ប៉ុន្តែ​អស់​អ្នក​ណា​ដែល​ទទួល​ទ្រង់ គឺ​អស់​អ្នក​ដែល​ជឿ​ដល់​ព្រះនាម​ទ្រង់ នោះ​ទ្រង់​បាន ​ប្រទាន​អំណាច ឲ្យ​បាន​ត្រឡប់​ជា​កូន​ព្រះ។

 

[2 កូរិនថូស 6:18] អញ​នឹង​ធ្វើ​ជា​ឪពុក​ដល់​ឯង​រាល់​គ្នា ហើយ​ឯង​រាល់​គ្នា​នឹង​ធ្វើ​ជា​កូន​ប្រុស ​កូន​ស្រី​ដល់ ​អញ នេះ​ជា​ព្រះបន្ទូល​នៃ​ព្រះអម្ចាស់​ដ៏​មាន​ព្រះចេស្តា​បំផុត។

 

តើយើងអាចមានទំនាក់ទំនងបែបណាជាមួយព្រះ? ទុកឱ្យសិស្សឆ្លើយ

 

ទំនាក់ទំនងដែលព្រះជាម្ចាស់បានជ្រើសរើសមានជាមួយយើង គឺជាទំនាក់ទំនងឪពុក និងកូន។ នៅពេលយើងទទួល និងជឿព្រះយេស៊ូវគ្រីស្ត ទ្រង់នឹងប្រទានសិទ្ធិឱ្យយើងក្លាយជាកូនរបស់ព្រះ។ ចូរគិតថា តើវាគួរឱ្យអស្ចារ្យប៉ុណ្ណា ដែលព្រះដ៏មានគ្រប់ទាំងព្រះចេស្ដា គង់នៅអស់កល្ប ជាព្រះអាទិករ និងជាព្រះគ្រប់គ្រង លើសកលលោកនេះ បានជ្រើសរើសរាប់យើងជាកូនរបស់ទ្រង់ ហើយទ្រង់ជាឪពុករបស់យើង!

 

តើដែលថា ព្រះជាម្ចាស់ ជាឪពុករបស់យើងនោះ មានអត្ថន័យដូចម្ដេច?

 

ទី១ វាមានន័យថា ព្រះអង្គខ្វល់ខ្វាយពីយើង។

 

[1ពេត្រុស 5:7]

ហើយ​ចូរ​ផ្ទេរ​គ្រប់​ទាំង​សេចក្តី​ទុក្ខ​ព្រួយ​របស់​អ្នក​រាល់​គ្នា​ទៅ​លើ​ទ្រង់ ដ្បិត​ទ្រង់​តែង​យក ​ព្រះទ័យ​ទុក​ដាក់​នឹង​អ្នក​រាល់​គ្នា។

 

[2កូរិនថូស 1:3-4]

សូម​សរសើរ​ដល់​ព្រះ​ដ៏​ជា​ព្រះវរបិតា​នៃ​ព្រះយេស៊ូវគ្រីស្ទ ជា​អម្ចាស់​នៃ​យើង​រាល់​គ្នា គឺ​ជា​ព្រះវរបិតា​ដ៏​មាន​សេចក្តី​មេត្តាករុណា ជា​ព្រះ​ដ៏​កំសាន្ត​ចិត្ត​គ្រប់​ជំពូក ដែល​ទ្រង់​កំសាន្ត​ចិត្ត​យើង ​រាល់​គ្នា ក្នុង​គ្រប់​ទាំង​សេចក្តី​វេទនា ប្រយោជន៍​ឲ្យ​យើង​អាច​នឹង​កំសាន្ត​ចិត្ត ​អ្នក​ឯ​ទៀត ក្នុង​អស់​ទាំង ​សេចក្តី​វេទនា​របស់​គេ​បាន​ដែរ គឺ​ដោយសារ​សេចក្តី​ក្សាន្ត​នោះ​ឯង ដែល​ព្រះ​បាន​កំសាន្ត​ចិត្ត​យើង​ស្រេច​ ហើយ។

 

ព្រះជាម្ចាស់ ជាឪពុកដ៏ល្អ ដែលខ្វល់ខ្វាយពីកូនរបស់ព្រះអង្គ។ ពេលយើងមានការថប់បារម្ភ ព្រះអង្គ នឹងជួយយើង។ "ក្នុង​គ្រប់​ទាំង​សេចក្តី​វេទនា" ព្រះអង្គកំសាន្តចិត្តយើង។ ការដែលមានព្រះជាឪពុករបស់ យើង បានន័យថា យើងនឹងមិនឆ្លងកាត់ការលំបាកតែម្នាក់ឯងនោះទេ។ ព្រះអង្គតែងតែគង់នៅជាមួយ យើង ហើយទ្រង់ជាព្រះសម្រាប់យើងដែរ។ នៅក្នុងព្រះគម្ពីរបានប្រាប់យើងថា  ព្រះ​ទ្រង់​ជា​ទី​ពឹង ​ជ្រក ក៏​ជា​កំឡាំង​នៃ​យើង​ខ្ញុំ ជា​ជំនួយ​ដែល​នៅ​ជាប់​ជា​មួយ​ក្នុង​គ្រា​អាសន្ន (ទំនុកតម្កើង 46:1)។ ព្រះអង្គ គឺជា "អ្នកគង្វាល" (មានន័យថា ព្រះអង្គការពារ និងដឹកនាំយើង (ទំនុកតម្កើង 23) ហើយជា "អ្នកលើកក្បាល យើងឡើង" (មានន័យថា ព្រះអង្គលើកទឹកចិត្តយើង នៅពេលយើងមានអារម្មណ៍បាក់ទឹកចិត្ត (ទំនុកតម្កើង3:3)

 

ទី២ វាមានន័យថា ព្រះអង្គផ្គត់ផ្គង់យើង។ ចូរស្ដាប់អ្វីដែលព្រះយេស៊ូវមានព្រះបន្ទូល៖

 

[ម៉ាថាយ 7:9-11] 

ក្នុង​ពួក​អ្នក​រាល់​គ្នា បើ​កូន​សូម​នំបុ័ង តើ​មាន​អ្នក​ណា​នឹង​ឲ្យ​ថ្ម​ដល់​វា ឬ​បើ​វា​សូម​ត្រី តើ​នឹង​ឲ្យ​ពស់​វិញ​ឬ​អី ចុះ​បើ​អ្នក​រាល់​គ្នា​ដែល​អាក្រក់ អ្នក​ចេះ​ឲ្យ​របស់ ​ល្អ​ដល់​កូន​ខ្លួន​ដូច្នេះ នោះ​ចំណង ​បើ​ព្រះវរបិតា​នៃ​អ្នក ដែល​ទ្រង់​គង់​នៅ​ស្ថានសួគ៌ ទ្រង់​នឹង​ប្រទាន​របស់​ល្អ មក​អស់​អ្នក​ដែល​សូមតើ​ជាង ​អម្បាលម៉ាន​ទៅ​ទៀត។

 

តើអ្នកគិតដូចម្ដេច បើសិនមាននរណាម្នាក់សុំនំបុ័ងពីឪពុកគាត់ តែឪពុកគាត់បែរជាឱ្យដុំថ្មទៅវិញនោះ? ទុកឱ្យសិស្សឆ្លើយ

 

ចុះបើអ្នកនោះសុំត្រី តែឪពុកឱ្យពស់វិញនោះ? ទុកឱ្យសិស្សឆ្លើយ

 

ឪពុកនៅលើផែនដី ស្ទើរតែទាំងអស់មិនដែលធ្វើបែបនោះទេ! ព្រះយេស៊ូវមានព្រះបន្ទូលថា សូម្បីតែ ឪពុកជាមនុស្ស នៅដឹងអំពីរបៀបឱ្យកាដូដ៏ល្អទៅកាន់ខ្លួនឯង ចុះទម្រាំព្រះជាម្ចាស់ ជាព្រះដ៏ឥតខ្ចោះ ទៀតនោះ ទ្រង់ប្រាកដជាឱ្យអ្វីល្អ ដែលយើងត្រូវការមិនខាន។

 

[យ៉ាកុប 1:17]  

គ្រប់​ទាំង​របស់​ដ៏​ល្អ ដែល​ព្រះ​ប្រទាន​មក និង​អស់​ទាំង​អំណោយ​ទាន​ដ៏​គ្រប់​លក្ខណ៍ នោះ​សុទ្ធ​តែ​មក​ពី​ស្ថាន​លើ គឺ​មក​ពី​ព្រះវរបិតា​នៃ​ពន្លឺ ដែល​ទ្រង់​មិន​ចេះ​ប្រែប្រួល សូម្បី​តែ​ស្រមោល​នៃ ​សេចក្តី​ផ្លាស់​ប្រែ​ក៏​គ្មាន​ដែរ។

 

ព្រះអង្គជាឪពុកដ៏សប្បុរស។ ទ្រង់ប្រទានឱ្យយើងនូវអ្វីដែលល្អ។ គ្រប់អំណោយទានដ៏ល្អ និងឥតខ្ចោះ ទាំងអស់ សុទ្ធតែមកពីទ្រង់។ ព្រះអង្គស្មោះត្រង់ និងមិនប្រែប្រួលនោះឡើយ។ ព្រះអង្គបានប្រទានពរ យើង និងបន្តប្រទានពរយើងរហូតតទៅ។

 

ទី៣ វាមានន័យថា ព្រះអង្គប្រៀនប្រដៅយើង។

 

[សុភាសិត 3:11-12]

កូន​អើយ កុំ​ឲ្យ​មើលងាយ​សេចក្តី​ប្រៀន​របស់​ព្រះយេហូវ៉ា​ឡើយ ក៏​កុំ​ឲ្យ​ណាយ​ចិត្ត​ នឹង​សេចក្តី​បន្ទោស​របស់​ទ្រង់​ដែរ។ ដ្បិត​អ្នក​ណា​ដែល​ព្រះយេហូវ៉ា​ ទ្រង់​ស្រឡាញ់ នោះ​ទ្រង់​ក៏​ស្តី​ប្រដៅ ​ផង គឺ​ដូច​ជា​ឪពុក​ធ្វើ​ចំពោះ​កូន ដែល​ជា​ទី​សំគាល់​ចិត្ត​ដល់​ខ្លួន​ដែរ។

 

តើអ្នកគិតថា ការប្រៀនប្រដៅជាការល្អ ឬអាក្រក់? ទុកឱ្យសិស្សឆ្លើយ

ហេតុអ្វីបានជាឪពុកម្ដាយប្រៀនប្រដៅកូន? ទុកឱ្យសិស្សឆ្លើយ

 

ព្រះអង្គចង់ឱ្យកូនរបស់ទ្រង់មានចរិតលក្ខណៈល្អ ដូចឪពុកល្អគ្រប់រូបចង់ដែរ។ ដូច្នេះ ព្រះអង្គប្រៀន ប្រដៅយើង។ សេចក្ដីប្រៀនប្រដៅរបស់ព្រះអង្គ មិនដែលធ្ងន់ធ្ងរ ឬសាហាវពេកនោះទេ គឺវាតែងតែ ដើម្បីការល្អសម្រាប់យើង។ នេះហើយជា សញ្ញាបញ្ជាក់អំពី សេចក្ដីស្រឡាញ់របស់ទ្រង់ សម្រាប់យើង។

 

ទី៤ វាមានន័យថា ព្រះអង្គស្រឡាញ់យើង។

 

[1យ៉ូហាន 3:1]

មើល សេចក្តី​ស្រឡាញ់​យ៉ាង​ណា​ហ្ន៍ ដែល​ព្រះវរបិតា​បាន​ផ្តល់​មក​យើង​រាល់​គ្នា ឲ្យ​យើង​ បាន​ហៅ​ថា​ជា​កូន​របស់​ព្រះ​ដូច្នេះ។

 

ព្រះអង្គស្រឡាញ់កូនរបស់ទ្រង់។ យើងមិនចាំបាច់ព្យាយាមប្រឹងប្រែងធ្វើអ្វីមួយ ដើម្បីទទួលបានក្ដី ស្រឡាញ់របស់ទ្រង់នោះទេ ព្រោះព្រះអង្គបានប្រគល់វាមកកាន់យើងរួចមកហើយ។ ទ្រង់ជ្រើសរើស ស្រឡាញ់យើង នាំយើងចូលទៅក្នុងគ្រួសាររបស់ទ្រង់ហើយ។ ឥឡូវនេះ គ្មានអ្វីដែលអាចបំបែក យើងពីសេចក្ដីស្រឡាញ់របស់ទ្រង់នោះឡើយ (រ៉ូម 8:38-39)។ គ្មាននរណាម្នាក់ស្រឡាញ់យើង ដូចព្រះអង្គនោះទេ។ប្រហែលជាមានអ្នកណាស្រឡាញ់ យើង (វាល្អ) តែសេចក្ដីស្រឡាញ់របស់ព្រះ គឺអស្ចារ្យជាងច្រើនណាស់។ ព្រះគម្ពីរប្រាប់យើងថា សេច ក្ដីស្រឡាញ់របស់ព្រះអង្គស្មោះត្រង់ នៅស្ថិតស្ថេរអស់កល្ប អស្ចារ្យ ឥតខ្ចោះ និងខ្ជាប់ខ្ជួន។ ព្រះជាម្ចាស់ ស្រឡាញ់កូនព្រះអង្គ ហើយនឹងបន្តស្រឡាញ់រហូតតទៅ។

 

ទី៥ វាមានន័យថា ព្រះអង្គមានផ្ទះមួយសម្រាប់យើង។ ឪពុកយើងមានផ្ទះមួយសម្រាប់យើង នៅស្ថានសួគ៌។ ចួរស្ដាប់អ្វីដែលព្រះយេស៊ូវមានព្រះបន្ទូល ៖

 

[យ៉ូហាន 14:2-3]

នៅ​ក្នុង​ដំណាក់​នៃ​ព្រះវរបិតា​ខ្ញុំ មាន​ទី​លំនៅ​ជា​ច្រើន ពុំ​នោះ ខ្ញុំ​បាន​ប្រាប់​អ្នក​រាល់ ​គ្នា​ហើយ ខ្ញុំ​ទៅ​រៀប​កន្លែង​ឲ្យ​អ្នក​រាល់​គ្នា។ បើ​ខ្ញុំ​ទៅ​រៀប​កន្លែង​ឲ្យ​អ្នក​រាល់​គ្នា នោះខ្ញុំ​នឹង​ត្រឡប់​មក​វិញ នឹង​ទទួល​អ្នក​រាល់​គ្នា​ទៅ​ឯ​ខ្ញុំ ប្រយោជន៍​ឲ្យ​អ្នក​រាល់​គ្នា​បាន​នៅ​កន្លែង​ដែល​ខ្ញុំ​នៅ​នោះ​ដែរ។

 

[លូកា 12:32]

កុំ​ឲ្យ​ខ្លាច ហ្វូង​តូច​អើយ ព្រោះ​ព្រះវរបិតា​នៃ​អ្នក​រាល់​គ្នា ទ្រង់​សព្វ​ព្រះហឫទ័យ នឹង​ប្រទាន​នគរ​មក​អ្នក​រាល់​គ្នា​ពិត។

 

ឪពុករបស់យើងមានផ្ទះដ៏ធំមួយសម្រាប់យើង ហើយនគរ​(ជាអាណាចក្រ)ដែរ។ យើងនឹងរស់នៅជាមួយ ព្រះអង្គជារៀងរហូត។

 

សរុបសេចក្ដីមក ព្រះជាម្ចាស់គឺជា ឪពុកដ៏ល្អ។ ព្រះអង្គខ្វល់ខ្វាយពីកូនទ្រង់ ផ្គត់ផ្គង់ដល់យើងជាកូន ប្រៀនប្រដៅយើង ស្រឡាញ់យើង និងផ្ដល់ផ្ទះដ៏ល្អសម្រាប់យើង ជារៀងរហូត។

 

ពេលវលាក្រុមតូច

ពិភាក្សាគ្នា នៅក្នុងក្រុមតូច:

• តើអ្នករៀនបានអ្វីអំពីព្រះ ពីមេរៀនថ្ងៃនេះ?

• តើចំនុចណាដែលអស្ចារ្យបំផុត ក្នុងការដែលមានព្រះជាឪពុក?

​

អធិស្ឋានបញ្ចប់