មេរៀនទី ៩: ជីវិតអស់កល្បជានិច្ច
សម្រង់សម្តីព្រះយេស៊ូវ៖ ប្រាកដមែន ខ្ញុំប្រាប់អ្នករាល់គ្នាជាប្រាកដថា អ្នកណាដែលជឿដល់ខ្ញុំ នោះមានជីវិតអស់កល្បជានិច្ច (យ៉ូហាន ៦:៤៧).
សេចក្តីសង្ឃឹមដ៏អស្ចារ្យរបស់គ្រីស្ទបរិស័ទគឺជាជីវិតអស់កល្បជានិច្ច។ ជីវិតអស់កល្បគឺជាអ្វីដែលព្រះយេស៊ូវសន្យាទៅកាន់អ្នកទាំងអស់ដែលជឿដល់ទ្រង់។ ហេតុដូច្នេះ យើងត្រូវសួរថា៖ តើជីវិតអស់កល្បជានិច្ចគឺជាអ្វី?
ពាក្យជាភាសាក្រិចនៅក្នុងព្រះគម្ពីរដែលបកប្រែពាក្យ ‘អស់កល្ប’ (αἰώνιος) សំដៅទៅលើសម័យកាល។ អ្នកប្រវត្តសាស្ត្របែងចែកពេលវេលាទៅជាសម័យកាលផ្សេងៗគ្នា (ឧទាហរណ៍ ‘សម័យអង្គរ’ ឬ ‘សម័យអាណាចក្រខ្មែរ’)។ សម័យកាលនីមួយៗមានលក្ខណៈផ្ទាល់ខ្លួនរបស់វាផ្សេងៗគ្នាអំពីជីវភាពរស់នៅរបស់មនុស្ស។ * កំណត់ចំណាំសម្រាប់គ្រូ #១
ដូច្នេះនៅពេលព្រះគម្ពីរនិយាយអំពី “ជីវិតអស់កល្ប” វាមានន័យថាជាជីវិតដែលយើងនឹងមាននៅក្នុងសម័យកាលជាក់លាក់មួយ។
ចំណុចគន្លឹះ #១៖ ជីវិតអស់កល្បគឺជាគុណភាពជីវិតទាក់ទងជាមួយនឹងសម័យកាលជាក់លាក់មួយ។
នៅពេលព្រះគម្ពីរនិយាយអំពី “ជីវិតអស់កល្ប” តើវាសំដៅទៅលើសម័យកាលណាមួយ? របៀបដ៏ងាយស្រួលបំផុតដើម្បីយល់ពីកិច្ចការនេះបានគឺចាប់ផ្តើមជាមួយនឹងគំនិតដែលថាវាគឺជាជីវិតដែលយើងនឹងទទួលបទពិសោធន៍នៅក្នុងសម័យកាលដែលត្រូវមកដល់ (នោះគឺនៅពេលដែលព្រះយេស៊ូវយ៉ាងមក សោយរាជ្យនៅលើផែនដី)។ នៅពេលការនេះកើតឡើង សម័យកាលថ្មីនៃភាពសុចរិតនឹងចាប់ផ្តើមឡើង។
២ ពេត្រុស ៣:១៣
តែតាមសេចក្ដីសន្យារបស់ទ្រង់ នោះយើងរាល់គ្នាទន្ទឹងចាំផ្ទៃមេឃថ្មី នឹងផែនដីថ្មី ដែលមានសុទ្ធតែសេចក្ដីសុចរិតវិញ
យ៉ាងណាមិញ ដោយសារព្រះយេស៊ូវសោយរាជ្យនៅក្នុងជីវិតរបស់អ្នកជឿបច្ចុប្បន្ននេះ យើងចាប់ផ្តើមទទួលបទពិសោធន៍ខ្លះៗនៃគុណភាពជីវិតដ៏អស់កល្បជានិច្ចរួចហើយ។ ព្រះយេស៊ូវប្រាប់យើងពីជីវិតអស់កល្បជានិច្ចនៅក្នុង យ៉ូហាន ១៧:៣
នេះជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែ១ នឹងព្រះយេស៊ូវគ្រីស្ទ ដែលទ្រង់បានចាត់ឲ្យមកផង
ជីវិតអស់កល្បគឺជាការស្គាល់ព្រះជាម្ចាស់ដែលជាព្រះវរបិតា និងព្រះរាជបុត្រា។ នៅក្នុង យ៉ូហាន ១៧:៣ ពាក្យជាភាសាក្រិកសម្រាប់ពាក្យ “ស្គាល់” (γινώσκω) មានន័យថាគឺជាកា រស្គាល់តាមរយៈបទពិសោធន៍ ផ្ទាល់ខ្លួន។ វាមិនមែនអំពីព័ត៌មាននោះទេ ប៉ុន្តែអំពីទំនាក់ទំនងវិញ។ ហេតុដូច្នេះ ជីវិតអស់កល្បជានិច្ចគឺជាការ មានទំនាក់ទំនងផ្ទាល់ខ្លួនជាមួយព្រះជាម្ចាស់។ នេះគឺជាលក្ខណៈដែលមានសារៈសំខាន់បំផុត សម្រាប់ជីវិតអស់កល្បជានិច្ច៖ ជីវិតអស់កល្បគឺជាជីវិតនៅជាមួយព្រះជាម្ចាស់។
ចំណុចគន្លឹះ #២៖ ជីវិតអស់កល្បគឺជាជីវិតនៅជាមួយព្រះជាម្ចាស់។
សម័យកាលថ្មីមួយនេះ នៅពេលដែលមនុស្សអាចស្គាល់ព្រះជាម្ចាស់ចាប់ផ្តើមនៅពេលណា? ចម្លើយគឺ៖ វាមានរួចហើយ! ដោយសារព្រះយេស៊ូវ ជីវិតនៃសម័យកាលខាងមុខគឺមានរួចហើយ។ ហេតុដូច្នេះហើយបានជាព្រះយេស៊ូវមានបន្ទូល (នៅក្នុងបច្ចុប្បន្នកាល) អំពីការដែលយើងមានជីវិតអស់កល្បជានិច្ច។
យ៉ូហាន ៥:២៤
ប្រាកដមែន ខ្ញុំប្រាប់អ្នករាល់គ្នាជាប្រាកដថា អ្នកណាដែលស្តាប់ពាក្យខ្ញុំ ហើយជឿដល់ព្រះអង្គ ដែលចាត់ឲ្យខ្ញុំមក អ្នកនោះមានជីវិតដ៏នៅអស់កល្បជានិច្ច ហើយមិនដែលត្រូវជំនុំជំរះឡើយ គឺបានកន្លងហួសពីសេចក្ដីស្លាប់ ទៅដល់ជីវិតវិញ
យ៉ូហាន ៦:៤៧
ប្រាកដមែន ខ្ញុំប្រាប់អ្នករាល់គ្នាជាប្រាកដថា អ្នកណាដែលជឿដល់ខ្ញុំ នោះមានជីវិតអស់កល្បជានិច្ច
១ យ៉ូហាន ៥:១២-១៣
ឯអ្នកណាដែលមានព្រះរាជបុត្រា នោះក៏មានជីវិតដែរ តែអ្នកណាដែលគ្មានព្រះរាជបុត្រានៃព្រះទេ នោះគ្មានជីវិតឡើយ។ ខ្ញុំបានសរសេរសេចក្ដីទាំងនេះ ផ្ញើមកអ្នករាល់គ្នា ដែលជឿដល់ព្រះនាមព្រះរាជបុត្រានៃព្រះ ដើម្បីឲ្យអ្នករាល់គ្នាបានដឹងថា អ្នករាល់គ្នាមានជីវិតអស់កល្បជានិច្ចហើយ
ប្រសិនបើអ្នកជឿលើព្រះយេស៊ូវ អ្នកមានជីវិតអស់កល្បជានិច្ច។ អ្នកមានវាហើយឥឡូវនេះ! អ្នកបានកន្លងហួសពីសេចក្ដីស្លាប់ ទៅដល់ជីវិតវិញ។
ជីវិតអស់កល្បជានិច្ចគឺវាលើសពីការដែលគ្រាន់តែទៅនគរស្ថានសួគ៌នៅពេលយើងស្លាប់ទៅ។ ជីវិតអស់កល្បជានិច្ចគឺជាការស្គាល់ព្រះជាម្ចាស់ ជាមនុស្សម្នាក់របស់ព្រះ ដែលរស់នៅខាងវិញ្ញាណឥឡូវនេះ។ ជីវិតនេះគឺស្ថិតនៅក្នុងអ្នកដែលបានទុកចិត្តលើព្រះយេស៊ូវគ្រីស្ទហើយ។
ជីវិតនៃសម័យកាលខាងមុខមាននៅក្នុងព្រះយេស៊ូវ ហើយបានធ្វើឱ្យមានសម្រាប់សិស្សរបស់ព្រះអង្គ ហើយស្ថិតនៅចំណុចកណ្តាលគឺទំនាក់ទំនងជាមួយព្រះជាម្ចាស់។ បើទោះបីជាព្រះជាម្ចាស់គង់នៅស្ថានសួគ៌ ហើយយើងនៅលើផែនដីនេះក៏ដោយ យើងអាចចាប់ផ្តើមស្គាល់ទ្រង់ ហើយទទួលបទពិសោធន៍ ‘ព្រះចេស្តារ សេចក្តីស្រឡាញ់ និងប្រាជ្ញារបស់ទ្រង់នៅក្នុងជីវិតរបស់យើងនៅទីនេះ និងឥឡូវនេះ។ ជីវិតអស់កល្បជានិច្ចចាប់ផ្តើមនៅពេលយើងកើតជាថ្មី។ វាគឺជាអំណោយទានរបស់ព្រះ ដែលទ្រង់ប្រទានឱ្យ នៅពេលដែលមនុស្សប្រែចិត្តចេញពីអំពើបាបរបស់ពួកគេ ហើយជឿលើព្រះយេស៊ូវគ្រីស្ទ។
នេះគឺជាជីវិតអស់កល្បជានិច្ច។ តើអ្នកទទួលវាហើយឬនៅ? តើអ្នកមានជីវិតរស់នៅចំពោះព្រះជាម្ចាស់ជាមួយជីវិតដែលអ្នកមិនធ្លាប់មាន (មកពីកំណើត) ប៉ុន្តែបានប្រទានមកអ្នកដោយសារព្រះវិញ្ញាណដ៏បរិសុទ្ធ? ប្រសិនបើវាកើតមានឡើង នោះទំនាក់ទំនងបានចាប់ផ្តើមកើតឡើងរវាងព្រះជាម្ចាស់ និងអ្នកដែលនឹងជាប់មានជារៀងរហូត!
ប្រសិនបើអ្នកមានជីវិតអស់កល្បជានិច្ច សូមចំណាយពេលបន្តិចដើម្បីអរគុណដល់ព្រះជាម្ចាស់សម្រាប់ការនេះ។
បន្ទាប់មក អធិស្ឋានសម្រាប់អ្នកដែលមិនមាន។
ចំណុចគន្លឹះ #៣៖ ជីវិតអស់កល្បចាប់ផ្តើមឥឡូវនេះ។
ពាក្យមួយទៀតដែលយើងត្រូវធ្វើការពិចារណាគឺ “ជីវិត”។ នៅពេលព្រះគម្ពីរនិយាយអំពីជីវិតអស់កល្បជានិច្ច ពាក្យជីវិតគឺ ζωή។ ព្រះគម្ពីរបង្រៀនយើងថា ព្រះវរបិតាមានជីវិត (ζωή) ក្នុងព្រះអង្គទ្រង់ និងព្រះរាជបុត្រាមានជីវិតក្នុងព្រះអង្គទ្រង់យ៉ាងនោះដែរ។
យ៉ូហាន ៥:២៦
ពីព្រោះដែលព្រះវរបិតាមានជីវិតក្នុងព្រះអង្គទ្រង់យ៉ាងណា នោះទ្រង់ក៏បានប្រទានឲ្យព្រះរាជបុត្រាមានជីវិត ក្នុងព្រះអង្គទ្រង់យ៉ាងនោះដែរ
ព្រះជាម្ចាស់គឺជាព្រះអាទិករ និងជាអ្នកទ្រទ្រង់ជីវិតទាំងអស់។ ជីវិតទាំងឡាយនៅក្នុងសកលលោកកើតមកពីទ្រង់។ ជីវិតត្រូវបានប្រទានមកឱ្យយើងម្នាក់ៗ ប៉ុន្តែមិនដែលប្រទានទៅព្រះជាម្ចាស់ឡើយ។ ព្រះជាម្ចាស់មានជីវិតនៅក្នុងព្រះអង្គទ្រង់ ហើយជីវិតនោះមិនដែលមានទីចាប់ផ្តើមឡើយ។
មនុស្សគ្មានជីវិតនៅក្នុងខ្លួននោះទេ។ យើងមានជីវិតតែនៅក្នុងព្រះជាម្ចាស់តែប៉ុណ្ណោះ។ មូលហេតុដែលយើងម្នាក់ៗមានជីវិតរស់នៅឥឡូវនេះគឺដោយសារព្រះជាម្ចាស់បានប្រទានឱ្យយើងនូវអំណោយទានជីវិតខាងរូបកាយ។ ដូចជាជីវិតខាងរូបកាយដែរគឺត្រូវពឹងផ្អែកទាំងស្រុងទៅលើព្រះជាម្ចាស់ដែលបានបង្កើត និងទ្រទ្រង់យើង ជីវិតអស់កល្បជានិច្ចក៏ត្រូវពឹងផ្អែកទាំងស្រុងលើព្រះជាម្ចាស់ដែរ។
ជីវិតអស់កល្បគឺមិនមែនជាអ្វីម្យ៉ាងដែលព្រះជាម្ចាស់អាចប្រទានឱ្យយើងក្រៅពីទ្រង់នោះឡើយ។ ជីវិតអស់កល្បជានិច្ចគឹជាការចែករំលែកនៅក្នុងជីវិតរបស់ព្រះជាម្ចាស់។ វាគឺជាអំណោយទាននៃជីវិតរបស់ទ្រង់នៅក្នុងយើង។ ** កំណត់ចំណាំសម្រាប់គ្រូ #២
តើព្រះជាម្ចាស់ប្រទានអំណោយទានជីវិតរបស់ទ្រង់ដល់យើងដោយរបៀបណា? ចម្លើយគឺតាមរយៈព្រះរាជបុត្រារបស់ទ្រង់។ ព្រះជាម្ចាស់ប្រទានជីវិតអស់កល្បជានិច្ចដល់មនុស្សតាមរយៈការរួបរួមគ្នារបស់ពួកគេជាមួយ ព្រះយេស៊ូវ។
យ៉ូហាន ១១:២៥-២៦
ព្រះយេស៊ូវមានបន្ទូលទៅនាងថា ខ្ញុំជាសេចក្ដីរស់ឡើងវិញ ហើយជាជីវិត អ្នកណាដែលជឿដល់ខ្ញុំ ទោះបើបានស្លាប់ហើយ គង់តែនឹងរស់ឡើងវិញដែរ ឯអ្នកណាដែលរស់នៅ ហើយជឿដល់ខ្ញុំ នោះមិនត្រូវស្លាប់ឡើយ នាងជឿសេចក្ដីនេះឬទេ
១ យ៉ូហាន ៥:១១
នេះហើយជាសេចក្ដីបន្ទាល់នោះ គឺថា ព្រះទ្រង់បានប្រទានជីវិតដ៏នៅអស់កល្បជានិច្ចមកយើងរាល់គ្នា ហើយជីវិតនោះ គឺនៅក្នុងព្រះរាជបុត្រានៃទ្រង់
ព្រះជាម្ចាស់មានជីវិតនៅក្នុងអង្គទ្រង់ ព្រះយេស៊ូវជាព្រះរាជបុត្រារបស់ទ្រង់មានជីវិតនៅក្នុងអង្គទ្រង់ ហើយតាមរយៈការួមនឹងព្រះយេស៊ូវយើងក៏មានជីវិតអស់កល្បជានិច្ចផងដែរ។
យ៉ូហាន ១:១-៤
កាលដើមដំបូងមានព្រះបន្ទូល ព្រះបន្ទូលក៏គង់នៅជាមួយនឹងព្រះ ហើយព្រះបន្ទូលនោះឯងជាព្រះ ទ្រង់គង់នៅជាមួយនឹងព្រះ តាំងអំពីដើមមក គ្រប់របស់ទាំងអស់បានកើតមកដោយសារទ្រង់ ហើយក្នុងបណ្តារបស់ដែលបានបង្កើតមកទាំងប៉ុន្មាន នោះគ្មានអ្វីណាមួយកើតមកក្រៅពីទ្រង់ឡើយ នៅក្នុងទ្រង់មានជីវិត ហើយជីវិតនោះជាពន្លឺនៃមនុស្សលោក
១ យ៉ូហាន ១:១-៣
ឯសេចក្ដីដែលមានតាំងពីដើមមក ដែលយើងខ្ញុំបានឮ ហើយភ្នែកបានឃើញ ក៏បានមើល ហើយដៃបានប៉ះពាល់ ខាងឯព្រះបន្ទូលនៃជីវិត (ដ្បិតព្រះដ៏ជាជីវិត ទ្រង់បានលេចមកហើយ យើងខ្ញុំបានឃើញទ្រង់ ក៏ធ្វើជាទីបន្ទាល់ប្រាប់ដល់អ្នករាល់គ្នា ពីជីវិតនោះដ៏រស់នៅអស់កល្បជានិច្ច ដែលពីដើមស្ថិតនៅនឹងព្រះវរបិតា ហើយបានលេចមកឲ្យយើងខ្ញុំឃើញ) ដូច្នេះ សេចក្ដីដែលយើងខ្ញុំបានឃើញ ហើយឮនោះ យើងខ្ញុំប្រាប់មកអ្នករាល់គ្នា ដើម្បីឲ្យអ្នករាល់គ្នាមានសេចក្ដីប្រកបនឹងយើងខ្ញុំដែរ រីឯសេចក្ដីប្រកបរបស់យើងខ្ញុំ នោះគឺប្រកបនឹងព្រះវរបិតា ហើយនឹងព្រះយេស៊ូវគ្រីស្ទ ជាព្រះរាជបុត្រាទ្រង់
១ យ៉ូហាន ៥:២០
យើងក៏ដឹងថា ព្រះរាជបុត្រានៃព្រះបានយាងមកហើយ ក៏បានប្រទានឲ្យយើងរាល់គ្នាមានប្រាជ្ញា ដើម្បីឲ្យបានស្គាល់ព្រះដ៏ពិតប្រាកដ យើងរាល់គ្នាជាអ្នកនៅក្នុងព្រះដ៏ពិតប្រាកដនោះ គឺក្នុងព្រះយេស៊ូវគ្រីស្ទ ជាព្រះរាជបុត្រានៃទ្រង់ ព្រះអង្គនោះឯងជាព្រះពិតប្រាកដ ហើយជាជីវិតអស់កល្បជានិច្ចផង។
ព្រះយេស៊ូវគឺជា “ជីវិតនោះដ៏រស់នៅអស់កល្បជានិច្ច ដែលពីដើមស្ថិតនៅនឹងព្រះវរបិតា ហើយបានលេចមកឲ្យយើងខ្ញុំឃើញ"។ ដើម្បីឱ្យយើងមានជីវិតអស់កល្បជានិច្ចមានន័យថាយើងស្គាល់ទ្រង់ ហើយមានការប្រកបគ្នាជាមួយទ្រង់ ហើយតាមរយៈទ្រង់យើងមានទំនាក់ទំនងជាមួយព្រះជាម្ចាស់!
ព្រះយេស៊ូវគឺជាជីវិតដ៏អស់កល្បជានិច្ច។ “ព្រះអង្គនោះឯងជាព្រះពិតប្រាកដ ហើយជាជីវិតអស់កល្បជានិច្ចផង”។ នៅក្នុងទ្រង់គឺជាជីវិត។ ហើយយើងនៅក្នុងទ្រង់។ ហេតុនេះហើយបានជាអស់អ្នកដែលរស់នៅក្នុងព្រះគ្រីស្ទមានជីវិតអស់កល្បជានិច្ច។
ការព្យាយាមដើម្បីទទួលបានជីវិតអស់កល្បជានិច្ចក្រៅពីព្រះជាម្ចាស់គឺមិនអាចទៅរួចនោះទេ ពីព្រោះជីវិតអស់កល្បជានិច្ចគឺជាការស្គាល់ព្រះជាម្ចាស់ ហើយចែករំលែកជីវិតដែលទ្រង់តែងតែរីករាយជាមួយ។ ជីវិតខាងរូបកាយមានចាប់តាំងពីកើតមករហូតដល់ពេលស្លាប់ ប៉ុន្តែជីវិតរបស់ព្រះជាម្ចាស់មិនចេះចប់ឡើយ។ ហើយនេះគឺជាជីវិតអស់កល្បជានិច្ច៖ ដើម្បីស្គាល់ព្រះដ៏ពិតតែមួយ និងព្រះយេស៊ូវគ្រីស្ទដែលទ្រង់បានបញ្ជូនមក។
ជីវិតអស់កល្បជានិច្ចគឺជាជន្មរបស់ព្រះជាម្ចាស់ស្ថិតនៅក្នុងអ្នកជឿ។ មានតែព្រះជាម្ចាស់តែប៉ុណ្ណោះដែលអស់កល្ប ហើយជីវិតតែមួយគត់ដែលនៅអស់កល្បគឺមកពីព្រះជាម្ចាស់។ ព្រះជាម្ចាស់គឺជាអំណោយទានដែលត្រូវបានប្រទានមក។ ព្រះយេស៊ូវមានបន្ទូលថា “ព្រះយេស៊ូវមានបន្ទូលឆ្លើយថា បើអ្នកណាស្រឡាញ់ខ្ញុំ អ្នកនោះនឹងកាន់តាមពាក្យខ្ញុំ នោះព្រះវរបិតាខ្ញុំនឹងស្រឡាញ់អ្នកនោះ ហើយយើងនឹងមកឯអ្នកនោះ ក៏នឹងតាំងទីលំនៅនៅជាមួយដែរ” (យ៉ូហាន 14:23)។ ព្រះជាម្ចាស់តាមរយៈព្រះវិញ្ញាណបរិសុទ្ធរបស់ទ្រង់យាងមកគង់នៅក្នុងអ្នកជឿ។ អ្នកជឿក្លាយទៅជាព្រះវិហារនៃព្រះវិញ្ញាណដ៏បរិសុទ្ធ ដូច្នេះហើយ ពួកគាត់នៅរស់ចំពោះព្រះ។
ចំណុចគន្លឹះ #៤៖ ជីវិតអស់កល្បជានិច្ចគឺជាការចែករំលែកនៅក្នុងជីវិតរបស់ព្រះជាម្ចាស់
ជីវិតអស់កល្បជានិច្ចគឺជាជីវិតដែលមិនចេះស្លាប់។ នេះគឺជាសេចក្តីពិតដែលមនុស្សភាគច្រើនគិតនៅពេលដែលពួកគេគិតអំពីជីវិតអស់កល្បជានិច្ច៖ ថារយៈពេលរបស់វាគឺគ្មានទីបញ្ចប់។ ជីវិតអស់កល្បជានិច្ចមិនដែលចប់ឡើយ។ ជីវិតដែលព្រះជាម្ចាស់ប្រទានឱ្យអ្នកជឿគ្រប់ៗរូបនៅក្នុងការកើតជាថ្មីរបស់ពួកគេមិនចេះស្លាប់ឡើយ។ ព្រះយេស៊ូវមានបន្ទូលថា៖ “ចៀមខ្ញុំទាំងប៉ុន្មានវាស្តាប់ខ្ញុំ ហើយមកតាម ខ្ញុំក៏ស្គាល់វាដែរ ខ្ញុំឲ្យជីវិតអស់កល្បជានិច្ចដល់វា វាមិនត្រូវវិនាសនៅអស់កល្បរៀងទៅ ក៏គ្មានអ្នកណាឆក់យកវាពីដៃខ្ញុំបានទេ” (យ៉ូហាន ១០:២៧-២៨)
ជីវិតរបស់ព្រះជាម្ចាស់នៅក្នុងអ្នកគឺអស់កល្បជានិច្ច។ តើអ្នកមើលឃើញពីព្រះពរដ៏អស្ចារ្យអ្វីជារបស់អ្នកដែរឬទេ ប្រសិនបើអ្នកបានទទួលអំណោយទាននេះ? ប្រសិនបើអ្នកបានទទួលជីវិតតាមរយៈព្រះយេស៊ូវគ្រីស្ទ អ្នកមានជីវិតដែលមិនចេះស្លាប់ ជីវិតដែលជាប់នៅមានរយៈពេលយូរជាងព្រះអាទិត្យ ឬព្រះច័ន្ទ។ លោកីយ៍ទាំងឡាយនឹងត្រូវកន្លងផុតទៅ ប៉ុន្តែជីវិតរបស់អ្នក និងជីវិតរបស់ព្រះជាម្ចាស់នឹងនៅតែបន្តរហូតតរៀងទៅ! គិតអំពីរឿងនេះ៖ មួយពាន់ឆ្នាំចាប់ពីថ្ងៃនេះទៅ អ្នកនឹងនៅតែមានជីវិត! អ្នកគឺអស់កល្បជានិច្ច! ហាលេលូយ៉ា!
ចំណុចគន្លឹះ #៥៖ ជីវិតអស់កល្បជានិច្ចគ្មានទីបញ្ចប់ឡើយ
ជីវិតអស់កល្បជានិច្ចគឺជាជីវិតដែលឈានដល់ភាពល្អឥតខ្ចោះពេញលេញនៅក្នុងសិរីរុងរឿង។ នៅក្នុងជីវិតខាងរូបកាយ មានលក្ខណៈខុសគ្នាខ្លាំងមួយរវាងទារក និងមនុស្សពេញវ័យ ដែលធំលូតលាស់ឡើង។ ប៉ុន្តែវាគឺជាជីវិតដដែល។ ដូចគ្នានេះដែរ មានភាពខុសគ្នាខ្លាំងនៅក្នុង ជីវិតរបស់អ្នករវាងពេលដែលអ្នកទទួលបានជីវិតអស់កល្បជានិច្ចជាលើកដំបូង (ក្នុងនាមជាអ្នកជឿថ្មីដែលកើត ម្តងទៀត) ហើយគ្រីស្ទានចាស់ទុំដែលអ្នកត្រូវក្លាយទៅជា។ ប៉ុន្តែវាគឺជាជីវិតដដែល។ វាគឺជាជីវិតដដែល ប៉ុន្តែពេញលេញជាង និងបរិបូរណ៍ជាង។ ខណៈពេលដែលជីវិតអស់កល្បជានិច្ចចាប់ផ្តើម នោះវានឹងលូតលាស់ ហើយក្លាយជាកាន់តែមានផលផ្លែរហូតទាល់តែឈានដល់ភាពល្អឥតខ្ចោះពេញលេញនៅក្នុងសិរីរុងរឿង។
យើងស្ថិតនៅចំណុចចាប់ផ្តើមនៃជីវិតអស់កល្បជានិច្ចតែប៉ុណ្ណោះ។ វានឹងកាន់តែប្រសើរឡើងនៅពេលដែលទំនាក់ទំនងរបស់អ្នកជាមួយព្រះជាម្ចាស់លូតលាស់ឡើង ហើយអ្នកលូតលាស់នៅក្នុងភាពបរិសុទ្ធ និងភាពជិតស្និទ្ធជាមួយព្រះជាម្ចាស់។ ថ្ងៃមួយនៅពេលយើងស្ថិតនៅក្នុងព្រះវត្តមានរបស់ព្រះអង្គនៅស្ថានសួគ៌ សេចក្តីអំណររបស់យើងនឹងមានលក្ខណៈពេញលេញ។ នៅថ្ងៃនោះ យើងនឹងដឹងថាជីវិតអស់កល្បជានិច្ចរបស់យើងបានចាប់ផ្តើមមុនពេលយើងមកដល់ស្ថានសួគ៌ទៅទៀត។ វាបានចាប់ផ្តើមនៅពេលយើងបានស្គាល់ព្រះជាលើកដំបូង។
ចំណុចគន្លឹះ #៦៖ ជីវិតអស់កល្បជានិច្ចគឺជាជីវិតដែលឈានដល់ភាពល្អឥតខ្ចោះពេញលេញ នៅក្នុងសិរីរុងរឿង
ពិភាក្សា៖ ប្រសិនបើនរណាម្នាក់សួរអ្នកថា “តើជីវិតអស់កល្បជានិច្ចគឺជាអ្វី”? តើអ្នកនឹងនិយាយដូចម្តេច?
ផ្នែកទី២៖ របៀបដែលយើងទទួលបានជីវិតអស់កល្បជានិច្ច
ជីវិតអស់កល្បជានិច្ចគឺមិនមែនជាអ្វីម្យ៉ាងដែលយើងសមនឹងទទួល ឬអាចរកបាននោះទេ។ ការពិតខគម្ពីរបន្ទាប់ទៀតប្រាប់យើងពីអ្វីដែលយើងរកបាន ហើយសមនឹងទទួល (“ឈ្នួលរបស់យើង”) គឺសេចក្តីស្លាប់។ ប៉ុន្តែអំណោយទានឥតគិតថ្លៃរបស់ព្រះជាម្ចាស់គឺជាជីវិតអស់កល្បជានិច្ច។
រ៉ូម ៦:២២-២៣
តែឥឡូវនេះ ដែលព្រះបានប្រោសឲ្យរួចពីបាប ហើយអ្នករាល់គ្នាបានត្រឡប់ជាបាវបំរើដល់ទ្រង់ នោះអ្នករាល់គ្នាបានផលខាងឯសេចក្ដីបរិសុទ្ធវិញ ហើយទីបំផុតនៃអំពើទាំងនោះ គឺជាជីវិតអស់កល្បជានិច្ចផង ដ្បិតឈ្នួលរបស់អំពើបាប នោះជាសេចក្ដីស្លាប់ តែអំណោយទាននៃព្រះវិញ គឺជាជីវិតដ៏នៅអស់កល្បជានិច្ច ដោយព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នា។
ជីវិតអស់កល្បជានិច្ចគឺជាអំណោយទានរបស់ព្រះជាម្ចាស់។ តើខគម្ពីរទាំងនេះប្រាប់យើងអំពីរបៀបដែលយើងទទួលអំណោយទាននេះយ៉ាងដូចម្តេច?
យ៉ូហាន ៣:១៦
ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ
យ៉ូហាន ៣:៣៦
ឯអ្នកណាដែលជឿដល់ព្រះរាជបុត្រា នោះមានជីវិតដ៏នៅអស់កល្បជានិច្ចហើយ តែអ្នកណាដែលមិនព្រមជឿដល់ព្រះរាជបុត្រាវិញ នោះនឹងមិនឃើញជីវិតសោះឡើយ គឺសេចក្ដីក្រោធរបស់ព្រះ តែងនៅជាប់លើអ្នកនោះឯង។
១ ធីម៉ូថេ ១:១៦
ដោយហេតុនោះបានជាទ្រង់អាណិតមេត្តាដល់ខ្ញុំ ដើម្បីឲ្យព្រះយេស៊ូវគ្រីស្ទបានសំដែងចេញ គ្រប់ទាំងសេចក្ដីអត់ធន់របស់ទ្រង់ក្នុងខ្លួនខ្ញុំ ដែលជាអ្នកលេខ១នោះ ឲ្យខ្ញុំបានធ្វើជាក្បួនដល់ពួកអ្នក ដែលនឹងជឿដល់ទ្រង់ ប្រយោជន៍ឲ្យគេបានជីវិតអស់កល្បជានិច្ច
យើងទទួលបានជីវិតអស់កល្បជានិច្ចដែលជាអំណោយទានរបស់ព្រះជាម្ចាស់តាមរយៈការជឿលើព្រះយេស៊ូវ។ វិធីតែមួយគត់ដែលមនុស្សម្នាក់អាចរស់បានជារៀងរហូតគឺត្រូវរួមជាមួយនឹងព្រះជាម្ចាស់។ អំពើបាបបានបំបែកការរួបរួមរបស់មនុស្សជាមួយនឹងព្រះជាម្ចាស់។ ឥឡូវនេះ វិធីតែមួយគត់ដើម្បីរួបរួមគ្នាជាមួយព្រះជាម្ចាស់ឡើងវិញគឺមានតែតាមរយៈវិធីដែលទ្រង់បានផ្តល់ឱ្យតែប៉ុណ្ណោះ៖ នោះគឺតាមរយៈព្រះយេស៊ូវគ្រីស្ទ។
យ៉ូហាន ១៤:៦
ព្រះយេស៊ូវមានបន្ទូលទៅគាត់ថា ខ្ញុំជាផ្លូវ ជាសេចក្ដីពិត ហើយជាជីវិត បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ
សេចក្តីសង្ឃឹមរបស់គ្រីស្ទានសម្រាប់ជីវិតអស់កល្បជានិច្ចគឺផ្អែកទៅលើសេចក្តីសន្យារបស់ព្រះយេស៊ូវ។ តោះយើងក្រឡេកមើលសេចក្តសន្យាទាំងអស់នេះ។
យ៉ូហាន ៤:១៤
តែអ្នកណាដែលផឹកទឹកខ្ញុំឲ្យ នោះនឹងមិនស្រេកទៀតឡើយ ទឹកដែលខ្ញុំឲ្យ នឹងត្រឡប់ជារន្ធទឹកនៅក្នុងអ្នកនោះ ដែលផុសឡើងដល់ទៅបានជីវិតអស់កល្បជានិច្ច
យ៉ូហាន ៥:២៤
ប្រាកដមែន ខ្ញុំប្រាប់អ្នករាល់គ្នាជាប្រាកដថា អ្នកណាដែលស្តាប់ពាក្យខ្ញុំ ហើយជឿដល់ព្រះអង្គ ដែលចាត់ឲ្យខ្ញុំមក អ្នកនោះមានជីវិតដ៏នៅអស់កល្បជានិច្ច ហើយមិនដែលត្រូវជំនុំជំរះឡើយ គឺបានកន្លងហួសពីសេចក្ដីស្លាប់ ទៅដល់ជីវិតវិញ
យ៉ូហាន ៦:៣៩-៤០
ឯបំណងព្រះហឫទ័យនៃព្រះវរបិតា ដែលចាត់ឲ្យខ្ញុំមក នោះគឺមិនចង់ឲ្យខ្ញុំបាត់អ្នកណា ក្នុងគ្រប់អស់ទាំងមនុស្ស ដែលទ្រង់ប្រទានមកខ្ញុំនោះឡើយ គឺទ្រង់ចង់ឲ្យខ្ញុំប្រោសទាំងអស់ឲ្យរស់ឡើង នៅថ្ងៃចុងបំផុតវិញ នេះហើយជាបំណងព្រះហឫទ័យនៃព្រះវរបិតាខ្ញុំ គឺឲ្យអស់អ្នកណាដែលឃើញព្រះរាជបុត្រា ហើយក៏ជឿដល់ទ្រង់ បានជីវិតដ៏នៅអស់កល្បជានិច្ច ហើយខ្ញុំនឹងឲ្យអ្នកនោះរស់ឡើងវិញ នៅថ្ងៃចុងបំផុត។
យ៉ូហាន ៦:៤៧
ប្រាកដមែន ខ្ញុំប្រាប់អ្នករាល់គ្នាជាប្រាកដថា អ្នកណាដែលជឿដល់ខ្ញុំ នោះមានជីវិតអស់កល្បជានិច្ច
យើងមានការសន្យាជាច្រើនមកពីព្រះយេស៊ូវដែលយើងនឹងមានជីវិតដ៏អស់កល្បជានិច្ចជាមួយនឹងព្រះជាម្ចាស់។ យើងនឹងស្គាល់ទ្រង់ ហើយចូលរួមនៅក្នុងជីវិតរបស់ព្រះជាម្ចាស់។ យើងនឹងរីករាយជាមួយនឹងគុណភាពនៃជីវិត ដែលបរិសុទ្ធ និងល្អឥតខ្ចោះ ហើយនិងបរិមាណនៃជីវិត ដែលចមិនដែលចប់ឡើយ។ នេះគឺជាជីវិតពិតដែលព្រះជាម្ចាស់មានបំណងសម្រាប់មនុស្ស - គ្មានអំពើបាប គ្មានសេចក្តីស្លាប់ គ្មានទីបញ្ចប់។ ពិភាក្សាជាមួយដៃគូរ៖ តើអ្នកមានទំនុកចិត្តប៉ុណ្ណាថាអ្នកនឹងមានជីវិតអស់កល្បជានិច្ច? ហេតុអ្វី?
១ យ៉ូហាន ២:២៥
នេះហើយ ជាសេចក្ដីដែលទ្រង់បានសន្យានឹងយើងរាល់គ្នា គឺជាជីវិតដ៏រស់នៅអស់កល្បជានិច្ច។
ទីតុស ១:២
ដោយសេចក្ដីសង្ឃឹមដល់ជីវិតដ៏នៅអស់កល្បជានិច្ច ដែលព្រះដ៏មិនចេះភូត ទ្រង់បានសន្យាមុនអស់ទាំងកល្ប
មនុស្សមួយចំនួនគិតថាការនេះគឺវាសាមញ្ញពេក។ អ្វីដែលយើងត្រូវធ្វើគឺជឿលើព្រះយេស៊ូវ ហើយ យើងទទួលបានជីវិតអស់កល្បជានិច្ច។ ប៉ុន្តែវាមិនសាមញ្ញនោះទេដើម្បីឱ្យព្រះយេស៊ូវសម្រេចការនេះបាន។ ទ្រង់ត្រូវយាងចុះពីស្ថានសួគ៌មកកាន់ផែនដី រស់នៅក្នុងជីវិតដែលល្អឥតខ្ចោះដើម្បីតតាំងនឹងការល្បួងគ្រប់យ៉ាង ទទួលយកការកាត់ទោសទាំងគ្មានកំហុស វាយនឹងរំពាត់ ជាប់ឆ្កាង ទទួលយកសេចក្ដីក្រោធរបស់ព្រះជាម្ចាស់សម្រាប់រាល់អំពើបាបដែលយើងប្រព្រឹត្តិ សុគត ហើយត្រូវបានប្រោសឱ្យរស់ពីសុគតឡើងវិញ។ នេះគឺជារបៀបដែលទ្រង់សម្រេចបានសេចក្ដីសង្រ្គោះ និងជីវិតអស់កល្បជានិច្ចរបស់យើង។ វាមិនសាមញ្ញនោះទេ។ ការលះបង់នោះគឺវាធំធេងជាង ការដែលយើងអាចស្រមៃឃើញ។ អ្នកអាចទទួល ឬបដិសេធការនេះ ប៉ុន្តែសូមកុំគិតថា វាមិនទាន់គ្រប់គ្រាន់សម្រាប់ជីវិតអស់កល្បជានិច្ចឱ្យសោះ។
ផ្នែកទី៣៖ តើជីវិតអស់កល្បជានិច្ចមានលក្ខណៈដូចម្តេច?
ការបើកសំដែងនៃជីវិតដ៏អស់កល្បជានិច្ច
យើងចាប់ផ្តើមទទួលបានបទពិសោធន៍នៃជីវិតដ៏អស់កល្បជានិច្ចឥឡូវនេះ ប៉ុន្តែយើងនឹងមានវាពេញលេញនៅក្នុងសម័យកាលដែលនឹងត្រូវមកដល់។ តើព្រះគម្ពីរប្រាប់យើងដូចម្តេចអំពីសម័យកាលដែលនឹងត្រូវមកដល់?
វិវរណៈ ២១:១-៤
រួចខ្ញុំឃើញផ្ទៃមេឃថ្មី នឹងផែនដីថ្មី ដ្បិតផ្ទៃមេឃមុន នឹងផែនដីមុនបានកន្លងបាត់ទៅហើយ ក៏គ្មានសមុទ្រទៀតឡើយ ហើយយ៉ូហានខ្ញុំ ក៏ឃើញទីក្រុងដ៏បរិសុទ្ធ គឺជាក្រុងយេរូសាឡិមថ្មី ចុះពីស្ថានសួគ៌មកអំពីព្រះ តាក់តែងដូចជាប្រពន្ធថ្មោងថ្មីតែងខ្លួនទទួលប្ដី ខ្ញុំមានឮសំឡេង១យ៉ាងខ្លាំង ចេញពីស្ថានសួគ៌មកថា មើល រោងឧបោសថរបស់ព្រះ បាននៅជាមួយនឹងមនុស្សហើយ ទ្រង់នឹងគង់នៅជាមួយនឹងគេ គេនឹងធ្វើជារាស្ត្ររបស់ទ្រង់ ហើយព្រះអង្គទ្រង់ក៏នឹងធ្វើជាព្រះដល់គេ ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ ដ្បិតសេចក្ដីមុនទាំងប៉ុន្មាន បានកន្លងបាត់ទៅហើយ។
យើងរៀនថានឹងមានស្ថានសួគ៌ និងផែនដីថ្មី។ ស្ថានសួគ៌ និងផែនដីបច្ចុប្បន្ននឹងត្រូវកន្លងផុតទៅ។ យើងនឹងរស់នៅក្នុងទីក្រុងបរិសុទ្ធ (“ទីក្រុងយេរូសាឡឹមថ្មី”) ហើយនឹងមានបទពិសោធន៍នៅជិតស្និទ ជាមួយនឹងព្រះជាម្ចាស់។ កន្លែងសម្រាប់ព្រះគង់នៅនឹងស្ថិតនៅជាមួយនឹងមនុស្ស។ ព្រះជាម្ចាស់នឹងក្លាយទៅជាព្រះរបស់យើង ហើយយើងនឹងក្លាយទៅជាបុត្រាបុត្រីរបស់ទ្រង់។ នឹងគ្មានសេចក្តីស្លាប់ ឬការឈឺចាប់ ឬការរងទុក្ខនៅក្នុងជីវិតអស់កល្បជានិច្ចទេ។
វិវរណៈ ២១:៩-១១
ក្នុងទេវតាទាំង៧ មានទេវតា១ ដែលកាន់ចានកន្ទោងដ៏ពេញដោយសេចក្ដីវេទនាទាំង៧ក្រោយបង្អស់ ទេវតានោះបានមកនិយាយនឹងខ្ញុំថា ចូរមកឯណេះ ខ្ញុំនឹងបង្ហាញឲ្យអ្នកឃើញប្រពន្ធថ្មោងថ្មី ជាភរិយារបស់កូនចៀម នោះទេវតាក៏នាំយកវិញ្ញាណខ្ញុំ ទៅលើភ្នំធំហើយខ្ពស់ បង្ហាញឲ្យខ្ញុំឃើញទីក្រុងបរិសុទ្ធ គឺជាក្រុងយេរូសាឡិម ដែលកំពុងតែចុះពីស្ថានសួគ៌ មកអំពីព្រះ ទាំងមានសិរីល្អនៃព្រះ ហើយពន្លឺរស្មីរបស់ទីក្រុងនោះ ក៏ដូចជាត្បូងមានដំឡៃថ្លៃវិសេស គឺដូចជាត្បូងមណីជោតិ ហើយថ្លាដូចជាកែវចរណៃ
ទីក្រុងបរិសុទ្ធគឺជាមនុស្ស ហើយមនុស្សគឺជា “ភរិយារបស់កូនចៀម”។ "កូនចៀម" ជាព្រះយេស៊ូវ។ ដោយហៅយើងថាជា “ភរិយារបស់កូនចៀម” ការនេះបង្ហាញថាយើងត្រូវបានការស្រឡាញ់ពីព្រះយេស៊ូវ ហើយត្រូវរួបរួមគ្នាជាមួយទ្រង់នៅក្នុងទំនាក់ទំនងជាអចិន្ត្រៃយ៍ (ដូចជាអាពាហ៍ពិពាហ៍)។ កូនក្រមុំរបស់ព្រះគ្រីស្ទគឺជាមនុស្សទាំងអស់ដែលទទួលបានការប្រោសលោះពេញមួយប្រវត្តិសាស្ត្រ។
វិវរណៈ ២១:១៥-២១
ឯទេវតា ដែលនិយាយមកខ្ញុំ នោះក៏មានកាន់រង្វាស់មាស ដើម្បីនឹងវាស់ទីក្រុង នឹងទ្វារ ហើយកំផែងក្រុងដែរ ទីក្រុងនោះមានរាង៤ជ្រុង បណ្តោយនឹងទទឹងស្មើគ្នា ទេវតាក៏យករង្វាស់ទៅវាស់ទីក្រុង ឃើញមាន១២ពាន់ស្តាដ ឯបណ្តោយ ទទឹង ហើយកំពស់ក៏ស្មើគ្នាទាំងអស់ ក៏វាស់កំផែងឃើញ១៤៤ហត្ថ តាមរង្វាស់មនុស្សជាតិដែលទេវតាប្រើ កំផែងនោះបានធ្វើពីត្បូងមណីជោតិ ហើយទីក្រុងក៏ធ្វើពីមាសសុទ្ធ ដូចជាកែវថ្លាល្អ ជើងកំផែងបានតាក់តែង ដោយត្បូងមានដំឡៃគ្រប់យ៉ាង ជើងទី១មានត្បូងមណីជោតិ ទី២មានត្បូងកណ្តៀង ទី៣មានត្បូងមោរ៉ា ទី៤មានត្បូងមរកត ទី៥មានត្បូងសាមស៊ី ទី៦មានត្បូងពិទាយ ទី៧មានត្បូងប៊ុតលឿង ទី៨មានត្បូងបេរីល ទី៩មានត្បូងទោប៉ាត់ ទី១០មានត្បូងយក់ ទី១១មានត្បូងនិល ទី១២មានត្បូងត្របែក ទ្វារទាំង១២ជាកែវមុក្តា១២ គឺទ្វារ១ធ្វើពីកែវមុក្តា១ ហើយផ្លូវក្រុងក៏ធ្វើពីមាសសុទ្ធ ថ្លាដូចជាកែវ។
ទីក្រុងគឺជាគូបដ៏ល្អឥតខ្ចោះ (ដែលមានប្រវែង ទទឺង និងកម្ពស់ទីក្រុងស្មើៗគ្នា) ដូចជាកន្លែងដ៏បរិសុទ្ធបំផុតនៅក្នុងព្រះវិហារដូច្នោះដែរ។ នេះគឺជាកន្លែងដែលព្រះវត្តមានរបស់ព្រះជាម្ចាស់គង់នៅ។ ការនេះបង្ហាញថាទីក្រុងទាំងមូលគឺជាកន្លែងដែលយើងនឹងទទួលបានបទពិសោធន៍នៃព្រះវត្តមានរបស់ព្រះជានិច្ច។ ទីក្រុងយេរូសាឡឹមថ្មីនឹងមានសិរីរុងរឿង។ គ្រឿងអលង្ការបង្ហាញប្រាប់ថាវានឹងក្លាយទៅជាទីក្រុងដ៏ស្រស់ស្អាតដែលមិនអាចប្រៀបផ្ទឹមបាន។
វិវរណៈ ២១:២២-២៧
ខ្ញុំមិនឃើញមានព្រះវិហារណា នៅក្នុងក្រុងនោះទេ ដ្បិតព្រះអម្ចាស់ ជាព្រះដ៏មានព្រះចេស្តាបំផុត ព្រមទាំងកូនចៀមដែរ ទ្រង់ជាព្រះវិហារនៃទីក្រុងនោះ ក្រុងនោះមិនត្រូវការនឹងព្រះអាទិត្យ ឬព្រះចន្ទ សំរាប់នឹងបំភ្លឺទេ ដ្បិតសិរីល្អនៃព្រះបានបំភ្លឺហើយ ឯកូនចៀមក៏ជាចង្កៀងនៃក្រុងនោះដែរ អស់ទាំងសាសន៍នឹងដើរក្នុងពន្លឺក្រុងនោះ អស់ទាំងស្តេចនៅផែនដី ក៏យកសិរីនៃខ្លួនមកទុកក្នុងក្រុងនោះដែរ ទ្វារក្រុងនោះទាំងប៉ុន្មានមិនដែលបិទនៅពេលថ្ងៃទេ ហើយនៅឯណោះគ្មានយប់ឡើយ មនុស្សលោកនឹងយកសិរីល្អ នឹងកេរ្តិ៍ឈ្មោះរបស់សាសន៍ទាំងប៉ុន្មានមកទុកក្នុងក្រុងនោះ ក៏គ្មានអ្វីស្មោកគ្រោក ឬអ្នកណាដែលប្រព្រឹត្តបែបគួរខ្ពើម ឬសេចក្ដីកំភូតណាចូលទៅក្នុងទីក្រុងនោះបានឡើយ ចូលបានតែអ្នកណា ដែលមានឈ្មោះកត់ទុក ក្នុងបញ្ជីជីវិតរបស់កូនចៀមប៉ុណ្ណោះ។
ខណៈដែលទំហំ និងភាពស្រស់ស្អាតរបស់ទីក្រុងគឺពិតជាអស្ចារ្យខ្លាំងណាស់ អ្វីដែលធ្វើឱ្យវាកាន់តែពិសេសគឺជាព្រះវត្តមានរបស់ព្រះជាម្ចាស់។ យើងនឹងមិនទៅព្រះវិហារទៀតទេ យើងនឹងទៅកាន់ព្រះជាម្ចាស់ និងព្រះយេស៊ូវដោយផ្ទាល់តែម្តង! ព្រះវត្តមានរបស់ព្រះជាម្ចាស់នឹងមានពេញនៅលើស្ថានសួគ៌ និងផែនដីថ្មីទាំងមូល (ខ៣) ដូច្នេះតាមរយៈការនៅកន្លែងនោះយើងនឹងចូលទៅក្នុងព្រះវត្តមានរបស់ព្រះជាម្ចាស់ដែលគ្មានដែនកំណត់ (យ៉ូហាន ១៤:៣; ១ ថែស្សាឡូនិច ៤:១៧)។ ទីក្រុងនឹងបំភ្លឺដោយសិរីរុងរឿងរបស់ព្រះជាម្ចាស់ ហើយជាចង្កៀងរបស់កូនចៀម។
ទេវតាក៏បង្ហាញ ឲ្យខ្ញុំឃើញទន្លេទឹកជីវិត ថ្លាដូចជាកែវចរណៃ ដែលហូរចេញពីបល្ល័ង្កនៃព្រះ នឹងកូនចៀម ឯនៅកណ្តាលផ្លូវក្រុងនោះ ហើយនៅមាត់ទន្លេទាំងសងខាង នោះមានដើមជីវិត ដែលបង្កើតផ្លែ១២ដង គឺ១ខែម្តងៗ ហើយស្លឹកឈើនោះ ក៏សំរាប់នឹងមើលអស់ទាំងសាសន៍ឲ្យជា គ្រានោះ នឹងគ្មានសេចក្ដីបណ្តាសាទៀតឡើយ ហើយបល្ល័ង្កនៃព្រះ នឹងកូនចៀម ក៏នឹងនៅក្នុងក្រុងនោះ ឯពួកបាវរបស់ទ្រង់ គេនឹងបំរើទ្រង់ គេនឹងឃើញព្រះភក្ត្រទ្រង់ ហើយព្រះនាមទ្រង់នឹងនៅលើថ្ងាសគេ ក៏នឹងឥតមានយប់ទៀតឡើយ ហើយគេមិនត្រូវការនឹងចង្កៀងណា ឬពន្លឺព្រះអាទិត្យទេ ពីព្រោះព្រះអម្ចាស់ដ៏ជាព្រះទ្រង់នឹងបំភ្លឺគេ ហើយគេនឹងសោយរាជ្យ នៅអស់កល្បជានិច្ចរៀងរាបតទៅ។
ដើមឈើជីវិតត្រូវបានដាំនៅចំចំណុចកណ្តាលនៃសួនច្បារអេដែន (លោកុប្បត្តិ ៣:២២)។ ដោយសារតែអំពើបាបរបស់អ័ដាម មនុស្សត្រូវបានហាមឃាត់ពីសួនច្បារអេដែន (លោកុប្បត្តិ ៣:១៧-១៨)។ ប៉ុន្តែមនុស្សជាតិដែលទទួលបានការប្រោសលោះនឹងអាចញ៉ាំផ្លែឈើនៃដើមជីវិតម្តងទៀត។ នៅសម័យកាលថ្មី ព្រះពររបស់សួនច្បារអេដែនត្រូវបានស្តារឡើងវិញ! យើងនឹងរីករាយក្នុងការប្រកបគ្នាជាមួយព្រះជាម្ចាស់ ជារៀងរហូតអស់កល្បតរៀងទៅ!
ពិភាក្សា៖ តើអ្វីគឺជាទិដ្ឋភាពដ៏អស្ចារ្យបំផុតនៃជីវិតដ៏អស់កល្បជានិច្ចសម្រាប់អ្នក?
ការសន្និដ្ឋាន
ការសន្យាពីជីវិតអស់កល្បជានិច្ចគឺជាការលើកទឹកចិត្តដ៏អស្ចារ្យដើម្បីរស់នៅសម្រាប់ព្រះជាម្ចាស់នៅពេលនេះ។ ប្រសិនបើព្រះជាម្ចាស់បានប្រទានជីវិតអស់កល្បជានិច្ចដល់យើង យើងត្រូវតែរស់នៅសម្រាប់ភាពអស់កល្បជានិច្ច។
ម៉ាថាយ ៦:១៩-២១
កុំឲ្យប្រមូលទ្រព្យសម្បត្តិ ទុកសំរាប់ខ្លួន នៅផែនដី ជាកន្លែងដែលមានកន្លាត នឹងច្រែះស៊ីបំផ្លាញ ហើយចោរទំលុះប្លន់នោះឡើយ ត្រូវប្រមូលទ្រព្យសម្បត្តិ ទុកសំរាប់ខ្លួន នៅឯស្ថានសួគ៌វិញ ដែលជាកន្លែងគ្មានកន្លាត ឬច្រែះស៊ីបំផ្លាញឡើយ ក៏គ្មានចោរទំលុះ ឬប្លន់ផង ពីព្រោះសម្បត្តិទ្រព្យរបស់អ្នកស្ថិតនៅកន្លែងណា នោះចិត្តអ្នកក៏នឹងនៅកន្លែងនោះដែរ។
ឥឡូវនេះមិនមែនជាពេលវេលាសម្រាប់ការស្វែងរកផាសុកភាព និងឋានៈបណ្តោះអាសន្ននៅក្នុងលោកីយ៍ដែលនឹងកន្លងផុតទៅនោះទេ។ វាគឺជាពេលវេលាសម្រាប់ការប្រមូលផលផ្លែសម្រាប់ជីវិតអស់កល្បជានិច្ចវិញ។
អ្នកណាដែលច្រូត នោះបានរង្វាន់ ក៏ប្រមូលផលសំរាប់ជីវិតដ៏នៅអស់កល្បជានិច្ច ដើម្បីឲ្យអ្នកដែលព្រោះ នឹងអ្នកដែលច្រូត បានអរសប្បាយផងគ្នា
យ៉ូហាន ៦:២៧-២៩
កុំឲ្យខំប្រឹងឲ្យបានតែអាហារ ដែលតែងតែពុករលួយនោះឡើយ ចូរខំឲ្យបានអាហារ ដែលនៅស្ថិតស្ថេរ ដរាបដល់ជីវិតអស់កល្បជានិច្ចវិញ ជាអាហារដែលកូនមនុស្សនឹងឲ្យមកអ្នករាល់គ្នា ដ្បិតគឺកូនមនុស្សនេះហើយ ដែលព្រះវរបិតាដ៏ជាព្រះ ទ្រង់បានដៅចំណាំទុក ដូច្នេះ គេទូលសួរទ្រង់ថា ដែលនឹងធ្វើការរបស់ព្រះ តើត្រូវធ្វើដូចម្តេចខ្លះ ព្រះយេស៊ូវមានបន្ទូលឆ្លើយថា ឯការរបស់ព្រះ គឺឲ្យអ្នករាល់គ្នាបានជឿដល់អ្នកដែលព្រះបានចាត់ឲ្យមក
ពិភាក្សា៖ តើអ្នកគិតពីជីវិតអស់កល្បជានិច្ចញឹកញាប់ដែរឬទេ? ប្រសិនបើអ្នកគិត តើអ្នករស់នៅដោយរបៀបណាឥឡូវនេះសម្រាប់ជីវិងដ៏អស់កល្បជានិច្ច?
សង្ខេប
ជីវិតអស់កល្បជានិច្ចគឺលើសពីការដែលគ្រាន់តែរស់នៅជារៀងរហូត។ ជីវិតអស់កល្បជានិច្ចគឺជា ជីវិតនៅជាមួយនឹងព្រះជាម្ចាស់។ វាគឺជាការស្គាល់ទ្រង់ និងរីករាយទំនាក់ទំនងជាមួយទ្រង់។ ជីវិតអស់កល្បជានិច្ចគឺជាអំណោយទានរបស់ព្រះជាម្ចាស់ដែលយើងទទួលបានតាមរយៈព្រះយេស៊ូវគ្រីស្ទ។ វាចាប់ផ្តើមក្នុងពេលឥឡូវនេះក្នុងនាមជាមនុស្សដែលកើតជាថ្មី ហើយនឹងទទួលបានបទពិសោធន៍ពេញ លេញនៅស្ថានសួគ៌ និងផែនដីថ្មីជាកន្លែងដែលយើងនឹងរស់នៅជាមួយព្រះជាម្ចាស់ជារៀងរហូតតទៅ។
* កំណត់ចំណាំសម្រាប់គ្រូ ១
សូមស្រមៃថាមានម៉ាស៊ីនពេលវេលា ហើយអ្នកត្រឡប់ទៅកាន់សម័យអង្គរវិញ។ ចូរគិតថាតើជីវិតរបស់អ្នកនឹងមានភាពខុសប្លែកគ្នាយ៉ាងដូចម្តេច? អ្នកនឹងមិនលេងបាល់ទាត់ ឬជិះម៉ូតូ ឬផឹកកាហ្វេ ឬចូលទៅកាន់ហ្វេសប៊ុកទេ។ ជំនួសមកវិញ អ្នកនឹងានជីវភាពរស់នៅថ្មី និងខុសគ្នាទាំងស្រុង។ របៀបស្លៀកពាក់ ការដឹកជញ្ជូន លំនៅដ្ឋាន ការកំសាន្តរបស់អ្នក។ល។ នឹងមានលក្ខណៈខុសប្លែកគ្នា។ ហេតុអ្វី? ពីព្រោះអ្នករស់នៅក្នុងសម័យកាលមួយផ្សេងទៀត។ ចំណុចគឺ៖ សម័យកាលដែលយើងរស់នៅមានឥទ្ធិពលទៅលើរបៀបរស់នៅរបស់យើង។
* កំណត់ចំណាំសម្រាប់គ្រូ ២
ចូរគិតពីឪពុកម្នាក់ដែលឱ្យរថយន្តធ្វើជាអំណោយដល់កូនស្រីពេញវ័យរបស់គាត់។ កូនស្រីនិយាយថាអរគុណ ហើយក៏បើកបររថយន្តនោះចេញទៅ។ អំណោយ និងអ្នកផ្តល់ឱ្យគឺខុសពីគ្នា។ កូនស្រីអាចរីករាយជាមួយនឹងរថយន្តរបស់នាងរាប់ខែដោយមិនជួបជាមួយនឹងឪពុករបស់នាង។ មនុស្សមួយចំនួនចង់ឃើញជីវិតអស់កល្បជានិច្ចមានលក្ខណៈបែបនេះ។ ពួកគេចង់បានជីវិតអស់កល្បជានិច្ចគឺជាអំណោយដែលឪពុកផ្តល់ឱ្យយើង ហើយបន្ទាប់មកអនុញ្ញាតិឱ្យយើងរីករាយតាមរបៀបរបស់យើង (ឧទាហរណ៍៖ តាមរបៀបដែលយើងចង់បាន)។ ប៉ុន្តែនេះមិនមែនជាជីវិតអស់កល្បជានិច្ចនោះទេ។ អំណោយ និងអ្នកផ្តល់ឱ្យគឺតែមួយ។ ព្រះជាម្ចាស់គឺជាអំណោយដែលបានប្រទានឱ្យ។ ជីវិតអស់កល្បជានិច្ចមានន័យថាព្រះយេស៊ូវប្រទានអំណោយទានដល់យើងនៃទំនាក់ទំនងជាមួយនឹងព្រះវរបិតា!
