មេរៀនទី ៤: ការយកធ្វើជាកូនចិញ្ចឹម
សម្រង់សម្តីព្រះយេស៊ូវ៖ រីឯបាវបំរើ គេមិននៅជាប់ក្នុងផ្ទះជាដរាបទេ តែព្រះរាជបុត្រា ទ្រង់នៅជាប់អស់កល្បជានិច្ចវិញ (យ៉ូហាន ៨:៣៥)
នៅក្នុងការសិក្សារបស់យើងកន្លងមក យើងបានក្រឡេកមើលទៅកាន់ព្រះពរខាងវិញ្ញាណនៃ ការប្រោសលោះ។ យើងបានឃើញថាមនុស្សទាំងអស់បានក្លាយជាទាសករនៃអំពើបាប ហើយគ្មានវិធីណា ដែលយើងអាចគេចចេញពីរឿងនេះដោយខ្លួនឯងបានឡើយ។ បន្ទាប់មក អ្នកប្រោសលោះបានបង់ថ្លៃលោះ ដើម្បីទិញយកយើង។
បន្ទាប់មក យើងរកឃើញថាអ្នកប្រោសលោះរបស់យើងមានផែនការដ៏គួរឲ្យកត់សម្គាល់បំផុត សម្រាប់យើង។ ព្រះអង្គនាំយើងទៅកាន់វិមានរបស់ព្រះបិតាទ្រង់។ ព្រះបិតារបស់ទ្រង់គឺជាស្តេចដ៏ឧត្តម! វាពិតជាឯកសិទ្ធិខ្លាំងណាស់សម្រាប់យើងដែលក្លាយជាអ្នកបម្រើរបស់ទ្រង់។ ប៉ុន្តែ ព្រះបិតាមានព្រះពរ ដ៏ភ្ញាក់ផ្អើលសម្រាប់យើង។ ព្រះអង្គប្រកាសថាទ្រង់មានបំណងធ្វើឲ្យយើងក្លាយជាសមាជិក នៃគ្រួសាររបស់ទ្រង់! យើងនឹងក្លាយជាកូនប្រុសស្រីដ៏ជាទីស្រឡាញ់របស់ទ្រង់!
កាឡាទី ៤:៤-៥
តែលុះវេលាកំណត់បានមកដល់ នោះព្រះទ្រង់បានចាត់ព្រះរាជបុត្រាទ្រង់ឲ្យមកចាប់កំណើតនឹងស្ត្រី គឺកើតក្រោមអំណាចនៃក្រិត្យវិន័យ ដើម្បីនឹងលោះពួកអ្នកដែលនៅក្រោមក្រិត្យវិន័យ ប្រយោជន៍ឲ្យយើងបានទទួលសគុណ ទុកជាកូនចិញ្ចឹម
ខនេះប្រាប់យើងអំពីគោលបំណងនៃការប្រោសលោះរបស់យើង។ ព្រះជាម្ចាស់បានបញ្ជូនព្រះយេស៊ូវមក លោះយើង “ប្រយោជន៍ឲ្យយើងបានទទួលសគុណ ទុកជាកូនចិញ្ចឹម”។ ការប្រោសលោះគឺ គ្រាន់តែជា ជំហានដំបូង តែប៉ុណ្ណោះ។ គោលដៅគឺការយកធ្វើជាកូនចិញ្ចឹម។
តើអ្វីគឺជាការយកធ្វើជាកូនចិញ្ចឹម?
ការយកធ្វើជាកូនចិញ្ចឹម (υἱοθεσία) បានមកពីពាក្យជាភាសាក្រិចចំនួនពីរពាក្យ៖ υἱός ដែលមានន័យថា ‘កូនប្រុស’ និង τίθημι ដែលមានន័យថា ‘ដើម្បីដាក់’។ ដើម្បីសូមនរណាម្នាក់ធ្វើជាកូនចិញ្ចឹមគឺដើម្បីដាក់ ពួកគេ នៅក្នុងតួរនាទីជាកូនប្រុស។ វាគឺជាការយកនរណាម្នាក់ដែលស្ថិតនៅក្រៅពីគ្រួសាររបស់អ្នក ហើយដាក់ពួកគេចូលមកក្នុងគ្រួសាររបស់អ្នកធ្វើជាកូនប្រុស។
ការសុំកូនមកចិញ្ចឹមគឺជារឿងធម្មតានៅក្នុងពិភពរបស់ចក្រភពរ៉ូម។ ប៉ុន្តែ ជនជាតិរ៉ូម៉ាំងមិនយកកូនចិញ្ចឹម កុមារតូចៗនោះទេ។ ពួកគេទទួលចិញ្ចឹមមនុស្សពេញវ័យវិញ - ជាទូទៅភាគច្រើនបំផុតគឺជាមនុស្សប្រុស មានអាយុ ២០ឆ្នាំ ឬច្រើនជាងនេះ (ហេតុនេះហើយបានជាពាក្យជាភាសាក្រិចសម្រាប់ការសុំធ្វើជា កូនចិញ្ចឹមសំដៅ ទៅលើកូនប្រុស)។ ពួកគេត្រូវបានយកមកចិញ្ចឹមដោយគ្រួសារអ្នកមានដែលមាន ទ្រព្យសម្បត្តិ។ គោលបំណងនៃការយកធ្វើជា កូនចិញ្ចឹមគឺជាការនាំយកអ្នកទទួលមរតកចូលមកក្នុងគ្រួសារ ដែលនៅថ្ងៃមួយទទួលមរតកនៃទ្រព្យសម្បត្តិ។
មនុស្សដែលត្រូវបានយកមកចិញ្ចឹមគឺមិនមែនជាកុមារកំព្រាទេ។ ជាទូទៅពួកគេមានឪពុកម្តាយរួចហើយ ហើយការទទួលធ្ចើជាកូនចិញ្ចឹមរបស់ពួកគេមិនមានន័យថា ពួកគេត្រូវបោះបង់ចោលគ្រួសារដើមរបស់ ពួកគេទេ។ គ្រួសារដើមរបស់ពួកគេរីករាយជាមួយនឹងជោគជ័យមួយចំនួនរបស់កូនប្រុសពួកគេដោយសារ គេបន្តមានទំនាក់ទំនងជាមួយគាត់។ យ៉ាងណាក្តី កូនប្រុសដែលត្រូវបានយកមកចិញ្ចឹម នឹងត្រូវទទួលបាន ឈ្មោះឪពុកថ្មីរបស់គេ។ គាត់នឹងទទួលបានសិទ្ធិ និងឯកសិទ្ធិទាំងអស់នៃគ្រួសារដែលទទួលយកគាត់ មកចិញ្ចឹម។ ជាការពិតគាត់គឺជាអ្នកទទួលមរតកគ្រប់យ៉ាងដែលគ្រួសារកាន់កាប់។ លើសពីនេះ បំណុលពីមុនទាំងអស់ របស់គាត់គឺត្រូវបានលុបចោល។ បទឧក្រិដទាំងឡាយណាដែលគាត់បានប្រព្រឹត្តិ ត្រូវបានលុបចោលស្របច្បាប់។ ហេតុដូច្នេះដើម្បីបានធ្វើជាកូនចិញ្ចឹមគឺត្រូវមានឈ្មោះថ្មី អត្តសញ្ញាណថ្មី និងក្លាយទៅជាមនុស្សថ្មីម្នាក់នៅក្នុងក្រសែភ្នែករបស់ច្បាប់។
យោងតាមច្បាប់របស់ចក្រភពរ៉ូម ឪពុកមិនអាចលុបចោលកូនចិញ្ចឹមបានទេ។ នៅពេលដែលមនុស្សម្នាក់ត្រូវបានយកមកធ្វើជាកូនចិញ្ចឹមហើយ វាមានលក្ខណៈអចិន្ត្រៃយ៍។ ការនេះបង្ហាញយើងពីសុវត្ថិភាពដែលការយកមកធ្វើជាកូនចិញ្ចឹមផ្តល់ឲ្យ។ អស់អ្នកដែលត្រូវបានយកមកធ្វើជាកូនចិញ្ចឹមក្លាយជាសមាជិកអចិន្ត្រៃយ៍របស់គ្រួសារ។
ដោយសង្ខេប មានលទ្ធផលចំនួនបីសម្រាប់ការយកធ្វើជាកូនចិញ្ចឹមរបស់កូនប្រុស៖
១) គាត់មានឪពុកថ្មីដែលទទួលយកមកធ្វើជាកូនចិញ្ចឹម និងដាក់ឈ្មោះឲ្យគាត់។
២) គាត់គឺជាអ្នកស្នងមរតកចំពោះទ្រព្យសម្បត្តិឪពុកថ្មីរបស់គាត់។
៣) គាត់មានអត្តសញ្ញាណថ្មី ហើយអតីតកាលរបស់គាត់ត្រូវបានលុបចោលស្របតាមផ្លូវច្បាប់។
សូមយើងក្រឡេកមើលទៅកាន់អត្ថប្រយោជន៍ទាំងនេះ ដែលកូនចិញ្ចឹមរបស់ព្រះជាម្ចាស់ទទួលបាន។
(១) ឪពុកថ្មី
ឯកសិទ្ធិដំបូងបង្អស់នៃការក្លាយជាកូនចិញ្ចឹមគឺថាអ្នកដែលត្រូវបានក្លាយទៅជាកូនចិញ្ចឹមមានឪពុកថ្មី។ ដូចគ្នានេះដែរនៅពេលដែលព្រះជាម្ចាស់ទទួលយកយើងធ្វើជាកូនចិញ្ចឹម វាមានន័យថាយើងមានបិតាថ្មី។
២ កូរិនថូស ៦:១៨
អញនឹងធ្វើជាឪពុកដល់ឯងរាល់គ្នា ហើយឯងរាល់គ្នានឹងធ្វើជាកូនប្រុសកូនស្រីដល់អញ នេះជាព្រះបន្ទូលនៃព្រះអម្ចាស់ដ៏មានព្រះចេស្តាបំផុត»។
ម៉ាថាយ ៦:៩
ដូច្នេះ ចូរអធិស្ឋានបែបយ៉ាងនេះវិញថា ឱព្រះវរបិតានៃយើងខ្ញុំ ដែលគង់នៅស្ថានសួគ៌អើយ សូមឲ្យព្រះនាមទ្រង់បានបរិសុទ្ធ
យ៉ូហាន ២០:១៧
ព្រះយេស៊ូវមានបន្ទូលទៅនាងថា កុំពាល់ខ្ញុំ ព្រោះខ្ញុំមិនទាន់ឡើងទៅឯព្រះវរបិតាខ្ញុំនៅឡើយ ចូរនាងទៅឯពួកបងប្អូនខ្ញុំប្រាប់គេថា ខ្ញុំឡើងទៅឯព្រះវរបិតាខ្ញុំ ជាព្រះវរបិតានៃអ្នករាល់គ្នា គឺជាព្រះនៃខ្ញុំ ហើយជាព្រះនៃអ្នករាល់គ្នាដែរ
អ្នកមានបិតាដែលគង់នៅស្ថានសួគ៌។ បិតារបស់អ្នកគឺជាព្រះអទិករ និងជាអង្គបុគ្គលទ្រទ្រង់ ពិភពលោកនេះ។ បិតារបស់អ្នកមានគ្រប់ទាំងសិទ្ធិអំណាច ព្រះចេស្តា ប្រាជ្ញា និងចំណេះដឹង។ បិតារបស់អ្នកមានបន្ទូល ហើយតាមរយៈការបង្គាប់បញ្ជារបស់ទ្រង់មានភព ១០០ពាន់លាន ត្រូវបានបង្កើតឡើង។ បិតារបស់អ្នកស្រឡាញ់អ្នក ហើយបានបង្កើតផែនការសម្រាប់អ្នកឲ្យមាន ភាពរីករាយអស់កល្បជានិច្ច!
ពិភាក្សាជាមួយដៃគូ៖ តើអ្វីជាព្រះពរនៃការមានព្រះជាម្ចាស់ធ្វើជាព្រះបិតារបស់អ្នកមានអត្ថន័យចំពោះអ្នក?
ព្រះយេស៊ូវមានបន្ទូលទៅកាន់ពួកសិស្សរបស់ទ្រង់ (ដែលសុទ្ធតែជាជនជាតិយូដា) ថាព្រះជាម្ចាស់គឺជា ព្រះបិតារបស់ពួកគេដើម្បីជួយគេឲ្យដល់ដឹងពីទំនាក់ទំនងថ្មីដែលពួកគេមានជាមួយព្រះជាម្ចាស់ តាមរយៈព្រះយេស៊ូវ។ វប្បធម៌ផ្សេងៗគ្នាមានគំនិតផ្សេងៗគ្នាអំពីតួរនាទីរបស់ឪពុក ដូច្នេះ វាមាន អត្ថប្រយោជន៍ក្នុងការស្វែងយល់អំពីគំនិតរបស់ជនជាតិយូដាសម្រាប់ភាពជាឪពុកដើម្បីឲ្យបានដឹងពីអ្វីដែលព្រះយេស៊ូវកំពុងបង្រៀនដល់ពួកសិស្សរបស់ព្រះអង្គ។ សម្រាប់ជនជាតិយូដា ព្រះបិតាគឺជាអ្នកដឹកនាំ នៅក្នុងគ្រួសារ។ នេះមានន័យថា៖
-
ឪពុកជាអ្នកដាក់ឈ្មោះឲ្យកូនប្រុសកូនស្រីរបស់គាត់។ ឈ្មោះរបស់ជនជាតិយូដាតែងតែត្រូវបានជ្រើសរើសដោយឪពុករបស់ពួកគេ។ លើសពីនេះ ជនជាតិយូដាមិនមាននាមត្រកូលនោះទេ។ ជំនួសមកវិញ ពួកគេមានពាក្យថា ‘បា’ ជាភាសាអារ៉ាមេក (ដែលមានន័យថា’កូនប្រុសរបស់’) ឬ ‘បាតា’ (ដែលមានន័យថា ជា’កូនស្រីរបស់’) ហើយបន្ទាប់មកគឺឈ្មោះឪពុករបស់ពួកគេ។ ឧទាហរណ៍ ស៊ីម៉ូន កូនយ៉ូណាស។
-
ឪពុកជាអ្នកកំណត់កន្លែងដែលកូនប្រុសកូនស្រីរបស់គាត់រស់នៅ។ នៅក្នុងសម័យសញ្ញាចាស់ ទឹកដីសន្យាត្រូវបានបែងចែកជាតំបន់ទៅតាមកុលសម្ព័ន្ធ។ ជនជាតិយូដាជាកម្មសិទ្ធរបស់ កុលសម្ព័ននៃឪពុករបស់ពួកគេ ហើយនេះវាកំណត់ពីតំបន់ដែលពួកគេត្រូវរស់នៅ។ ម៉្យាងទៀត កូនប្រុសកូនស្រីរស់នៅក្នុងផ្ទះឪពុករបស់ពួកគេរហូតដល់ពេលគេរៀបការរួច បើទោះបីជាវាត្រូវចំណាយពេលវេលាយូរប៉ុណ្ណាដើម្បីឲ្យការនេះកើតឡើងក៏ដោយ។ ពួកគេរស់នៅដោយស្ថិតនៅក្រោមសិទ្ធិអំណាច និងការការពាររបស់គាត់។
-
ឪពុកជាអ្នកផ្គត់ផ្គង់ដល់សមាជិកគ្រួសាររបស់គាត់ទាំងអស់។ ឪពុកជនជាតិយូដាគឺជាអ្នកផ្គត់ផ្គង់ដល់គ្រួសារ ហើយពួកគេទុកចិត្តគាត់សម្រាប់រឿងគ្រប់យ៉ាងដែលពួកគេត្រូវការ។
-
ឪពុកជាអ្នកកំណត់អាជីពកូនប្រុសរបស់គាត់។ អាជីពរបស់កូនប្រុសជនជាតិយូដាគឺដូចគ្នានឹងអាជីពរបស់ឪពុកគាត់ដែរ។ ឧទាហរណ៍ យ៉ូសេបគឺជាជាងឈើ ដូច្នេះព្រះយេស៊ូវបានក្លាយទៅជាជាងឈើដែរ សេបេដេមានអាជីវកម្មខាងនេសាទ ដូច្នេះយ៉ាកុប និងយ៉ូហានក៏ជាអ្នកនេសាទដែរ។
-
ឪពុកជាអ្នកសម្រេចចិត្តថាតើនរណាជាមនុស្សដែលកូនប្រុសកូនស្រីរបស់គាត់ត្រូវរៀបការជាមួយ។ អាពាហ៍ពិពាហ៍ត្រូវបានរៀបចំឡើងពីឪពុក។ ជាទូទៅឪពុកគឺជាអ្នកសម្រេចចិត្តលើរឿងនេះនៅពេលកូនៗរបស់ពួកគេនៅក្មេងនៅឡើយ។
-
ឪពុកឲ្យពរទៅកាន់កូនៗរបស់គាត់ ដែលកំណត់អំពីដំណើរជីវិតរបស់ពួកគេ (ឧទាហរណ៍ យ៉ាកុប និងកូនៗរបស់គាត់នៅក្នុង លោកុប្បត្តិ ៤៩ ឬអ៊ីសាក់ជាមួយយ៉ាកុប និងអេសាវនៅក្នុង លោកុប្បត្តិ ២៧)។ ពាក្យសម្តីរបស់ឪពុកមានសិទ្ធិអំណាច ហើយគឺជាទំនាយ និងពរដែលមានផលប៉ះពាល់ យ៉ាងពិតប្រាកដទៅលើអនាគតកូនៗរបស់ពួកគេ។
ដូច្នេះ នៅពេលដែលព្រះយេស៊ូវមានបន្ទូលប្រាប់សិស្សរបស់ទ្រង់ឲ្យគិតពីព្រះជាម្ចាស់ថាជាព្រះបិតារបស់ ពួកគេ ពួកគេយល់ថាការនេះមានន័យថា ជីវិតរបស់ពួកគេនឹងពឹងផ្អែកទាំងស្រុងលើព្រះ ដែលទទួលខុសត្រូវគ្រប់ផ្នែកនៃជីវិតរបស់ពួកគេ ៖ ឈ្មោះរបស់ពួកគេ ការងាររបស់ពួកគេ ផ្ទះរបស់ពួកគេ អាពាហ៍ពិពាហ៍របស់ពួកគេ អនាគតរបស់ពួកគេ - ជីវិតទាំងស្រុងរបស់ពួកគេនឹងត្រូវបានកំណត់ដោយ និងពឹងផ្អែកលើព្រះជាម្ចាស់។ នៅពេលព្រះជាម្ចាស់យកអ្នកធ្វើជាកូនចិញ្ចឹម វាមានន័យថាទ្រង់ក្លាយទៅជាមានសិទ្ធិអំណាចដ៏អស្ចារ្យបំផុត នៅក្នុងជីវិតរបស់អ្នក ហើយនឹងធ្វើកិច្ចការគ្រប់ទាំងអស់ដែលព្រះអង្គមានផែនការសម្រាប់អ្នក។
ពិភាក្សា៖ តើអ្វីគឺជាផលប៉ះពាល់ចំពោះជីវិតរបស់អ្នកដែលថាព្រះជាម្ចាស់គឺជាព្រះបិតារបស់អ្នក?
(២) អ្នកស្នងមរតករបស់ព្រះជាម្ចាស់
ការទទួលយកធ្វើជាកូនចិញ្ចឹមរបស់ជនជាតិរ៉ូម៉ាំងគឺសម្រាប់គោលបំណងនៃការស្នងមរតក។ ដូចគ្នានេះដែរ កូនដែលយកមកធ្វើជាកូនចិញ្ចឹមរបស់ព្រះជាម្ចាស់គឺជាអ្នកស្នងមរតកដ៏អស្ចារ្យ។
ហើយដោយព្រោះអ្នករាល់គ្នាជាកូន បានជាព្រះទ្រង់ចាត់ព្រះវិញ្ញាណនៃព្រះរាជបុត្រាទ្រង់ ឲ្យមកក្នុងចិត្តអ្នករាល់គ្នា ឲ្យបន្លឺឡើងថា អ័ប្បា ព្រះវរបិតាអើយ ដូច្នេះ អ្នករាល់គ្នាមិនមែនជាបាវបំរើទៀតទេ គឺជាកូនវិញ ហើយបើជាកូននោះនឹងបានមរដកនៃព្រះ ដោយសារព្រះគ្រីស្ទដែរ
ដោយសារតែការយកធ្វើជាកូនចិញ្ចឹមរបស់យើង យើងលែងជាទាសករនៃអំពើបាបទៀតហើយ យើងគឺជាអ្នកស្នងមរតករបស់ព្រះជាម្ចាស់វិញ!
ព្រះយេស៊ូវគឺជាអ្នកស្នងមរតកគ្រប់ទាំងអស់។
នៅជាន់ក្រោយបង្អស់នេះ ទ្រង់បានមានបន្ទូលនឹងយើងរាល់គ្នា ដោយសារព្រះរាជបុត្រាវិញ ដែលទ្រង់បានដំរូវឲ្យបានគ្រងរបស់ទាំងអស់ ទុកជាមរដក ព្រមទាំងបង្កើតលោកីយ ដោយសារព្រះរាជបុត្រានោះដែរ
យ៉ូហាន ៣:៣៥
ឯព្រះវរបិតា ទ្រង់ស្រឡាញ់ព្រះរាជបុត្រា ហើយបានប្រគល់គ្រប់ទាំងអស់ មកក្នុងព្រះហស្តទ្រង់
កូល៉ុស ១:១៦
ដ្បិតគឺទ្រង់ហើយ ដែលបង្កើតគ្រប់ទាំងអស់ ទាំងរបស់នៅស្ថានសួគ៌ នឹងនៅផែនដី ទាំងរបស់ដែលមើលឃើញ ហើយដែលមើលមិនឃើញផង ទោះបើជារាជ្យ ឬអំណាចជាព្រះអម្ចាស់ ឬអំណាចគ្រប់គ្រង ឬអំណាចណាក៏ដោយ នោះសុទ្ធតែកើតមកដោយសារទ្រង់ ហើយសំរាប់ទ្រង់ទាំងអស់ផង
ព្រះយេស៊ូវគឺជាអ្នកស្នងមរតកគ្រប់ទាំងអស់។ របស់ទាំងអស់ត្រូវបានបង្កើតឡើងសម្រាប់ព្រះអង្គ។ ព្រះជាម្ចាស់បានប្រគល់អ្វីៗទាំងអស់មកក្នុងព្រះហស្តរបស់ទ្រង់។ ឥឡូវនេះ ចូរក្រឡេកមើលទៅកាន់សេចក្តីពិតដ៏គួរឲ្យកត់សម្គាល់បន្ទាប់នេះ។
យើងគឺជាអ្នកស្នងមរតកជាមួយនឹងព្ព្រះគ្រីស្ទដែរ!!!!
រ៉ូម ៨:១៦-១៧
ហើយព្រះវិញ្ញាណទ្រង់ក៏ធ្វើបន្ទាល់នឹងវិញ្ញាណយើងថា យើងជាកូនរបស់ព្រះ បើសិនណាជាកូនព្រះហើយ នោះយើងក៏បានគ្រងមរដកដែរ គឺជាអ្នកគ្រងមរដកនៃព្រះជាមួយនឹងព្រះគ្រីស្ទផង ឲ្យតែយើងទទួលរងទុក្ខជាមួយនឹងទ្រង់ចុះ ដើម្បីឲ្យបានដំកើងឡើងជាមួយនឹងទ្រង់ដែរ។
គ្រប់ទាំងអស់ត្រូវបានបង្កើតឡើងសម្រាប់ព្រះយេស៊ូវ។ ព្រះជាម្ចាស់បានប្រគល់អ្វីៗគ្រប់យ៉ាងទៅក្នុង ព្រះហស្តរបស់ព្រះយេស៊ូវ។ ឥឡូវនេះយើងគឺជាអ្នកស្នងមរតកជាមួយនឹងព្រះយេស៊ូវដែរ។ ហេតុដូច្នេះ គ្រប់ទាំងអស់គឺជារបស់យើង! អ្នកជឿទាំងអស់ចែករំលែកព្រះពរដ៏មានតម្លៃ និងសំខាន់បំផុតរបស់ ព្រះជាម្ចាស់ស្មើៗគ្នា - សម្រាប់ការសង្គ្រោះ កំណើតថ្មី ការប្រោសលោះ ការយកធ្វើជាកូនចិញ្ចឹម ដង្វាយធួន ការអត់ទោស ការរាប់ថាសុចរិត ការញែកជាបរិសុទ្ធ ការរស់ឡើងវិញ ការថ្វាយសិរីល្អ និងជីវិតអស់កល្ប!
១ កូរិនថូស ៣:២១-២៣
ដូច្នេះ កុំឲ្យអ្នកណាអួតពីមនុស្សឡើយ ដ្បិតគ្រប់ទាំងអស់ជារបស់ផងអ្នករាល់គ្នា ទោះទាំងប៉ុល ឬអ័ប៉ុឡូស កេផាស លោកីយ ជីវិត សេចក្ដីស្លាប់ របស់នៅជំនាន់សព្វថ្ងៃ ឬទៅមុខក្តី នោះសុទ្ធតែជារបស់ផងអ្នករាល់គ្នាទាំងអស់ តែឯអ្នករាល់គ្នាជារបស់ផងព្រះគ្រីស្ទវិញ ហើយព្រះគ្រីស្ទ ទ្រង់ជារបស់ព្រះ។
មរតករបស់យើងគឺស្ថិតនៅជារៀងរហូត៖ វាមិនចេះពុករលួយ ក៏ឥតសៅហ្មង ហើយមិនដែលស្រពោនឡើយ!
១ ពេត្រុស ១:៣-៥
សូមសរសើរដល់ព្រះដ៏ជាព្រះវរបិតានៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា ដែលទ្រង់បានបង្កើតយើងឡើងជាថ្មី តាមសេចក្ដីមេត្តាករុណាដ៏ធំរបស់ទ្រង់ ដើម្បីឲ្យយើងរាល់គ្នាបានសេចក្ដីសង្ឃឹមដ៏រស់ ដោយសារព្រះយេស៊ូវគ្រីស្ទ ទ្រង់រស់ពីស្លាប់ឡើងវិញ ហើយឲ្យយើងបានមរដក ដែលមិនចេះពុករលួយ ក៏ឥតសៅហ្មង ហើយមិនដែលស្រពោនឡើយ ជាមរដក ដែលបំរុងទុកឲ្យយើងរាល់គ្នានៅស្ថានសួគ៌ គឺឲ្យយើងរាល់គ្នា ដែលព្រះចេស្តានៃព្រះកំពុងតែថែរក្សា ដោយសារសេចក្ដីជំនឿ សំរាប់ឲ្យបានសេចក្ដីសង្គ្រោះ ដែលប្រុងប្រៀបនឹងសំដែងមកនៅជាន់ក្រោយបង្អស់នោះ
មរតករបស់យើងត្រូវបានបំរុងទុកឲ្យយើងរាល់គ្នានៅស្ថានសួគ៌។
យើងទទួលមរតកនៃជីវិតអស់កល្បនៅក្នុងនគរព្រះ។
ឯអស់អ្នកណាដែលលះចោលផ្ទះសំបែង ឬបងប្អូនប្រុសស្រី ឪពុកម្តាយ ប្រពន្ធកូន ឬស្រែចំការ ដោយយល់ដល់ឈ្មោះខ្ញុំ នោះនឹងបានជា១រយភាគឡើងវិញ ហើយនឹងបានគ្រងជីវិតអស់កល្បជានិច្ច ទុកជាមរដកដែរ
ដើម្បីកាលណាយើងបានរាប់ជាសុចរិត ដោយសារព្រះគុណទ្រង់ នោះឲ្យយើងបានត្រឡប់ជាអ្នកគ្រងមរដក តាមសេចក្ដីសង្ឃឹមដល់ជីវិតដ៏នៅអស់កល្បជានិច្ច
ការរស់នៅអស់កល្បជានិច្ចនៅក្នុងនគរព្រះគឺជាមរតកសម្រាប់កូនរបស់ព្រះទាំងអស់។ សូមកត់សម្គាល់ថា ជីវិតអស់កល្បជានិច្ចមិនអាចរកបាននោះទេ វាអាចទទួលបានតែតាមរយៈមរតកតែប៉ុណ្ណោះ។ វាគឺជាអំណោយទានមកពីព្រះជាម្ចាស់ដែលយើងទទួលបានតាមរយៈការដើរតាមព្រះយេស៊ូវ។
ម៉ាថាយ ២៥:៣៤
នោះលោកដ៏ជាស្តេច នឹងមានបន្ទូលទៅពួកអ្នកដែលនៅខាងស្តាំថា ឱពួកអ្នកដែលព្រះវរបិតាយើងបានប្រទានពរអើយ ចូរមកទទួលមរដកចុះ គឺជានគរដែលបានរៀបចំទុកសំរាប់អ្នករាល់គ្នា តាំងពីកំណើតលោកីយមក
ចូរស្តាប់ចុះ បងប្អូនស្ងួនភ្ងាអើយ តើព្រះមិនបានរើសពួកអ្នកក្រនៅលោកីយនេះ ដែលជាអ្នកមានខាងសេចក្ដីជំនឿ ហើយជាអ្នកគ្រងមរដកក្នុងនគរ ដែលទ្រង់បានសន្យាទុក ឲ្យពួកអ្នកដែលស្រឡាញ់ទ្រង់ទេឬអី
ព្រមទាំងអរព្រះគុណ ដល់ព្រះវរបិតាដែលទ្រង់បានប្រោស ឲ្យយើងបានគួរនឹងទទួលចំណែកកេរ្ដិ៍អាករ ក្នុងពួកបរិសុទ្ធនៅទីភ្លឺផង
លូកា ១២:៣២
កុំឲ្យខ្លាច ហ្វូងតូចអើយ ព្រោះព្រះវរបិតានៃអ្នករាល់គ្នា ទ្រង់សព្វព្រះហឫទ័យនឹងប្រទាននគរមកអ្នករាល់គ្នាពិត
សូមកត់សម្គាល់ថា អ្នកស្នងមរតកនៃព្រះរាជ្យគឺត្រូវបានប្រទានពរតាមរយៈព្រះបិតា ត្រូវបានជ្រើសរើសដោយព្រះបិតា មានលក្ខណៈសម្បត្តិគ្រប់គ្រាន់ដោយព្រះបិតា ហើយប្រទានព្រះរាជ្យតាមរយៈព្រះបិតា។ បន្ទាប់ពីអានចប់ យើងអាចចូលរួមជាមួយស្តេចដាវីឌដោយថា៖ ខ្សែរង្វាស់បានធ្លាក់នៅទីកន្លែងគាប់ចិត្តឲ្យទូលបង្គំ អើ ទូលបង្គំបានទទួលមរដកល្អណាស់ (ទំនុកដំកើង ១៦:៦)
ពិភាក្សា៖ តើអ្វីជាសារៈសំខាន់នៃការពិតដែលថាជីវិតអស់កល្បនៅក្នុងនគរព្រះគឺជាមរតក (មិនអាចរកបាន)ដោយមនុស្ស?
ព្រះវិញ្ញាណបរិសុទ្ធនៅក្នុងយើង គឺជាការធានាដែលយើងមានជាមរតក។
អេភេសូរ ១:១៣-១៤
ឯអ្នករាល់គ្នា ក៏បានឮព្រះបន្ទូលនៃសេចក្ដីពិត គឺជាដំណឹងល្អពីសេចក្ដីសង្គ្រោះរបស់អ្នករាល់គ្នាដោយសារទ្រង់ដែរ ហើយកាលអ្នករាល់គ្នាបានជឿហើយ នោះទ្រង់ក៏ដៅចំណាំដោយព្រះវិញ្ញាណបរិសុទ្ធ ដែលបានសន្យា ព្រះវិញ្ញាណនោះទ្រង់ជាទីបញ្ចាំចិត្ត ពីដំណើរកេរ្តិ៍អាកររបស់យើងរាល់គ្នា ទាល់តែបានលោះរបស់កំណាន់ ដែលទ្រង់បានទិញទុកឲ្យយើងនោះ សំរាប់ជាសេចក្ដីសរសើរដល់សិរីល្អនៃទ្រង់។
ព្រះវិញ្ញាណបរិសុទ្ធនៅក្នុងអ្នកគឺជាការធានាដែលអ្នកមានជាមរតក។ ពាក្យសម្រាប់ពាក្យថា “ទីបញ្ចាំចិត” (ἀρραβὼν) គឺជាពាក្យដែលអ្នកជួញដូរបានប្រើប្រាស់នៅពេលដែលអ្នកទិញផ្តល់ឲ្យផ្នែកនៃតម្លៃ ជាការសន្យា។ នៅពេលដែលការសន្យាត្រូវបានទទួលយក វាបានបង្កើតនូវកិច្ចសន្យាស្របច្បាប់មួយ ដែលបានធានាថាប្រតិបត្តិការនឹងត្រូវបានចប់សព្វគ្រប់ក្នុងពេលអនាគត។ នេះគឺជាអ្វីដែល ព្រះវិញ្ញាណបរិសុទ្ធគឺសម្រាប់អ្នកជឿ - ការសន្យាដែលព្រះជាម្ចាស់ផ្តល់ឲ្យយើងឥឡូវនេះ គឺសម្រាប់ បញ្ជាក់ពីមរតកអនាគតរបស់យើង។
(៣) អ្នកជាមនុស្សថ្មី
នៅពេលដែលមនុស្សម្នាក់ត្រូវបានយកមកធ្វើជាកូនចិញ្ចឹម គាត់គឺជាមនុស្សថ្មីម្នាក់ ហើយមានជីវិតថ្មី។ នេះគឺជាការពិតសម្រាប់យើងក្នុងនាមជាកូនចិញ្ចឹមប្រុសស្រីរបស់ព្រះជាម្ចាស់។ ជាលទ្ធផលនៃការយកធ្វើជាកូនចិញ្ចឹមរបស់យើង យើងមាន៖
១, សញ្ជាតិថ្មី
ក្នុងនាមជាកូនរបស់ព្រះជាម្ចាស់ អ្នកគឺជាពលរដ្ឋនៃស្រុកកំណើតរបស់ទ្រង់គឺ ស្ថានសួគ៌។
ភីលីព ៣:២០
ឯយើងរាល់គ្នា យើងជាសាសន៍ស្ថានសួគ៌វិញ ក៏នៅចាំព្រះអម្ចាស់យេស៊ូវគ្រីស្ទ ជាព្រះអង្គសង្គ្រោះ ទ្រង់យាងមកពីស្ថាននោះឯង
“យើងជាសាសន៍ស្ថានសួគ៌” ប្រាប់យើងថាស្ថានសួគ៌គឺជាកន្លែងដែលយើងគឺជាកម្មសិទ្ធិ - វាគឺជាស្រុកកំណើតរបស់យើងដែលព្រះបិតារបស់យើងស្ថិតនៅ ជាកន្លែងដែលឈ្មោះរបស់យើងត្រូវបានកត់ត្រាទុក (លូកា ១០:២០) និងជាកន្លែងដែលមរតករបស់យើងកំពុងតែរង់ចាំយើង (១ ពេត្រុស ១:៤)។
២) លំនៅដ្ឋានថ្មី
នៅស្ថានសួគ៌ អ្នកមានផ្ទះដែលព្រះយេស៊ូវបានរៀបចំសម្រាប់អ្នករួចហើយ។ នេះនឹងក្លាយទៅជាផ្ទះរបស់អ្នកជារៀងរហូត។
យ៉ូហាន ១៤:១-៣
កុំឲ្យចិត្តអ្នករាល់គ្នាថប់បារម្ភឡើយ អ្នករាល់គ្នាជឿដល់ព្រះហើយ ចូរជឿដល់ខ្ញុំដែរ នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន ពុំនោះ ខ្ញុំបានប្រាប់អ្នករាល់គ្នាហើយ ខ្ញុំទៅរៀបកន្លែងឲ្យអ្នករាល់គ្នា បើខ្ញុំទៅរៀបកន្លែងឲ្យអ្នករាល់គ្នា នោះខ្ញុំនឹងត្រឡប់មកវិញ នឹងទទួលអ្នករាល់គ្នាទៅឯខ្ញុំ ប្រយោជន៍ឲ្យអ្នករាល់គ្នាបាននៅកន្លែងដែលខ្ញុំនៅនោះដែរ
៣) លក្ខណៈថ្មី
កូនប្រុសចិញ្ចឹមមានប្រវត្តិនៃបទឧក្រដ្ឋពីអតីតកាលរបស់អ្នកលុបចោលស្របច្បាប់រួចហើយ។ ដូចគ្នានេះដែរ ក្នុងនាមជាកូនរបស់ព្រះជាម្ចាស់ អំពើបាបពីអតីតកាលរបស់យើងទាំងអស់ត្រូវបានលុបចេញ ហើយយើង មានសេរីភាពត្រូវបានដោះលែងចេញពីកំហុសរបស់វា។ យើងនឹងក្រឡេកមើលរឿងនេះនៅក្នុងមេរៀននៃ ការអត់ឱនទោស។
ឥឡូវនេះដែលយើងត្រូវបានរំដោះឲ្យមានសេរីភាពចេញពីអំពើបាបហើយ យើងអាចចាប់ផ្តើមរស់នៅក្នុង ជីវិតប្រកបដោយភាពសុចរិត។ យើងបានក្លាយជាសមាជិកគ្រួសាររបស់ព្រះជាម្ចាស់ ហើយលក្ខណៈរបស់ យើងគួរឆ្លុះបញ្ចាំងពីព្រះជាម្ចាស់កាន់តែកើនឡើង។
ម៉ាថាយ ៥:៤៤-៤៨
ប៉ុន្តែខ្ញុំប្រាប់ថា ត្រូវស្រឡាញ់ពួកខ្មាំងសត្រូវ ត្រូវឲ្យពរដល់អ្នកណាដែលប្រទេចផ្តាសា ត្រូវប្រព្រឹត្តល្អនឹងអ្នកណាដែលស្អប់អ្នករាល់គ្នា ហើយត្រូវអធិស្ឋានឲ្យអ្នកណាដែលធ្វើទុក្ខបៀតបៀនដល់អ្នករាល់គ្នាវិញ ដើម្បីឲ្យបានធ្វើជាកូនរបស់ព្រះវរបិតានៃអ្នករាល់គ្នា ដែលគង់នៅស្ថានសួគ៌ ព្រោះទ្រង់ធ្វើឲ្យថ្ងៃរបស់ទ្រង់រះឡើង បំភ្លឺទាំងមនុស្សអាក្រក់នឹងមនុស្សល្អ ហើយទ្រង់បង្អុរឲ្យភ្លៀងធ្លាក់មក លើទាំងមនុស្សសុចរិត នឹងមនុស្សទុច្ចរិតផង ដ្បិតបើអ្នករាល់គ្នាស្រឡាញ់តែអស់អ្នកណា ដែលស្រឡាញ់ដល់ខ្លួន នោះតើបានបំណាច់អ្វី ឯពួកអ្នកយកពន្ធ តើគេមិនប្រព្រឹត្តដូច្នោះដែរទេឬអី ហើយបើអ្នករាល់គ្នាគំនាប់តែបងប្អូនអ្នកប៉ុណ្ណោះ នោះតើបានធ្វើអ្វីប្លែកពីគេ ឯពួកសាសន៍ដទៃ តើមិនប្រព្រឹត្តដូចគ្នាទេឬអី ដូច្នេះ ចូរឲ្យអ្នករាល់គ្នាបានគ្រប់លក្ខណ៍ ដូចព្រះវរបិតានៃអ្នក ដែលគង់នៅស្ថានសួគ៌ ទ្រង់គ្រប់លក្ខណ៍ដែរ។
ព្រះយេស៊ូវសង្ខេបគោលដៅនៃជីវិតរបស់គ្រីស្ទាន: ជាការឆ្លុះបញ្ចាំងពីលក្ខណៈនៃព្រះដ៏ជា ព្រះវរបិតានៃយើង។ ពាក្យដែលបកប្រែថា “គ្រប់លក្ខណ៍” (τελειο) មានន័យថា “ចាស់ទុំ” ឬ “ពេញវ័យ” ឬ “ពេញលេញ” ដែលត្រូវបានប្រើសម្រាប់ការរៀបរាប់ពីមនុស្សចាស់ធៀបនឹងកូនក្មេង (ដែលត្រូវបានប្រើស សម្រាប់ភាពធំដឹងក្តីខាងវិញ្ញាណ ១ កូរិនថូស ២:៦, ១៤:២០; ភីលីព ៣:១៥) ។ ពាក្យនេះ មកពី ពាក្យថា τελος មានន័យថា “ចុងបញ្ចប់” ឬ “គោលដៅ”។ វាមិនមែនជាអ្វីមួយដែលយើងអាច សម្រេចបានភ្លាមៗនោះឡើយ។ ការនេះទាមទារអោយយើងបានឆ្លងកាត់ដំណាក់កាលសំខាន់ៗ ជាច្រើនដើម្បីអោយ បានដល់គោលដៅចុងបំផុត។ គោលដៅនោះគឺជាសេចក្តីគ្រប់លក្ខណ៍នៃព្រះវរបិតា ដែលគង់នៅស្ថានសួគ៌។ យើងប្រៀបបានដូចជាកូនក្មេងតូច ដែលកំពុងតែរីកចំរើនក្នុងលក្ខណៈ សម្បត្តិដើម្បីឲ្យយើង បានប្រែដូចជាព្រះវរបិតានៃយើងកាន់តែខ្លាំងឡើងថែមទៀត។
អេភេសូរ ៥:១
ដូច្នេះ ចូរត្រាប់តាមព្រះ ដូចជាកូនស្ងួនភ្ងា
ប្រយោជន៍ឲ្យអ្នករាល់គ្នាបានឥតសៅហ្មង ឥតកិច្ចកល ជាកូនព្រះ ដែលរកបន្ទោសមិនបាននៅក្នុងដំណមនុស្សវៀច ហើយខិលខូច ដែលអ្នករាល់គ្នាភ្លឺនៅកណ្តាលគេ ដូចជាតួពន្លឺនៅក្នុងលោក
ដើម្បីឆ្លុះបញ្ចាំងពីលក្ខណៈរបស់ព្រះជាម្ចាស់ យើងត្រូវតែទទួលប្រដៅ។ ព្រះបិតារបស់យើងជាអ្នកផ្តល់ឲ្យ។
ដ្បិតព្រះអម្ចាស់ទ្រង់ផ្ចាញ់ផ្ចាលចំពោះអស់អ្នកណាដែលទ្រង់ស្រឡាញ់ ហើយទ្រង់វាយប្រដៅដល់អស់ទាំងកូនដែលទ្រង់ទទួល» បើសិនជាអ្នករាល់គ្នាត្រូវសេចក្ដីផ្ចាញ់ផ្ចាល នោះគឺព្រះអង្គទ្រង់ប្រព្រឹត្តនឹងអ្នករាល់គ្នា ដូចជាកូនហើយ ដ្បិតតើមានកូនឯណាដែលឪពុកមិនវាយផ្ចាលនោះ
សុភាសិត ៣:១១-១២
កូនអើយ កុំឲ្យមើលងាយសេចក្ដីប្រៀនរបស់ព្រះយេហូវ៉ាឡើយ ក៏កុំឲ្យណាយចិត្តនឹងសេចក្ដីបន្ទោសរបស់ទ្រង់ដែរ ដ្បិតអ្នកណាដែលព្រះយេហូវ៉ាទ្រង់ស្រឡាញ់ នោះទ្រង់ក៏ស្តីប្រដៅផង គឺដូចជាឪពុកធ្វើចំពោះកូន ដែលជាទីគាប់ចិត្តដល់ខ្លួនដែរ។
ដូចជាឪពុកល្អដែរ ព្រះជាម្ចាស់ចង់ឲ្យបុត្ររបស់ព្រះអង្គមានលក្ខណៈល្អកាន់តែប្រសើរឡើង។ ហេតុដូច្នេះ ទ្រង់ប្រដៅដល់អស់អ្នកដែលព្រះអង្គស្រឡាញ់។
៤) គ្រួសារថ្មី
ក្នុងនាមជាកូនចិញ្ចឹមរបស់ព្រះជាម្ចាស់ យើងមានគ្រួសារថ្មីមួយ។ គ្រួសារនេះមានបងប្អូនប្រុសស្រីរាប់លាននាក់នៅក្នុងព្រះគ្រីស្ទមកពីជុំវិញពិភពលោក។
ម៉ាថាយ ១២:៤៦-៥០
កាលទ្រង់កំពុងតែមានបន្ទូលនឹងហ្វូងមនុស្សនៅឡើយ នោះមាតា នឹងពួកប្អូនទ្រង់ក៏ឈរពីខាងក្រៅរកទូលនឹងទ្រង់ មានម្នាក់ទូលទ្រង់ថា មើលន៏ ម្តាយ នឹងប្អូនលោក ឈរនៅខាងក្រៅចង់និយាយនឹងលោក តែទ្រង់ឆ្លើយទៅអ្នកដែលទូលនឹងទ្រង់ថា តើអ្នកណាជាម្តាយហើយជាប្អូនខ្ញុំ រួចទ្រង់លាតព្រះហស្ត ចង្អុលទៅពួកសិស្ស ដោយបន្ទូលថា នុ៎ះន៏ ម្តាយ ហើយនឹងប្អូនខ្ញុំ ដ្បិតអ្នកណា ដែលធ្វើតាមព្រះហឫទ័យនៃព្រះវរបិតាខ្ញុំ ដែលគង់នៅស្ថានសួគ៌ គឺអ្នកនោះហើយ ជាប្អូនប្រុសស្រី ហើយជាម្តាយខ្ញុំវិញ។
ដោយសង្ខេប ជាលទ្ធផលនៃការក្លាយជាកូនចិញ្ចឹមរបស់ព្រះជាម្ចាស់ អ្នកមានព្រះបិតាថ្មី មរតក គ្រួសារថ្មី លំនៅដ្ឋានថ្មី សញ្ជាតិថ្មី ហើយឥឡូវនេះមានលក្ខណៈថ្មីដែលកំពុងលូតលាស់។ អ្នកគឺជាមនុស្សថ្មីទាំងស្រុង!
ចាក់ភ្លេង
ការយកធ្វើជាកូនចិញ្ចឹម៖ កិច្ចការរបស់ព្រះជាម្ចាស់
ចូរយើងបញ្ចប់មេរៀនរបស់យើង តាមរយៈការសិក្សាពីរបៀប ដែលការសុំកូនចិញ្ចឹមរបស់យើងត្រូវបាន សម្រេច។ ព្រះវរបិតា ព្រះរាជបុត្រា និងព្រះវិញ្ញាណបរិសុទ្ធមានតួរនាទីសំខាន់រៀងៗខ្លួននៅក្នុងការយក យើងធ្វើជាកូនចិញ្ចឹម។
តួរនាទីជាព្រះបិតារបស់ព្រះជាម្ចាស់សម្រាប់ការយកយើងធ្វើជាកូនចិញ្ចឹម
អេភេសូរ ១:៣-៦
សូមសរសើរដល់ព្រះដ៏ជាព្រះវរបិតានៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា ដែលទ្រង់បានប្រទានពរមកយើងក្នុងព្រះគ្រីស្ទ ដោយគ្រប់ទាំងព្រះពរខាងព្រលឹងវិញ្ញាណ នៅស្ថានដ៏ខ្ពស់ តាមដែលទ្រង់បានរើសយើងរាល់គ្នាក្នុងព្រះគ្រីស្ទ តាំងពីមុនកំណើតលោកីយមក ប្រយោជន៍ឲ្យយើងរាល់គ្នាបានបរិសុទ្ធ ហើយឥតកន្លែងបន្ទោសបាននៅចំពោះទ្រង់ ដោយសេចក្ដីស្រឡាញ់ ពីព្រោះទ្រង់បានដំរូវយើងរាល់គ្នាទុកជាមុន សំរាប់ឲ្យទ្រង់បានទទួលយើងជាកូនចិញ្ចឹម ដោយសារព្រះយេស៊ូវគ្រីស្ទ តាមបំណងព្រះហឫទ័យទ្រង់ ដើម្បីនឹងសរសើរដល់ព្រះគុណដ៏ឧត្តមរបស់ទ្រង់ ដែលបានផ្តល់មកយើងរាល់គ្នាទទេ ក្នុងព្រះរាជបុត្រាស្ងួនភ្ងារបស់ទ្រង់
នៅក្នុងអត្ថបទនេះប្រាប់យើងពីសេចក្តីពិតដ៏អស្ចារ្យបីយ៉ាងអំពីការទទួលយកយើងធ្វើជាកូនចិញ្ចឹម។
ទីមួយ ការទទួលយកធ្វើជាកូនចិញ្ចឹមរបស់យើងគឺ “តាមបំណងព្រះហឫទ័យទ្រង់”។ ពាក្យជាភាសាក្រិក បកប្រែពាក្យ “គោលបំណង” នៅក្នុងខ៥ ថាជា εὐδοκίαν មានន័យថា “ភាពរីករាយដ៏ល្អ”។ វាគឺជាភាពរីករាយដ៏ល្អរបស់ព្រះជាម្ចាស់ក្នុងការទទួលយកយើងធ្វើជាកូនចិញ្ចឹម។
ការយកធ្វើជាកូនចិញ្ចឹមគឺជាព្រះហឫទ័យ និងជាកិច្ចការរបស់ព្រះបិតា។ ភាពជាកូនចិញ្ចឹមរបស់អ្នកមិនមែនដោយសារតែអ្វីដែលអ្នកបានធ្វើ ឬការសម្រេចចិត្តរបស់អ្នកនោះទេ ជំនួសមកវិញព្រះជាម្ចាស់បានសម្រេចព្រះទ័យក្នុងភាពអស់កល្បជានិច្ច។ សូមកត់សម្គាល់ថា “ទ្រង់បានដំរូវយើងរាល់គ្នាទុកជាមុន សំរាប់ឲ្យទ្រង់បានទទួលយើងជាកូនចិញ្ចឹម”។ “បានដំរូវយើងរាល់គ្នាទុកជាមុន” មានន័យថាព្រះជាម្ចាស់បានសម្រេចព្រះទ័យ និងបង្កើតការនេះជាមុន។ តើទ្រង់បានធ្វើរឿងនេះតាំងពីពេលណាមក? ទ្រង់បានជ្រើសរើសយើង “តាំងពីមុនកំណើតលោកីយមក”។ ភាពជាកូនចិញ្ចឹមរបស់អ្នកចូលទៅក្នុងគ្រួសាររបស់ព្រះជាម្ចាស់មានការគ្រោងទុកជាមុន មុនពេលពិភពលោកនេះត្រូវបានបង្កើតឡើងទៅទៀត ហើយវាស្ថិតនៅជារៀងរហូត។
ទីពីរ ការយកយើងធ្វើជាកូនចិញ្ចឹមគឺដោយសារសេចក្តីស្រឡាញ់របស់ព្រះបិតា។ សូមកត់សម្គាល់ថា “ដោយសេចក្ដីស្រឡាញ់ ពីព្រោះទ្រង់បានដំរូវយើងរាល់គ្នាទុកជាមុន សំរាប់ឲ្យទ្រង់បានទទួលយើងជា កូនចិញ្ចឹម ដោយសារព្រះយេស៊ូវគ្រីស្ទ”។ ការនេះរំលឹកយើងពីអ្វីដែលសាវ័កយ៉ូហានបានសរសេរ៖
១ យ៉ូហាន ៣:១ក
មើល សេចក្ដីស្រឡាញ់យ៉ាងណាហ្ន៍ ដែលព្រះវរបិតាបានផ្តល់មកយើងរាល់គ្នា ឲ្យយើងបានហៅថាជាកូនរបស់ព្រះដូច្នេះ
ចូរគិតអំពីសេចក្តីស្រឡាញ់ដ៏អស្ចារ្យដែលបាននាំយើងចូលមកក្នុងគ្រួសារបស់ព្រះជាម្ចាស់! ព្រះជាម្ចាស់អាចប្រោសលោះយើងដោយមិនចាំបាច់ធ្វើឲ្យយើងក្លាយទៅជាកូនរបស់ទ្រង់ឡើយ។ ប៉ុន្តែ សេចក្ដីស្រឡាញ់យ៉ាងណាហ្ន៍ ដែលព្រះជាម្ចាស់មានសម្រាប់យើងត្រូវបានបង្ហាញចេញមកដោយថា ទ្រង់បាននាំយកយើងចូលមកក្នុងគ្រួសាររបស់ព្រះអង្គជាកូនៗដ៏ជាទីស្រឡាញ់របស់ទ្រង់។
ទីបី ការយកយើងធ្វើជាកូនចិញ្ចឹមគឺ “ដើម្បីនឹងសរសើរដល់ព្រះគុណដ៏ឧត្តមរបស់ទ្រង់”។ លទ្ធផលនៃការយកធ្វើជាកូនចិញ្ចឹមរបស់អ្នកគឺថាសិរីល្អនៃព្រះគុណរបស់ព្រះជាម្ចាស់ត្រូវបានសរសើរ។ ព្រះជាម្ចាស់មិនត្រូវការទទួលយកកូនចិញ្ចឹមនោះទេ។ ទ្រង់មានព្រះបុត្រាដែលស្តាប់បង្គាប់ដ៏ល្អឥតខ្ចោះ បំផុតរបស់ទ្រង់រួចហើយ! ប៉ុន្តែទ្រង់បានជ្រើសរើស កំណត់ទុកជាមុន ប្រោសលោះ និងយកទាសករដែលបះបោរមកធ្វើជាកូនចិញ្ចឹមដើម្បីឲ្យក្លាយទៅជាកូនដ៏ជាទីស្រឡាញ់របស់ព្រះអង្គ។ នេះគឺជាការបង្ហាញដ៏គួរឲ្យកត់សម្គាល់អំពីព្រះគុណរបស់ព្រះជាម្ចាស់ដែលគួរតែបណ្តាលឲ្យយើងសរសើរតម្កើងដល់ទ្រង់។
តួរនាទីរបស់ព្រះយេស៊ូវនៅក្នុងការយកយើងធ្វើជាកូនចិញ្ចឹម
បន្ទាប់ពីព្រះបិតាបានសម្រេចចិត្តយកយើងធ្វើជាកូនចិញ្ចឹម ព្រះយេស៊ូវបានសម្រេចកិច្ចការនេះហើយ។ អត្ថបទនៅក្នុងគម្ពីរអេភេសូប្រាប់យើងថាការយកយើងធ្វើជាកូនចិញ្ចឹមគឺ “ដោយសារព្រះយេស៊ូវគ្រីស្ទ”។ មនុស្សទាំងអស់គឺជាការបង្កើតរបស់ព្រះជាម្ចាស់ ប៉ុន្តែយើងក្លាយជាបុត្ររបស់ព្រះជាម្ចាស់បានតែតាមរយៈ ការយកធ្វើជាកូនចិញ្ចឹមតែប៉ុណ្ណោះ ហើយការយកធ្វើជាកូនចិញ្ចឹមគឺមានតែតាមរយៈព្រះយេស៊ូវគ្រីស្ទតែ ប៉ុណ្ណោះ។
យ៉ូហាន ១:១២-១៣
ប៉ុន្តែអស់អ្នកណាដែលទទួលទ្រង់ (ព្រះយេស៊ូវ) គឺអស់អ្នកដែលជឿដល់ព្រះនាមទ្រង់ នោះទ្រង់បានប្រទានអំណាចឲ្យបានត្រឡប់ជាកូនព្រះ គឺជាកូន ដែលមិនមែនកើតមកពីឈាម ឬតាមប្រាថ្នាខាងរូបសាច់ ឬតាមចំណង់នៃមនុស្សឡើយ គឺកើតមកអំពីព្រះវិញ។
កាឡាទី ៣:២៦
ដ្បិតអ្នករាល់គ្នាសុទ្ធតែជាកូនព្រះ ដោយសារសេចក្ដីជំនឿជឿដល់ព្រះគ្រីស្ទយេស៊ូវ
ខគម្ពីរទាំងនេះប្រាប់យើងពីរបៀបដែលយើងក្លាយជាកូនរបស់ព្រះជាម្ចាស់។ គឺតាមរយៈសេចក្តីជំនឿ នៅក្នុងព្រះយេស៊ូវ តាមរយៈការទទួលទ្រង់ តាមរយៈការជឿដល់ព្រះនាមទ្រង់។ នៅក្នុងសម័យនោះ ឈ្មោះរបស់មនុស្សម្នាក់បង្ហាញពីការពិតអំពីលក្ខណៈ និងអត្តសញ្ញាណរបស់គាត់។ ហេតុដូច្នេះ ដើម្បី “ជឿលើព្រះនាមទ្រង់” គឺត្រូវទទួលយកអ្វីៗគ្រប់យ៉ាងដែលព្រះយេស៊ូវមានព្រះបន្ទូលអំពីអង្គទ្រង់។ មានតែព្រះយេស៊ូវតែប៉ុណ្ណោះដែលផ្តល់សិទ្ធិ (ἐξουσίαν) ឲ្យក្លាយជាកូនរបស់ព្រះជាម្ចាស់បាន។
ព្រះរាជបុត្រាផ្តល់ឲ្យយើងនូវស្ថានភាពជាកូនប្រុស
មានតែព្រះយេស៊ូវទេ ដែលទ្រង់មានភាពសក្តិសមយ៉ាងពិសេស ដែលទ្រង់អាចសម្រេច ការយកយើងមកធ្វើជាកូនចិញ្ចឹម។ ទ្រង់គឺជាព្រះរាជបុត្រានៃព្រះ ហើយមានតែទ្រង់ទេ ដែលអាចប្រទានឲ្យ ឋានៈ និង សិទ្ធិ ជាកូនប្រុសរបស់ទ្រង់មកកាន់យើង។ ព្រះយេស៊ូវជាព្រះរាជបុត្រានៃព្រះបានក្លាយជាមនុស្ស ដើម្បីឲ្យមនុស្សអាចក្លាយជាកូនប្រុសរបស់ព្រះបាន។ ព្រះអង្គបានជ្រើសរើសចែករំលែកមរតករបស់ទ្រង់ជាមួយយើង។
កាឡាទី ៤:៤-៥
តែលុះវេលាកំណត់បានមកដល់ នោះព្រះទ្រង់បានចាត់ព្រះរាជបុត្រាទ្រង់ឲ្យមកចាប់កំណើតនឹងស្ត្រី គឺកើតក្រោមអំណាចនៃក្រិត្យវិន័យ ដើម្បីនឹងលោះពួកអ្នកដែលនៅក្រោមក្រិត្យវិន័យ ប្រយោជន៍ឲ្យយើងបានទទួលសគុណ ទុកជាកូនចិញ្ចឹម
តួរនាទីរបស់ព្រះវិញ្ញាណបរិសុទ្ធនៅក្នុងការយកយើងធ្វើជាកូនចិញ្ចឹម
ព្រះជាម្ចាស់បានបញ្ជូនព្រះរាជបុត្រារបស់ព្រះអង្គមកក្នុងលោកីយ៍នេះដើម្បីឲ្យយើងក្លាយជាបុត្ររបស់ទ្រង់។ ឥឡូវនេះ ព្រះជាម្ចាស់បញ្ជូនព្រះវិញ្ញាណបរិសុទ្ធមកគង់នៅក្នុងចិត្តយើងដើម្បីឲ្យយើងមាននូវ បទពិសោធន៍ នៃកូនរបស់ទ្រង់ (នោះគឺដើម្បីឲ្យយើងស្គាល់ព្រះជាម្ចាស់ជាព្រះបិតារបស់យើង)។
កាឡាទី ៤:៦-៧
ហើយដោយព្រោះអ្នករាល់គ្នាជាកូន បានជាព្រះទ្រង់ចាត់ព្រះវិញ្ញាណនៃព្រះរាជបុត្រាទ្រង់ ឲ្យមកក្នុងចិត្តអ្នករាល់គ្នា ឲ្យបន្លឺឡើងថា អ័ប្បា ព្រះវរបិតាអើយ ដូច្នេះ អ្នករាល់គ្នាមិនមែនជាបាវបំរើទៀតទេ គឺជាកូនវិញ ហើយបើជាកូននោះនឹងបានមរដកនៃព្រះ ដោយសារព្រះគ្រីស្ទដែរ
ព្រះវិញ្ញាណផ្តល់បទពិសោធន៍នៃភាពជាកូនប្រុសដល់យើង
ព្រះវិញ្ញាណបរិសុទ្ធនៅក្នុងចិត្តយើង បណ្តាលឲ្យយើង អាចស្រែកឡើងថា “អ័ប្បា”។ អ័ប្បាគឺជាពាក្យភាសាអារ៉ាប់ ដែលកូនៗប្រើ សម្រាប់ហៅទៅកាន់ឪពុករបស់ខ្លួន (រ៉ូម ៨:១៥)។ ពាក្យនេះបកប្រែថា “ស្រែកឡើង” (κράζω) មានន័យថា គឺជា ការស្រែកចង់បាន បន្ទាន់ ជាមួយនឹងអារម្មណ៍យ៉ាងជ្រាលជ្រៅ។ នៅគម្ពីរដំណឹង ល្អ បានកត់ត្រា ពាក្យនេះតែម្តងគត់គឺនៅពេលព្រះយេស៊ូវបានហៅព្រះថា “អ័ប្បា” នៅក្នុងម៉ាកុស ១៤:៣៦ នៅក្នុង សួនគែតសេម៉ានី។ នេះគឺជាការត្រឹមត្រូវ សម្រាប់ឲ្យព្រះយេស៊ូវក្នុងការប្រើប្រាស់ពាក្យនេះ ក្នុងពេលវេលាដែលទ្រង់ត្រូវការកំលាំងបន្ទាន់យ៉ាងខ្លាំងមកពីព្រះ។ ឥឡូវ ព្រះវិញ្ញាណបរិសុទ្ធក៏បានដាក់ ពាក្យដូចគ្នាមកលើកូនចិញ្ចឹមរបស់ព្រះ។ ព្រះវិញ្ញាណបរិសុទ្ធនៅក្នុង ចិត្តរបស់យើង ប្រទានឲ្យយើងមានបំណងចិត្តយ៉ាងខ្លាំងក្លាចង់បានព្រះអង្គ ដែលទ្រង់ជាព្រះវរបិតា របស់យើង។
រ៉ូម ៨:១៤-១៧
ហើយអស់អ្នកណាដែលព្រះវិញ្ញាណនៃព្រះទ្រង់នាំ អ្នកទាំងនោះហើយជាពួកកូនរបស់ព្រះ អ្នករាល់គ្នាមិនបានទទួលនិស្ស័យជាបាវបំរើ ឲ្យត្រូវភ័យខ្លាចទៀតឡើយ គឺបានទទួលនិស្ស័យជាកូនចិញ្ចឹមវិញ ដោយហេតុនោះបានជាយើងស្រែកឡើងថា ឱអ័ប្បា ព្រះវរបិតាអើយ ហើយព្រះវិញ្ញាណទ្រង់ក៏ធ្វើបន្ទាល់នឹងវិញ្ញាណយើងថា យើងជាកូនរបស់ព្រះ បើសិនណាជាកូនព្រះហើយ នោះយើងក៏បានគ្រងមរដកដែរ គឺជាអ្នកគ្រងមរដកនៃព្រះជាមួយនឹងព្រះគ្រីស្ទផង ឲ្យតែយើងទទួលរងទុក្ខជាមួយនឹងទ្រង់ចុះ ដើម្បីឲ្យបានដំកើងឡើងជាមួយនឹងទ្រង់ដែរ។
ខណៈពេលដែលមនុស្សម្នាក់ទទួលបានបទពិសោធន៍ពីព្រះវិញ្ញាណបរិសុទ្ធដឹកនាំគាត់ (នោះគឺ បង្រៀនគាត់ពីសេចក្តីពិតខាងឯវិញ្ញាណតាមរយៈព្រះបន្ទូលរបស់ព្រះជាម្ចាស់ ញែកគាត់ជាបរិសុទ្ធ និងបង្កើតផលផ្លែខាងវិញ្ញាណនៅក្នុងជីវិតរបស់គាត់) គាត់មានទំនុកចិត្តថាមានការពិតគួរឲ្យកត់សម្គាល់បានកើតឡើង។ គាត់បានក្លាយទៅជាបុត្ររបស់ព្រះជាម្ចាស់ ហើយគាត់ដឹង និងស្រឡាញ់ព្រះជាម្ចាស់ជាព្រះបិតារបស់គាត់! ការទទួលយកធ្ចើជាកូនចិញ្ចឹមនេះគឺជាបំណងព្រះហឫទ័យរបស់ព្រះបិតា ដោយសម្រេចបានតាមរយៈព្រះរាជបុត្រា ហើយអនុវត្តនៅក្នុងជីវិតរបស់គាត់តាមរយៈព្រះវិញ្ញាណបរិសុទ្ធ។
សេចក្តីសង្ខេប៖ ការទទួលយកជាកូនចិញ្ចឹមគឺជាព្រះពរខាងវិញ្ញាណមកពីព្រះជាម្ចាស់ដែលទ្រង់បានដាក់មនុស្សចូលទៅក្នុងគ្រួសារធ្វើជាបុត្ររបស់ព្រះអង្គ។ ពួកគេមានទំនាក់ទំនងជាមួយព្រះជាម្ចាស់ជាព្រះបិតរារបស់ពួកគេ ទទួលមរតកនៃជីវិតដ៏អស់កល្បនៅក្នុងនគរព្រះ និងអត្តសញ្ញាណថ្មីជាបុត្ររបស់ព្រះជាម្ចាស់។
ចូរចំណាយពេលខ្លះដើម្បីអធិស្ឋានអរព្រះគុណព្រះជាម្ចាស់ឥឡូវនេះសម្រាប់ព្រះពរនៃការយកធ្វើជាកូនចិញ្ចឹមរបស់ទ្រង់។
អធិស្ឋានបិទ
